Paulo ghatetwa na nsoka ku kubhoko mu kalila ka Melita
28
Bhotwakafumanga mu tanganika moomo bhupanga, kundi twamānya kubha ti, tuli mu kalila ^kakabheele kajhitilwe Melita. 2 Bhekasi bha haaho bhatusangaanila fisogha nkana. Bhatuhembela mulīlo, bhukohela kukabheele mpeho ne nfula jhikabheele jhyaghwa. Bhatusangaanila fwense aleke twighanikisye ghoogho mulīlo. 3 Paulo ghasōlelesya kamuligho ka tukwi. Bhwakabheele nalikusibhiika mu mulīlo, nsoka jhyafuma mu seesyo nkwi, bhukohela kukabheele kwafyuha na mulīlo, jhyalibhinga ku kubhoko kwajhe jhyamuteta. 4 Bhekasi bha mu kaako kalila, bhobhakabhanga bhajhilōla jheejhyo nsoka, jhilikuheehela ku kubhoko kweke Paulo, bhalihwehwetela kubhala, “Ghooghu muntu ni mwihaghanyi. Singa bhoghasila kunyika moomu mu tanganika, mughābho ghwetu ghujhitilwe ‘Muliha Kafinda,’ teghwamulēke asiibhe bhupanga.” 5 Tukubha Paulo ghajhikunkumulila mu mulīlo, teghakafulalikanga singa fise. 6 Bhaabho bhantu bhalikulanganyia ti alakufimba ajhe aloghwa hansi, afwe. Tukubha bhobhakahembelanga ikunka ileehe bhusila kulōla syosyonse, bhahindula katendelo kaabho bhabhala ti, ni mughābho.Paulo alikumusisya usye ghweke mukulu ghwa kalila ka Melita
7 Kundi haaho hotwakaghambukilanga, hakabheele ha bhwihi na mabhāla gha mukulu ghwa kaako kalila ^akabheele najhitilwe Pubhilio. Ghoogho Pubhilio ghatusangaanila fisogha ku lugho lwajhe, twahwa nfuku itatu. 8 Ku leelyo ikunka, usye akabheele nalele mu bhulīli nalikulwasibhwa fitambo na kamunda ka malaso. Paulo ghajhingila mu nyumba mu kumukūnga. Bhoghakakwisyanga kumutendajhyukila kwa Kabhumba, ghamubhiikila mabhoko ghaajhe ku mutwe, ghamusisya. 9 Leelyo ighāmbo bholyakamānyikanga, bhalwele bhandi bhonse mu kalya kalila, bhabha bhalikumujhiila Paulo, ghabha nalikubhasisya. 10 Bhantu bha haaho bhatusīima nkana. Bhotwakahensanga kubhuuka, bhatutansisya mu meeli fintu fyonse fyotwakahensanga.
Paulo alikufīka mu lugho lwa Luumi
11 Bhotwakahwanga myensi itatu mu kaako kalila, twasumbula lwēndo mu meeli ^jhikabheele jhyajhughalala, jhihembeele liima lya mpeho lihwe. Jheejhyo meeli ^jhikabheele jhifumile mu lugho lwa Alekisandilia, jhikabheele jhinyeghilwe mikiti jhya Mighābho Mahasa. 12 Twafīka mu lugho lwa Silakusa, twajhīkala haaho nfuku itatu. 13 Twafuma haaho, twafīka mu lugho lwa Leghio. Mulāabho ghwajhe, musāgha ghwa kuusi ghwapuula, ghwasūla tufīke ifuku lya bhubhili mu lugho lwa Puteoli. 14 Kooko twasangaana na bhahemba bheneetu, bhatulebhelesya kubhala, twīkale nabho nfuku ndwi. Bhosyakahwanga, twalōnda nsīla kujha mu lugho lwa Luumi. 15 Bhahemba bheneetu bha kooko ku Luumi, bhobhakahulikanga kubha ti, tuli mu nsīla tulikujha kumwabho, bhajhisa mwi ighulilo lya Apio, luhande lwaketwanga “Mikahawa Itatu,” mu kutusangaanila. Paulo bhoghakabhalōlanga, ghamusīima Kabhumba ghasangabhala nkana.
16 Bhotwakafīkanga mu lugho lwa Luumi, Paulo ghalombwa ajhīkale mu nyumba jhyajhe kumwi na bhasilikale bha kumulalilila.
Paulo alikusāhula na bhakulu bha Bhajhahudi ku Luumi
17 Bhosyakahwanga nfuku itatu, ghabhajhita hamwi bhakulu bha Bhajhahudi bha ku Luumi. Bhobhakakomenkananga, ghabhalomba kubhala, “Bhamughana ghwane, singa bhonsyakakolanga ighāmbo ibhi ku bhantu bheetu, ajhe mu misīlo jhya bhanyinefwekulu, tukubha nankanīghwanga mu lugho lwa Jhelusalemu, nanfelwa ku Bhaluumi. 18 Bhaabho Bhaluumi bhobhakabhanga bhahwa kumbasya, bhahensa kundekulula, bhukohela tebhakansanganga na bhubhi bhunakansūlile injihaghwe. 19 Tukubha Bhajhahudi bhatuna kubha ti, nensilekululwi. Teetyo nansona kubha, ighāmbo lyane likalwe na Kalisaalia kunu ku Luumi. Te kubhala ti nkabheele nendi kuhensa kubhasitaaka bhantu bha mu sihugho syane. 20 Kundi ghaagho gho ghasūla namiita, aleke imilōle tusāhule hamwi. Une haaha nanjīghalilwa bhukohela ndisighile ghalya ghobhesighile Bhesilaheeli bhonse.”
21 Haaho bhakulu bha bhaabho Bhajhahudi, bhamuhindula kubhala, “Ufwe tetupātile lupapulo lolonse kufuma mu sihugho sya Jhudea, lutensile ku luhande loobhe. Kabhili, tyajhisile muntu ghoghonse haaha kutenda sikūla sibhi luhande loobhe. 22 Tukubha ufwe, tulikuhensa kuhulika ughwe bhuli bholikulanganyia, bhukohela seesi situnfi syolōnsile, tujhinsi kubha ti, bhantu bhalikusibhala fibhi mpande syonse.”
23 Teetyo bhalaghana na Paulo ifuku lyobhalokakomenkana. Leelyo ifuku bholyakabhanga lyafīka, bhajhisa bhantu bhengi mukati mu nyumba jhyakabheele najhīkeele. Paulo ghabhalomba nalikubhalāngululila luhande lwa Bhwami bhweke Kabhumba,b kusumbulila mulāabho mpaka mugholo, ghakahensanga bhaabho bhamwisighe Jheesu. Fyasūla abhalāngulule luhande lwa sikūla syeke Jheesu ku kulōnda Kabhāngo keke Musa ne fitaabhu fya bhaghwelaghu. 24 Bhandi bhaghaswa ghaagho maghāmbo ghoghakatendanga, tukubha bhandi tebhakaghaswanga. 25 Kundi haaho bheene ku bheene tebhakehulikanga, bhajha kuleghunkana. Bhobhakabheele bhalikujha, Paulo ghabhalomba ighāmbo limwi kubhala, “Mwēgho Mulafu ghweke Kabhumbac ghakatendanga maghāmbo gha bhwene, nalikubhalomba bhanyinefwekulu kuhitila kwa mughwelaghu Isaajha kubhala,
26 ‘Ujhe ku bhaabha bhantu, ukabhalombe kubhala,
“Kuhulika mulohulika, tukubha temwamānye.
Kukūnga mulokūnga, tukubha temwalōle.
27 Filobha teetyo, bhukohela myēgho jhya bhaabha bhantu ni mikaka,
matwi ghaabho teghalikuhulika,
bhasinsīile menso ghaabho.
Tebhahensile menso ghaabho ghalōle,
ajhe matwi ghaabho ghahulike,
ajhe myēgho jhyabho jhimānye,
bhasihinduki, aleke none imbasābhule.”’”d
28 Paulo ghajhililika kutenda nalikubhalomba, “Nonwe ndikuhensa mumānye kubhala, sikūla syeke Kabhumba sya kubhasābhula bhantu, syafelwa ku bhantu bhasili Bhajhahudi. Bhaabho bhalohulika!” [ 29 Bhoghakabhanga ghahwa kutenda ghaagho maghāmbo, Bhajhahudi bhaajha bhalikuleghunkana bheene ku bheene.]e 30 Paulo ghahwa myaka ibhili misima, nali mu jheejhyo nyumba jhyakabheele natiisile ghongwa. Akabheele ketenalikubhasangaanila bhonse ^bhakabheele bhalikumujhumbila. 31 Akabheele nalikubhalomba bhantu mpola sya Bhwami bhweke Kabhumba, nalikubhalāngulula ku luhande lweke Sifwe Bhusya Jheesu Kiliisito. Ghakēlanga ghaagho ku bhusimu, bhusila muntu ghoghonse ghwa kumulēsya.