26
Kundi Aghilipa ghamulomba Paulo kubhala, “Nonwe kooko fumya muhogho ghoobhe.” Haaho Paulo ghatalika kubhoko, ghasumbula kufumya muhogho ghwajhe ghaabhala, 2 “Ee mwami Aghilipa, une ndi na mwando, bhukohela nanjughalala ha mbele jhyobhe, infumye muhogho ku ghonse ghobhalikunsitaaka Bhajhahudi. 3 Ndikutenda teetyo, nkana bhukohela ughwe ujhinsi fisogha misīlo jhyonse jhya Bhajhahudi na ghaagha ghonse gho bhalikutensanyia. Teetyo, ndikukusōna utuusye mwēgho uhulikisye.4 “Bhajhahudi bhonse bhajhinsi fisogha nsembo jhyonkabheele najhyo mu sihugho syetu, kufuma bhutwana bhwane, mpaka kufīkila nfuku syonankēkalanga mu lugho lwa Jhelusalemu. 5 Bheene bhanyinsi ku nfuku singi, na haaha kubha bhaatēha bhanatenda bhwene bhwajhe kubha ti, nkabheele nenīghile misīlo jhyonse jhya Bhafalisaajho.a Na Bhafalisaajho gho bhali na majhemi gha kunīgha Kabhāngo konse ka Bhajhahudi, kusumba bhandi bhonse. 6 Nonwe nanjughalala haaha, inkalilwe bhukohela ndisighile ku fibhalwa filya Kabhumba fyoghakabhalombanga bhanyinefwekulu. 7 Ghaagha gho maghāmbo ghobhaheebhilwe makabhila ikumi na abhili gha sihugho syetu, bhahensile kulōla bhoghalikukwīla. Seesyo gho silikusūla bhalikumutendajhyukila Kabhumba bhufuku ne isyubha. None bhwalelo, ee mwami, ndikusitaakwa na Bhajhahudi bhondisighile ku ghaagho maghāmbo. 8 Ku bhuti bhomulikulanganyia kubha ti, Kabhumba tyanabhasyula bhafu?
9 “Une nenyene nkabheele nendi kulanganyia kukola syosyonse silya sinakobholeka, aleke inditune isiina lyeke Jheesu ghwa ku Nasaleti. 10 Ghaagho gho nankakolanga kooko ku Jhelusalemu. Bhapeesi bhakulu bhakampanga managha gha kubheghalila bhahemba mwi ighelesya. Bhobhakabheele bhalikukalilwa kufwa, une nkabheele nengaswele ghobhakabheele bhalikukala. 11 Nfuku syonse nkabheele ketenanja mu nyumba syonse sya kusangaanilamob aleke imbakalile, kabhili nkabheele nendikubhasuntilisya bhamuhambaasye Jheesu. Sisila syane kumwabho, syakasūlanga inje mu fihugho findi aleke imbasanfye.
12 “Ifuku limwi, nkabheele mu nsīla nendikujha mu lugho lwa Damesiki, nkabheele na managha na malaghi kufuma ku bhapeesi bhakulu. 13 Ee mwami, bhonkabheele mu jheejhyo nsīla, isyubha lyafīka hakati, nandōla ilangaasi ikulu nkana kufuma mwi ighūlu. Leelyo ilangaasi likabheele lilikughaka kusumba isyubha. Kundi lyalafya honse, kumwi no bhonkabheele nabho. 14 Fwense twaghwa hansi. Kundi nanhulika silongo silikunomba ku Sihebhulania, kubhala, ‘Sauli, Sauli! Kusi ulikumbunusya? Kusi ulikwifulasya fya malami, kobhe sihōngo silikusontola ntūbha jhyeke sye bhusya!’
15 “Kabhili nambasya kubhala, ‘Ee Taata Bhusya, ughwe uli ghanyi?’ Naagho ghahindula ghaabhala, ‘Une ndi Jheesu ghoghwe ulikumbunusya. 16 Nonwe bhuuka ujhughalale! Nandilubhusya kumoobhe, aleke inkubhiike ubhe mukola milīmo ghwane. Ulakubha nolikubhatembekesisya bhantu bhandi, sikūla syoghwalōla bhwalelo, ne fyondakubha nendikukulāngisya. 17 Nomba nendikukufungila kufuma ku Bhajhahudi bhenoobhe, no ku bhantu bhasili Bhajhahudi. Nomba nendikukulaghiila kumwabho, 18 aleke ubhajhīghule menso, bhahinduke kufuma mu sikolo, bhengile mwi ilangaasi, bhafume mu mpasi jhyeke Syetani,c bhamuhindukile Kabhumba. Ku kwīla teetyo, bhalakubha bhalesibhwa bhubhi bhwabho, bhalobha kumwi na bhandi bhonse ^bhafūliitwe ku kuliswa isiina lyane.’
19 “Teetyo, ee mwami Aghilipa, nsyakalēkanga kufilōnda feefyo filōli kufuma mwi ighūlu. 20 Tukubha nansumbula kulāngulula bhantu bha ku Damesiki kubhala, bhaghalaghale bhubhi bhwabho, bhamuhindukile Kabhumba no kukola ghalya ghakulangisya kubha ti, bhahīnduka mu myēgho jhyabho. Kabhili nanāngulula maghāmbo ghaaghoe ku bhantu bha ku Jhelusalemu no ku bhantu bha mu sihugho syonse sya Jhudea, kumwi no ku bhantu bhasili Bhajhahudi. 21 Ghaagho gho ghakēlanga Bhajhahudi bhaanīghe, bhobhakansangananga ha Nyumba Nkulu jhya Ipeelelo lyeke Kabhumba, bhahensa kunjihagha. 22 Tukubha Kabhumba ghanfūnaanila mpaka kufīkila ifuku lya bhwalelo. Seesyo gho silikusūla nanjughalala ha mbele jhya bhantu, bhakulu na bhatooli, kutenda sikūla syonandōla. Hatuhu maghāmbo ghandi ghondikutenda tukubha ni ghalya ghakatendwanga na bhaghwelaghu no Musa kubha ti, ghalokeesa. 23 Bhaabho bhonse bhakatendanga kubhala ti, Kiliisitod alokabhambwa, no kubha unyene alokabha ghwa kusumbula kusyuka kufuma ku bhafu, aleke atangaasye Sikūla Sisogha sya kusābhulwa, syajhisa ku bhantu bhonse Bhajhahudi na bhasili Bhajhahudi.”
24 Paulo bhwakabheele nasyali nalikufumya muhogho ghwajhe, mwami Fesito ghamutunyia ku silongo sikulu kubhala, “Ughwe Paulo, ajhe ghwasala! Ajhe kusōma kwingi, kwa kwīla usale?”
25 Kundi Paulo ghamuhindula kubhala, “Ee mwami Fesito, une nsili musasi. Maghāmbo ghondikutenda ni gha bhwene gha masāla makwile. 26 Mwami aghajhinsi fisogha ghaagha maghāmbo. Nyinsi kubhala teliliho singa tu ighāmbo limwi mu ghaagha lyasimānyile, bhukohela teghakabheele ghalikukoleka ku bhufiso. Teetyo inamubhalile ghaagho, bhusila kughubhaha. 27 Teeti ee mwami Aghilipa, ghonse ghakatendwanga na bhaghwelaghu, ulikughaswa? Une nyinsi fisogha kubha ti, ulikughaswa.”
28 Haaho Aghilipa ghamubhasya kubhala, “Ulikulanganyia ti, ulakundelebhula imbe muhemba ghweke Jheesu ku maghāmbo ghoobhe mase kobhe ghaagha?” 29 Paulo ghamuhindula ghaabhala, “Jhibhe ni ku maghāmbo mase, ajhe ku mengi, ndikumusēegha Kabhumba ku luhande loobhe, no ku luhande lwa bhandi bhonse bhanhulikiisye bhwalelo kubhala, mubhe kobhe une bhuli bhondi, tukubha bhusila kuhambwa na jheejhi mighīla.”
30 Haaho mwami Aghilipa ghajhughalala, kumwi no mwami Fesito no Bhelinike, na bhandi ^bhakabheele bhēkeele hamwi. 31 Mukubha bhalikujha, bhakatesanyianga bhabhala, “Ghooghu muntu tyajhilite ighāmbo lyolyonse linasūla ajhihaghwe, ajhe ajhīghalilwe mwi ighelesya.” 32 Kundi Aghilipa ghamulomba Fesito kubhala, “Jhinabhe kubha ti, ghooghu muntu tyasēeghile ighāmbo lyajhe likalwe na Kalisaali,e analekuululwe.”