Lughēlo lwa ntaama ^jhikabheele jhyataajhika
(Matajhu 18:12-14)
15
Ifuku limwi, bhakanya kulīhiisya makomoa na bhakanya bhubhi kwa Kabhumba, bhonse bhakabheele bhajhiile kwa Jheesu, mu kumuhulikisya. 2 Kundi Bhafalisaajho na bhamakota bha Kabhāngo keke Musa bhasumbula kung'wing'a bhalikubhala, “Ghooghu muntu, alikubhasangaanila bhakanya bhubhi kobhe bhaabha! Kabhili alikulya nabho!”3 Kundi Jheesu ghabhalomba lughēlo loolu ghaabhala, 4 “Kubha ghumwi mu umwe nali na ntaama ighāna, jhimwi jhyataajhika, alojhīla bhuti? Alosilēka silya makumi kyenda na kyenda mwi isēnga, ghaajha mu kuhensela ^jhilobha jhyataajhika, mpaka ajhilōle. 5 No bhwalobha ghajhilōla, alojhitwala ku matugho ku nsekonseko. 6 Kubha ghafīka ha lugho alobhajhita bhanywanyi na bhafitinkanyi bhaajhe, ghabhalomba kubhala, ‘Sangabhale hamwi none, bhukohela ntaama jhyane ^jhikabheele jhyataajhika, nanjilōla!’ 7 Teetyo bhondikumilomba bhofilokabha, mulokabha nsekonseko singi mwi ighūlu, kanya bhubhi ghumwi kwa Kabhumba kubha ghaghalaghala bhubhi bhwajhe, kusumba bhantu makumi kyenda na kyenda bhaghololoke, bhasila ighala lya kughalaghala.”
Lughēlo lwa ihela ^likabheele lyataajhika
8 Jheesu ghabhalomba ghaabhala, “Mwanamukeema ghumwi ali na mahela ikumi, ne ihela limwib lyataajhika, alojhīla bhuti? Alokwamika kamūni, ghahyahila nyumba jhyonse, alohensa ku managha mpaka alilōle. 9 Kubha ghalilōla, alobhajhita bhanywanyi na bhafitinkanyi bhaajhe, ghabhalomba kubhala, ‘Sangabhale hamwi none, bhukohela ihela lyane ^likabheele lyataajhika, nandilōla!’ 10 Teeti bhondikumilomba, ghobhuli Kabhumba ne misambwa bhaajhe bhalokabha na nsekonseko, kubha kanya bhubhi singa ghumwi ghaghalaghala bhubhi bhwajhe.”
Mwana kanya kupumpuka
11 Jheesu ghatenda lughēlo lundi ghaabhala, “Akabheeleho muntu ghumwi, akabheele na bhaana bhaajhe bhaghoosi bhabhili. 12 Mwanaajhe mutooli, ghaajha kwa sye ghaabhala, ‘Ee taata, ndikusēegha umpekesye bhuhyana bhwane.’ Kundi usye ghabhaghabhulila bhonse bhuhyana bhwabho.
13 Mukubha syahita nfuku singana, ghulya mutooli ghakomenkanyia fintu fyajhe fyonse ghafighūsya, ghabhuuka na mahela ghwakabheele ghapāta, ghaajha ku sihugho sya hale. Bhoghakafīkanga kooko, ghasumbula kujhilya fibhi nsābho jhyajhe. 14 Mukubha ghahwa fyonse, nsāla nkulu jhyahona mu silya sihugho, kundi naagho ghajha kusamba. 15 Kundi, ghaajha kwa muntu ghumwi ghwa mu silya sihugho, ghasona mulīmo. Ghoogho muntu, ghamulaghiila mwi ibhāla mu kuliisya ngulubhec syajhe. 16 Ghulya mulughalugha akabheele nalikuhensa kulya manyala ghosikabheele silikulya ngulubhe. Tukubha, tehakabheele singa tu muntu ghumwi, ghwa kumuha ka kulya kokonse.
17 Kafumilo ka haaho ghalanganyia mu mwēgho ghwajhe ghaabhala, ‘Bhakola milīmo bhonse bheke taata, bhalikulya bhanapootwa, ku bhuti une nendikufwa haaha ne nsāla? 18 Nonwe nankubhuuka kuheleela kwa taata, inkamulombe kubhala, “Ee taata, namubhiihya Kabhumba, nankubhiihya noghwe. 19 Nsilinganeene no kubha mwanoobhe, mbiike imbe mu bhakola milīmo bhoobhe.”’
20 Kundi ghabhuuka ghaheleela kwa sye. Nasyali kule, usye ghamulōla, ghamulōlela sighōngo. Ghaajha lubhilo, ghamusangaanila, ghamujhambila. 21 Kundi ghulya mwanaajhe, ghamulomba sye ghaabhala, ‘Ee taata, namubhiihya Kabhumba, nankubhiihya noghwe. Nsilinganeene no kubha mwanoobhe.’
22 Tukubha usye ghabhalomba bhasya bhaajhe ghaabhala, ‘Lente bhwangu nkanjo nsogha nkana mumufwike. Mufwike na kateebha kwi ikumo, ne nkwābho ku maghūlu. 23 Twale ng'ombe jhilya nfililike jhya mubhāla,d musinse, tulye tusaahe mubhāla. 24 Bhukohela mwanaane ghooghu, akabheele kobhe ghakafwa, nonwe ghasyuka, akabheele ghakataajhika, nonwe ghalōleka!’ Kundi bhantu bhonse bhasumbula kusaaha mubhāla.
25 Ikunka leelyo, mwanaajhe mukulu akabheele mwi ibhāla. Mukubha nahelesile nali ha bhwihi no lugho, ghahulika bhantu bhalikujhimba no kukina. 26 Ghamwita musya ghumwi, ghamubhasya ghaabhala, ‘Kwabha si?’ 27 Ghamulomba ghaabhala, ‘Muto ghoobhe ghajhisa, no so ghamusinsila jhilya ng'ombe nfililike jhya mubhāla, bhukohela ghamulōla mwanaajhe kabhili, nasyali bhupanga.’ 28 Ghulya mwanaajhe mukulu ghaghājha, ghatuna kujhingila mu nyumba. Kundi usye ghaafuma hanse, ghajha kumulebhelesya ajhingile. 29 Tukubha unyene ghamuhindula usye ghaabhala, ‘Hulikisya! Myaka jhyonse jheejhi ndikukujhyukila milīmo ha lugho haaha, kabhili nsinanēle singa ifuku limwi kahambaasya ku gholikundaghiila! Tukubha une tunampekesye singa tu kabhusi, nandya, nansangabhala hamwi na bhanywanyi bhaane. 30 Tukubha bhoghajhisa mwanoobhe ghooghu, ^ghakalya fibhi nsābho jhyobhe hamwi na bhalaghanyia, ghwamusinsila ng'ombe nfililike jhya mubhāla!’