Luuka 4

Kughemwa kweke Jheesu

(Matajhu 4:1-11; Maaliko 1:12-13)

Jheesu ghakafumanga mu monga ghwa Jholodani nabhumbiike managha gha Mwēgho Mulafu ghweke Kabhumba. Ghoogho Mwēgho Mulafu ghamulombola mwi ighulungu, 2 no kooku nalikughemwa na Syetani ku nfuku makumi ane. Mafuku ghonse ghaagho tyakalya kokonse, ku bhuhela nsāla jhyamukola. 3 Kundi Syetani ghamubhalila, “Kubha noli Mwana ghweke Kabhumba, lilombe leeli iibhwe libhe ibhu.” 4 Jheesu ghamuhindula, “Finyeghilwe kubhala, ‘Bhupanga bhwa muntu tebhuli ku fyakulya bhuhela.’”

5 Kafumilo ka haaho Syetani ghamutwala, nalikumutansya ku lughamba na musosi, ghamulānsya mpasi syonse sya ha bhweleelo ku mujhaghumwi. 6 Ghoogho Syetani ghamubhalila, “Nankukuheekesya mpasi jhya kusijhughalalila syonse seesi ne mpunda syabho, sibhe mu mabhoko ghoobhe, bhukohela syonse ni syakwane inafumya bhuli bhonantēha. 7 Kansi ughwe, kubha ghwampakila, syonse silakubha syakoobhe.” 8 Jheesu ghamuhindula, “Finyeghilwe kubhala, ‘Mupakile So Bhusya Kabhumba ghoobhe, mupeele nyene ghongwa.’”

9 Kafumilo ka haaho Syetani ghamufela mpaka ku Jhelusalemu, ku bhulunga bhwa Nyumba Nkulu jhya Ipeelelo lyeke Kabhumba, ghamulomba, “Kubha noli Mwana ghweke Kabhumba liteele hansi, 10 bhukohela finyeghilwe,

‘Kabhumba alokulaghiisisya misambwa bhaajhe bhakusūnge,

11 no kubha naagho bhalokutwala mu mabhoko ghaabho,

aleke kughūlu koobhe kusikuntuki kwi ibhwe.’”

12 Jheesu ghahindula ghaabhala, “Finyeghilwe kubhala, ‘Nosimughemi So Bhusya Kabhumba ghoobhe.’” 13 Bhoghakabhanga ghahwa kumughema ku nsīla syonse, Syetani ghamulēka nyinambele.

Jheesu alikusapa milīmo ku sihugho sya Ghalilaajha

(Matajhu 4:12-17; Maaliko 1:14-15)

14 Haaho Jheesu ghakaheleelanga ku Ghalilaajha nabhumbiike managha gha Mwēgho Mulafu ghweke Kabhumba, mpunda syajhe syakwila mu ngo syonse sikabheele mu mbalimbali. 15 Kundi ghasumbula kubhalāngulula bhantu mu majhumba gha kusangaanilamo Bhajhahudi, na bhantu bhonse bhamulumba.

Jheesu bhalikumutuna ku Nasaleti

(Matajhu 4:12-17; Maaliko 1:14-15; 6:1-6)

16 Kafumilo ka haaho Jheesu ghakajhanga ku Nasaleti, mu lugho loghakakulilangamo, ne Ifuku lya Kutamuka ghajhingila mu nyumba jhya kusangaanilamo Bhajhahudi, kobhe bhwakabheele ghaajhīla. Ghajhughalala aasōme Maghāmbo gheke Kabhumba. 17 Kundi ghaheebhwa sitaabhu sibhingilwe syeke mughwelaghu Isaajha, ghahensela ^hakabheele hanyeghilwe,

18 “Mwēgho ghweke Taata Bhusya ghuli ku mwane,

bhukohela Kabhumba ghakandaghila imbalombe bhalanda Sikūla Sisogha.

Andaghisile imbalombe bhalikusampwa kulekululwa kwabho,

na bhahofu kusumbula kulōla kabhili.

Andaghisile imbapingule bhakabhisilwe,

19 no kubhatānyisya mwaka ghwa sighōngo syeke Taata Bhusya ku bhantu bhaajhe.”

20 Kundi bhoghakabhanga ghahwa, ghabhinga sitaabhu ghamuheleesisya mukola milīmo, ghajhīkala. Bhantu bhonse ^bhakabheelemo mu nyumba jhya kusangaanila bhasīibha bhamuhusuliile menso. 21 Ghasumbula kubhatānyisya ghaabhala, “Ghaagha maghāmbo ghomwahulika nansōma, bhwalelo ghakwila ku mwenyu.” 22 Bhantu bhonse bhamwilōleela, bhalikosa mahi ku maghāmbo masogha ghwakabheele nalikutenda, bhalibhasya, “Ughooghu te mwana ghweke Jhusufu?”

23 Kundi unyene ghabhalomba, “Nyinsi mulakubhalaho mughanyi ghwa kubhala, ‘Mufumo, likolele ghwenyene, maghāmbo ghonse ghotukahuliike ghokēlite ku Kapelinaumu, ghēle na hanu ha mwenyu.’” 24 Ghalōnsya ghaabhala, “Ndikumilomba bhwene, hatuhu mughwelaghu ghobhakoswa mu lugho lwajhe. 25 Hulikisye, hakabheele bhalekwa bhengi mu sihugho sya Isilaheeli mu nfuku syeke Elijha, bhuli nfula bhojhyakajhughalalanga myaka itatu ne myensi mukaagha, nsāla jhyahona sihugho syonse. 26 Tukubha hamwi na ghaagho, Elijha tyakalaghilwa ku mulekwa ghoghonse mwi Isilaheeli, kubhula kulahila ghakalaghilwanga kwa mulekwa ghumwi ghwa ku Seleputa ghwa mu sihugho sya Sidoni. 27 Kabhili, hakabheele bhakanya mpōngo bhengi mwi Isilaheeli mu nfuku syeke mughwelaghu Elisa, tukubha hatuhu ghundi ghoghonse ghakafūlwanga, kubhula kulahila Namani bhuhela muntu ghwa ku Siilia.”

28 Bhantu bhonse bhakabheelemo mu nyumba jhya kusangaanila, bhobhakahulikanga ghaagho maghāmbo, bhakaghājhanga nkana. 29 Kafumilo ka haaho bhamutwala bhamufela kumbali na lugho, bhamufela mu njegheelo jhya musosi ^ghukabheele ghughubhekweko lugho lwabho, bhamutēnkele mu lughanje. 30 Tukubha Jheesu ghabhahita hakati, ghaajha.

Jheesu alikukuula limusāgha

(Maaliko 1:21-28)

31 Kundi Jheesu ghaajha ku Kapelinaumu, mu sihugho sya Ghalilaajha, Ifuku lya Kutamuka ghajhingila mu nyumba jhya kusangaanilamo Bhajhahudi nalikubhalāngulula bhantu. 32 Bhalikosa mahi nkana ku malāngululo ghaajhe, bhukohela fibhalwa fya kumwajhe fikabheele na managha nkana. 33 Mu jheejhyo nyumba jhya kusangaanila, mukabheele muntu ^akabheele ne ndwala jhya limusāgha. Ghoogho muntu ghaloloma nkana, 34 ghaabhala, “Ughwe ee Jheesu Munasaleti, ulikuhensa si ku mwetu? Ghwajhisa mu kutuhwa? Nkwinsi kubha ti uli ghanyi, uli mutentekwa ghweke Kabhumba.” 35 Jheesu ghalikuula lilya limusāgha ghalibhalila, “Humbula, fuma ku ghooghu muntu!” Kundi lilya limusāgha lyamughwisya hansi hakati na bhantu, lyajha bhusila kumufulasya. 36 Bhantu bhonse bhalikosa mahi, bhajha kwibhasya, “Ghaagha malāngululo ni gha bhuti? Ghooghu muntu ku managha gha kuhamulisya alikukuula mamisāgha ghaafuma.” 37 Mpunda jhyeke Jheesu jhyakwila honse mu silya sihugho.

Jheesu alikusisya bhalwele

(Matajhu 8:14-17; Maaliko 1:29-39)

38 Jheesu bhoghakabhanga ghaafuma mu jhilya nyumba jhya kusangaanilamo Bhajhahudi, ghakajhanga ku lugho kwa Simoni. Bhoghakabhanga ghafīka ghamusangana nyina bhukwe ghweke Simoni nalwele nkana, bhamusēegha Jheesu amusisye. 39 Jheesu ghajhughalala ha bhwihi na mulwele, ghabhukuula bhulya bhulwele, haaho na haaho mulwele ghabha ghasila, ghabhuuka, ghajha kuhindaghana

40 Mukubha isyubha lilikutolobhela, bhamulentela Jheesu bhantu ^bhakabheele na malwele ghoghonse, ghabhaghambikako mabhoko ghumwi ghumwi, ghabhasisya bhonse. 41 Mukubha mamisāgha ghalikubhafumako ghakalolomanga ghaabhala, “Uughwe uli mwana ghweke Kabhumba.” Tukubha Jheesu ghakaghasibhilanga ghasitendi, bhukohela ghamujhinsi kubha ti ni Muhosya.

42 Mulāabho ghwajhe Jheesu ghakabhuukanga ghaajha sibhelo kwa bhusila bhantu. Linyabhwingi lya bhantu bhajha kumuhensa. Bhobhakabhanga bhamulōla, bhalīngisya kumulēsya nasijhi. 43 Tukubha unyene ghabhahindula ghaabhala, “Ndikuhenselwa kubhalomba bhantu Sikūla Sisogha sya Bhwami bhweke Kabhumba no mu sindi ngo, leelyo lyondaghisilwe.” 44 Kundi Jheesu ghajhililika na mulīmo ghwa kubhalāngulula bhantu mu majhumba gha kusangaanila gha mu sihugho sya Jhudea.