Lughēlo lwa munyampala kanya masāla
16
Jheesu ghabhalomba bhahemba bhaajhe ghaabhala, “Hakabheele mutunsi ghumwi, ^akabheele no munyampala ghwa kujhughalalila nsābho jhyajhe. Ghulya mutunsi ghalombwa kubhala munyampala ajhughalaliile nsābho jhyajhe, alikujhisambaasya sambaasya. 2 Kundi mutunsi ghamwita ghulya munyampala, ghamulomba ghaabhala, ‘Ni bhuti ghaagha ghondikuhulika ghalikutendwa ku mulīmo ghoobhe? Lānsya fyoghwakakola ne fyoghwakakosya nsābho jhyane, bhukohela tunajhughalalila kabhili kubha munyampala!’3 Munyampala ghulya ghalibhasya, ‘Taata bhusya, alikunfumya mu milīmo, nonwe nankukola si? Kulīma, nsili na managha. Kabhili kujha nansona, mbwene nsonyi. 4 Nonwe! Namānya bhondakwīla, akulinga bhwalobha ghanfumya mu milīmo jheejhi bhantu bhansangaanile mu ngo sya kumwabho.’
5 Kundi ghulya munyampala, ghabhajhita bhonse ^bhakabheele bhalikujhimukilwa no sye bhusya. Ghamubhasya ghwa kusumbula ghaabhala, ‘Ulikujhimukilwa finga no taata bhusya?’ 6 Ghamuhindula ghaabhala, ‘Ndikujhimukilwa gheleni maghāna munane sya mafuta gha miselituni.’a Ghulya munyampala ghamulomba ghaabhala, ‘Twala lupapulo lwa fintu fyolikujhimukilwa, jhīkala bhwangu, nyegha maghāna ane.’ 7 Kundi ghamubhasya ghwa bhubhili ghaabhala, ‘Ughwe ulikujhimukilwa finga?’ Ghamuhindula ghaabhala, ‘Mifuko ighāna jhya ngano.’ Munyampala ghulya ghaabhala, ‘Twala lupapulo lwa fintu fyolikujhimukilwa, nyegha makumi munane.’
8 Ghulya mutunsi ghamusīima ghulya munyampala kanya kujhughalalila fibhi nsābho, bhuli bhoghakola ku bhukosaghuke. Bhukohela, bhantu bhasimwisighile Kabhumba, bhakokola milīmo jhyabho jhya ha bhweleelo ku masāla kusumba bhamwisighile Kabhumba. 9 Nonwe une ndikumilomba kubhala, bhe na bhanywanyi ku fintu fyenyu fya hanu ha bhweleelo, akulinga kubha fyahwa kuhita, musangaanilwe ku meekasi gha bhusila ha bhuhela.
10 Muntu ghoghonse ghwakukabha najheghamiilwe ku fintu fitooli, ghoogho alojheghamilwa no ku fintu fikulu. Teeti ghobhuli muntu ghoghonse ghwakukabha nasijheghamiilwe ku fintu fitooli, ghoogho teghajheghemilwe no ku fintu fikulu. 11 Nonwe, kubha musijheghamiilwe ku fintu fya hanu ha bhweleelo, ni ghanyi alomujheghamila ku fintu fya bhwene ha mbele jhyeke Kabhumba? 12 Kabhili kubha musijheghamiilwe ku fintu fya ghundi, ni ghanyi alomuheekesya fintu fyenyu mwebheene? 13 Hatuhu mukola milīmo akobhwele kubhakolela milīmo bha sye bhusya bhabhili. Ajhe alomughājha ghumwi ghamutēha ghundi, ajhe alomujhimbika ghumwi ghamuhambaasya ghundi. Temunakobhola kumujhyukila Kabhumba hamwi no kujhyukila nsābho!”
14 Bhafalisaajho bhobhakabhanga bhahulika maghāmbo ghaagho ghonse, bhasumbula kumusyenteka, bhukohela bhakabheele bhatēhile nkana mahela. 15 Jheesu ghabhalomba ghaabhala, “Umwe, mukolitiipa bhaghololoke myēgho mu menso gha bhantu. Tukubha Kabhumba ajhinsi ghali mu myēgho jhyenyu. Bhukohela ghalya ghajhimbikwe nkana na bhantu, Kabhumba aghaghājhile!
Ghandi malāngululo gheke Jheesu
(Matajhu 11:12-13; 5:31-32; Maaliko 10:11-12)
16 Fitaabhu fya Kabhāngo keke Musa ne fya bhaghwelaghu, fyakatangaasibhwanga mpaka liima lyeke Jhohana Mubhatisi. Kusumbulila liima leelyo, Sikūla Sisogha sya Bhwami bhweke Kabhumba silikutangaasibhwa, bhonse bhalikwijhanda kujhingila.b 17 Tukubha, bhukaka bhwa kufumya kaghāmbo katooli nkana ka Kabhāngo, bhusunfile bhukaka bhwa ighūlu ne libhweleelo kuhita.
18 Muntu ghoghonse ghwakukabha ghamulēka mukasi ghatoola ghundi, alikufuma kunse. No ghwakukabha ghatoola mwanamukeema ghakalēkwa ne ibha, alikufuma kunse.”
Mutunsi no mupīina Lasaalo
19 Jheesu ghajhililika ghaabhala, “Hakabheele mutunsi ghumwi, ^akabheele ghafwala myenda misogha jhya mahela mengi. Nfuku syonse akabheele teghalya fyakulya fya situnsi. 20 Hakabheele mupīina ghumwi, ^akabheele najhitilwe Lasaalo, akabheele nabhiikilwe ha mbalimbali na musīgho ghwa ghulya mutunsi. Lasaalo akabheele na filōnda mutūmba ghonse, 21 na makabhwa ghakabheele keteghalamba filōnda fyajhe. Akabheele keteghahensa kulya mbulukutu sikabheele silikuhona kufuma ha siliilo sya ghulya mutunsi.
22 Kafumilo ka haaho, mupīina Lasaalo ghasumaalika. Misambwa bheke Kabhumba bhamutwala, bhamubhiika hamwi no Bhulahimu mwi ighūlu. Ghulya mutunsi, naagho ghasumaalika, bhamusiika. 23 Kookuli kusimu ghulya mutunsi mukubha nalikubhunuka nkana, ghabhuusya menso ghaajhe, ghamulōla Bhulahimu ku hale no Lasaalo nali kumwi naajhe. 24 Ghamutangiila ku silongo sikulu ghaabhala, ‘Ee taata Bhulahimu, nfwile sighōngo! Ndikusamba nkana ku mulīlo ghooghu! Mulaghile Lasaalo, atimpike kakumo mu mansi, akulinga atonyisye ku lulimi lwane luhole.’
25 Tukubha Bhulahimu ghamuhindula ghaabhala, ‘Mwanaane, jhisukila bhuli bhokabheele noli bhupanga ukabheele na fintu fyonse fisogha. Tukubha Lasaalo, akabheele na fintu fyonse fibhi. Nonwe, unyene alikujheebha hanu, noghwe ulikubhunuka. 26 Hamwi na ghaagho, hakati jhyetu umwe nofwe, hali liina ikulu nkana. Liina leelyo libhiikilwe akukabha, bha kunu ^bhalobha bhalikuhensa kwisa kumwenyu, bhapootwe kughambuka, bha kooko bhapootwe kwisa kumwetu.’
27 Ghulya mutunsi ghamulomba ghaabhala, ‘Nonwe taata, ndikukusēegha umulaghile Lasaalo ajhe ku lugho mu nyumba jhyeke taata. 28 Kooko ndi na bhamughana ghwane bhataanu. Ajhe akabhakabhe bhalēke bhubhi bhwabho, akulinga bhasijhisi kunu naagho mu kubhunuka.’ 29 Tukubha Bhulahimu ghamuhindula ghaabhala, ‘Bhamughana bhoobhe bhali na malāngululo gha Kabhāngo keke Musa na bhaghwelaghu, bhaghalōnde ghaagho!’