Luuka 5

Jheesu alikubhajhita bhahemba bha kusumbula

(Matajhu 4:18-22; Maaliko 1:16-20)

Lyalikabha ifuku limwi, Jheesu akabheele najhughalele kwisinsi lya tanganika jhya Ghenesaleti, bhantu bhengi bhakabheele bhamuniengele bhahulikisye Ighāmbo lyeke Kabhumba. 2 Ghaalōla maato abhili ku mbalimbali na tanganika, tukubha bhalofi bhakabheele bhafumamo bhalikukōsela makila ghaabho. 3 Jheesu ghatanda mu bhwato bhumwi ^bhukabheele bhweke Simoni, ghamusēegha ajhe hale fise mu mansi kufuma ku mbalimbali. Ghajhīkala, ghajha kubhalāngulula linyabhwingi nali mu bhwato. 4 Bhoghakabhanga ghahwa kulāngulula, ghamulomba Simoni, “Soojha bhwato mpaka mwi isībha, kooko musoosye makila gheenyu mulobhe masembe.”

5 Simoni ghamuhindula ghaabhala, “Ee Taata Bhusya, twalobha bhufuku bhwasya bhusila kulumbata kokonse, bhukohela bhoghwabhala, nankuteela kabhili makila.” 6 Simoni na bhenaajhe bhobhakabhanga bhateela makila ghaabho, mwakafwanga masembe mengi nkana na makila ghanasumbula no kutanduka. 7 Bhajha kubhakabhila bhalofi bhenaabho ^bhakabheele mu bhundi bhwato bhese bhabhafūnaanile. Bhajhisa, bhabhumba masembe maato ghonse abhili ghanahensa no kunyika.

8 Simoni, lindi isiina bhamubhala ti Petelo, bhoghakabhanga ghaalōla teetyo, ghaajha ghakasukama ha maghūlu gheke Jheesu ghaabhala, “Taata Bhusya fuma hanu hondi bhukohela une ndi muntu ghwa bhubhi kwa Kabhumba.” 9 Simoni ghakabhalanga teetyo bhukohela unyene na bhenaajhe bhonse bhakekosanga mahi nkana ku masembe kufūla ghobhakabheele bhalobha. 10 Kumwi na bhaana Sebhedajho Jhakobho no Jhohana, ^bhakabheele bhalobhela kumwi, naagho fyabhalubha. Kundi Jheesu ghamubhalila Simoni, “Nosighubhahi, kusumbula nonwe ulakubha mulofi ghwa bhantu.” 11 Bhobhakabhanga bhaghesya maato ghaabho kwi isinsi, bhaalēka fyonse fyobhakabheele nafyo bhalōndekana no Jheesu, abhahembeke.

Jheesu alikumufūla ali ne mpōngo

(Matajhu 8:1-4; Maaliko 1:40-45)

12 Lyalikabha ifuku limwi Jheesu nali mu lugho lumwi, ^mukabheele mulwele ghwa mpōngo mutūmba ghonse. Ghoogho muntu bhoghakabhanga ghamulōla Jheesu ghakaghwanga bhubhundama ha Jheesu, ghamulebhelesya ghaabhala, “Taata Bhusya kubha ghwatēha unanfūla.” 13 Kundi Jheesu ghagholola kubhoko kwajhe, ghamughambikako ghaabhala, “Nantēha, fūlwa.” Haahoe mpōngo jhyabha jhyasila. 14 Jheesu ghamulēsya ghulya muntu ghaabhala, “Nosibhuuli ku muntu ghoghonse, tukubha, kajhe ukelubhusye kwa mupeesi, ukafumye ne mpeesi jhya kufūlwa koobhe, kobhe bhwalaghisile Musa akulinga bhantu bhelōlele bheene bhuli bhoghwasila.” 15 Tukubha mpunda jhyajhe Jheesu jhyajha jhyakwila, bhamukomenkanila bhantu bhengi bha kumuhulikisya no kusisya malwele ghaabho. 16 Tukubha unyene akabheele ghatēha kwīkala sibhelo, nalikutendajhyuka kwa Kabhumba.

Jheesu alikumusisya kanya ighōnde

(Matajhu 9:1-8; Maaliko 2:1-12)

17 Ifuku limwi Jheesu akabheele nalikubhalāngulula bhantu, mu bhaabho bhakabheelemo Bhafalisaajho na bhamakota bha Kabhāngo keke Musa, kufuma kila lugho lwa mu Ghalilaajha no mu Jhudea no kufuma ku Jhelusalemu. Akabheele nabhumbiike managha gheke Sye Bhusya gha kusisya bhalwele.

18 Hakesanga bhantu bhatwite kaliili ka mulwele ghwa ighōnde, bhalīngisya kumwingisya mu nyumba akulinga bhamufele kwa Jheesu. 19 Bhobhakabhanga bhabhulwa ha kuhita bhantu bhakabheele bhengi, bhakatandanga ku nyumba, bhatubhula lukanga, bhamusoosya hakati na bhantu mu kaliili mpaka mwifo ha mbele jhyeke Jheesu.

20 Jheesu bhoghakabhanga ghaalōla bhuli bhobhamwisigha, ghaabhala kwa mulwele, “Munywanyi, ghwalesibhwa bhubhi bhoobhe kwa Kabhumba.” 21 Bhamakota bha Kabhāngo keke Musa hamwi na Bhafalisaajho bhajha kwibhasya kubhala, “Ni ghanyi ghooghu alikumubhenguka Kabhumba? Ni hatuhu analesya muntu bhubhi kwa Kabhumba, ni Kabhumba bhuhela.” 22 Kansi Jheesu ghamānya fyobhalikulanganyia, ghabhabhasya, “Kusi mulikulanganyia ghaagho mu myēgho jhyenyu? 23 Ihafu ni liihe, kumulomba mulwele ghwa ighōnde kubhala, ‘Ghwalesibhwa bhubhi bhoobhe kwa Kabhumba,’ ajhe, ‘Bhuuka, uujhe’? 24 Ndikuhensa mumānye kubha ti, une Mwana ghwa Muntu nhebhilwe mpasi na managha gha kulesya bhubhi hanu ha bhweleelo.” Kundi Jheesu ghamubhalila ghulya muntu ^akabheele ne ighōnde, “Jhughalala! Twala mukeka ghoobhe, ujhe ku lugho kumobhe.” 25 Haaho na haaho ghulya muntu ghabhuuka bhabhwene, ghalitwika mukēka ghwajhe ghaajha ku lugho kumwajhe no kooku nalikutenda mpunda syeke Kabhumba. 26 Bhonse bhakabheeleho bhalikosa mahi, bhatenda mpunda syeke Kabhumba, bhaasūpa bhabhala, “Bhwalelo twalōla fyotusinalōle.”

Jheesu alikumujhita Laawi, lindi isiina Matajhu, abhe muhemba ghwajhe

(Matajhu 9:9-13; Maaliko 2:13-17)

27 Kafumilo ka haaho Jheesu ghanyalika hanse, ghajhililika fise, ghamulōla kanya kulīhiisya makomo, isiina lyajhe Laawi, najhīkeele mu kasumba. Jheesu ghamubhalila, “Nōnde.” 28 Laawi ghaalēka fyonse, ghabhuuka, ghamulōnda.

29 Syakalōndanga Laawi ghakamwīlilanga Jheesu mubhāla ha lugho lwajhe. Hakabheele sifita sikulu sya bhakanya kulīhiisya makomo na bhandi bhantu bhakabheele bhēkeele bhalikulya hamwi nabho. 30 Kundi Bhafalisaajho na bhamakota bhaabho bha Kabhāngo bhajha kung'wing'a ku bhahemba bheke Jheesu. Mu kung'wing'a bhabhala, “Mulikwīla bhuti kulya no kunywa hamwi na bhakanya kulīhiisya makomo na bhakanya bhubhi kwa Kabhumba?” 31 Jheesu ghabhahindula ghaabhala, “Bhantu bhapanga tebhahensile mufumo, tukubha bhalwele gho ^bhamuhensile. 32 Nsijhisile mu kubhajhita bhaghololoke myēgho, njisile mu kubhajhita bhakanya bhubhi kwa Kabhumba akulinga bhaghalaghale.”

Malāngululo mahya

(Matajhu 9:14-17; Maaliko 2:18-22)

33 Bhalya bhantu bhamutānyisya Jheesu bhabhala, “Bhahemba bheke Jhohana bhakobha ketebhasīngwa bhusila kulya no kutendajhyuka kwa Kabhumba, hamwi na bhahemba bha Bhafalisaajho, tu ughwe bhahemba bhoobhe bhalikulya bhananywa.” 34 Jheesu ghabhalomba ghaabhala, “Teeti bhahelekesi bha bhwenga munabhasūla bhasīngwe bhusila kulya no kooku bhali kumwi no mutoola bhwenga? 35 Tukubha halobha ne nfuku mutoola bhwenga bhemba bhaajhe bhalomufumyaho, mu seesyo nfuku mobhalokēkala bhusila kulya.” 36 Jheesu ghasya mughanyi ghaabhala, “Ni hatuhu akotandula mwenda munhya ghabhiika silaka ku mwenda ghwa kale. Kubha ghaajhīla teetyo alobha ghatandula mwenda munhya ne silya silaka tesyajhikanyie no ghulya mwenda ghwa kale. 37 No kubha hatuhu muntu akobhiika divai nhya mu lusingi lwa kale, no kubha ghaajhīla teetyo, lulya lusingi lulobheleka ne jhilya divai jhiloghoneka. 38 Divai nhya jhihenseelwe kubhiikwa mu lusingi luhya, te lwa kale. 39 Kabhili kubha hali divai jhya kale, hatuhu muntu akotēha divai nhya ghaghājha divai jhya kale, bhukohela bhakobhala, ‘Divai jhya kale gho nsogha.’”