Jheesu alikubhalaghiila bhandi bhahemba makumi ndwi na bhabhili
10
Kufuma haaho, Sifwe Bhusya ghasāaghula na bhandi makumi ndwi na bhabhili, ghabhalaghiila bhabhili bhabhili bhamulombolele mu ngo syonse no mu mahala mwakabheele nabhasile kujha. 2 Jheesu ghabhalomba, “Mwi ibhāla lyeke Taata Bhusya fya kusuughulwa ni fingi, tukubha bha kusuughula ni bhase. Kansi, musēeghe Taata Bhusya nyene ibhāla, alaghiile bha kusuughula mwi ibhāla lyajhe. 3 Kookwe lyāte, tukubha ndikumulaghiila kobhe ntaama hakati na mabhinga. 4 Musitwali mbughuli, ajhe bhahasya, ajhe nkwābho sya kuhīndulila. Musijhi mwaposya bhantu mu nsīla. 5 Kabhili, nyumba jhyojhyonse jhyomulojhingilamo, sya kusumbula, mwajhitendajhyukila kubhala, ‘Maholo ghabhemo mu jheejhi nyumba.’ 6 Kubha nalimo mutēha maholo, maholo ghenyu ghalosīibha ku mwajhe. Kubha nasilimo, ghalya maholo ghalomiheleelela umwe bheene. 7 Homwafīkila kubha hali maholo, mwajhīkala haahoe, mwalya mwananywa fyobhamiheekesya, bhukohela mukola milīmo ahenseelwe kulīhwa simaanya syajhe. Musituuluki tuuluki kufuma mu jhindi nyumba kujha mu jhindi.8 Lugho lolonse lomulojhingilamo, kubha bhamusangaanila, mwalya fyomulikuheebhwa. 9 Mwasisya bhalwele bhalimo, mwabhalomba bhantu kubhala, ‘Bhwami bhweke Kabhumba bhwamikoleelela.’ 10 Tukubha lugho lolonse lomulojhingilamo, kubha bhabhula kumisangaanila, mwafumamo. Kubha muhitile mu nsīla syabho mwabhala, 11 ‘Kumwi no lufundu lwa mu lugho lwenyu lwatumukila ku maghūlu gheetu, tulikulukunkumulila ku mwenyu.a Mumānye kubhala, Bhwami bhweke Kabhumba bhwamikoleelela.’ 12 Ndikubhala itye, ifuku lya kukalilwa na Kabhumba, loolo lugho lulokahuulwa kusumba kuhuulwa kwa bhantu bha ku Sodoma.b
Kosyabha ngo sisilikughalaghala
(Matajhu 11:20-24)
13 Komwabha bha mu lugho lwa Kolasini, nomwe bha mu lugho lwa Bhetisaida! Bhukohela maleebha ghonanjīla ku mwenyu, kubha ghanakēlike mu lugho lwa Tiilo no mu lugho lwa Sidoni, bhantu bha mu seesyo ngo ambi bhakaghalaghala. Mu kooko kughalaghala bhanakafwale myenda jhya maghunila bhanesīigha na mafundu. 14 Tukubha, ifuku lya kukalilwa na Kabhumba, kuhuulwa kwenyu kulokabha kukulu kusumba bhantu bha ku Tiilo no ku Sidoni. 15 Nomwe bhantu bha ku Kapelinaumu, mulikulanganyia ti mulotansibhwa mpaka mwi ighūlu? Lekehi, mulosoosibhwa mpaka kusimu.”
16 Kundi Jheesu ghajhililika kubhalomba bhahemba bhaajhe ghaabhala, “Muntu ghwa kumihulikisya umwe, alikunhulikisya nine, ghwa kumituna umwe, alikuntuna nine. Ghoghonse alikuntuna une, alikumutuna ghulya andaghisile.”
Kuheleela kwa bhalya makumi ndwi na bhabhili
17 Kundi bhalya bhahemba makumi ndwi na bhabhili, bhaheleela bhasangabheele, bhamulomba Jheesu bhabhala, “Ee Sifwe Bhusya, kumwi na mamisāgha mabhi kubha twaghakuula kwi isiina lyobhe, ghalikutughubhaha.” 18 Jheesu ghabhalomba kubhala, “Namulōlanga Syetani nalikuhona kufuma mwi ighūlu kobhe nkubha. 19 Akūnga, namiheekesya managha gha kujhima kusumba managha ghonse gha mwimba ghwenyu Syetani. Ku managha ghaagho mulokandagha nsoka na kaamina, no kubha hatuhu sintu sya kumifulasya. 20 Tukubha, musisangabhali bhukohela mamisāgha mabhi bhoghalikumighubhaha, sangabhale bhukohela masiina gheenyu ghamānyiike kwa Kabhumba mwi ighūlu.”
Jheesu ghasangabhala nkana
(Matajhu 11:25-27; 13:16-17)
21 Ghomukubha Jheesu mu leelyo ikunkae, ku Mwēgho Mulafuc ghweke Kabhumba ghasangabhala nkana ghaabhala, “Ee Taata ughwe ujhimile mwi ighūlu na ha bhweleelo, nankusīima. Nankusīima bhukohela ghaagha maghāmbo ghwabhafisa bhakanya masāla na bhaghosibhakulu, ghwabhalānsya bhantu bhakukabha bhesighile kobhe bhaana bhatooli. Bhwene Taata, teetyo gho bhuli bhoghwakatēhanga.” 22 Kabhili ghaabhala, “Taata ghakampa fyonse, ni hatuhu amumānyile Mwana, ni Sye bhuhela. Kabhili ni hatuhu amumānyile Taata, ni Mwana bhuhela, no muntu ghoghonse ghwakukabha Mwana ghatēha kumulānsya.”
23 Kundi Jheesu ghabhabhijhukila bhahemba bhaajhe ghabhalomba kubhala, “Sumbwa menso ghabhwene ghaagha ghomubhwene umwe. 24 Ndikumilomba kubhala bhaghwelaghu bhengi na bhaami bhengi bhakahensanga nkana kughalōla ghaagha ghomubhwene umwe tebhakaghalōlanga. Kumwi no kughahulika ghaagha ghomuhuliike umwe tebhakaghahulikanga.”
Lughēlo lwa Musamalia mutendeke
25 Ikota ghumwi ghwa Kabhāngo ghajhughalala amugheme Jheesu ahulike bhwalakubhala, ghamubhasya, “Ee taata bhuhemba, injīle bhuti akulinga imbe no bhupanga bhwa nfuku syonse?” 26 Jheesu ghamuhindula ghaabhala, “Kabhāngo keke Kabhumba kabhasile bhuti? Ukajhinsi bhuti?” 27 Ghamuhindula ghaabhala, “Mutēhe So Bhusya Kabhumba ghoobhe ku mwēgho ghoobhe ghonse, ku kulanganyia koobhe konse no ku masāla ghoobhe ghonse, na managha ghoobhe ghonse.d Mutēhe ghwamughana ghoobhe kobhe bholitēhile ghwenyene.” e 28 Jheesu ghamubhalila, “Ghwahindula nensa! Ghwajhīla teetyoe, haaho ulobha na bhupanga bhwa nfuku syonse.”
29 Tukubha ghulya ikota ghwa Kabhāngo, akabheele nalikuhensa kwibhiika kubha ti ni mutendeke, ghamubhasya kabhili Jheesu ghaabhala, “Nonwe, ghwamughana ghwane ni ghuuhe?” 30 Jheesu ghamuhindula ghaabhala, “Hakabheele muntu ghumwi, ghakafumanga ku Jhelusalemu, ghasooka kujha ku lugho lwa Jheeliko. Nali mu nsīla, bhamusangana bheefi bhehaghanyi, bhamufuula myenda, bhamuhuula nkana, bhamulēka nali hase kuputunkana. 31 Haaho mupeesi ghumwi ghabha nahitile mu jhilya nsīla, mukubha ghamulōla ghulya muntu, ghahita ku mbali. 32 Teetyoe no Mulawi,f mukubha ghafīka halya ghamulōla ghulya muntu, naagho ghahita ku mbali. 33 Tukubha Musamalia ghumwi, akabheele najhiile ghahita jhilya nsīla. Mukubha ghamulōla ghulya muntu, ghamulōlela sighōngo, 34 ghamukoleelela, ghamusīigha divai na mafuta mu filōnda fyajhe akulinga afisuule, ghamuhamba filōnda fyajhe. Ghamutansya ku lughamba jhya sihōngo syajhe, ghamufela mu nyumba jhya bhanyēnyi, ghabha nalikumutonsya.
35 Mukubha kwasya, ghafumya dinali ibhili,g ghaamuha nyene jhilya nyumba, kundi ghamulomba ghaabhala, ‘Mutonsye muntu ghooghu. Kubha mahela ghaagha ghahwa, une kubha nanheleela, nonkakulīha syonse silokabha syasumba.’ 36 Nonwe, mu bhatatu bhaabha, ni ghuuhe gholikulanganyia kubha ti ni ghwamughana ghwajhe bhwene, ghwamughana ghwa ghulya muntu akabheele ghahuulwa na bheefi bhehaghanyi?” 37 Ghamuhindula ghaabhala, “Ni ghulya ghamulolelanga sighōngo.” Jheesu ghamulomba ghaabhala, “Noghwe kajhe ukakole teetyoe!”
Jheesu mu nyumba jhyeke Maalita no Maliamu
38 Jheesu na bhahemba bhaajhe, bhobhakabheele mu nsīla bhajhiile ku Jhelusalemu, bhafīka mu lugho lumwi. Haaho mwanamukeema ghumwi, ^akabheele najhitilwe Maalita, ghamusangaanila Jheesu mu nyumba jhyajhe. 39 Maalita akabheele no mutoghwajhe akabheele najhitilwe Maliamu. Ikunka leelyo, Maliamu ghakesanga ghajhīkala ha mbalimbali na maghūlu gheke Jheesu, nahulikiisye malāngululo ghaajhe. 40 Tukubha Maalita ghabha nalikusamba na milīmo mingi jhya kumujhemeeta Jheesu. Kundi ghakoleela ghamulomba Jheesu ghaabhala, “Ee Taata Bhusya, tubhwene kubhiiha bhuli mutoghwane ghandēka nendikukola nengwa? Kansi mulombe anfūnaanile!”