23
Paulo ghabhahusulila menso bhaabho bhakulu bha ibhalasa, ghatenda kubhala, “Bhamughana ghwane, mbele nenjīkele ku mwēgho musogha ha mbele jhyeke Kabhumba, mpaka bhwalelo teeti.” 2 Mupeesi mukulua Anania bhoghakabhanga ghahulika teetyo, ghabhalomba ^bhakabheele bhajhughalele ha bhwihi naajhe Paulo, bhamuhuule ikoofi ku mulōmo. 3 Kundi Paulo ghamulomba Anania, kubhala, “Kabhumba alokuhuula, ughwe katelanyia! Uli kobhe lukande ^lusiighilwe nswakala! Ughwe ujhīkeele haaha aleke unkalile kobhe Kabhāngo bhokatensile. Tukubha, ughwe ghwenyene ulikukalunga Kabhāngo, bhukohela ulikubhala ti, inhuulwe ikoofi.”4 Bhantu ^bhakabheele bhajhughalele ha bhwihi no Paulo, bhamukabha bhabhala, “Teeti ughwe, unamutuka mupeesi mukulu ghweke Sifwe Bhusya Kabhumba?” 5 Paulo ghabhahindula ghaabhala, “Bhamughana ghwane, nsibhele nenyinsi kubha ti, gho mupeesi mukulu! Nyinsi finyeghilwe kubhala, ‘Nosimutendi fibhi mwami ghwenyu.’ ”b
6 Paulo akabheele najhinsi kubha ti, mu bhaabho bhantu, bhandi ni Bhasadukaajhoc na bhandi ni Bhafalisaajho.d Teetyo, ghatenda ku silongo sikulu ha mbele jhya leelyo ibhalasa ghaabhala, “Bhamughana ghwane, une ndi Mufalisaajho, mwana ghwa Bhafalisaajho. Nansitaakwa haaha bhukohela nanswa kubhala, bhafu bhalokasyuka.” 7 Bhoghakahwanga kutenda ghaagho hakabhanga kuhisyunkana mu Bhafalisaajho na Bhasadukaajho, hajhisa nsambaala jhya siikalo syonse. 8 Kuhisyunkana kwakasūlikanga teeti bhukohela, Bhasadukaajho bhakobhala ti, bhafu tebhakosyuka, hatuhu misambwa, na mamisāgha naagho teghaliho. Tukubha Bhafalisaajho bhaghajhinsi fisogha ghaagho ghonse atatu.
9 Kundi, mu bhaabho bhakulu bha ibhalasa, hakabhanga kuhisyunkana kukulu. Bhamakota bhandi bha Kabhāngo keke Musa bha ku luhande lwa Bhafalisaajho bhajhughalala bhabhala, “Tetubhwene bhubhi bhobhonse ku ghooghu muntu! Hamwi limusāgha ajhe musambwa ghatenda naajhe!” 10 Masōola ghabha makulu, ghasumwa ghoogho munyampala ghwa bhasilikale ghaghubhaha kubha ti, hamwi bhaabho bhakulu bha ibhalasa bhakobhwele bhamufulasya Paulo. Teetyo, ghalaghiila bhasilikale bhaajhe bhajhe bhakamufumye Paulo mu mabhoko ghaabho ku managha, bhamwingisye mu lusinga lwa nyumba jhya bhasilikale.
11 Kundi bhufuku bhoobhoe, Sifwe Bhusya Jheesu ghajhughalala habhwihi naajhe, ghamulomba kubhala, “Mila mwēgho! Kubha ghwakantendelelanga mu lugho lwa Jhelusalemu, teetyo bhombasile ukakole no mu lugho lwa Luumi.”
Bhajhahudi bhalikutensanyia bhwakumwihagha Paulo
12 Bhokwakabhanga kwasya, Bhajhahudi bhandi bhaajhīla kalimbo, bhalaghana kubhala, bhasili fyakulya no kunywa mpaka bhamwihaghe Paulo. 13 Bhantu bhakēlanga kaako kalimbo, bhakabheele kusumba bhantu makumi ane. 14 Teetyo, bhaajha ku bhapeesi bhakulu na bhakulu bha ibhalasa, bhatenda kubhala, “Twalaghana tulēke kulya no kunywa, mpaka tumwihaghe Paulo. 15 Kansi nonwe, umwe kumwi na bhakulu bheneenyu bha ibhalasa, mulombe munyampala ghwa bhasilikale, amulente Paulo kumwenyu. Mwijhīle kobhe, mulikuhensa kumutembeekesya fisogha bhuli bhotulikumusitaaka. Ufwe tulakumwihagha nasyali no kufīka haaha.”
16 Tukubha mwiswa ghweke Paulo, ghahulika maghāmbo ghaabho ghobhakabheele bhalikuhensa kwīla ku luhande lwajhe, kundi ghaajha moomo mu lusinga lwa nyumba jhya bhasilikale, ghamulomba Paulo. 17 Kundi, Paulo ghamwita musilikale ghumwi ajhughalaliile haaho, ghamulomba kubhala, “Mufele ghooghu mulughalugha, kwa munyampala ghwenyu ali ne ighāmbo lya kumulomba.” 18 Kundi ghoogho musilikale ghamufela kwa munyampala ghwabho, ghamulomba kubhala, “Ghulya mwighalilwa Paulo, ghanjita ghansona kubha ti, imulente ghooghu mulughalugha kumoobhe, ali ne ighāmbo lya kukulomba.” 19 Ghoogho munyampala ghamunīgha ghoogho mulughalugha kubhoko, ghaajha naajhe ku bhufiso, kundi ghamubhasya kubhala, “Uli ne ighāmbo umbalile?” 20 Ghoogho mulughalugha ghaabhala, “Bhajhahudi bhalaghana, bhakusone Paulo isoneka, umufele mwi ibhalasa lyabho. Bhalokejhīla kobhe bhalikuhensa kutembeekesya fisogha maghāmbo ghalikusūla bhamusitaake. 21 Kundi ughwe nosiswi, bhukohela bhaabho bhantu bhasumbile makumi ane, bhalomubhwelamila Paulo mu nsīla, akulinga kubha ghahita bhamwihagha. Bhaabho bhantu, bhalaghana, bhasili fyakulya ajhe kunywa sintu syosyonse, mpaka bhamwihagha. Nonwe bhajhīkeele bhakwiliile, bhahembeele bhuli bholakutenda.” 22 Kundi ghoogho munyampala ghamulomba ghoogho mulughalugha kubhala, “Nosimulombi muntu ghoghonse kubha ti, ghwanomba feefi fibhalwa.” Kundi ghamutāabhula ajhyāte.
Paulo alikufelwa kwa mwami Feliki
23 Kundi, ghoogho munyampala ghwa bhasilikale, ghabhajhita bhajhughalasi bhabhili bha bhasilikale, ghabhalomba kubhala, “Mubhakomenkanyie bhasilikale maghāna abhili bhajhe lwa maghūlu, bhasilikale makumi ndwi bhalyāsye falaasi, na bhasilikale maghāna abhili bhakanya masumo. Bhajhe mu lugho lwa Kalisaalia ikunka lya sa taatu bhufuku. 24 Mumubhiikile naagho Paulo falaasi jhya kumutwala, aleke alyāte fisogha kwa mwami Feliki.”
25 Ghoogho munyampala ghwa bhasilikale, ghaanyegha lupapulo, kubhala,
26 “Ee mughosimukulu mwami Feliki, une Kilaudio Lisia ndikukuposya. 27 Muntu ghooghu ghakanīghwanga na Bhajhahudi, bhahensa kumwihagha. Une bhonankamānyanga kubha ti ni Muluumi, nanja hamwi na bhasilikale, namusisya. 28 Nankahensanga kumānya sintu ^sikabheele silikusūla bhaabho Bhajhahudi bhamusitaake, teetyo, namufela mwi ibhalasa lyabho. 29 Nandōla kubha ti, bhalikumusitaaka ku maghāmbo gha Kabhāngo ka kumwabho. Tukubha bhuli bhobhakamusitaakanga, teliliho ighāmbo singa tu limwi linasūla ajhihaghwe ajhe ajhīghalilwe. 30 Bhonankabhalilwanga kubha ti, Bhajhahudi bhaajhīla kalimbo kabhi kwa ghooghu muntu, nandōla kubhala, imulente bhwangu kooko kumoobhe. Nambabhalila bhalya bhantu bhalikumusitaaka, bhese bhamusitaake kumoobhe.”
31 Kundi, bhaabho bhasilikale bhamutwala Paulo kobhe bhobhakabheele bhalombwa, bhamufela bhoobho bhufuku mpaka mu lugho ^lukabheele lujhitwile Antipatili. 32 Mukubha kwasya, bhalya bhasilikale ^bhakabheele bhalikujha lwa maghūlu bhaheleela, bhabhalēka bhenaabho bhakanya falaasi bhajhe no Paulo. 33 Bhobhakabhanga bhafīka mu lugho lwa Kalisaalia, bhamuha lulya lupapulo mwami Feliki, bhamukabhisya no Paulo. 34 Bhoghakabhanga ghahwa kulusōma lulya lupapulo, ghabhasya kubhala, “Ghooghu muntu ni ghwa kuuhe?” Bhoghakabhalilwanga kubha ti ni ghwa ku sihugho sya Kilikia, 35 ghamulomba Paulo kubhala, “Ndakukuhulikisya, ^bhakusitaakile bhobhalobha bhafīka.” Kundi ghalaghiila kubhala ti, Paulo alalililwe mu nyumba jhya bhwami bhweke Helode.e