Luuka 7

Munyampala ghwa Siluumi alikumwisigha Jheesu

(Matajhu 8:5-13)

Bhoghakabhanga Jheesu ghakwisya kutenda maghāmbo ghaagha ghonse bhantu bhaghahulika, ghakajhanga ku lugho lwa Kapelinaumu. 2 Ukooko kukabheele no munyampala ghwa bhasilikale akabheele no musya ghwajhe ghwakukabha namutēhile nkana. Ghoogho musya akabheele mulwele nkana. 3 Ghoogho munyampala bhoghakabhanga ghahulika mpunda syeke Jheesu, ghakalaghilanga bhaghosibhakulu bha Bhajhahudi bhakamulombe Jheesu ajhise amusisye musya ghwajhe. 4 Bhobhakabhanga bhafīka kwa Jheesu, bhamulebhelesya nkana bhabhala, “Ghooghu muntu ni fisogha ghafūnaanilwa, 5 Bhukohela ghooghu asitēhile sihugho syetu, ghwatughubhakiile ne nyumba jhya kusangaanilamo.”

6 Kundi Jheesu ghalōndekana nabho bhalya bhaghosibhakulu, bhasyali ku nsīla, ghulya munyampala ghalaghiila bhanywanyi bhaajhe bhamulombe Jheesu, “Taata Bhusya nosisambi kwisa mu nyumba jhyane nsisusene noghwe kwingila mu nyumba jhyane. 7 Fyasūlanga nandaghiila nandōlanga une nsineesa koli, tukubha tenda tue ighāmbo musya ghwane alakusila. 8 Bhukohela une ndi na bhankuliile, kabhili une none ndi na bhasilikale bhali heefo jhyane, bhwenakobhola kubhalomba kubha ti, ‘Kajhe,’ ghaajha, ajhe ‘Jhisa,’ ghajhisa. Kabhili nkobhwele namulomba musya ghwane, ‘Kola ne leeli,’ ghakola.”

9 Jheesu bhoghakabhanga ghahulika ghaagha maghāmbo ghakekosanga mahi nkana, ghabhijhukila lulya lūuli lwa bhantu ^bhakabheeleho ghaabhala, “Singa tu mu Bhesilaheeli nsinalōle muntu kanya kwisigha kukulu kobhe kooku!” 10 Bhalya bhantu bhakalaghilwanga kwa Jheesu bhobhakaheleelanga ku lugho, bhasangana ghulya musya ghasila.

Jheesu alikumusyula mulughalugha ghweke mulekwa

11 Lyalikahita ikunka, Jheesu na bhahemba bhaajhe no lūuli lweneene lwa bhantu, bhakajhanga mpaka ku lugho lumwi lujhitilwe Naini. 12 Bhoghakabhanga ghakoleela ha musīgho ghwa lugho, ghasangaana na bhantu bhatwite mulāmbo ghwa mulughalugha afuukile ghongwae. Ghooghu nyina ni mulekwa ghakafwilwa ne ibha, na bhantu bhengi mu lugho bhali kumwi naajhe. 13 Sifwe Bhusya bhoghakabhanga ghamulōla ghoogho mufwilwa, ghamulōlela sighōngo, ghaabhala, “Humbula kulīla.” 14 Kundi ghakoleela ha bhwihi, ghafīka ghakuumya kalya kasalaghano, bhantu ^bhakabheele bhatwite, bhajhughalala. Ghaabhala, “Mulughalugha, ndikukubhalila, bhuuka.” 15 Ghulya ^akabheele ghasumaalika, ghabhuuka, ghajhīkala, ghajha kutenda. Jheesu ghamukabhisya kwa nyina.

16 Bhantu bhonse bhaghubhaha, bhabha na syubhaho, bhajha kumutiikisya Kabhumba bhabhala, “Twafīkilwa na mughwelaghu mukulu kumwetu, Kabhumba ghajhisa mu kubhafūnaanila bhantu bhaajhe.” 17 Mpunda jhya fyonse fyakabheele nalikukola Jheesu, jhyakwila honse mu Jhudea no mu fihugho fyonse fya ha bhwihi.

Jheesu no Jhohana Mubhatisi

(Matajhu 11:2-19)

18 Bhahemba bheke Jhohana bhamutānyisya Jhohana Mubhatisi ghaagho ghonse ghwakabheele nalikwīla Jheesu. Jhohana ghajhita bhabhili mu bhahemba bhaajhe, 19 ghabhalaghiila kwa Sifwe Bhusya bhamubhasye kubhala, “Ughwe ghoghwe Muhosya ghulya ajhisile, ajhe tukūngilile ni ghundi?” 20 Bhobhakabhanga bhafīka kwa Jheesu, bhamubhalila, “Jhohana Mubhatisi ghatulaghila tukubhasye, ‘Ughwe ghoghwe Muhosya ghulya ajhisile, ajhe tukūngilile ni ghundi?’”

21 Mu leelyo ikunkae, Jheesu ghakabhasisyanga bhantu bhengi malwele ghaabho ghonse, ghabhasisya na bhakabheele na mamisāgha mabhi, na bhahofu bhengi ghabhasisya menso bhajha kulōla. 22 Jheesu ghabhahindula bhalya bhahemba bheke Jhohana ghaabhala, “Kajhe mukamutānyisye Jhohana ghonse ghomwalōla no ghomwahulika. Bhahofu bhabhwene, fisyeta bhalikulyāta, bhakanya mpōngo bhalikusila, bhakafumbo bhalikuhulika, bhafu bhalikusyuka na bhapīina bhalikutangasisibhwa sikūla sisogha. 23 Sumbwa muntu ghulya asili ne nfūno none.”

24 Bhobhakabhanga bhaajha bhalya bhahemba bheke Jhohana, kundi Jheesu ghajha kubhalomba lūuli lwa bhantu bhakabheeleho mpunda syeke Jhohana, “Langaanyienge tu, mukabhuukile kujha mwi isēnga mukakūnga si? Mukalōla bhwasi bhobhulikutengana no musāgha? 25 Kubha fisili bhoobho, mwajhanga mukalōla si? Muntu afwite myenda jhya majhemi? Ahulikisye, bhantu bhali ne myenda jhya majhemi jhya mahela mengi, bhēkeele mu majhumba gha bhaami. 26 Nonwelo, mwabhuukanga kujha mukalōla si? Mukalōla mughwelaghu? Ni bhwene ughoogho te mughwelaghu bhuhela, asunfile no mughwelaghu. 27 Ughoogho Jhohana ghwatendelelwe no mughwelaghu Malaki kubhala,

‘Kūnga ndikumulaghiila muntengwe ghwane akulombolele,

aleke akujhōojhesye nsīla.’”

28 Jheesu ghalōnsya ghaabhala, “Mu bhantu bhonse ha bhweleelo ni hatuhu mukulu ghwa kusumba Jhohana. Tukubha ghooghuli ali mutooli mu bhonse mu Bhwami bhweke Kabhumba, gho mukulu hali Jhohana.”

29 Ikunka leelyo bhantu bhonse kumwi na bhakanya kulīhiisya makomo bhobhakabhanga bhahulika maghāmbo gheke Jheesu, bhakamwisighanga Kabhumba, bhukohela bhaabho bhakabhatisibhwanga na Jhohana. 30 Tukubha, Bhafalisaajho na bhamakota bha Kabhāngo keke Musa bhakatunanga malaghi gheke Kabhumba, bhukohela tebhakabhatisibhwanga na Jhohana.

31 Jheesu ghaabhala, “Imbasusanyie nasi bhantu bha jheejhi nfuuke? Bhasusene na sighanyi? 32 Bhasusene na bhatwana ^bhakabheele bhajhīkeele mwi ighulilo, bhalikutenda ku bhenaabho kubhala,

‘Twamihuulilanga ngōma,

tukubha temwakinanga,

twamijhimbilanga nyimbo sya bhulanda,

tukubha temwalīlanga.’

33 Jhohana bhoghakesanga, tyakabheele ghaalya ibhu, tyakabheele ghanywa divai, umwe mulikubhala ti, ‘Ali na mamisāgha.’ 34 Une Mwana ghwa Muntu nankeesa ndikulya na nanywa, umwe mulikubhala, ‘Kūnge ghwa kalya, munywa maalwa, munywanyi ghwabho bhakanya kulīhiisya makomo na bhakanya bhubhi kwa Kabhumba.’ 35 Tukubha masāla gheke Kabhumba, ghalōleeke ni gha bhwene ku bhantu bhaajhe bhaghaswele.”

Mwanamukeema kanya bhubhi kwa Kabhumba ghalesibhwa

36 Limwi ifuku Mufalisaajho ghumwi ghakamwitanga Jheesu mu nyumba jhyajhe, ghamuteekela fyakulya. Kundi Jheesu ghajhingila mu nyumba jhyeke ghulya Mufalisaajho, ghajhīkala ha fyakulya. 37 Mu lulya lugho, mukabheele no mwanamukeema ghumwi, akabheele no bhubhi kwa Kabhumba. Ghoogho mwanamukeema bhoghakabhanga ghahulika kubhala ti, “Jheesu alikulya fyakulya mu nyumba jhyeke Mufalisaajho,” ghakajhanga ne nsupa jhya alabhasita jhibhumbike mafuta manyunkilile. 38 Ghafīka ha maghūlu gheke Jheesu ghajha kulīla, ndiilo silikutonyela ku mpambala syeke Jheesu. Mu kusyambula ndiilo, teghasyambusya na nyele syajhe, kooku nalikumusyusyuta na kanywa nalikumusīigha na ghalya mafuta manyunkilile.

39 Ghulya Mufalisaajho ^ghakamwitanga, ghajha kulanganyia mu mwēgho kubhala, “Ghooghu muntu ambi nali mughwelaghu fyene, anamānye kubhala ti ghooghu mwanamukeema alikumukuumya ni ghwa bhuti, kubha ti ni muntu ghwa bhubhi kwa Kabhumba.” 40 Kundi Jheesu ghaabhala, “Simoni ndi na sibhalwa sya kukutānyisya.” Simoni ghahindula ghaabhala, “Tānyia, Taata bhuhemba.” 41 Ghaabhala, “Hakabheele muntu ghumwi ^akabheele nabhatiisile bhantu bhabhili, ghumwi nalikumwimukila dinali maghāna ataanu, ghwa bhubhili dinali makumi ataanu. 42 Bhobhakabhanga bhapootwa kumulīha, ghakabhalōlelanga sighōngo bhonse bhabhili ghaalēka kubhajhimukila. Mu bhaabho bhabhili ni ghuuhe alomutēha kusumba mwinaajhe ghulya ^akabheele nalikubhajhimukila?” 43 Simoni ghahindula kubhala, “Bhombwene ni ghooghuli ^akabheele nalikujhimukilwa silingi singi hali mwinaajhe.” Jheesu ghaabhala, “Ghwabhala fyene.”

44 Kundi Jheesu ghamubhijhukila ghulya mwanamukeema, ghamulomba Simoni, “Umubhwene ghooghu mwanamukeema? Nanyingilanga mu nyumba jhyobhe, teghwampekesyanga mansi gha kunyaagha ku mpambala. Tukubha ghooghu mwanamukeema ghatonyisya ndiilo syajhe ku mpambala syane ghanasyambusya na nyele syajhe. 45 Ughwe teghwamposyanga ku kunsyusyuta na kanywa koobhe, ghooghu mwanamukeema kusumbulila honanjisilanga tyalēkilehi kunsyusyuta mpambala syane. 46 Tunsīighile mafuta ku mutwe gha kunjemeeta, tu ughooghu ghansīigha mafuta manyunkilile ku mpambala syane. 47 Nonwe ndikukubhalila itye, ghooghu mwanamukeema ghalesibhwa bhubhi bhukulu kwa Kabhumba, gho fyasūlanga ghatēha nkana. No muntu ghwa kulesibhwa mabhi mase akotēha fise.” 48 Kundi ghamulomba ghulya mwanamukeema, “Ghwalesibhwa bhubhi bhoobhe kwa Kabhumba.”

49 Gho mukubha bhalya ^bhakabheele bhalikulya hamwi no Jheesu bhajha kwibhasya kubhala, “Ni ghanyi ghooghu alikulesya mabhi kwa Kabhumba?” 50 Tukubha Jheesu ghamulomba ghulya mwanamukeema kubhala, “Kwisigha koobhe gho kwasūla ghwasābhuka, kajhe na maholo.”