Malāngululo gha kwifumisya nsika no kughemwa
(Matajhu 18:6-7, 21-22; Maaliko 9:42)
17
Jheesu ghabhalomba bhahemba bhaajhe ghaabhala, “Kughemwa kukosūla bhantu kukola bhubhi, kuneesa ifuku lyolyonse. Tukubha, koghaabha muntu ghwakukabha nalikusūla kooko kughemwa! 2 Jhinabhe sumbwa ghoogho muntu kuhambilwa ibhwe lya kusyela mwi ikōsi, ghataghilwa mu tanganika, hali kumusūlila ghumwi mu bhaabho bhatoolia ajhīle bhubhi! 3 Nonwe, mubhe mubhengile!Ghwamughana ghoobhe ghakubhiihya, mukabhe, ghaghalaghala mufumisye nsika. 4 Singa ghakubhiihya myelelo ndwi kwi ifuku limwi, no kuheleela kumoobhe myelelo ndwi nalikubhala, ‘Nangalaghala,’ ughwe mufumisye nsika!”
Managha gha kwisigha
5 Kundi mintengwe bhaajhe bhamulomba Sibho Bhusya bhabhala, “Tughungilisye managha gha kwisigha!” 6 Sibho Bhusya ghabhahindula ghaabhala, “Kubha munabhe no kwisigha kutooli singa kobhe mbuto ntooli nkana,b munakobhole kusilomba siti sya likuuku seesi kubhala, ‘Mooleka ukebhyale mu tanganika!’ naagho sinamihulike.
Mukola milīmo akole milīmo jhyabhaliilwe kukola
7 Tubhale ghumwi mu umwe ali na musya ghwakukabha nalikulīma, ajhe kukema ntaama. Ni ghanyi alakumubhalila musya ghaafuma ku milīmo, kubhala, ‘Jhisa bhwangu ujhīkale ulye fyakulya’? 8 Te teetyo hi! Alobhala, ‘Njōojhisye fyakulya, kabhili kenyela uhindaghane mpaka nanhwa kulya no kunywa. Kubha nanhwa, kundi noghwe ghwalya no kunywa.’ 9 Teeti! Alomusīima musya, bhukohela bhoghajhīla bhuli bhwabhele ghamulaghiila? Te teetyo hi! 10 Ghobhuli bhofili no kumwenyu, kubha mwahwa kukola ghonse Kabhumba bho amilaghisile bhale, ‘Ufwe tuli bhasya bhuhela, tetunajha mpunda, twakola bhuhela bhuli bhotubhalilwe kukola.’”
Jheesu alikusisya bhalwele ikumi bha mpōngo
11 Jheesu mukubha najhiile ku Jhelusalemu, akabheele nalikuhita nsīla jhyakukabha jhihitile hakati na sihugho sya Samaliac ne sya Ghalilaajha. 12 Mukubha nalikujhingila mu lugho lumwi bhoobhu, ghasangaana na bhantu ikumi bhakanya mpōngo. Bhalya bhantu, bhajhughalala hale naajhe, 13 bhamutangiila bhabhala, “Ee Jheesu Sifwe Bhusya, tufwile sighōngo!” 14 Jheesu mukubha ghabhalōla, ghabhalomba ghaabhala, “Kajhe mukelānsye ku bhapeesi.” Bhobhakabheele mu nsīla bhajhiile, bhafulwa bhunajhisi bhwabho bhwa mpōngo.
15 Ghumwi mu bhaabho, bhoghakalōlanga ti ghasila, ghaheleela kwa Jheesu, kooku nalikumulumba nkana Kabhumba ku silongo sikulu. 16 Bhoghakafīkanga, ghaghwa bhubhundama ha mbele mu maghūlu gheke Jheesu nalikumusīima. Ghoogho muntu, akabheele Musamalia. 17 Jheesu ghabhasya ghaabhala, “Tebhafulitwe bhonse ikumi? Bhandi kyenda bhali ihe? 18 Hatuhu ghaheleela mu kumulumba Kabhumba, kubhula kulahila munyēnyi ghooghu ghwa sindi sihugho?” 19 Kundi Jheesu ghamulomba ghaabhala, “Jhughalala, kajhe, kwisigha koobhe kwakusisya!”
Kwisa kwa Bhwami bhweke Kabhumba
(Matajhu 24:23-28, 37-41)
20 Ifuku limwi, Bhafalisaajho bhamubhasya Jheesu bhabhala, “Bhwami bhweke Kabhumba bhulokesa ifuku si?” Jheesu ghabhahindula ghaabhala, “Bhwami bhweke Kabhumba tebhwajhise ku kulōleka ku menso. 21 Bhantu tebhalokabhala, ‘Kūnga! Bhuli haaha!’ ajhe, ‘Bhuli halya!’ Hulikisye, Bhwami bhweke Kabhumba bhuli mu myēgho jhyenyu.”d
22 Kundi Jheesu ghabhalomba bhahemba bhaajhe ghaabhala, “Silokeesa nfuku syakukabha mulokekumbulisya kulōla singa ifuku limwi mu mafuku gha Mwana ghwa Muntu,e tukubha temwakalilōle. 23 Bhantu bhalomilomba bhalikubhala, ‘Kūnga! Ali halya!’ ajhe, ‘Kūnga! Ali haaha!’ Musibhuuki kubhalōnda. 24 Jhīkale mujhinsi kubhala, Mwana ghwa Muntu bhwalokaheleela, alokabha kobhe mibheebhe jhya nkubha bhuli bhojhikobhebha mwi ighūlu, kufuma ku bhusumbulilo mpaka ku bhuhela. 25 Tukubha, mukubha ghaagho ghasyali kulōleka, Mwana ghwa Muntu alobhunusibhwa ku mengi, na bhantu bha nfuuke jheejhi bhalomubhuuluka.
26 Kobhe bhofyakabhanga nfuku syeke Nuhu, ghobhuli bhofilokabha nfuku sya kuheleela Mwana ghwa Muntu. 27 Nfuku syeke Nuhu, bhantu bhakabheele bhalikulya bhananywa, bhatoola bhanatoolwa, mpaka ifuku lilya lyoghakabhanga Nuhu ghajhingila mu meeli nkulu. Haaho, nfula nkulu jhyakaghwanga, mansi ghabhumbika honse ghajhihagha bhantu bhonse.
28 Kabhili nfuku syeke Loti, fikabheele teetyoe. Bhantu bhakabheele bhalikulya bhananywa, bhalikughūla bhanaghūsya, bhalikubhyala bhanaghubhaka. 29 Tukubha, ifuku lilya lyoghakafumanga Loti ku Sodoma, mulīlo mukali na mabhwe ghalikughaka kufuma mwi ighūlu ghwakasookanga kobhe nfula, ghwabhahiisya bhantu bhonse. 30 Ghobhuli bhofilokabha ifuku lilya, Mwana ghwa Muntu bhwalokabha nalikulōleka halafu no kumānyika.
31 Ifuku leelyo, muntu ^alobha nali ku lughamba ne nyumba, nasisooki atwale fintu fyajhe fili mukati mu nyumba. Na alobha nali mwi ibhāla, nasiheleeli mu kutwala syosyonse. 32 Jhisukile bhuli bhofyakabhanga kwa mukasi ghweke Loti.f 33 Muntu ghoghonse ghwakubha nalikuhensa kukōnka bhupanga bhwajhe, ghoogho alobhutaagha. Tukubha muntu ghoghonse ^alobha ghabhutaagha, ghoogho alobhukōnka.
34 Ndikumilomba kubhala, bhufuku bhwa leelyo ifuku bhantu bhabhili bhalobha bhaleele bhulīli bhumwi, ghumwi alotwalwa, ghundi alolēkwa. 35 Ifuku leelyo, bhanabhakeema bhabhili bhalobha bhalikusya hamwi, ghumwi alotwalwa, ghundi alolēkwa.”g
37 Bhahemba bhaajhe bhamubhasya bhabhala, “Sifwe Bhusya, ghaagho ghalokakoleka ihe?” Ghabhahindula ghaabhala, “Ho ghuli mulāmbo, hoghakokomenkana makalimba.”