Jheesu alikumusisya mulwele mwi Ifuku lya Kutamuka
14
Ifuku limwi lya Kutamuka, Jheesu ghakajhanga mu kulya fyakulya mu nyumba kwa mukulu ghumwi ghwa Bhafalisaajho. Mukubha nali moomo, bhantu bhakabheele bhamukūngiile nkana bhalōle bhuli bhwalakwīla.2 Kansi ha mbele jhyeke Jheesu, hakabheele muntu ghumwi, ^akabheele no bhulwele bhwa kufimba mutūmba. 3 Kundi Jheesu ghabhabhasya Bhafalisaajho na bhamakota bha Kabhāngo keke Musa ghaabhala, “Teeti, Kabhāngo keetu katulonfile kusisya bhantu mwi Ifuku lya Kutamuka?” 4 Tukubha bheene bhahumbula nakele. Jheesu ghamunigha mulwele ghulya, ghamusisya, ghamulomba ajhe.
5 Kundi Jheesu ghabhabhasya ghaabhala, “Ni ghanyi mu umwe ghwakukabha, mwanaajhea ajhe ng'ombe jhyajhe jhyahonela mwi ilībha Ifuku lya Kutamuka, asinajhifumyamo haahoe?” 6 Bhalya bhantu, tebhakabha na lya kuhindula.
Malāngululo gha kulēsya kwikusya
7 Jheesu akabheele nalikukūnga bhanyēnyi ^bhakabheele bhakaatikwa hamwi naajhe leelyo ifuku, bhuli bhobhakabheele bhalikusāaghula makonko gha bhaghosibhakulu. Kundi ghabhalomba lughēlo, ghaabhala, 8 “Kubha muntu ghakukaatika ku bhwenga, lēka kwīkala ku makonko gha bhaghosibhakulu. Nosijhīli teetyo bhukohela, hamwi ghakaatikwa mughosimukulu ghundi kusumba ughwe. 9 Kubha ghajhisa ^alobha ghamikaatika umwe mwense, ghakulomba ghaabhala, ‘Mulēkele ghooghu leelyo ikonko.’ Haaho, ulolōla nsonyi nkana, mu kubhuuka kujha kwi ikonko lya lusakalusaka. 10 Kansi, kubha ghwakaatikwa, jhīkala kwi ikonko lya lusakalusaka, akulinga kubha ghajhisa akukatiike, akulombe kubhala, ‘Munywanyi ghwane, jhisa ujhīkale ha mbele haaha.’ Haaho ulobha ghwajhimbikwa ha mbele jhya bhakaatikwa bhonse. 11 Bhukohela, muntu ghoghonse ghwakukabha nalikwikusya, Kabhumba alomusoosya. No muntu ghwakukabha nalikwisoosya, Kabhumba alomutansya.”
12 Haaho, Jheesu ghamulomba ghoogho ghakamukatikanga ghaabhala, “Mukubha nolikubhajhōojhisya bhantu mubhāla isyubha ajhe mugholo, lēka kubha ne nsembo jhya kubhajhita bhanywanyi bhoobhe, ajhe bhamughana bhoobhe, ajhe bhafitinkanyi bhoobhe bhatunsi. Kubha ghwajhīla teetyo, naagho bhalokukaatika kumyabho, haaho ulobha ghwalīhwa fyoghwakafumyanga. 13 Kansi, kubha nolikutelenkanyia mubhāla, keteghwabhajhita bhapīina, fisekwa, fisyeta na bhahofu. 14 Haaho ulobha na sumbwa, bhukohela bhaabho tebhali na sintu sya kulīha. No Kabhumba alokakulīha, kubha ghabhasyula bhaghololoke myēgho kufuma kusimu.”
Lughēlo lwa mubhāla ghweke Kabhumba
(Matajhu 22:1-10)
15 Mukaatikwa ghumwi, ^akabheele najhīkeele ha fyakulya, bhoghahulika maghāmbo gheke Jheesu, ghamulomba ghaabhala, “Sumbwa, muntu ^alokalya ha mubhāla mu Bhwami bhweke Kabhumba!” 16 Jheesu ghasya lughēlo ghaabhala, “Akabheeleho muntu ghumwi, ^akabheele nalikujhōojhya mubhāla mukulu, ghabhakaatika bhantu bhengi. 17 Mukubha jhyakwila ninga jhya mubhāla, ghalaghiila musya ghwajhe ku bhoghakakaatikanga, akulinga abhalombe itye, ‘Jhise, fintu fyonse fyakwila!’
18 Tukubha, bhonse ^bhakabheele bhakaatikwa, bhabhala bhafulilwa. Ghwa kusumbula ghaabhala, ‘Nangūla ibhāla, ndikuhenselwa inje mukalilōla. Nfwile sighōngo nsilakwisa.’ 19 Ghwa bhubhili ghaabhala, ‘Nangūla ng'ombe ikumi sya kulīmya, ndikujha mu kusilīngisya. Nfwile sighōngo nsilakwisa.’ 20 No ghwa bhutatu ghaabhala, ‘Nantoola mukeema itye nonwee, nsinakobhola kwisa.’
21 Ghulya musya ghaheleela, ghamutānyisya ghonse sye bhusya. Kundi ghulya sye bhusya ghaghājha, ghamulomba musya ghwajhe ghaabhala, ‘Kajhe bhwangu mu maghana no mu nsīla sindi sya mu loolu lugho, ubhalente haaha bhapīina, fisekwa, fisyeta na bhahofu.’
22 Kafumilo ka haaho, ghulya musya ghaheleela, ghamulomba ghaabhala, ‘Taata bhusya, ghalya ghobhele ghwandaghila nankola. Tukubha, mpeghupeghu jhisyali jhiliho.’
23 Sye bhusya ghamulomba ghaabhala, ‘Nonwe! Kajhe kunse na lugho, mu nsīla no mu tusīla, ukabhalebhelesye bhantu bhese bhajhingile mu nyumba jhyane, akulinga jhibhumbike. 24 Ndikumilomba umwe kubhala, mu bhaabho bhonankakaatikanga mu kusumbula, singa tu ghumwi teghakuumye mubhāla ghonanjōojhya une!’”
Bhukaka bhwa kubha muhemba ghweke Jheesu
(Matajhu 10:37-38)
25 Mulēgha mukulu ghwa bhantu bhakabheele bhalikulyāta kumwi no Jheesu. Kundi ghabhijhuka, ghabhalomba ghaabhala, 26 “Muntu ghoghonse ^alikuhensa kunōnda une, ahenseelwe kuntēha une kusumba kubhatēha sye, nyina, mukasi, bhaana bhaajhe, bhamughana ghwajhe, na bhehwa bhaajhe. Kabhili ahenseelwe kuntēha une kusumba bhupanga bhwajhe. Kubha ghaabhula kukola ghaagho, tyanakobhola kubha muhemba ghwane.b 27 Muntu ghoghonse ^asilikughutwala musalabha ghanōnda, tyanakobhola kubha muhemba ghwane.
28 Ntānyisye fisogha, kubha ghumwi mu umwe nalikuhensa kughubhaka kapungu, alojhīla si nyinambele? Nyinambele, alosumbula kulanganyia fintu fyonse filikuhenselwa. Kundi alokūnga kubha nali ne mpijha sya kukobhola kuhwa mulīmo ghwa kughubhaka. 29 Kubha ghaalēka kulanganyia teetyo, akobhwele ghasumbula, kundi ghapootwa kughunguula kughubhaka. Haaho bhahitansīla bhonse bhalomuhahuula, 30 ketebhabhala, ‘Muntu ghooghu ghakasumbulanga kughubhaka, tukubha ghapootwa kughunguula!’
31 Kabhili tubhale, mwami ghumwi alikuhensa kusoola na mwami ghundi, alojhīla si nyinambele? Nyinambele alolanganyia kubha unyene ali na bhasilikale elufu ikumi, kubha nanakobhola kusoola no mwinaajhe ali na bhasilikale elufu makumi abhili. 32 Kubha ghaalōla ti alakupootwa, alolaghiila bhahelekesi bhaajhe, bhaajhe kwa mwami mwinaajhe nasyali hale, akulinga bhabhiike kabhāngo ka kusaana.
33 Gho bhuli bhofili no kumwenyu, hatuhu mu umwe anabha nali muhemba ghwane, kubha nasifilēkile fyonse fyali nafyo.”
Mukele ghusikojhogha
(Matajhu 5:13; Maaliko 9:50)