Jheesu alikubhalaghiila mintengwe bhaajhe ikumi na bhabhili
(Matajhu 10:5-15; Maaliko 6:7-13)
9
Ifuku limwi Jheesu ghakabheetanga mintengwe bhaajhe ikumi na bhabhili, ghabhaha managha gha kukuula mamisāgha ghonse no kusisya malwele. 2 Kundi ghabhalaghiila kutangaasya Bhwami bhweke Kabhumba, no kusisya bhalwele. 3 Ghabhalomba ghaabhala, “Musitwali kokonse mu lwēndo lwenyu, ajhe ntūbha, ajhe mbughuli, ajhe kaakulya, mahela, ajhe nkanjo ibhili. 4 Nyumba jhyomulokafīkilamo bhamusangaanila, jhyomwajhīkalamo mpaka ifuku lya kubhuuka mu loolo lugho. 5 No mu lugho lobhasilomusangaanila, mu kufuma mu loolo lugho mwakunkumula lufundu ku maghūlua gheenyu.” 6 Kundi bhalya mintengwe bhabhuuka kujha bhatangaasya mu ngo Sikūla Sisogha no kusisya bhalwele honse hobhahita.Mpunda syeke Jheesu silikumusanfya Helode Antipa mu mwēgho
(Matajhu 14:1-12; Maaliko 6:14-29)
7 Helode,b mwami ghwa ku Ghalilaajha, ghahulika mpunda jhya ghonse ghwalikwīla Jheesu. Ghakasanfisibhwanga nkana mu mwēgho bhukohela bhandi bhantu bhakabheele bhalikubhala ti, “Jheesu ni Jhohana Mubhatisi ghasyuka kufuma kusimu.”c 8 Bhandi bhabhala ti, “Ni Elijha ghajhisa kabhili,” na bhandi ti, “Ni ghumwi mu bhalya bhaghwelaghu bha kale ghasyuka.” 9 Tukubha, Mwami Helode ghaabhala, “Jhohana nankamuputanga mutwe, nonwe ni ghanyi alikwīla ghaagho ghondikuhulika?” Ghahensa nkana amulōle.
Jheesu alikubhalaaghisya bhantu elufu itaanu
(Matajhu 14:13-21; Maaliko 6:30-44; Jhohana 6:1-14)
10 Bhalya mintengwe bhaajhe bhobhakabhanga bhaheleela, bhamutānyisya Jheesu maghāmbo ghonse ghobhakolanga. Kundi Jheesu ghabhatwala ghaajha nabho sibhelo mu lugho lwa Bhetisaida. 11 Tukubha linyabhwingi lya bhantu bhobhakabhanga bhamānya koghaajha, bhajha kumulōnda. Jheesu ghabhasangaanila fisogha ghajha kubhalāngulula ighāmbo lya Bhwami bhweke Kabhumba no kusisya bhakabheele na malwele.
12 Mukubha ghwabha mugholo, bhalya ikumi na bhabhili, bhamujhiila bhabhala, “Bhataabhule bhantu aleke bhaajhe mu ngo no mu mabhāla ghali mu bhwihibhwihi bhakahense fyakulya na ha kulaala, bhukohela hanu hotuli ni he isēnga lyamwenga.” 13 Jheesu ghabhahindula ghaabhala, “Bhaheekesye umwe mwebheene fyakulya.” Bhamuhindula bhabhala, “Ufwe tetuli nafyo fya kubhakwila, hali mabhu ataanu na masembe abhili bhuhela. Mbala tujhe tukaghūle fyakulya fya kwikuta bhantu bhonse bhaabha.” 14 Leelyo ifuku bhantu bhakabheeleho, bhanabhaghoosi bhakabheele kobhe elufu itaanu. Kundi Jheesu ghabhalomba bhahemba bhaajhe, “Bhalombe bhēkale masundo gha bhantu makumi ataanu ataanu.” 15 Kundi bhahemba bhaajhe bhaajhīla kobhe bhobhalombwanga, bhabhekasya bhantu bhonse. 16 Naagho Jheesu ghaghatwala ghalya mabhu ataanu na ghalya masembe abhili, ghakūnga mwi ighūlu, ghafitendajhyukila kwa Kabhumba, ghametula ghabhaheekesya bhahemba bhaajhe bhabhaghabhulile bhantu. 17 Bhantu bhonse bhaalya, bhajhikuta. Bhahemba bhaajhe bhakomenkanyia fyakasīibhilanga, ghabhumbika makapo ikumi na abhili.
Petelo alikutenda ghafuminkanyia kubha ti Jheesu ni Muhosya
(Matajhu 16:13-19; Maaliko 8:27-29)
18 Ifuku limwi Jheesu akabheele sibhelo nalikutendajhyuka kwa Kabhumba. Bhahemba bhaajhe bhakabheele kumwi naajhe, ghabhabhasya, “Bhantu bhakombalako ghanyi?”
19 Bhahindula bhabhala, “Bhandi bhalikubhala ti ughwe uli Jhohana Mubhatisi, bhandi Elijha, bhandi ni mu bhalya bhaghwelaghu bha kale ghasyuka.”
20 Kundi ghabhabhasya kabhili, “Umwe nomwe mulikumbalako ghanyi?” Petelo ghahindula ghaabhala, “Ughwe ghoghwe Muhosya ghwa kufuma kwa Kabhumba.”
Jheesu alikutenda mpola sya kufwa no kusyuka kwajhe
(Matajhu 16:20-28; Maaliko 8:30-9:1)
21 Kundi Jheesu ghabhakabha bhasimulombi muntu ghoghonse seesyo mpola, 22 ghaabhala, “Une Mwana ghwa Muntu ndokabhunusibhwa nkana. Bhaghosibhakulu, bhapeesi bhakulu na bhamakota bha Kabhāngo keke Musa bhalokantuna. Ndokajhihaghwa, tukubha mwi ifuku lya bhutatu ndokasyulwa.”
23 Ghabhalomba bhantu bhonse kubhala, “Muntu ghoghonse ^alikuhensa kunōnda, ahenseelwe ghasumbula ghaliihala, ghalitwika musalabha ghwajhe nfuku syonse, ghalōndekana none. 24 Muntu ghoghonse ^alikuhensa kusisya bhupanga bhwajhe, alobhutaagha. Tukubha ghooghuli ^alobhutaagha bhupanga bhwajhe nali kuli une, ghoogho ghwalobhusisya. 25 Alopātaho si muntu kubha ghabha ne fintu fyonse fya ha bhweleelo, ghabhulwa bhupanga bhwajhe bhwa nfuku syonse? 26 Muntu ghoghonse ^alondōlela nsonyi une na malāngululo ghaane, none Mwana ghwa Muntu ndokamulōlela nsonyi ghoogho muntu ifuku lya kwisa no bhukulu bhwane, no bhweke Taata hamwi no bhweke misambwad bhasila kanyanyala. 27 Ndikubhala bhwene, hali na bhandi mu umwe mujhughalele haaha, tebhafwe mpaka bhabhulōla Bhwami bhweke Kabhumba.”
Jheesu alikuhīnduka bhusyu
(Matajhu 17:1-8; Maaliko 9:2-8)
28 Kobhe nfuku munane nahwile kutenda ghaagho maghāmbo, Jheesu ghakabhatwalanga Petelo, Jhohana no Jhakobho, ghaajha nabho ku musosi mukatendajhyuka. 29 Mukubha nalikutendajhyuka, bhusyu bhwajhe bhwahīnduka, myenda jhyajhe jhyabha milafulafu jhilikujhengajhenga. 30 Haaho halōleka bhantu bhabhili bhalikusāhula naajhe, na bhaabho bhantu bhakabheele ni Musae no Elijha. 31 Bhaabho bhalōleka bhalikujhengajhenga, bhalikusāhula no Jheesu ku lufu lwajhe lwakabheele nali ha bhwihi kukwisya, kooko ku Jhelusalemu.
32 Mukubha filikukoleka feefyo, Petelo na bhenaajhe bhakabheele bhalikughōna. Bhobhakabhanga bhahalamuka, bhalōla bhukulu bhweke Jheesu bhuli bhwalikujhengajhenga, bhabhalōla na bhalya bhantu bhabhili bhwakabheele nabho. 33 Bhaabho Musa no Elijha mukubha bhalikulekunkana no Jheesu, Petelo ghamulomba Jheesu ghaabhala, “Munyampala, ni fisogha tubhe hanue, tughubhake nkambi itatu, jhimwi jhyakoobhe, jhimwi jhyeke Musa ne jhindi jhyeke Elijha.” Ghakatendanga ghaagho bhusila kumānya fyalikutenda.
34 Nasyali no kuhwa kutenda ghaagho, hajhisa ifūmbe lyabhafimbila. Bhobhakabhanga bhajhingila mu leelyo ifūmbe, bhaghubhaha nkana. 35 Silongo syahulikika kufuma mu leelyo ifūmbe kubhala, “Ghooghu gho Mwanaane ghonankasāaghula, muhulikisye.” 36 Bhosyakabhanga syahita seesyo silongo, Jheesu ghalōleka najhughalele ghongwae. Bhahemba bhaajhe bhafihumbula, mu seesyo nfuku tebhakatenda ku bhantu ghaagho ghobhalōlanga.
Jheesu alikumusisya mutwana kanya limusāgha
(Matajhu 17:14-18; Maaliko 9:14-27)
37 Mulāabho ghwajhe, Jheesu na bhalya bhahemba bhaajhe bhatatu, bhobhakabhanga bhasooka kufuma ku musosi, ghasangaana na mulēgha ghwa bhantu bhengi. 38 Muntu ghumwi kufuma mu ghoogho mulēgha ghamutangiila ghaabhala, “Ee taata bhuhemba, ndikusēegha umukūnganyie mwanaane, bhukohela ni ghooghoe ghondi naajhe. 39 Akūnga, akobha teghajhisilwa na limusāgha ibhi ketelyamusūla kuloloma nkana. Likomujhughanyia lyamughwisya hansi ghabha kobhe mulwele ghwa silungufwa, kooku nalikufuntuka ifulo ku kanywa. Telikosīngwa lyamufumako, likomupaminkisya nkana. 40 Nambasēeghanga nkana bhahemba bhoobhe bhalikuule, lyabhapoota.” 41 Jheesu ghahindula ghaabhala, “Ale nfuuke jhisimwisighile Kabhumba, jhyakataajhika, imisīkisye mwēgho no kwīkala nenyu mpaka ifuku si?” Kundi ghamulomba ghoogho muntu, “Mulente hanu mwanoobhe.”
42 Ghulya mutwana mukubha najhiile kwa Jheesu, limusāgha lyamughwisya hansi, lyajha kumughalaghasya. Tukubha Jheesu ghalikuula lilya limusāgha limufumeko, ghamusisya mwana, ghamukabhisya kwa sye. 43 Bhantu bhonse bhakabheeleho bhobhakabhanga bhalōla managha makulu gheke Kabhumba, bhalikosa mahi nkana.
Jheesu alikutenda mpola sya kufwa kwajhe kabhili
(Matajhu 17:22-23; Maaliko 9:30-32)
Haaho mukubha bhasyali bhalikwikosa mahi, Jheesu ghabhalomba bhahemba bhaajhe ghaabhala, 44 “Hulikisye nensa ghaagha ghondikuhensa kumilomba, Mwana ghwa Muntu ali kwihi kufelwa mu mabhoko gha bhemba.” 45 Tukubha bheene tebhakamānyanga ti kubhala bhoobho ni kubhala bhuti. Ghaagho ghakafiswanga kumwabho akulinga bhajhīkale bhusila kumānya, bhanaghubhaha no kubhasya.
Ni ghanyi alakubha mukulu
(Matajhu 18:1-5; Maaliko 9:33-37)
46 Bhahemba bhaajhe bheke Jheesu bhajha kusoola, ni ghanyi ali mukulu kusumba bhenaajhe. 47 Jheesu bhoghakabhanga ghamānya fyobhalikulanganyia, ghakatwalanga mutwana mutooli ghamubhiika ha bhwihi naajhe. 48 Haaho ghabhalomba ghaabhala, “Ghoghonse ghwa kumupokeela mwana mutooli kobhe ghooghu kwi isiina lyane, alikumpokeela nine. No ghoghonse alikumpokeela une, alikumupokeela ghooghuli andaghisile. Bhukohela ali mutooli mu umwe mwense, ghoogho gho mukulu kusumba mwense.”
Asihisyunkene nomwe ali luhande lwenyu
(Maaliko 9:38-40)
49 Jhohana ghamulomba Jheesu ghaabhala, “Ee munyampala, twalōlanga muntu nalikukuula mamisāgha kwi isiina lyobhe, twamulēsya, bhukohela tetukokola mulīmo kumwi naajhe.” 50 Jheesu ghamuhindula ghaabhala, “Musimulēsi, bhukohela ghoghonse asihisyunkene nomwe, ali luhande lwenyu.”
Bhasamalia bhalikutuna kumupokeela Jheesu
51 Bhosyakabhanga nfuku syajhe sya kughulusibhwa mwi ighūlu syakoleela, ghakajhelekesyanga masāla ajhe ku Jhelusalemu. Ghasumbula kujhako. 52 Kundi ghabhalaghiila bhantu bhamulombole mu lugho lwa mu sihugho sya Samalia,f bhamujhōojhisye ha kubha. 53 Tukubha bheene lugho tebhakamusangaanilanga, bhukohela bhwakabheele ghajhelekesya masāla ghaajhe ku Jhelusalemu. 54 Bhahemba bhaajhe Jhakobho no Jhohana bhobhakabhanga bhalōla bhoobho bhabhala, “Ee Sifwe Bhusya, mbele tusone mulīlo kufuma mwi ighūlu ghusooke ghubhahiisye?” 55 Jheesu ghabhabhijhukila ghabhakabha. 56 Haaho Jheesu na bhahemba bhaajhe bhabhuuka bhaajha mu lundi lugho.
Bhukaka bhwa kumulōnda Jheesu
(Matajhu 8:19-22)
57 Bhobhakabheele mu nsīla, muntu ghumwi ghamulomba Jheesu, “Nankukulōnda kokonse koloojha.” 58 Jheesu ghamuhindula, “Mambwe ghali na makelo, manyōnyi ghali na meesa, tukubha Mwana ghwa Muntu tali na ha kupeekama.”
59 Jheesu ghamulomba ghundi muntu kubhala, “Nōnde.” Tukubha ghoogho muntu ghaabhala, “Ee Taata Bhusya ntabhule nyinambele inje inkamusiike taata.” 60 Jheesu ghamuhindula ghaabhala, “Bhalēke bhasimwisighile Kabhumba bhasiike bhahele bhaabho, tukubha ughwe kajhe ghwatangaasya Bhwami bhweke Kabhumba.”