Bhanabhakeema bhalikulōndekana no Jheesu
8
Kafumilo ka haaho Jheesu ghakajhanga ghahita mu ngo nkulu ne ntooli, nalikutānyia no kulāngulula Sikūla Sisogha sya Bhwami bhweke Kabhumba. Bhalya ikumi na bhabhili bhakabheele kumwi naajhe. 2 Hamwi na bhaabho hakabheele na bhanabhakeema ^bhakabheele ne ndwala jhya mamisāgha mabhi na ghandi malwele Jheesu akabheele ghabhasisya. Mu bhaabho bhanabhakeema, akabheelemo no Maliamu, lindi isiina Maghidalenaa ^akabheele na mamisāgha ndwi Jheesu akabheele ghaghakuula. 3 No Jhoana muka Kuusa, akabheelemo. Kuusa ghwakabheele najhughalalile fikwalango fyeke mwami ha lugho ha Helode. Kabhili akabheelemo no Susana na bhandi bhanabhakeema bhengi, ketebhafumya fintu fyabho kubhalaaghisya Jheesu na bhahemba bhaajhe.
Lughēlo lwa mubhyala mbuto
(Matajhu 13:1-9; Maaliko 4:1-9)
4 Ifuku limwi bhantu bhengi bha kufuma mu sindi ngo, bhakabheele bhamukomenkanila Jheesu, ghatenda lughēlo ghaabhala, 5 “Mubhyala mbuto ghumwi ghakajhanga mu kabhyala mbuto syajhe. Mukubha nalikubhyala, sindi mbuto syahonela mu nsīla, bhahita nsīla bhasikandagha na manyōnyi ghasilya. 6 Sindi mbuto syahonela kwi itandala, bhosyakabhanga syamēla syajha kughuma bhukohela sifi hatuhu. 7 Sindi mbuto syahonela ha menfwa syakulila hamwi, ghalya menfwa ghasūla matoosi. 8 Sindi mbuto syakahonelanga ha bhulongo bhusogha, syamēla syaha fisogha, mbuto jhimwi jhyaha ighāna.” Bhoghakabhanga ghahwa kutenda ghaagho, kundi ghaabhala, “Ali na matwi gha kuhulika na ahulike.”
Syakasūlanga keteghalāngulula ku ngēlo
(Matajhu 13:10-23; Maaliko 4:10-20)
9 Bhahemba bhaajhe bhamubhasya, “Kusumuulila lughēlo loolu ni kubhala bhuti?” 10 Ghabhahindula ghaabhala, “Umwe mwakaheebhwa kumānya fintu fyobhasijhinsi bhandi fya Bhwami bhweke Kabhumba. Tukubha, bhandi ndikubhalomba ku ngēlo, akulinga,
‘Singa bhakūnga, bhasilōli.
Singa bhahulika, bhasimānyi.’b
11 Kusumuulila lughēlo loolu ni kubhala itye, mbuto ni Ighāmbo lyeke Kabhumba. 12 Silya syakahonelanga mu nsīla, ni bhantu bhakohulika Ighāmbo lyeke Kabhumba, kundi Syetani ghajhisa ghalifumyamo mu myēgho jhyabho, akulinga bhasimwisighi bhasābhuke. 13 Silya syakahonelanga kwi itandala ni bhantu bhakohulika Ighāmbo lyeke Kabhumba, bhasangabhala kulipokeela, tukubha bhali kobhe mbuto sya bhusila misii. Bhaabho bhakoliisigha mafuku matooli, kubha bhaaghemwa tebhakolaasa. 14 Silya syakahonelanga ha menfwa, ni bhantu bhakohulika Ighāmbo lyeke Kabhumba, kundi bhaghwa mu ghandi gha kusamba, iitama lya mahela, ne iitama lya fintu fya ha bhweleelo. Bhaabho tebhakoha majhābho ghaakoma fisogha. 15 Ne silya syakahonelanga ha bhulongo bhusogha, ni bhantu bhakohulika Ighāmbo lyeke Kabhumba bhanalinigha ku mwēgho ghonse, bhajhīkala mu ghalya malāngululo, bhaaha fisogha ku kusīkya myēgho.
Lughēlo lwa kamūni
(Maaliko 4:21-25)
16 Hatuhu muntu ^akokwamika kamūni kundi ghakafundikila na nkono, ajhe kukabhiika mwi italala lya bhulīli. Akotansya ha bhutala, akulinga bhantu mu kwingila habha halafile. 17 Hatuhu maghāmbo ghafindikisibhwe, ghasilokalubhuka halafu. Ne fintu fyonse fifisilwe, filomānyika fyabha halafu. 18 Nonwe hulikisye fisogha, muntu ghoghonse anighile malāngululo ghaane, aloghungilisibhwa masāla. Tukubha ghoghonse asinighile malāngululo, kumwi na kalya katooli kwabhele nako aloghanyukwa.”
Nyina na bhamughana ghwajhe bheke Jheesu
(Matajhu 12:46-50; Maaliko 3:31-35)
19 Kundi unyina na bhamughana ghwajhe bheke Jheesu, bhajhisa mu kumulōla. Tukubha tebhakakobholanga kukoleela ha bhwihi naajhe bhukohela bhantu bhakabheele bhengi nkana. 20 Sikūla syamufīkila kubhala, “Nyoko na bhamughana ghoobhe bhali hanse bhalikuhensa kukulōla.” 21 Jheesu ghabhahindula ghaabhala, “Bhantu bhonse bhahulikisye Ighāmbo lyeke Kabhumba bhanalilōnda, bhaabho gho maajho na bhamughana ghwane.”
Jheesu alikuhosya lukugha
(Matajhu 8:23-27; Maaliko 4:35-41)
22 Ifuku limwi Jheesu ghabhalomba bhahemba bhaajhe, “Tughambuke ku lwambuko na tanganika.” Bhatanda mu bhwato bhajha kughambuka. 23 Mukubha bhalikughambuka, Jheesu ghaghōna tulo. Mwasūlika musāgha ghwa lukugha mu tanganika mwabha mabhīmbi. Bheene bhaghubhaha kufwa bhukohela bhwato bhwakajhanga kwingilamo mansi, hase bhunyike.
24 Bhahemba bhaajhe bhamujhiila Jheesu bhamuhalamusya bhabhala, “Ee Sifwe Bhusya, Sifwe Bhusya, twafwa twahela!” Jheesu ghahalamuka, ghaghukalihila musāgha ghwa lukugha, mabhīmbi ghaalēka, tanganika jhyatuulama. 25 Jheesu ghabhabhasya bhahemba bhaajhe, “Kwisigha kwenyu umwe kuli ihee?” Bhahemba bhaajhe fyabhalubha, bhalibhasya, “Ni ghanyi ghooghu ghwakukabha ghakaliha musāgha na mabhīmbi fyamuhulika?”
Jheesu alikumusisya kanya mamisāgha mabhi
(Matajhu 8:28-34; Maaliko 5:1-20)
26 Kundi Jheesu na bhahemba bhaajhe bhaghambuka ku lwambuko na Ghalilaajha, bhafīka mu sihugho sya Bhaghelasi. 27 Bhobhakabhanga bhatikila kwi isinsi lya sihugho sya Ghelasi, Jheesu ghasangaana na Mughelasi ghumwi ^akabheele ne ndwala jhya mamisāgha. Jheejhyo ndwala akabheele najhyo nfuku singi, keteghalyāta bhufuula, tyakabheele najhīkeele ha lugho, akabheele najhīkeele ku malaalo.
28 Bhoghakabhanga ghulya mulwele ghamulōla Jheesu, ghakalolomanga kundi ghaghwa hansi ha mbele jhyajhe. Ghulya kanya mamisāgha ghatenda ku silongo sikulu ghaabhala, “Ni sighanyi sili hakati une noghwe Jheesu Mwana ghweke Kabhumba Mukulu ghwa Fyonse? Ndikukusēegha nkana undēke nosinfulaasi.” 29 Ghakabhalanga teetyo bhukohela Jheesu akabheele ghalilomba leelyo limusāgha limufumeko ghoogho muntu. Leelyo limusāgha likabheele tusi lyamukumbae ku managha. Ketebhamuhamba mighīla ku mabhoko no ku maghūlu bhamuhembelele, hamwi ne teetyo keteghajhiputa. Kabhili leelyo ketelyamulyasya mwi isēnga bhusila kwimānya.
30 Jheesu ghamubhasya, “Isiina lyobhe uli ghanyi?” Ghamuhindula, “Lubhugha,” bhukohela akabheele na mamisāgha mengi nkana. 31 Ghalya mamisāgha ghamulebhelesya nkana nasighakuuli ghaajhe mu liina ileehe.c
32 Kansi luhande loolo hakabheele no mulēgha ghwa ngulubhe silikukemwa mu njegheelo jhya musosi. Gho mukubha ghalya mamisāgha ghamwighongeela nkana aghaswēsye ghaajhe mu mulēgha ghwa ngulubhe. Kundi ghaghaswēsya. 33 Mamisāgha ghamufumako ghulya muntu ghaajha mu mulēgha ghwa ngulubhe, mulēgha ghonse ghwa ngulubhe ghwasooka lubhilo nkana kujha mu mansi, mosyafwila.
34 Bhalya ^bhakabheele bhalikukema ngulubhe bhobhakalōlanga bhoobho, bhakajhilukanga bhaajha bhalikulalaasya seesyo mpola mu lugho no mu mahala. 35 Bhantu bhobhakabhanga bhahulika ghaagho, bhakanyalikanga kujha mukalōla bhofyabha. Mukubha bhafīkaho hwakabheele Jheesu, bhamusangana ghulya muntu ^akabheele ghakuulwa mamisāgha, najhīkeele mu maghuli ibhānda gheke Jheesu. Naagho nali na masāla ghaajhe ghakwiliile, nafwite ne myenda. Bhobhakalōlanga ghaagho bhaghubhaha nkana. 36 Bhalya bhakalōlanga bhuli bhofyabha, bhatānyia ku bhandi bhuli ghoogho muntu bhoghasisibhwa no Jheesu. 37 Bhekasi bha mu sihugho sya Bhaghelasi bhaghubhaha nkana. Bhamulebhelesya Jheesu nasīkali mu sihugho syabho. Kundi Jheesu ghatanda mu bhwato ghaajha.
38 Mukubha Jheesu nalikubhuuka, ghulya ^akabheele ne ndwala jhya mamisāgha, ghamulebhelesya nkana Jheesu. Unyene ghahensa ti amulōnde, tu Jheesu ghamutāahya ghaabhala, 39 “Heleela ku lugho ukatānyie bhuli fyoghakwīlila Kabhumba.” Kundi ghaheleela ghaajha ghatānyia lugho lonse maghāmbo ghonse ghoghamwīlila Jheesu.
Jheesu alikumusisisya mwanamukeema no kumuhembuula ghwa Jhailo
(Matajhu 9:18-26; Maaliko 5:21-43)
40 Kundi Jheesu bhoghakabhanga ghaheleela bhamusangaanila fisogha bhukohela bhakabheele bhamuhembeele. 41 Haaho hajhisa muntu ghumwi isiina lyajhe Jhailo, akabheele mukulu ghwa nyumba jhya kusangaanilamo Bhajhahudi. Ghafīka ghaghwa mu maghūlu ibhānda gheke Jheesu ghamusēegha ajhise hamwajhe, 42 bhukohela mwanaajhe muhāla ghwa myaka ikumi ne ibhili akabheele nafuukile ghongwae ali kwihi kuputunkana. Jheesu mukubha najhiileko, lūuli lwa bhantu bhengi bhamulibhisya.
43 Mu loolo lūuli mukabheele no mwanamukeema ^akabheele ne ndwala jhya musōnga ku myaka ikumi ne ibhili. Akabheele ghakahwikisya fintu fyajhe mu bhafumo bhusila kulōla muntu ghwa kumusisya. 44 Kundi ghulya mwanamukeema ghaajha mu mughōngo ghweke Jheesu ghafīka ghakuumya ipindo lya mwenda ghweke Jheesu, haahoe ndwala jhyajhe jhyasila. 45 Jheesu ghabhasya, “Ni ghanyi ghankuumya?” Bhantu bhonse bhatuna. Kundi Petelo ghamulomba Jheesu ghaabhala, “Ee Sifwe Bhusya, kūnga lūuli lwa bhantu bhobhakulibhisya.” 46 Jheesu ghaabhala, “Hali muntu ghankuumya. Mbwene managha ghaane gha kusisya ghakola mulīmo.” 47 Ghulya mwanamukeema bhoghakabhanga ghaalōla kubha ti tyanakobhola kufisama, ghalilubhusya ha mbele jhyeke Jheesu nalikusughuma na bhoobha.d Ghafīka ghasukama, ghajha kutenda ku bhantu bhonse fyasūlanga ghakuumya ipindo lya mwenda ghweke Jheesu, no bhuli bhoghasila ndwala jhyajhe haahoe. 48 Jheesu ghamulomba ghaabhala, “Mwanaane, kwisigha koobhe gho kwakusisya. Lyāta maholo.”
49 Mukubha Jheesu nalikutānyia ghaagho, hajhisa muntu kufuma ku lugho kwa Jhailo. Ghoogho ghafīka ghamulomba Jhailo ghaabhala, “Mwanoobhe ghasumaalika nosimusanfi so bhuhemba.” 50 Tukubha Jheesu bhoghakahulikanga ghaagho, ghamulomba Jhailo ghaabhala, “Nosisūpi ughwe liisighe, mwanoobhe alakusila.”
51 Bhoghakabhanga ghafīka ha lugho ha Jhailo, ghabhalēsya bhandi bhasijhingili mu nyumba, ghakengilangamo unyene, Petelo, Jhohana no Jhakobho, sye ghwa mwana no nyina bhuhela. 52 Bhantu bhonse bhakabheele bhalikulīla, kumulīlila ghoogho muhāla. Tukubha Jheesu ghabhalomba, “Lēke kulīla ghooghu muhāla tyafwile, ghaghōna tu tuloe.” 53 Bhantu bhamujhangalika nkana, bhukohela bhakabheele bhajhinsi kubha ti ghasumaalika.
54 Kundi Jheesu ghamunigha ku kubhoko, ghamutangiila, “Mutwana, bhuuka.” 55 Leelyo ikunkae ghulya muhāla ghahembuuka, ghabhuuka. Jheesu ghasemesya bhamuheekesye fyakulya ghulya muhāla. 56 Bhafyasi bhaajhe bhalikosa mahi nkana, tukubha Jheesu ghabhalēsya bhasitendi ku bhantu feefyo fyoghajhīla.