Paulo ha mbele jhyeke Feliki ku Kalisaalia
24
Mukubha syahita nfuku itaanu, mupeesi mukulu Anania, ghasooka mu lugho lwa Kalisaalia, kumwi na bhakulu bhandi bha ibhalasa lya Bhajhahudi, no mulāngulusi ghumwi ghwa kabhāngo ka sihugho, ^akabheele najhitilwe Telitulo. Bhaabho bhonse, bhamusitaaka Paulo kwa mwami Feliki. 2 Paulo bhoghakabhanga ghalentwa, Telitulo ghasumbula kumusitaaka ghaabhala, “Mughosimukulu Feliki, ughwe ulikusūla tulikubha na maholo nfuku syonse. Bhwami bhoobhe ni bhutendeke, ulikughahindula maghāmbo mabhi ghajhīkala fisogha moomu mu sihugho. 3 Tulikubhuswa bhwami bhoobhe tusangabhele nfuku syonse, tulikukusīima nkana mpande syonse ku nsīla syonse. 4 Nonwe nensibhi na maghāmbo maleehe nkana, ndikukusēegha ku mwēgho ghoobhe, uhulikisye fise ghotuli nagho.5 “Twalōla kubhala, ghooghu muntu ni katelanyia nkana. Unyene alikubhasonganyia Bhajhahudi mu fihugho fyonse, alikusūla bhantu bhabhula kwihulika mumyabho. Hamwi na ghaagho, unyene gho kalombo ghwa bhahemba bha ghulya ghwa ku Nasaleti. 6 Bhoghakabhanga ghalunga misīloa jhya Nyumba Nkulu jhya Ipeelelo lyeke Kabhumba, haahoe twamunīgha. [Twakahensanga kumukalila ku kulōnda Kabhāngo keetu, 7 tukubha Lisia ghulya munyampala ghwa bhasilikale, ghajhisa ghatughanyuka ku managha, 8 ghatenda kubhala, ufwe tulikumusitaaka, tumusitaake kumoobhe.]b Teetyo, ughwe ghwenyene kubha ghwamubhasilisya, ulakumānya bhwene bhwa ghaagha maghāmbo ghonse ghalikusūla ufwe twamusitaaka.” 9 Ghaagho maghāmbo gheke Telitulo, Bhajhahudi naagho bhaghaswa kubha ti ni gha bhwene.
Paulo alikufumya muhogho ghwajhe ha mbele jhyeke Feliki
10 Kundi Feliki ghamusōnta ikumo Paulo aleke naagho atende. Paulo ghahindula ghaabhala, “Une nyinsi kubhala, kubha ughwe noli mukala maghāmbo mu seesi sihugho syetu ku myaka mingi, ndikuhensa kutenda bhusila kughubhaha. 11 Ughwe ghwenyene unatembeekesya bhukohela, tesisumbile nfuku ikumi ne ibhili nenjiile ku Jhelusalemu, mukatendajhyuka kwa Kabhumba. 12 Bhaabha bhantu bhalikunsitaaka, tebhakansanganga nendikutensanyia na muntu ghoghonse ha Nyumba Nkulu jhya Ipeelelo lyeke Kabhumba, ajhe kusonganyia bhantu mu nyumba sya kusangaanilamo Bhajhahudi,c ajhe luhande lolonse mu loolo lugho. 13 Ghaagha maghāmbo ghobhalikunsitaaka nonwe, tebhakobhwele kulānsya bhwene bhwajhe.
14 “Tukubha ndikuswa ha mbele jhyobhe kubhala, ndikumupeela Kabhumba ghwa bhanyinefwekulu, kabhili nōnsile Nsīla jhyeke Jheesu, bheene jhyobhajhitileko nsīla jhya malami. Hamwi na ghaagho, ndikughaswa maghāmbo ghonse ^ghanyeghilwe mu Kabhāngo keke Musa no mu fitaabhu fya bhaghwelaghu. 15 Une, ndisighile kwa Kabhumba, kobhe bhaabha bhonse naagho bhobhesighile kubha ti, Kabhumba alokabhasyula bhafu bhonse, bhasogha na bhakanya bhubhi. 16 Teetyo, nfuku syonse ndikwīla majhemi no kubha no mwēgho musogha ha mbele jhyeke Kabhumba na ha mbele jhya bhantu.
17 “Bhonkabheele nankahwa myaka mingi bhusila kufīka mu lugho lwa Jhelusalemu, nankaheleelanga kooko aleke imbafūnaanile bhantu bha sihugho syane bhalya bhasikobhwele, no kufumya mpeesi kwa Kabhumba. 18 Bhaabha bhantu gho bhakansanganga ha Nyumba Nkulu jhya Ipeelelo lyeke Kabhumba nendikwīla ghaagho maghāmbo, nkabheele nankwisya kufūlwa. Nsikabheele ketenanyingila na lūuli lwa bhantu ajhe nsyakēlanga kajhombe kokonse moomo. Bhakabheelemo Bhajhahudi bhandi, kufuma ku sihugho sya Asia. 19 Bhaabho gho bhanakajhughalale ha mbele jhyobhe kunsitaaka kumoobhe, kubha bhanakabhe ne ighāmbo ku mwane.
20 “Ajhe, bhaabha bhantu bhali haaha, bhatende ighāmbo lyolyonse ibhi lyobhakalōlanga kumwane bhonankajhughalalanga mwi ibhalasa lyabho.d 21 Hamwi bhakaghajhanga bhonankatendanga ighāmbo limwi ku silongo hakati jhyabho kubhala, ‘Silikusūla une inkalilwe ku kabhāngo ha mbele jhyenyu bhwalelo, ni bhukohela ndisighile kubha ti, bhafu bhalokasyuka.’”
22 Kansi, Feliki akabheele najhinsi fisogha Nsīla jhyeke Jheesu. Kundi ghaabhala, “Nonkalikala ighāmbo lyenyu kubha ghulya munyampala ghwa bhasilikale Lisia, ghajhisa.” Kundi ghasambaasya seesyo siikalo. 23 Kundi mwami Feliki ghamulomba mukulu ghwa bhasilikale ^akabheele haaho amulalilile Paulo. Tukubha abhe namulekulwile, akulinga abhe ne mpeghupeghu jhya kukola milīmo jhyajhe, na bhanywanyi bhaajhe kubha bhajhisa bhasilesibhwi kumuha ka kumuha.
Paulo ha mbele jhyeke mwami Feliki no Dulusila
24 Bhosyakabhanga syahita nfuku nse, ghoogho Feliki ghajhisa kumwi no mukasi Dulusila, ^akabheele Mujhahudi. Kundi ghalaghiila kubhala ti, Paulo ajhitwe. Paulo bhoghakabhanga ghafīka, mwami Feliki ghasumbula kumuhulikisya, nalikutenda ku luhande lwa kumwisigha Kiliisito Jheesu. 25 Paulo ghasumbula kubhalomba ghonse ^ghahenselwe ha mbele jhyeke Kabhumba, no kulēka kukola mabhi, kabhili bhuli Kabhumba bhwalokabhakalila bhantu. Feliki bhoghakahulikanga teetyo, ghaghubhaha. Ghamulomba Paulo kubhala, “Ku teeti nonwe ukobhwele ghwajha. Kubha nampāta mpeghupeghu ndokakwita kabhili.” 26 Hamwi na ghaagho, Feliki akabheele nalikulanganyia ti, Paulo anamuha mahela gha kumulebhelesya. Teetyo akabheele keteghamwita nfuku syonse, nalikusāhula naajhe. 27 Myaka ibhili bhojhyakahitanga, Polikio Fesito ghabha mwami, mu mpasi jhyeke Feliki. Bhukohela Feliki akabheele nalikuhensa kubhēlila bhusogha Bhajhahudi, ghamulēka Paulo mwi ighelesya.