Paulo alikuhensa ighāmbo lyajhe lifelwe kwa Kalisaali
25
Fesito akabheele ghahwa nfuku itatu najhimile mu sihugho sya Jhudea, ghaafuma mu lugho lwa Kalisaalia, ghatanda kujha ku lugho lwa Jhelusalemu. 2 Kooko, bhapeesi bhakulua na bhakulu bhandi bha Bhajhahudi, bhamulōnda bhamulomba ghonse ghobhakabheele bhalikumusitaaka Paulo. Bhabha bhalikumulebhelesya nkana, 3 akubha, abhēlile bhusogha bhwa kubhahelesesya Paulo ha Jhelusalemu. Bhakabheele bhalikumulebhelesya bhukohela bhakabheele bhaajhīla kalimbo ka kumwihaghila mu nsīla. 4 Fesito ghabhahindula ghaabhala, “Paulo ajhīghaliilwe kulya ku Kalisaalia, none nenyene ndakuheleela mu nfuku sya ha bhwihi. 5 Kansi, tujhe hamwi na bhandi bhakulu bhenyu, bhajhe bhakamusitaake kooko, kubha ghakabhihyanga ighāmbo lyolyonse.”6 Fesito bhwakabheele ghahwa kwīkala nabho ku nfuku kobhe munane ajhe ikumi, ghasooka kujha ku Kalisaalia. Mulāabho ghwajhe, ghajhikasya ibhalasa, ghajhīkala ku sitebhe syajhe sya kukalila maghāmbo, ghalaghiila kubhala, Paulo alentwe. 7 Paulo bhoghakabhanga ghafīka haaho, Bhajhahudi ^bhakabheele bhafuma ku Jhelusalemu, bhajhughalala bhamuniengela, bhasumbula kumusitaaka maghāmbo mengi makulu. Tukubha bhakapotwanga kulānsya bhwene bhwa ghaagho maghāmbo.
8 Kundi Paulo naagho ghasumbula kufumya muhogho ghwajhe ghaabhala, “Une nsibhihisye ighāmbo lyolyonse ku luhande lwa Kabhāngo ka Bhajhahudi, ajhe ku luhande lwa Nyumba Nkulu jhya Ipeelelo lyeke Kabhumba, ajhe ku luhande lweke mwami mukulu Kalisaali.”b 9 Fesito ku kuhensa kubhalyohya Bhajhahudi, ghamubhasya Paulo kubhala, “Ulikuswa kujha mu lugho lwa Jhelusalemu, ukakalilwe kooko ha mbele jhyane, ku maghāmbo ghaagho?”
10 Paulo ghamuhindula ghaabhala, “Nanjughalala hakati jhya bhakala maghāmbo ^bhakasongolwa na Kalisaali, na haaha honhenseelwe kukalilwa. Ughwe ghwenyene ujhinsi fisogha kubha ti, nsibhabhihisye Bhajhahudi sintu syosyonse. 11 Kundi kubha nankēlanga ighāmbo lyolyonse lilya lihensile infwe, nsitunile kufwa. Tukubha, kubha maghāmbo ghobhalikunsitaaka Bhajhahudi te gha bhwene, tyaliho akobhwele kumbiika mu mabhoko ghaabho! Ndikusōna kubhala, ghaagha maghāmbo ghakalwe na Kalisaali nyene.”
12 Kundi Fesito bhoghakahwanga kusāhula na bhantu bha ibhalasa lyajhe, ghatenda ghaabhala, “Ghwasōna kubhala, Kalisaali gho akukalile, ulakujha kwa Kalisaali.”
Mwami Fesito alikumubhalila mwami Aghilipa mpola syeke Paulo
13 Mafuku mase ghakalōndanga, mwami Aghilipa kumwi no Bhelinike mwihwa ghwajhe, bhafīka ku Kalisaalia, aleke bhamuposye mwami Fesito. 14 Bhajhīkala haaho nfuku singi. Ifuku limwi, Fesito ghamulomba mwami Aghilipa ighāmbo lyeke Paulo, ghatenda kubhala, “Aliho haaha muntu ghumwi, ghalēkwa mwi ighelesya no mwami Feliki. 15 Bhonkabheele ku Jhelusalemu, bhapeesi bhakulu na bhakulu bha Bhajhahudi, bhanomba maghāmbo gho bhakabheele bhalikumusitaaka. Bhandebhelesya imukalile. 16 Nambahindula kubhala, ufwe Bhaluumi, tetukomukalila muntu nasyali kufumya muhogho ghwajhe ha mbele jhya bhalya ^bhamusitaakile. 17 Kundi naheleela kumwi na bhaabho ^bhamusitaakile Paulo. Nsikatinda, mulāabho ghwajhe twajhīkala ibhalasa, nandaghiila kubhala, Paulo alentwe. 18 Bhalya bhantu bhajhughalala, bhasumbula kumusitaaka. Tukubha maghāmbo ghobhakabheele bhalikumusitaaka, teghakabheele mabhi kobhe bhonkabheele nendikulanganyia. 19 Bhakabheele bhalikutensanyia na Paulo ku luhande lwa misīlo jhyabho bheene, no luhande lwa muntu ghumwi ajhitilwe Jheesu. Ghoogho muntu ghalisumaalika, tukubha Paulo unyene alikusimbaatisya kubha ti, ali bhupanga. 20 None, nsyakamānyanga bhwakulikala leelyo ighāmbo. Kundi, namubhasya Paulo kubha nahensile kujha kwi ibhalasa ku Jhelusalemu, mukatenda ghaagho maghāmbo. 21 Tukubha Paulo ghasōna kubhala, ighāmbo lyajhe, likalwe na Kalisaali. Haaho nambala, ajhīghalilwe mukubha tuhembeele kumufela kwa Kalisaali.” 22 Kundi Aghilipa ghamulomba Fesito kubhala, “Ndikuhensa imuhulikisye ghoogho muntu une nenyene.” Fesito ghamuhindula ghaabhala, “Ulokamuhulikisya isoneka.”
Paulo alikulentwa ha mbele jhyeke mwami Aghilipa
23 Bhokwakabhanga kwasya, Aghilipa kumwi no Bhelinike, bhajhisa bhalikwitiipa. Bhajhingila mwi ibhalasa kumwi na bhakulu bha bhasilikale, na bhakulu bha mu lugho. Kundi mwami Fesito ghalaghiila kubhala, Paulo alentwe. 24 Kundi Fesito ghaabhala, “Mwami Aghilipa nomwe mwense muli hamwi nofwe haaha, mumubhwene ghooghu muntu! Ngo syonse sya Bhajhahudi, Jhelusalemu na haaha ha Kalisaalia, bhalikuhuula kajhombe kunhesa imukalile nasibhi bhupanga. 25 Tukubha une nsibhwene ibhi lyolyonse lyoghajhīla linasūla ajhihaghwe. Bhukohela bhoghansōna kubha ti, ghaagha maghāmbo ghakalwe na mwami mukulu, nandaghiila afelwe ku lugho lwa Luumi. 26 Ku luhande lwane nsijhinsi sintu syosyonse sya kumulomba Kalisaali sijhikenyie no ghooghu muntu. Nonwe namulenta ha mbele jhyenyu, ne nkana ni kumoobhe mwami Aghilipa, akulinga bhotulokabha twakwisya kutembeekesya, indōle sintu sya kunyegha ku luhande lwajhe. 27 Bhukohela, te fisogha kumufela muntu ^asitaakilwe bhusila kulāngisya maghāmbo ghalya ghobhalikumusitaakila.”