Paulo alikufelwa mu lugho lwa Luumi
27
Syakalōndanga jhyalōleka bhabhala, tujhe mu meeli mu sihugho sya Italia. Paulo na bheghalilwa bhandi, bhakabhisibhwa kwa mukulu ghumwi ghwa bhasilikale. Mukulu ghoogho ghaketwanga Jhulio, ghwa situnfi sya bhasilikale ^bhakabheele bhajhitilwe ti, “Situnfi sya Mwami mukulu Aghusito.” 2 Twatanda mu meeli ^jhikabheele jhifumile mu lugho lwa Adalamitio. Meeli jheejhyo jhikabheele jhihensile kujha mu fyambu fyakukabha fili kwi isinsi lya sihugho sya Asia. Twasumbula lwēndo lwetu hamwi no Alisitaliko, muntu ghwa kufuma ku Tesalonike mu sihugho sya Makedonia.3 Mulāabho ghwajhe, twaghēla mu lugho lwa Sidoni. Jhulio ghamwīlila Paulo gha bhutendeke, ku kumuswesya ajhe akelōle no bhanywanyi bhaajhe, akulinga bhamuhe fintu fyakabheele nalikuhensa. 4 Kufuma kooko, twahita ku kasikasi jhya kalila ^kakabheele kajhitilwe Kiipulo, bhukohela musāgha ghwakatukumbanga. 5 Twaghambuka tanganika, luhande lwa fihugho fya Kilikia ne Pamufilia, twafīka ha Miila mu sihugho sya Likia. 6 Kooko mukulu ghwa bhasilikale ghoogho, ghasangana meeli jhya kufuma mu lugho lwa Alekisandilia. Jheejhyo meeli jhikabheele jhijhiile ku Italia, kundi ghatutansyamo.
7 Twajha bhukebhuke ku nfuku singi ku kusamba nkana, twasumwa twafīka ha bhwihi na lugho lwa Niido. Bhotwakahensanga kuhita, musāgha mukali ghwatujhīghalisya, ghwasūla tuniengele luhande lwa kuusi lwa kalila ka Kileete, ha bhwihi ne ilaasi ^likabheele lijhitilwe Salumone. 8 Twajha tuhitile ku mbalimbali ku kusamba nkana, twasumwa twafīka ^hakabheele hajhitilwe, “Syambu Sisogha,” ha bhwihi no lugho lwa Lasea.
9 Tukabheele twahwa ikunka ileehe mu tanganika, ne nfuku nsogha sya kulyāta mu tanganika sikabheele syahita. Ku teetyo jhyalōleka kubha tunakajhililike no lwēndo loolo, tunakapāte nteesi. Kundi Paulo ghabhalomba bhenaajhe kubhala, 10 “Ee bhaabho, mbwene kubhala, lwēndo lwetu loolu, lulakutusūlila nteesi mu meeli jheejhi, ufwe bheene hamwi ne miligho.”
11 Tukubha mukulu ghwa bhasilikale teghakaswanga maghāmbo gheke Paulo, ghaghalōla kobhe ghasili no mukōnko, ghalōnda maghāmbo gha mulyasya meeli no kanya meeli. 12 Haaho syambu silya syobhakabheeleho tesikabheele na mpeghupeghu fisogha jhya kwīkala nfuku sya mpeho nkana. Bhantu bhengi mu bhaabho bhaaswa kufumako kulya, hamwi bhakobhwele kwīkala ha Foinike. Ha Foinike ni syambu syakukabha sili mu kalila ka Kileete, hakabheele hasogha ku kughēsya meeli, akulinga bhēkale mafuku ghonse gha mpeho.
Paulo na bhenaajhe bhalikusamba mu tanganika
13 Haaho musāgha musogha ghwasumbula kupuula, kufuma luhande lwa Kuusi. Ghwasūla bhakanya meeli bhalanganyie kubhala ti, bhakobhwele kufīkila mojhilanganyisye myēgho jhyabho. Kundi bhatansya nanga bhajhililika na lwēndo lwabho, bhahita ku bhwihi ne isinsi lya kalila ka Kileete. 14 Mukubha lyahita ikunka fise, musāgha mukulu ^ghukabheele ghujhitilwe “Eulakilo,”a ghwajha kupuula kufuma ku kalila ka Kileete. 15 Musāgha ghoogho ghwabha ghulikuhuula luhande lwa meeli, twalingisya kutambaana nagho, tukubha ghwatusumba. Twaghulēka ghutufele hakati na tanganika.
16 Twahita mu nyuma jhya kalila katooli ^kakabheele kajhitilwe Kauda, kaako kalila katusinga fise musāgha mukali. Haaho twalijhanda ku kusamba twasisya bhwato bhwa kusābhulilamo bhantu. 17 Mukubha bhakola milīmo bha mu meeli bhahwa kutansya bhulya bhwato mukati mu meeli, bhaniengesya mighīla meeli jhyonse, bhajhihamba jhyakaka. Bhakabheele bhaghubheehe kubhala ti, hamwi bhanahaghamila mu musenga ghwa tanganika jhya sihugho sya Liibhya. Kooko kusūpa kwasūla bhasoosya matanga, bhaalēka meeli jhijhe na musāgha.
18 Musāgha ghwajhililika kuhuula meeli ku managha. Mulāabho ghwajhe, bhakola milīmo bhaabho, bhasumbula kutaaghila miligho mu tanganika. 19 Ifuku lya bhutatu, bhasumbula kutaagha fikwalango fya meeli mu tanganika ku mabhoko ghaabho bheene. 20 Syahita nfuku singi isyubha ne ntangwa bhusila kulōleka, no musāgha ghukabheele ghusyalimo mu tanganika. Jhyasūla twajha kwisihisya kubhala ti tetulosābhuka bhupanga.
21 Nfuku singi bhosyakahitanga bhusila kulya sintu, Paulo ghajhughalala hakati nabho, ghatenda kubhala, “Umwe bhajhango, munakabhe mwanhulikisya, mwalēka kubhuuka kufuma kulya ku Kileete, ghaagha ghonse teghanatufīkeko. 22 Nonwe ndikumilomba kubhala, musijhingi myēgho, bhukohela hatuhu singa tu ghumwi mu umwe ^alofwa, tukubha meeli jheejhi gho jhilakubhiiha. 23 Ndikutenda teetyo, bhukohela une ndi ghweke Kabhumba gho nkobha nendikupeela. Bhufuku bhwa bhwalelo musambwa ghwajhe ghanjisilanga, 24 ghambalila kubhala, ‘Paulo, nosighubhahi! Ulikuhenselwa kujhughalala ha mbele jhyeke mwami mukulu Kalisaali. Ghwanamānya kubhala, Kabhumba alobhasābhula ku sighōngo syajhe, bhonse bho muli hamwi nabho mu lwēndo.’ 25 Kansi nonwe, une ndikumilomba kubhala, musijhingi myēgho! Une ndisighile kubhala ghonse Kabhumba ghoghambalila, ghalakukoleka. 26 Hamwi na ghaagho, tulakutēnkelwa mu kalila kamwi.”
Paulo na bhenaajhe bhalikusābhulwa
27 Twahwa mafuku ikumi na ane, tulikutēnkwa na musāgha mukali, kujha kooku no kooku, mu tanganika jhya Adilia. Ifuku lya ikumi na bhune bhufukukati, bhakola milīmo bha mu meeli bhalōla kobhe bhali ha bhwihi na ku lutambo. 28 Kundi bhasoosya mughīla bhakūnga bhulehe bhwa mansi, bhasānga matambo makumi abhili. Ku teetyo bhakoleela ha mbele fise, bhakūnga kabhili, bhasānga matambo ikumi na ataanu. 29 Bhaghubhaha kubhala ti, meeli jhilakwihuula ku mabhwe, haaho bhajhughalala bhasoosya nanga ine mu mansi, mu nyuma jhya meeli, bhahensa kusye bhwangu.
30 Bhakola milīmo bha mu meeli bhahensa kutoloka bhalēke meeli. Ku teetyo, bhasoosya mu mansi bhwato bhwa kusābhulilamo bhantu, bhaajhīla kobhe bhalikuteela nanga sindi luhande lwa ha mbele jhya meeli. 31 Haaho Paulo ghamulomba mukulu ghwa bhasilikale hamwi na bhasilikale bhaajhe kubhala, “Bhakola milīmo bha mu meeli bhaabha, kubha bhasilakusiibha mu meeli, temulakusila!” 32 Haaho bhaabho bhasilikale bhaputa nkusa ^sikabheele silimbile bhwato bhwa kusābhulilamo bhantu, bhabhulēka bhutwalwe na mansi.
33 Mukubha kwabha ku mwisakusya, Paulo ghasumbula kubhalebhelesya bhenaajhe bhalye fyakulya nalikutenda, “Bhwalelo ni ifuku lya ikumi na bhune kusumbulila homwakanīghilwanga no bhoobha, bhusila kulya sintu. 34 Nonwe ndikumilebhelesya mulye, akulinga musifwi na nsāla. Bhukohela singa tu lunyele lwa muntu ghumwi mu umwe telulakutaajhika.”
35 Bhoghakahwanga kutenda teetyo, ghatwala ibhu, ghamusīima Kabhumba ha mbele jhyabho bhonse, ghalimetula, ghasumbula kulya. 36 Kundi ku mujhaghumwi bhonse bhasikya myēgho, bhasumbula kulya. 37 Fwense ^tukabheele mu meeli jheejhyo, tukabheele kobhe maghāna abhili na makumi ndwi na mukaagha. 38 Bhobhakabhanga bhajhikuta, bhataaghila fyakulya mu tanganika, aleke bhapungusye bhunywamu bhwa meeli. 39 Mulāabho, bhakola milīmo bha mu meeli tebhakasimānyanga silya sihugho. Tukubha bhobhakalōlanga ilaasi no mwengulo ghwa kusābhuka kwi isinsi, bhahensa kubha finakobholeka bhakaghesye meeli jhyabho kooko. 40 Haaho bhaputa mighīla jhya nanga bhajhilēka mu tanganika. Kabhili bhatebhusya mighīla ^jhikabheele jhihambile itanga ku meeli. Bhatansya itanga itooli ha mbele jhya meeli akulinga libhumbe musāgha, kundi bhaajha mwi ilaasi. 41 Tukubha meeli jheejhyo bhojhyakakolelanga ha mbele fise, bhafīka luhande hali nkwānga sya mansi sisanganeene. Mukubha bhasyali kufīka ku lutambo, mutwe ghwa meeli ghwasīnta ku managha mu musinsi ghwa mu mansi, jhyahaghamila moomo. Luhande lwa ku nsīsi lwahulwahuulwa na mabhīmbi, lwasumwa lwasumbula kubheleka mahande mahande.
42 Kundi bhasilikale bhahensa kubhehagha bheghalilwa bhonse, akulinga bhasikobholi kusunga bhatoloke. 43 Tukubha mukulu bhwa bhasilikale, ghakahensanga amusābhule Paulo, ghabhalēsya bhasijhīli teetyo. Ghatenda kubhala, bhakukabha bhakobhwele kusunga, bhasunge mpaka ku lutambo, 44 na bhandi bhakukabha bhasijhinsi kusunga, bhanīghe mahande ne fintu findi fya mu meeli. Ku kwīla teetyo, bhantu bhonse bhafīka ku lutambo bhali bhupanga.