Ghalaghale
13
Ikunka leelyo, bhantu bhandi ^bhakabheeleho bhamulomba Jheesu kubhala, “Hali Bhaghalilaajha bhoobhu bhakajhihaghwanga kwi ilaghi lyeke Pilaato,a mukubha bhalikufumya mpeesi jhyabho kwa Kabhumba. Kundi malaso ghaabho ghasansikana na malaso gha manywele gha mpeesi.” 2 Jheesu ghabhabhasya kubhala, “Teeti, bhomulikulanganyia umwe, Bhaghalilaajha bhaabho bhakajhihaghwanga teetyo, bhukohela bhakabheele bhabhi kusumba Bhaghalilaajha bhandi bhonse? 3 Lekehi! Tukubha ndikumilomba kubha musighalaghali bhubhi bhwenyu, mulojhihaghwa bhoobhoe nomwe mwense! 4 Ajhe, bhaabhali bhantu ikumi na munane bhakaghwilwanga no lukande lukulu ku Siloamu, bhafwa, mulikulanganyia ti bheene bhakabheele bhabhi kusumba bhantu bhonse bhakabheele bhēkeele mu Jhelusalemu? 5 Lekehi! Tukubha ndikumilomba kubha musighalaghali bhubhi bhwenyu, mulojhihaghwa bhoobhoe nomwe mwense!”Lughēlo lwa siti sisikooha majhābho
6 Kundi Jheesu, ghabhalomba bhantu lughēlo loolu ghaabhala, “Akabheeleho muntu ghumwi ^akabheele ne siti sya tiini sibhyelwe mwi ibhāla lyajhe lya misabhibhu. Ifuku limwi ghakajhanga ti akake majhābho gha tiini, tukubha teghakalōlangako singa tu limwi. 7 Kundi ghamulomba mukola milīmo ghwajhe ghwa ibhāla ghaabhala, ‘Kūnga! Mu myaka itatu nanjisa mu kuka majhābho ku siti seesi, tukubha nsibhwene sintu! Nonwe sipute, bhukohela silikukimya ibhāla bhuhela!’
8 Tukubha mukola milīmo ghulya ghamuhindula ghaabhala, ‘Ee taata bhusya, silēke no ghunu mwaka, insijhihilile insibhikile ne mbolela. 9 Syaha majhābho mwakeso, fisogha! Kubha syabhula kuha, haaho ghwasiputa.’”
Jheesu alikumusisya mwanamukeema mwi Ifuku lya Kutamuka
10 Ifuku limwi lya Kutamuka,b Jheesu akabheele nalikulāngulula bhantu mu nyumba jhya kusangaanilamo Bhajhahudi.c 11 Mu nyumba moomo, akabheelemo mwanamukeema ghumwi, ^akabheele ne limusāgha likabheele lyakamusūlila ndwala myaka ikumi na munane. Mwanamukeema ghoogho akabheele ghakatintimala mughōngo, kabhili akabheele ghakapootwa kughololoka.
12 Jheesu bhoghakabhanga ghamulōla, ghamwita. Kundi ghamulomba ghaabhala, “Mukulu, bhulwele bhoobhe bhwakulekuulula!” 13 Jheesu ghabhiika mabhoko ghaajhe ku mukulwana ghulya, haahoe ghulya mukulwana ghajhughalala ghagholola mughōngo ghwajhe, ghasumbula kumulumba Kabhumba.
14 Tukubha mukulu ghwa nyumba jhya kusangaanilamo ghaghājha, bhukohela Jheesu ghamusisya ghulya muntu mwi Ifuku lya Kutamuka. Ghulya mukulu ghwa nyumba jhya kusangaanilamo ghabhalomba bhantu ghaabhala, “Nyuma jhyonse jhili na nfuku mukaagha sya kukola milīmo. ^Alikuhensa kusisibhwa ghajhisa mu nfuku seesyo, kulēka mwi Ifuku lya Kutamuka!”
15 Sifwe Bhusya ghamuhindula ghaabhala, “Umwe bha kali ku ghundi! Teeti temukojhīghulila mwi ihangula ng'ombe syenyu ne fihongo fyenyu, mwasifela mu kunywa mansi, singa mwi Ifuku lya Kutamuka? 16 Nonwe nasi mwanamukeema ghooghu, ghwa bhukwa bhweke Bhulahimu,d ghwakukabha myaka ikumi na munane nahambilwe na Syetani, tyanahambululwa jheejhyo nsika mwi Ifuku lya Kutamuka?”
17 Jheesu mukubha ghatenda ghaagho, bhemba bhaajhe bhonse, bhalōla nsonyi. Tukubha bhandi bhonse bhakasangabhalanga nkana ku maghāmbo ghonse masogha Jheesu ghwakabheele nalikukola.
Lughēlo lwa mbuto ntooli nkana, no lwa bhumela
(Matajhu 13:31-33; Maaliko 4:30-32)
18 Kundi Jheesu ghabhasya, “Langaanyie, Bhwami bhweke Kabhumba bhususeene na si? Imbususanyie na si? 19 Bhususeene na mbuto ntooli nkana,e jhyoghakabhyalanga muntu mwi ibhāla lyajhe. Mbuto jhyamēla, syabha siti, ghajhisa manyōnyi ghajhōojhya meesa ku matabhi ghaajhe.”
20 Jheesu ghabhasya kabhili ghaabhala, “Imbususanyie na si, Bhwami bhweke Kabhumba? 21 Bhususeene na bhumelaf ghoghakatwalanga mwanamukeema ghumwi, ghasimika ikubhulu limwi lya bhufu bhwa ngano.g Mukubha ghasimika, ghulya bhumela ghwaghaasika bhufu bhonse.”
Musīgho mukuti
(Matajhu 7:13-14, 21-23)
22 Jheesu mukubha najhiile ku Jhelusalemu, akabheele nalikuhita mu ngo nkulu ne ntooli, nalikubhalāngulula bhantu. 23 Ifuku limwi, muntu ghumwi ghamubhasya ghaabhala, “Ee Taata Bhusya, bhantu bhalokabha bhasābhulwa na Kabhumba bhalokabha bhase tue?”
Jheesu ghamuhindula ghaabhala, 24 “Lijhande kujhingila ha musīgho mukuti. Fyene ndikumilomba kubhala, bhengi bhalokalīngisya kujhingila, tukubha tebhakakobhole. 25 Hali ne ifuku, lyakukabha kanya nyumba alojhīghala lwibhi, mulojhughalala kunse, mu kughongomola lwibhi mulikubhala, ‘Ee Sifwe Bhusya, tujhīghulile!’ Nonyene alomihindula ghaabhala, ‘Nsimijhinsi kabhili nsijhinsi no komufumile!’
26 Nomwe mulobhala, ‘Ufwe ghofwe tukabheele tulikulya no kunywa hamwi noghwe! Kabhili ughwe ukabheele ghwatulāngulula mu mahala gheetu!’ 27 Tukubha unyene alomihindula kubhala, ‘Nsijhinsi komufumile! Fume hanu hondi, umwe bhakolabhubhi!’
28 Mulokamulōla Bhulahimu, Isaka, Jhakobho na bhaghwelaghu bhonse bhali mu Bhwami bhweke Kabhumba. Tukubha umwe mulokabha mwateelwa kunse. Kooko komulokabha mulikulīla, no ku sisila, mulikusya meeno! 29 Kabhili bhantu kufuma mu fihugho fyonse fya ha bhweleelo bhalokeesa, bhalokabha bhalikulya hamwi mubhāla mu Bhwami bhweke Kabhumba.
30 Ahulikisye! Bhaliho bhali bha bhuhela nonwe, bhalobha bha kusumbula, kabhili bhaliho bhali bha kusumbula nonwe, bhalobha bha bhuhela.”
Jheesu alikululīlila lugho lwa Jhelusalemu
(Matajhu 23:37-39)
31 Ikunka leelyoe, Bhafalisaajho bhandi bhaajha kwa Jheesu bhamulomba bhabhala, “Bhuuka hanu, ujhe kundi, bhukohela Helode Antipa alikuhensa kukujhihagha.” 32 Jheesu ghabhahindula ghaabhala, “Lyāte mukalilombe lilya limbwe kubhala, ‘Kūnga! Bhwalelo ne isoneka, ndikukuula mamisāgha no kusisya bhalwele, ne ifuku lya bhutatu, nanhwa mulīmo ghwane.’ 33 Hamwi na ghaagho ndikuhenselwa kubha mu lwēndo bhwalelo ne isoneka, no lwalusiku. Bhukohela tefinakobholeka mughwelaghu kufwila kunse na ku Jhelusalemu!
34 Ee Jhelusalemu, Jhelusalemu! Ulikujhihagha bhaghwelaghu na bhantu bhalikulaghilwa kumoobhe, ulikubhajhihagha ku kubhahuula na mabhwe. Ne myelelo mingi nkabheele nendikuhensa kubhakomenkanyia bhaana bhoobhe, kobhe nkoko bhuli bhojhikofukatila mabhoojha ghaajhe mu mapapa ghaajhe, tukubha temwakaswanga. 35 Kūnga! Nonwe Kabhumba alikumilēka umwe no lugho lwenyu! Nonwe, ndikumilomba, temulondōla kabhili, mpaka ifuku lyakukabha mwabhala, ‘Ghalabhwa mpemba alikwisa kwi isiina lyeke Sifwe Bhusya.’”h