Fya kubhasya fijhikenyie ne Ifuku lya Kutamuka
(Matajhu 12:1-8; Maaliko 2:23-28)
6
Lyalikabha Ifuku limwi lya Kutamuka, Jheesu akabheele nalikuhita mu mabhāla gha ngano, bhahemba bhaajhe bhajha kuhulula ngano bhalikulya. 2 Kundi Bhafalisaajho bhabhabhasya, “Nasi mulikukola milīmo Ifuku lya Kutamuka? Kwīla ghaagho te Kabhāngo keetu mwi Ifuku lya Kutamuka.” 3 Jheesu ghabhahindula ghaabhala, “Temunasomehi bhoghakēlanga Daudi bhojhikabheele jhyamukola nsāla, unyene na bhenaajhe? 4 Ghakengilanga mwi Ipeelelo lyeke Kabhumba, ghatwala mabhu gha ntenteko, ghaalya ghanabhaha na bhenaajhe, na ghaagho teghakolibhwa na muntu ghoghonse ni bhapeesi bhuhela.”a 5 Jheesu ghalōnsya ghaabhala, “ Une Mwana ghwa Muntu gho Siinywe Bhusya ghwa Ifuku lya Kutamuka.”Jheesu alikumusisya kanya ighōnde Ifuku lya Kutamuka
(Matajhu 12:9-14; Maaliko 3:1-6)
6 Lyalikabha kabhili lindi Ifuku lya Kutamuka, Jheesu ghakengilanga mu nyumba jhya kusangaanilamo Bhajhahudi. Mukabheele no muntu ^akabheele ghakaghwa kubhoko kwajhe kwa kwene. 7 Bhafalisaajho na bhamakota bha Kabhāngo keke Musa bhakabheele bhamukūngiile nkana, bhalōle kubha nalakukola mulīmo ghwa kusisya Ifuku lya Kutamuka, akulinga bhalōle nfūno jhya kumubhuula. 8 Kansi unyene ghamānya fyobhalikulanganyia, ghamulomba ghulya ghakaghwa kubhoko, “Bhuuka, jhughalala hakati na bhantu.” Ghabhuuka ghajhughalala. 9 Kundi Jheesu ghabhabhalila, “Ndikumubhasya ni liihe lili mu Kabhāngo kulikola Ifuku lya Kutamuka, kukola masogha ajhe kukola mabhi? Kusisya bhupanga ajhe kwihagha?” 10 Ghabhakūnga bhantu bhonse bhakabheeleho, kundi ghamulomba ghulya muntu, “Gholola kubhoko koobhe.” Kundi ghagholola kubhoko kwajhe, kwabha kwasila. 11 Tukubha Bhafalisaajho bhaaghājha nkana, bhajha kutensanyia, “Tumwīle bhuti Jheesu?”
Jheesu alikubhāalula mintengwe ikumi na bhabhili
(Matajhu 10:1-4; Maaliko 3:13-19)
12 Lyalikabha ifuku limwi Jheesu ghakabhuukanga ghaajha ku musosi mu kutendajhyuka, nali kooko ghakatendajhyukanga kwa Kabhumba mpaka bhufuku bhwasya. 13 Bhokwakabhanga kwasya mulāabho, ghakabhatangiilanga bhahemba bhaajhe ghabhāalulamo ikumi na bhabhili, bhaabho bhoghaketangako mintengwe. 14 Masiina gha mintengwe ghakabheele ni ghaagha, Simoni ghoghakelikangako Petelo, no Andelea mutoghwajhe, no Jhakobho no Jhohana, no Filipo no Bhatolomajho, 15 Matajhu no Tomasi, Jhakobho mwana Alufajho, Simoni ghaketwangako Selote, 16 no Jhuuda mwana Jhakobho no Jhuuda Isikalyote, ghoogho gho ghakamuhīndukanga Jheesu.
Jheesu alikulāngulula ghanasisya na bhantu
(Matajhu 4:23-25)
17 Kundi Jheesu ghasooka kufuma ku musosi, hamwi ne mintengwe bhaajhe, ghafīka ha mutendansi ghajhughalala. Hakabheele lūuli lwa bhahemba na bhandi bhantu tue bhengi. Bhaabho bhantu bhandi bhakafumanga ku Jhudea, bhandi bhafuma ku Jhelusalemu, bhandi ku Tiilo no ku Sidonib ngo sikabheele kwi isinsi. 18 Bhantu bhakabheele bhakomenkana akulinga bhamuhulikisye Jheesu no kusisibhwa malwele ghaabho, na bhantu ^bhakabheele bhalikusanfibhwa na mamisāgha mabhi, ghakabhasisyanga. 19 Bhantu bhonse ^bhakabheeleho bhakabheele bhalikuhensa kumukuumya, bhukohela managha ghaajhe ghakabheele ghalikufuma ghalikubhasisya bhonse.
Komwabha ne sumbwa
(Matajhu 5:1-12)
20 Jheesu ghabhakūnga bhahemba bhaajhe ghaabhala,
“Sumbwa umwe bhapīina,
bhukohela Bhwami bhweke Kabhumba ni bhwakwenyu.
21 Sumbwa umwe muli ne nsāla nonwe,
bhukohela muloheebhwa mwajhikuta.
Sumbwa umwe mulikulīla nonwe,
bhukohela mulobha mu nsēko.
22 Sumbwa umwe, bhomulokabha mwaghājhwa na bhantu, bhamibhuuluka, bhalikumituka, no kumitaghanyia kobhe sintu sibhi, bhukohela bhomwakaamānya une Mwana ghwa Muntu. 23 Mukubha ghaagho ghalikulōleka, umwe sangabhale mwanajhunjaghuka, nsimaano jhyenyu ni nkulu mwi ighūlu kwa Kabhumba. Teetyo bhobhakēlanga na bhanyinabhokulu ku bhaghwelaghu.
24 Tukubha, komwabha umwe bhatunsi,
bhukohela mwakalya simaanya syenyu.
25 Komwabha umwe muli mu siikuta nonwe,
bhukohela mulobha mu nsāla.
Komwabha umwe muli mu nsēko nonwe,
bhukohela mulobha mu sililo.
26 Komwabha umwe mukubha bhantu bhonse bhamifela mpunda nsogha,
bhukohela teetyo bhobhakēlanga na bhanyinabhokulu ku
bhaghwelaghu bha malami.
Mutēhe mwimba ghoobhe
(Matajhu 5:38-48; 7:12a)
27 Nonwe ndikumutānyisya umwe munhulikiisye, bhatēhe bhemba bhenyu, bhelīle masogha bhalya bhamighājhile. 28 Kabhili, bhalikumifuusa bhalombe bhapambulilwe, bhalikumijhōojhisya mabhi, bhatendajhyukile masogha kwa Kabhumba. 29 Muntu ghwa kukupaatula itama limwi, muhindusisye ne lya bhubhili, no muntu ghwa kukughanyuka kabhegha, mulēkele kumwi ne nkanjo. 30 ^Ghakusona muheekesye, muntu ghwa kukughanyuka kakoobhe nosihensi akuheleesisye. 31 Ghaaghali ghomuhensile bhantu bhamiīlile, gho mwabhēlila nomwe.
32 Kubha mwabhatēha bhalya bhamitēhile umwe, mulakubha mwapātaho mpunda si? Feefyo fya kubhatēha bhamitēhile fyobhalikwīla kumwi na bhakanya bhubhi kwa Kabhumba. 33 Kabhili, kubha mwabhēlila matendeke bhaabhali bhakomiīlila nomwe matendeke, mulakubha mwapātaho mpunda si? Kumwi na bhakanya bhubhi kwa Kabhumba bhakojhīla ghaaghoe. 34 Kabhili kubha mwabhatiila bhaabhali bhanakobhola kumilīha, mulakubha mwapātaho mpunda si? Kumwi na bhakanya bhubhi kwa Kabhumba bhakobhatiila bhakanya bhubhi bhenaabho bhanabhaheleesisya fyonse.
35 Tukubha umwe, bhatēhe bhemba bhwenyu mwanabhēlila matendeke. Ketemwabhatiila tue, musibhajhimukili bhamulīhe. Kubha mwajhīla bhoobho nsimaano jhyenyu jhilokabha nkulu. Mulobha bhaana bheke Kabhumba Mukulu ghwa Fyonse, bhukohela unyene ni mutendeke ku bhasimusīimile na bhakanya bhubhi. 36 Kansi umwe bhe na sighōngo kobhe Siinywe ghwa mwi ighūlu bhwali ne sighōngo.
Musijhīli bhwangu kukala bhubhi bhwa bheneenyu
(Matajhu 7:1-5)
37 Musikali bhubhi bhwa bheneenyu, nomwe temwakalilwe bhubhi bhwenyu. Musitendi bhubhi bhwa bheneenyu no kubhalihiisya, nomwe temwatendwe bhubhi. Bhafumisye nsika bhandi no Kabhumba alomilesisya bhubhi bhwenyu. 38 Mwabha bhahaanyi bha fintu, nomwe muloheebhwa, lughēla lwa kubhumbika no kusindaghilwa no kuseketelwa fyanaghoneka ku maghūlu ghenyu, fyobhalomiheekesya. Bhukohela lughēla looluli lomulikupimila bhandi, lomulopimilwa nomwe.”
39 Ghasya lughēlo ghaabhala, “Teeti muhofu anamulombola muhofu mwinaajhe? Lekehi! Bhalohonela mu liina bhonse bhabhili. 40 Muhemba tyakolunga sye bhuhemba, tukubha, ghakahwa kulāngwa gho akolingaana no sye bhuhemba.
41 Ulikukalōla bhuti kahande katooli ka siti kaatipa mu linso lya mwinoobhe, ghwapootwa kulōla ibhuliti lili mu linso lyobhe ghwenyene? 42 Unasumbula bhuti kumulomba mwinoobhe kubhala ti, ‘Mwanaabho hembela inkufumisye lili mu linso lyobhe,’ ghwapootwa kumānya ibhuliti lili mu linso lyobhe ghwenyene? Ulikutenda kali ku ghundi ughwe, fumya nyinambele ibhuliti lili mu linso lyobhe ghwenyene, haaho bhonalōla fisogha kufumya kaatipa mu linso lya mwinoobhe.
Siti sikomānyika ku majhābho ghaajhe
(Matajhu 7:16-20; 12:33-35)
43 Hatuhu siti sisogha sikooha majhābho mabhi, ajhe siti sibhi sikoha majhābho masogha. 44 Siti sikomānyika ku majhābho ghaajhe. Bhantu tebhakooka majhābho gha tiini ku mughunga, ajhe misabhibhu ku mubhombo. 45 Bhofikobha muntu mutendeke akofumya matendeke kufuma mu mwēgho ghwajhe, no muntu ghwa bhubhi akofumya mabhi kufuma mu mwēgho ghwajhe. Bhukohela kanywa ka muntu kakotenda ghalya ghali mu mwēgho ghwajhe.
Mughubhaki mungalangala no mughubhaki kanya masāla
(Matajhu 7:24-27)
46 Nasi mulikunjitako ‘Taata Bhusya, Taata Bhusya,’ no kooku musilikukola ghondikumilomba? 47 Nankumilānsya muntu ghwakukabha nalikwisa ku mwane, ghaghahulika maghāmbo ghaane ghanaghakola. 48 Ughoogho alakususana kobhe muntu ghakaghubhakanga nyumba, ghasabha mwimbi mukulu, ghaghubhaka musingi kwi itandala. Bhojhyakabhanga mpantuka jhyasūlika, monga ghwajhela mpaka ku nyumba, tukubha tejhyakajhelanga bhukohela nyumba jhyajhe jhikabheele jhikakile. 49 Tukubha ghooghuli alikuhulika tue bhusila kughakola, alobha kobhe ghulya muntu ghakaghubhakanga nyumba jhyajhe ku musenga bhusila musingi. Mpantuka bhojhyakabhanga jhyasūlika, jhilya nyumba jhyakaghwanga ku mulongo, jhyabhiiha bhuliko.”