Jheesu alikubhakabha bhasibhi bhalikutenda kali ku ghundi
(Matajhu 10:26-27)
12
Ikunka leelyo, bhantu maghāna na maghāna bhakabheele bhakomenkana kumuhulikisya Jheesu. Bhakabheele bhengi bhajha kwikandaghana mukubha bhalikukoleela mu kuhulikisya. Kundi Jheesu ghatenda nyinambele ku bhahemba bhaajhe ghaabhala, “Mwabha mubhengile na kali ku ghundi ka Bhafalisaajho, bhukohela kakojhogha kobhe bhumela.a 2 Ghonse ghali mu bhufiso ghalobha halafu, kabhili ghonse ghasimānyiike ghalomānyika. 3 Nonwe, ghonse ghomulikutenda mu sikolo, ghalohulikika halafu. Kabhili, ghonse ghomulikuhwehweta mukati, ghalotangaasibhwa ha mbele jhya bhantu bhengi.”Ghwa kughubhahwa ni ghanyi?
(Matajhu 10:28-31)
4 Jheesu ghabha najhililike kulāngulula kubhala, “Ale bhanywanyi bhaane, ndikumilomba kubhala, musibhaghubhahi bhalikwihagha mutūmba bhuhela. No kubha bhajhihagha, hatuhu sindi syobhanakobhola kukola. 5 Kansi, imilombe ghwa kughubhahwa, mughubhahe Kabhumba, ghwakukabha ghajhihagha muntu, ali na managha gha kuhamulisya kumuteela mu mulīlo ghwa Jhehanamu.b Fyene! Ndikumilomba kubhala, ghoogho gho mughubhahe!
6 Teeti, manyōnyi mase mase ataanu teghakoghusibhwa mahela mase nkana? Hamwi na ghaagho, Kabhumba tyanalabhilila singa tu limwi. 7 Nonwe umwe musighubhahi, Kabhumba amijhimbiike kusumba manyōnyi mengi! Kumwi ne nyele syonse sili ku mitwe jhyenyu, sipandilwe.
Kutānyia kwisigha kwenyu ha mbele jhya bhantu
(Matajhu 10:32-33; 12:32; 10:19-20)
8 Ndikumilomba kubha, muntu ghoghonse ghwakukabha nalikunswa une ha mbele jhya bhantu ti ndi Sye Bhusya, Mwana ghwa Muntu alomuswa ha mbele jhya misambwa bheke Kabhumba. 9 Tukubha, muntu ghoghonse ghwakukabha nalikutenda ha mbele jhya bhantu kubha ti tyanyinsi, none nonkatenda ha mbele jhya misambwa bheke Kabhumba kubha ti nsimujhinsi. 10 Muntu ghoghonse ^alobha nalikutenda ighāmbo ibhi ku Mwana ghwa Muntu, alolesibhwa bhubhi bhwajhe. Tukubha, alobha nalikumubhenguka Mwēgho Mulafu ghweke Kabhumba, ghoogho teghalesibhwe bhubhi bhwajhe.
11 Bho bhalomifela mu mabhalasa gha majhumba gha kusangaanilamo Bhajhahudi, ha bhaami na ha bhakulu, lēke kusamba bho mulobhala ajhe bho mulohindula. 12 Mwēgho Mulafu ghweke Kabhumba ikunka leelyoe, alomilānga bhuli bhomulakutenda.”
Lughēlo lwa mutunsi mungalangala
13 Muntu ghumwi mu ghulya mulēgha ghamulomba Jheesu ghaabhala, “Taata bhuhemba, mulombe mukulu ghwane angabhulile bhuhyana bhoghakatulēkelanga siifwe.” 14 Jheesu ghamuhindula ghaabhala, “Ale muntu, ni ghanyi ghakambiika une kubha mujhangusi ghwenyu, ajhe kubha mughabhusi ghwa bhuhyana bhwenyu?” 15 Kundi ghabhalomba bhantu bhonse ghaabhala, “Bhe mubhengile! Musibhi ne iitama lyolyonse, bhukohela bhupanga bhwa muntu tebhukofuma mu fintu fyali nafyo.”
16 Kundi ghabhalomba lughēlo loolu ghaabhala, “Hakabheele mutunsi ghumwi, mwi ibhāla lyajhe fintu fyakahangilanga nkana. 17 Ghalibhasya mu mwēgho ghwajhe ghaabhala, ‘Injīle bhuti? Fisuughulwa fyane, nsili na ha kufibhiika!’ 18 Kundi ghaabhala, ‘Nankwīla itye, ndosambaasya tubhangula twane, nongubhaka tubhangula tundi tukulu nkana. Moomo mondobhiika fisuughulwa fyane fyonse ne fintu fyane. 19 Haaho ndoghubhalila, mwēgho ghwane, “Uli na fintu fingi fisogha fya kusyelukwa myaka mingi. Nonwe, tulama, lya ghwananywa, usangabhale.”’ 20 Tukubha Kabhumba ghamulomba ghaabhala, ‘Uli mungalangala ughwe! Bhufuku bhwa bhwalelo bhalakutwala mwēgho ghoobhe! Ne fintu fyobhe fyonse fyobhikiile filobha fyeke ghanyi?’
21 Teetyo ghobhuli bhofilokabha, ku ghoghonse alikwilundikila fintu kwi iitama lya ha bhweleelo, no bhutunsi bhwajhe tebhuli na mulīmo kwa Kabhumba.”
Kumwisigha Kabhumba
(Matajhu 6:25-34)
22 Kundi Jheesu ghabhalomba bhahemba bhaajhe ghaabhala, “Nonwe, lēke kusambila bhupanga bhwenyu kubhala mulakulya si, ajhe kusambila mitumba jhyenyu kubhala mulakufwala si. 23 Bhupanga gho sikulu kusumba fyakulya. No mutūmba gho sikulu kusumba myenda. 24 Kūnga mamombo. Teghakobhyala teghakosuughula, teghali na tubhangula, tukubha Kabhumba akoghalaaghisya. Nonwe umwe mujhimbiikwe nkana ha mbele jhyeke Kabhumba kusumba manyōnyi!
25 Ni ghanyi mu umwe akobhwele kusamba aghungilisye bhupanga bhwajhe singa nsa jhimwi? 26 Nonwe, kubha mulikupootwa kukola sintu sitooli kobhe seesyo, ku bhuti mulikusamba na ghandi?
27 Kūnga ntulo, bhosilikukula. Tesikokola milīmo ajhe kulanda myenda. Ndikumilomba fyene, Solomoni mu nfuku syonse sya bhwami no bhutunsi bhwajhe, teghakafwikwanga mwenda ghwamwīkala kobhe ntulo seesi! 28 Kabhumba akoghafwika mabhwasi gha mwi isala ghakukabha bhwalelo ne isoneka ghaghuma, ghateelwa mu mulīlo. Teeti umwe bhakanya kwisigha kuse, tyanamufwika nkana kusumba haaho?
29 Nonwe, lēke kuhensa kubha ti mulakulya si, ajhe mulakunywa si, ku ghaagho lēke kujhisihisya. 30 Bhukohela bhantu bhasimujhinsi Kabhumba ghobhalikuhensela feefyo, tukubha umwe Siinywe ghwa mwi ighūlu ajhinsi kubha ti mulikufisamba! 31 Nonwe bhuhense nyinambele Bhwami bhweke Kabhumba, ne feefi findi muloghungilisibhwa.
Mbiika jhya mwi ighūlu
(Matajhu 6:19-21)
32 Musighubhahi, mulēgha muse kobhe ghwa ntaama, bhukohela Siinywe ghwa mwi ighūlu, atēhile kumiheekesya bhwami bhwajhe. 33 Ghūsye fintu fyenyu, mubhaheekesye bhapīina ghaagho mahela gha feefyo fintu. Lijhōojhisye mbughuli jhisikokima, mwibhikile mbiika mwi ighūlu mojhisikoseeha. Kooko kutuhu mwifi anajhibha ajhe mijhye jhya kubhiihya. 34 Halya hojhili mbiika jhyobhe, no mwēgho ghoobhe hoghuloobha.
Bhe musunyiile
35 Nfuku syonse mwabha musunyiile kukola milīmo jhyeke Kabhumba, no tumūni twenyu twabha tumuniike. 36 Bhe kobhe bhasya bhamuhembeele sibho bhusya aheleele kufuma ku bhwenga, akulinga ikunka lyalojhisa ghaghongomola lwibhi, bhamujhīghulila haahoe. 37 Sumbwa bhasya bhakukabha sibho bhusya ghajhisa, ghabhasānga bhahalamwike. Ndikumilomba fyene, ghoogho sibho bhusya alojhīla matelekanyi gha fyakulya ghabhakalibhisya bhasya bhaajhe ghabhaheekesya. 38 Sumbwa bhaabho bhasya bhakukabha sibho bhusya singa ghajhisa bhufukukati ajhe ku mwisakusya, ghabhasangana bhasunyiile.
39 Tukubha mānye fisogha leeli ighāmbo kubhala, kanya nyumba kubha anakamānye ikunka lya kujhisilamo mwifi, tyanakalēke nyumba jhyajhe jhyabhelaghwa. 40 Nonwe, nomwe bhe mukwiliile, bhukohela Mwana ghwa Muntu alojhisa ikunka lyomusijhinsi.”
Lughēlo lwa mukola milīmo musogha no mubhi
(Matajhu 24:45-51)
41 Kundi Petelo ghamubhasya Jheesu ghaabhala, “Taata Bhusya, lughēlo loolu loghwatulomba, ni kuli ufwe bhuhela, ajhe ni ku bhantu bhonse?” 42 Sifwe Bhusya ghamuhindula ghaabhala, “Langanyia, munyampala musogha, kanya masāla ni ghuuhe? Ni ghooghuli ghwakukabha sye bhusya kubha ghaajha lwēndo, ghamubhiika ajhughalalile bhakola milīmo bhenaajhe, no kubhaha fyakulya nfuku syonse. 43 Sumbwa musya ghulya, ghwakukabha sye bhusya kubha ghaheleela alomusāngana, nalikwila kobhe bhuli bho ghakamulaghilanga. 44 Fyenen dikumilomba , sye bhusya alomubhiika ghoogho musya ajhughalalile nsābho jhyajhe jhyonse. 45 Tukubha mukola milīmo ghoogho kubha ghalanganyia mu mwēgho ghwajhe kubhala, ‘Taata bhusya ghatinda kuheleela,’ kundi ghasumbula kubhahuula bhasya bhenaajhe, bhanabhaghoosi na bhanabhakeema, ghabha nalikulya no kunywa ghanakolwa. 46 Sye bhusya, alokaheleela ifuku lyasikabheele nalanganyisye, ne nsa jhyasikabheele najhinsi. Alomuputaghula ghamubhiika hamwi na bhasimwisighile Kabhumba.
47 Mukola milīmo ghwakukabha najhinsi fyatēhile sye bhusya, tukubha ghaalēka kwīla matelekanyi ajhe kukola kobhe bhwatēhile sye bhusya, ghoogho alohuulwa nkana. 48 Tukubha mukola milīmo ghwakukabha nasijhinsi fyakotēha sye bhusya, ghaajhīla fijhikenyie no kuhuulwa, ghoogho alohuulwa fise. Muntu ghoghonse ghwakukabha naheebhilwe fingi, ghoogho alojhimukilwa fingi, no ghwakukabha nakabhisiibhwe fingi, alojhimukilwa fingi nkana.
Kwisa kweke Jheesu kulikusūla kulekunkana
(Matajhu 10:34-36)
49 Nankeesa ha bhweleelo haaha mu kughāsya mulīlo. Sumbwa kubha ghunabhe ghwasumbula kughāka! 50 Tukubha hali no kubhatisibhwac kwisile kumwane kwa kusamba, konankupokeela kooko ghokulikusūla nansamba nkana mu mwēgho ghwane, mpaka kwakwila. 51 Teeti, mulikulanganyia ti nanjisa mu kulenta maholo ha bhweleelo? Te teetyo! Ndikumilomba kubhala, nanjisa mu kulenta bhwimba. 52 Kusumbula nonwe, mu nyumba mulobha muli bhantu bhataanu bhalobha bhalikulekunkana, bhatatu bhalolekunkana ku bhabhili. Na bhaabho bhabhili bhalolekunkana ku bhatatu. 53 Sye alolekunkana no mwanaajhe, mwanaajhe naagho no sye. Nyina alolekunkana no mwanaajhe muhāla, no muhāla no nyina. Nyina bhukwe alolekunkana no mukamwanaajhe, no mukamwanaajhe naagho no nyina bhukwe.”
Kumānya mihīndaghuko
(Matajhu 16:2-3)
54 Jheesu ghabhalomba mulēgha ghonse ghaabhala, “Kubha mwalōla mafumbe ghalikukomenkana ku bhujha isyubha ku mulongo mukobhala, ‘Nfula jhilikuhensa kughwa,’ no bhwene jhyaghwa. 55 Kabhili kubha mwalōla musāgha ghwa kuusi mukobhala, ‘Kulikuhensa kubha kufyu,’ bhwene bhokukoobha.d 56 Umwe bha kali ku ghundi, mujhinsi kulikūnga ighūlu! Nonwe, ku bhuti mulikupootwa kughamānya ghaagha ghalikulōleka nfuku seesi?
Kusaana no mwimba
(Matajhu 5:25-26)
57 Ku bhuti bhomusilikujhelekesya masāla ku fintu fya kapanga? 58 Kubha mwimba ghoobhe nalikukufela mwi ibhalasa,e lijhande kusaana naajhe musyali mu nsīla. Kubha ghwalēka kwīla teetyo, alokukulukumpa kwa hakimu, no kooko ulokalilwa, ghwanafelwa ku managha mwi ighelesya. 59 Ndikumilomba, mukati moomo teghwamufume mpaka ghwahakila fyonse fyolikujhimukilwa!”