Timoseo ghalipampika kwa Paulo no Siila
16
Paulo ghafīka mu lugho lwa Delibhe, kundi ghaajha no mu lugho lwa Lisitila. Kooko ku Lisitila kukabheele no muhemba ghumwi ghweke Jheesu. Ghoogho muhemba, akabheele najhitilwe Timoseo. Nyinaabho akabheele Mujhahudi ^amwisighile Jheesu. Tukubha usye tyakabheele Mujhahudi. 2 Timoseo akabheele na mpunda nkulu nkana mu bhahemba bhenaajhe ^bhakabheele ku Lisitila no kwi Ikonilo. 3 Paulo ghakahensanga Timoseo alōndekane naajhe, teetyo ghamutwala ghamuputa nkōpa, bhukohela Bhajhahudi ^bhakabheele bhēkeele kulya bhakabheele bhamujhinsi usye ti ni Mujhunani. 4 Bhobhakabheele bhahitile mu silya ngo bhakabhahanga bhahemba ghalya malaghi ghakafumisibhwanga ne mintengwe na bhaghosibhakulu bha kaniisa kulya ku Jhelusalemu, bhabhalomba bhaghanīghe. 5 Teetyo bhahemba bhaabho bhaabha na managha kubha bhesighile, bhantu bhaabha bhalikughungilika nfuku syonse.Paulo alikulōla filōli ku Toloa
6 Paulo hamwi na bhenaajhe bhakalyātanga mu fihugho fya Filighia ne Ghalatia, bhukohela Mwēgho Mulafu ghweke Kabhumbaa akabheele ghabhalēsya kutangaasya Ighāmbo lyeke Kabhumba kooko ku Asia. 7 Bhobhakabhanga bhafīka ku sihugho sya Misia, bhakalingisyanga kujha kwingila ku sihugho sya Bhisinia, tukubha Mwēgho Mulafu ghweke Jheesub teghakabhaswesyanga bhajhe. 8 Teetyo bhakahitanga ku Misia, bhafīka ku lugho lwa Toloa. 9 Bhobhakafīkanga kooko, bhufuku Paulo ghaalōla filōli. Mu feefyo filōli, ghaalōla muntu ghwa ku Makedonia najhughalele, nalikumulebhelesya nkana kubhala, “Ghambuka ujhise kunu ku Makedonia, utufūnaanile.” 10 Paulo bhoghakabhanga ghaalōla feefyo filōli, haahoe twajhīla matelekanyi kujha ku Makedonia, bhukohela twakamānyanga kubhala ti Kabhumba ghatwita tutangaasye Sikūla Sisogha ku bhalya bhantu.
Kwisigha kweke Lidia
11 Kundi, twafuma ku Toloa mu meeli, twajha syalimwi mpaka ku kalila kajhitilwe Samotilake. Bhokwakabhanga kwasya, twajha twakafīka ku lugho lwa Neapoli. 12 Kufuma kooko, twajha mpaka mu lugho lwa Filipi, lugho lukulu lwa ku Makedonia, ni lugho lobhakabheele Bhaluumi bhengi bhēkeele. Kundi twasooka mu lugho loolo, twajhīkalamo mafuku mase. 13 Ifuku lya Kutamuka, twajha kunse na loolo lugho, ku mbalimbali na monga, bhukohela tukabheele tulikulanganyia kubha, tunapāta ha kutendajhyukila. Twajhīkala, twasumbula kusāhula na bhanabhakeema ^bhakabheele bhakomenkana haaho. 14 Mwanamukeema ghumwi mu bhaabho ^bhakabheele bhatuhulikiisye isiina lyajhe Lidia, musulusi ghwa myenda jhya mahela mengi, mwikasi ghwa ku lugho lwa Tiatila tyakabheele Mujhahudi, tukubha akabheele ghakepampika ku Bhajhahudi nalikumupeela Kabhumba. Taata Bhusya ghaghwighula mwēgho ghwajhe ghapokeela fibhalwa fyeke Paulo. 15 Bhoghakabhanga ghaliisigha, ghabhatisibhwa unyene na bhantu bha mu nyumba jhyajhe. Kundi ghatulebhelesya nkana ghaabhala, “Kubha mwalōla kubha ti bhwene une mwisighile Taata Bhusya Jheesu, jhise mwīkale mu nyumba jhyane.” Ghatulebhelesya nkana nalikuhensa tujhe hamwajhe.
Paulo no Siila bhalikwighalilwa mwi ighelesya
16 Ifuku limwi, bhotukabheele tulikujha ha kutendajhyukila, twasangaana na muhāla ghumwi musya. Ghoogho muhāla, akabheele na limusāgha ibhi. Leelyo limusāgha, likabheele ketelyamuha managha gha kulaghula filokeesa. Mu kooko kulaghula kwajhe, bhakulu bhaajhe bhakabheele ketebhapāta mahela mengi. 17 Ghoogho muhāla, ghabha nalikumulōnda Paulo nofwe, kooku nalikuhuula kajhombe kubhala, “Bhantu bhaabha, ni bhakola milīmo bheke Kabhumba Mukulu ghwa Fyonse. Bhaabho bhalikumitangaasisya bhuli bhomulosābhulwa!” 18 Ghoogho muhāla, ghajhililika nalikwīla teetyo ku nfuku singi. Tukubha Paulo ghaghājha nkana. Ghabhijhuka ghalikalihila lilya limusāgha ghaabhala, “Ndikukulomba kwi isiina lyeke Jheesu Kiliisito umufumeko ghooghu muhāla!” Haahoe, lilya limusāgha lyamufumako.
19 Kundi, bhakulu bheke ghulya muhāla, bhobhakabhanga bhalōla kubha ti, tebhali na kasako kandi ka kulonka mahela, bhamunīgha Paulo no Siila bhabhatamba mpaka ha mbele jhya bhakulu bha ibhalasa. 20 Bhobhakabhanga bhabhafīsya ku bhaabho, bhabhasitaaka bhabhala, “Bhantu bhaabha ni Bhajhahudi, bhalikulenta bhukasonganyia mu lugho lwetu. 21 Kabhili bhalikutulāngulula maghāmbo gha mighenyi jhisili jhya kumwetu ufwe Bhaluumi, tetubhaliilwe kujhiswa ajhe kujhilōnda.”
22 Lūuli lwa bhantu ^bhakabheele bhakomenkana halya, bhabhebhunda Paulo no Siila. Bhalya bhakulu bha ibhalasa bhalaghiila Paulo no Siila bhafuulwe myenda jhyabho ku managha, bhahuulwe ne fibhooko. 23 Bhobhakabhanga bhakwisya kubhahuula fibhooko fingi, bhabhajhīghalila mwi ighelesya, kundi bhamulomba mukulu ghwa bhasilikale bha ighelesya abhanīghilile nkana. 24 Mukulu ghwa ighelesya naagho, ghalaghiila bhabhabhiike mu syumba sya mukati, kabhili bhabhahambe ku sinyenye.
25 Mukubha bhwafīka bhufukukati, Paulo no Siila bhakabheele bhalikutendajhyuka kwa Kabhumba, bhalikumwimbila nyimbo sya kumujhimbika. Bheghalilwa bhenaabho, bhakabheele bhabhahulikiisye. 26 Haahoe, linyamusikimya ikulu nkana lyajhisa, kumwi no musingi ghwa ighelesya ghwatengana. Milyāngo jhya ighelesya jhyajhighuka ne mighīla ^jhikabheele jhihambile bhantu bhonse jhyahambuluka. 27 Ghulya mukulu ghwa ighelesya mukubha ghahalamuka, ghaalōla milyāngo jhya ighelesya jhijhighwilwe, ghasōmola lupanga lwajhe mwi ighājha, ghahensa ti alijhihaghe. Ghakēlanga teetyo nalikulanganyia ti bhantu bhonse ^bhakabheele bhajhīghaliilwe bhakilima. 28 Tukubha Paulo ghatangiila ku silongo sikulu ghaabhala, “Nosijhihaghi! Fwense tuliho.” 29 Haaho ghulya mukulu ghwa ighelesya, ghalaghiila tumūni tulentwe. Bhotwakalentwanga, ghajhingila moomo mwi ighelesya, ghasukama ha mbele jhyeke Paulo no Siila kooku nalikusughuma.
30 Kundi ghabhafela kunse, ghabhabhasya ghaabhala, “Bhakulu bhaane, injīle bhuti aleke insābhulwe?” 31 Bhamuhindula kubhala, “Mwisighe Jheesu, ughwe na bhantu bha mu nyumba jhyobhe, mulosābhulwa.” 32 Kundi, Paulo no Siila bhamulāngulula Sikūla Sisogha syeke Sifwe Bhusya Jheesu, unyene na bhantu bhonse ^bhakabheele bhali mu nyumba jhyajhe. 33 Bhufuku bhoobhoe, ghulya mukulu ghwa ighelesya, ghabhatwala ghabhasuula filōnda fyabho. Kundi ghabhatisibhwa unyene na bhantu bhaajhe bhonse. 34 Bhoghakabhanga ghahwa ghabhafela ku lugho kumwajhe, ghabhajhōjhisya fyakulya. Ghasangabhala nkana hamwi na bhamughana ghwajhe bhonse, bhukohela bhobhamwisigha Kabhumba.
35 Bhokwakabhanga kwasya, bhalya bhakulu bha ibhalasa, bhabhalaghiila bhakulu bha bhasilikale kwa mukulu ghwa ighelesya bhabhala, “Bheghule, bhabhalekuulule bhalya bhantu bhajhe kumyabho.” 36 Ghulya mukulu ghwa ighelesya ghamulomba Paulo ghaabhala, “Bhakulu bha ibhalasa bhalaghiila bhantu kubhala, imijhīghulile. Nonwe fume kunse, mujhyāte maholo kumyenyu.”
37 Kundi, Paulo ghabhalomba bhalya bhakulu bha bhasilikale kubhala, “Kusi bhaabho bhakulu bha ibhalasa bhatuhuula nkana ha mbele jhya bhantu bhusila kutukalila, nofwe tuli Bhaluumi!c Bhatwighalila mwi ighelesya. Kundi bhalikuhensa kutufumya moomu ku bhufiso? Lekehi! Bhese bheene bhatufumye moomu mwi ighelesya.” 38 Bhaabho bhakulu bha bhasilikale, bhaheleela bhabhalomba bhalya bhakulu bha ibhalasa ghaagho maghāmbo. Kundi, bhobhakabhanga bhahulika kubhala ti, Paulo no Siila ni Bhaluumi, bhakaghubhahanga nkana. 39 Ku teetyo, bhakajhanga mukabhakondelesya bhabhafwile sighōngo, kundi bhabhafumya mwi ighelesya, kabhili bhabhalebhelesya bhafume mu lulya lugho. 40 Paulo no Siila, bhobhakabhanga bhafuma mwi ighelesya, bhakajhanga kwa Lidia, bhakomenkana haaho na bhahemba bhenaabho, bhabhasikya myēgho, kundi bhaajha.