Jheesu alikubhalānga bhwa kutendajhyuka kwa Kabhumba
(Matajhu 6:9-13; 7:7-11)
11
Ifuku limwi, Jheesu akabheele nalikutendajhyuka kwa Kabhumba. Mukubha ghahwa, ghumwi mu bhahemba bhaajhe ghaabhala, “Ee Taata Bhusya, tulānge kutendajhyuka kwa Kabhumba, kobhe Jhohana bhuli bhoghakabhalānganga bhahemba bhaajhe.”2 Jheesu ghabhalomba ghaabhala, “Mu kutendajhyuka kwa Kabhumba, mwabhala itye,
‘Ee Siifwe isiina lyobhe lilumbwe,
bhwami bhoobhe bhwise.a
3 Ghwatuheekesya nfuku syonse fyakulya fyetu.
4 Tulesisye bhubhi bhwetu,
kobhe nofwe bhotulikubhafumisya nsika bhonse bhalikutubhiihya.
No kubha usitulēki tughemwe.’”b
5 Kundi ghabhalomba ghaabhala, “Tubhale muntu ghumwi mu umwe ajhiile kwa munywanyi ghwajhe hakati jhya bhufuku, ghamulomba ghaabhala, ‘Ee munywanyi ghwane, ndikusēegha untiile mabhu atatu, 6 bhukohela, munywanyi ghwane ghajhisa ku mwane ghaafuma lwēndo. Tukubha une nsili na fyakulya fya kumuha.’ 7 No munywanyi ghoogho nali mukati ghamuhindula ghaabhala, ‘Lēka kunsanfya! Une nanhwanga kwighala lwibhi! Kabhili une na bhaana bhaane twalaala. Nsinakobhola kubhuuka inkuheekesye syosyonse!’ 8 Ndikumilomba, kubha ghoogho muntu ghajhililika kumusēegha, munywanyi ghwajhe alobhuuka ghamuheekesya fyalikuhensa. Teghamuhe bhukohela ni munywanyi ghwajhe, alomuha ku bhukohela bhoghasunfya kumusēegha.
9 Nonwe ndikumilomba, sēeghe muloheebhwa, hensele mulofilōla, tangiile mulojhīghulilwa. 10 Muntu ghoghonse alikusēegha akoheebhwa, alikuhensa akofilōla, na alikutangiila akojhīghulilwa. 11 Teeti, ni ghanyi mu umwe ghwakukabha mwanaajhe kubha ghasona isembe, ghaamuha nsoka? 12 Ajhe ghasona ijhi, ghaamuha kaamina? 13 Kubha umwe bhakanya bhubhi, mujhinsi kubhaha bhaana bhenyu fintu fisogha, Taata ghwa mwi ighūlu alokola fisogha kusumba haaho. Alobhaha Mwēgho Mulafu ghweke Kabhumba bhalobha bhalikumusēegha.”
Jheesu alikubhīnga mamisāgha ku managha gheke Kabhumba
(Matajhu 12:22-30; Maaliko 3:20-27)
14 Ifuku limwi, Jheesu akabheele nalikubhīnga limusāgha ibhi ku muntu. Leelyo limusāgha lyakamusūlilanga bhukameeme ghoogho muntu. Mukubha limusāgha lyamufumako, ghasumbula kusāhula. Bhantu bhengi ^bhakabheeleho, bhalikosa mahi nkana. 15 Tukubha bhandi mu bhaabho bhabhala, “Alikubhīnga mamisāgha mabhi ku managha gha Bhelisebhuli, mukulu ghwa mamisāgha!” 16 Bhandi bhabha bhalikumughema Jheesu, akulinga abhalānsye lusante lwa kulānsya kubhala, ghwalikukola ghafumile mwi ighūlu kwa Kabhumba. 17 Kansi Jheesu ghamānya fyobhalikulanganyia, ghabhalomba ghaabhala, “Bhantu bha bhwami bhumwi kubha bhalikusoola, bhwami bhoobho bhukosambaala. No mu nyumba teetyoe, kubha bhahisyunkana bheene ku bheene, nyumba jhyabhiiha. 18 Ghobhuli bhofili, Syetani kubha ghaliighājha nyene, haaho bhwami bhwajhe bhulojhughalala bhuti? Ndikubhala leelyo ku bhukohela mulikubhala ndikubhīnga mamisāgha mabhi ku managha gha Bhelisebhuli. 19 Nonwe, kubha une nendikubhīnga mamisāgha ghaagho ku managha gha Bhelisebhuli, bhahemba bhenyu bhalikubhīnga ku managha gheke ghanyi? Teetyo bhahemba bhenyu bhalobha bhakinso bhomusilikutenda bhwene. 20 Tukubha une, kubha nendikubhīnga mamisāgha mabhi ku managha gheke Kabhumba, nonwe Bhwami bhweke Kabhumba bhwamwisila!
21 Muntu kanya managha ne filanga, alikulalilila nyumba jhyajhe, tehali anamughanyuka fintu fyajhe. 22 Tukubha, kubha ghajhisa muntu kanya managha kusumba unyene, ghamusumba, haaho aloghanyukwa filanga fyajhe fyonse fyabhele nalisighiile, no kutwala fintu fyonse fili mu nyumba ghaghābhulila bhandi. 23 Muntu ghoghonse asili luhande lwane, ghoogho ni mwimba ghwane. Kabhili muntu asilikukomenkanyia hamwi none, ni kasambaasya.
Limusāgha ibhi bholikojhīla kubha lilikuheleela ku muntu
(Matajhu 12:43-45)
24 Limusāgha ibhi kubha lyafuma ku muntu, likojha mwi isala mu kuhensela ha kutamuka. Kubha lyabhulwa likobhala, ‘Ndoheleela kookulie ku nyumba jhyane konankafumanga.’ 25 Kubha lyafīka lyasangana hahyahiilwe, hajhōjhisiibhwe fisogha, 26 likojha lyakatwala mamisāgha mabhi ghandi ndwi, mabhi kusumba lyene. Kundi ghakojhingila ghajhīkala. Haaho ghoogho muntu akosumbilwa nkana, kusumba ha bhusumbulilo.”
Kupambulilwa kwa bhwene
27 Jheesu mukubha nalikutenda leelyo, mwanamukeema ghumwi mu ghulya mulēgha, ghatansya silongo ghaabhala, “Jhipambuliilwe nda jhyakakufyalanga na mabheele ghakakughonsyanga!” 28 Tukubha Jheesu ghatenda ghaabhala, “Bhapambuliilwe nkana bhahuliike no kulōnda Ighāmbo lyeke Kabhumba.”
Bhantu bhalikuhensa Jheesu alānsye lusante lweke Kabhumba
(Matajhu 12:38-42)
29 Mukubha bhantu bhalikukomenkana, Jheesu ghaabhala, “Bhantu bha nfuuke jheejhi ni bhabhi nkana! Bhalikuhensa inānsye lusante, tukubha bhaloheebhwa lusante lweke Jhona bhuhela. 30 Kobhe Kabhumba bhoghakamwīlanga Jhona abhe lusante longwa ku bhantu bha lugho lwa Ninawi, ghobhuli bhofili, Mwana ghwa Muntu naagho alobha lusante longwa ku bhantu bha nfuuke jheejhi.
31 Ifuku lya kukalilwa, mwami mukeema ghwa sihugho sya Syebhac alokajhughalala kubhakalila umwe bhantu bha nfuuke jheejhi bhubhi bhwenyu. Bhukohela unyene ghakesanga kufuma ku sihugho sya hale, ghajhisa mu kuhulikisya maghāmbo matendeke gheke mwami Solomoni.d Nonwe aliho hanu mukulu kumusumba Solomoni! 32 Kabhili ifuku lya kukalilwa, bhantu bha ku Ninawi, naagho bhalokajhughalala ha mbele jhyeke Kabhumba mu kubhakalila bhantu bha nfuuke jheejhi. Ku bhukohela Jhona mukubha ghatangaasya Ighāmbo lyeke Kabhumba kumwabho, bhakaghalaghalanga bhubhi bhwabho.e Nonwe haaha aliho mukulu kusumba Jhona!
Linso ni kamūni ka mutūmba
(Matajhu 5:15; 6:22-23)
33 Hatuhu muntu akokwamika kamūni ghabhiika hafisamike, ajhe kufundikila na nkono. Akobhiika ha bhutala, akulinga bhantu bhalikwingila, bhalōle fisogha. 34 Menso ghoobhe ni kobhe kamūni ka mutūmba. Menso ghoobhe kubha ghabhwene fisogha, mutūmba ghoobhe ghonse ghukobha ghumunikiilwe. Tukubha kubha ghakakatala, mutūmba ghoobhe ghonse ghukobha sikolo. 35 Syakutembeekesya ni isye, ilangaasi lili mu mutūmba ghoobhe lisibhi sikolo. 36 Teetyo, kubha mutūmba ghoobhe ghonse ghumunikiilwe bhusila sikolo syosyonse, haaho ulobha ghwamunikilwa kobhe mwi ilangaasi lya kamūni likulafisisye.”
Jheesu alikubhakabha Bhafalisaajho na bhamakota bha Kabhāngo keke Musa
(Matajhu 23:1-36; Maaliko 12:38-40)
37 Jheesu bhoghakabhanga ghahwa kutenda ghaagho maghāmbo, Mufalisaajhof ghumwi ghamwita ajhe mu kulya fyakulya kumwajhe. Kundi, Jheesu ghaajha kwa Mufalisaajho, ghajhingila, ghajhīkala ha fyakulya. 38 Ghulya Mufalisaajho bhoghakalōlanga Jheesu ghajhīkala bhusila kukalabha kobhe bhobhakabheele bhaajhīla, ghakekosanga mahi nkana. 39 Kundi Sifwe Bhusya ghamulomba ghaabhala, “Umwe Bhafalisaajho, mukosūnga mitaho ne nkono kulughulu, tukubha mukati mu myēgho jhyenyu mubhumbiike iitama no bhubhi.g 40 Umwe bhangalangala! Temujhinsi kubha ti, Kabhumba ghakajhōjhyanga kulughulu, gho ghakajhōjhyanga no mukati? 41 Umwe, bhafūnaanile bhapīina ku mwēgho ghumwi, haaho fyonse filobha filafu kumwenyu ha mbele jhyeke Kabhumba.
42 Komwabha umwe Bhafalisaajho! Bhukohela temujhinsi kubhēlila bhandi fisogha mulinganyiisye, kabhili temumutēhile Kabhumba. Mulikumufumisya Kabhumba ifungo limwi mu mafungo ikumi singa gha fintu fisefise fyonse, kobhe mbogha no bhutendo. Tukubha mulikuhenselwa kubhēlila bhandi fisogha mulinganyiisye no kumutēha Kabhumba, bhusila kulēka ghaagho ghandi. 43 Komwabha umwe Bhafalisaajho! Bhukohela mutēhile kwīkala ku makonko gha bhaghosibhakulu gha ha mbele, mu majhumba ghenyu gha kusangaanila. Kabhili, mulikuhensa bhantu bhamisukamile mwi ighulilo. 44 Komwabha umwe bhukohela mususeene na malaalo ghasila lusante, na bhantu bhalikutalantala ku lughamba bhusila kumānya.”h
45 Ikota ghumwi ghwa Kabhāngo ghamulomba Jheesu ghaabhala, “Ikota, bhuli bholikutenda ghaagho, ulikutubhala fibhi nofwe bhamakota bha Kabhāngo keke Musa.” 46 Jheesu ghamuhindula ghaabhala, “Nomwe bhamakota bha Kabhāngo keke Musa, komwabha! Bhukohela, mulikubhalānga bhantu tubhāngo twingi kobhe kubhatwikilisya miligho minywamu jhisinatwalika. Nomwe nokujhikuumya singa tu na kakumo kamwi kubhafūnaanila! 47 Komwabha umwe! Bhukohela mulikughaghubhakila fisogha malaalo gha bhaghwelaghu, tukubha bhakabhehaghanga ni bhasiinywe! 48 Haaho mulikulānsya kubha ti gho umwe bhakalōla bhukohela mulikuswa ghalya ghobhakēlanga bhasiinywe. Bhakabhehaghanga bhaghwelaghu, nomwe mulikughubhaka malaalo gha bhaabho bhaghwelaghu!
49 Gho kutuma Kabhumba ku bhukulu bhwajhe ghakabhalanga itye, ‘Ndokabhabhalaghiila bhaghwelaghu ne mintengwe kumwabho, tukubha bhandi bhalobhehagha, bhandi bhalobhasanfya.’ 50 Teetyo, bhantu bha nfuuke jheejhi bhalakubhuulwa ku nfu sya bhaghwelaghu bhonse bhakehaghwanga, kufuma ha bhusumbulilo bhwa bhweleelo. 51 Ghwa kusumbula kwihaghwa ni Abhelii bhandi bhalōnda, no ghwa bhuhela ni Sakalia,j ghakehaghilwanga hakati jhya bhulunga ne Nyumba Nkulu jhya Ipeelelo.k Ndikumilomba fyene bhantu bha nfuuke jheejhi bhalobhuulwa ku ghaagho ghonse.
52 Komwabha umwe bhamakota bha Kabhāngo keke Musa! Bhukohela mwajhīghala mulyāngo ghwa kumumānya Kabhumba. Kumwi nomwe temumujhinsi, kabhili mulikubhajhīghalisya bhalikuhensa kumumānya.”