Ibhalasa lya ku Jhelusalemu
15
Habha bhantu bhakafumanga ku Jhudea bhajhisa ku Antiokia, bhabhalāngulula bhalya bhahemba bhabhala, “Kubha mwabhula kuputa nkōpaa kobha bhwalaghiisile Musa, temunasābhukehi.” 2 Ighāmbo leeli, lyakasūlanga Paulo no Bhalinaabha bhapootwa kwihulika na bhalya bhantu. Bhatendaho maghāmbo mengi gha bhuhinga. Bhahemba bhaabho bhobhakalōlanga ghaagho, bhabhalomba Paulo no Bhalinaabha bhajhe ku Jhelusalemu, bhakahanuusye kwa mintengwe na bhandi bhaghosibhakulu bha kaniisa. 3 Kafumilo ka haaho bhalitāahya na bhahemba bha ku Antiokia. Mukubha bhajhiile bhahita mu sihugho sya Foinike no mu Samalia, bhaabha bhalikubhalomba bhahemba bha kooko bhuli bhantu bhasili Bhajhahudi naagho bhobhamumānya Kabhumba. Sikūla seesyo bhasitēha nkana bhaabho bhahemba bha kooko.4 Paulo na bhenaajhe bhobhakabhanga bhafīka ku Jhelusalemu, mintengwe bheke Jheesu, bhaghosibhakulu bha kaniisa na bhandi bhantu bha kaniisa, bhabhasangaanila fisogha. Paulo no Bhalinaabha bhabhalomba ghonse Kabhumba ghoghakakolanga kuhitila kumwabho. 5 Tukubha bhandi bhahemba mu Bhafalisaajhob bhajhughalala bhabhala, “Bhantu bhasili Bhajhahudi bhalikuhenselwa nyinambele bhaputwe nkōpa, kabhili bhalōnde Kabhāngo keke Musa.”
6 Kundi mintengwe na bhaghosibhakulu bha kaniisa bhabhiika sifita kulitendelela leeli ighāmbo. 7 Bholyakabhanga lyahita ikunka ikulu bhalikulitendelela, Petelo ghajhughalala ghaabhala, “Ale bhamughana ghwane, mujhinsi kubhala ti mu nfuku sya kusumbula Kabhumba ghakansāaghulanga une akulinga bhantu bhasili Bhajhahudi bhahulike Sikūla Sisogha bhasiswe. 8 No Kabhumba ajhinsi myēgho jhya bhantu, nonyene ghakalānsyanga kubha ti ghabhaswa ku kubhaha Mwēgho Mulafuc kobhe bhoghakatuhanga ufwe. 9 Tefileghunkenehi Kabhumba fyoghakēlanga kumwetu no kumwabho, ghakajhisūnga myēgho jhyabho bhamwisighe Jheesu. 10 Nonwe, nasi mulikumughema Kabhumba ku kubhatwikilisya bhahemba bheke Jheesu miligho jhya Kabhāngo keke Musa, jhyakukabha kusumbula bhanyinefwekulu nofwe twakapootwa kujhitwala? 11 Ufwe syotujhinsi ni kubhala, twakasābhulwa ku sighōngo syeke Sifwe Bhusya Jheesu teetilie kobha bheene.”
12 Haaho bhantu bhonse bhakabheelemo, bhahumbula nakele. Paulo no Bhalinaabha bhajha kutenda bhuli Kabhumba bhwakabhaheele managha gha kujhōojhya lusante na maleebha mu bhantu bhasili Bhajhahudi. 13 Kubha bhahwa kutenda, Jhakobho ghaabhala, “Bhamughana ghwane, hulikisye. 14 Simoni ghatulomba bhuli Kabhumba fyoghakēlanga mu kusumbula ku bhantu bhasili Bhajhahudi, akulinga asāaghule mu bhaabho bhabhe bhantu bhaajhe. 15 Leeli ighāmbo lilinganeene na maghāmbo gha bhaghwelaghu kobhe bhofibhasile,
16 ‘Kubha ghahita ghaagha nonkaheleela,
nanjighubhaka kabhili nyumba jhyeke Daudid jhyakaghwa.
Nonkalijhōojhya luhya itōngo lyajhe, nandighubhaka kabhili.
17 Haaho bhantu bhonse bha findi fihugho,
bhonantangiila kubha ti bhabhe bhantu bhaane,
bhalohensela honkali une Sibho Bhusya.
18 Bhwalikubhala Sifwe Bhusya ghakalānsyanga ighāmbo leeli kufuma kale.’e”
19 Jhakobho ghajhililika ghaabhala, “Leelyo gho lilikusūla une nambala ti tulēke kubhasanfya bhantu bhasili Bhajhahudi ^bhamwisighile Kabhumba. 20 Tukubha tubhafelele lupapulo lwa kubhalomba bhalēke kulya nyama sya kupeela, bhasijhīli bhulabha, bhasili nyama sya manywele gha kukulika, kabhili bhasili malaso gha manywele. 21 Bhukohela, kufuma nfuku sya kunyuma bhakabheeleho bhantu ^bhakabheele bhalikulāngulula Kabhāngo keke Musa ku bhantu mu ngo syonse. Sikabheele ketesyasōmwa Nfuku syonse sya Kutamukaf mu nyumba sya kusangaanilamo Bhajhahudi.”
Lupapulo ku bhahemba bhasili Bhajhahudi
22 Kundi mintengwe na bhaghosibhakulu bha kaniisa, hamwi na bhahemba bhonse bha kaniisa jhya ku Jhelusalemu, bhatendela kumwi, bhasāaghula bhantu bhakulōndekana no Paulo no Bhalinaabha ku Antiokia. Haaho bhamusāaghula Jhuuda lindi isiina Bhalisabha, hamwi no Siila, bhaabha bhantu bhabhili bhakabheele bhakalombo bha bhenaabho. 23 Bhabhaheekesya lupapulo lubhasile,
“Ufwe mintengwe na bhaghosibhakulu bha kaniisa, bhahemba bheneenyu, tulikumiposya umwe bheneetu musili Bhajhahudi muli kooko ku Antiokia, ku Siilia no ku Kilikia. 24 Tukahuliike kubhala ti kuli bhantu ^bhakesile kooko kufuma kunu kumwetu bhalikumisanfya ku maghāmbo ghaabho, bhotusyakalaghilanga ufwe. 25 Nonwe ku syahamwi ufwe twabhala, twaswa ku mwēgho ghonse kusāaghula bhantu bhengana bhalōndekane no Paulo no Bhalinaabha kwisa kooko. 26 Bhaabho bhakehala kukola mulīmo ghweke Sifwe Bhusya Jheesu Kiliisito singa kunabha kufwa. 27 Twabhalaghiila kooko kumwenyu Jhuuda no Siila, bhaabho bhalokamulāngulula fisogha ghaagho ghotutensile mu loolo lupapulo. 28 Bhukohela Mwēgho Mulafu ghweke Kabhumba ghatulombola kubhala, tusimitwiki muligho ghoghonse mukulu kusumba ghaagha maghāmbo gha kapanga, 29 musili nyama sya kupeela, musili malaso, musili nyama sya manywele gha kukulika, liijheke no bhulabha. Kubha mwaliijheka na ghaagho ghonse mulobha mwajhīla fisogha. Jhīkale mpola.”
30 Kundi bhalitāahya nabho bhalya bhakalaghilwanga, bhaajha ku Antiokia. Bhobhakabhanga bhafīka bhakomenkanyia bhahemba bhonse, bhabhaheekesya lulya lupapulo lwa malaghi. 31 Bhalya bhahemba bhobhakabhanga bhahwa kughahulikisya malaghi ghonse ^ghakabheele mu lulya lupapulo, bhasangabhala nkana ku maghāmbo ghakabheelemo gha kubhasīipya. 32 Jhuuda no Siila ^bhakabheele bhaghwelaghu, bhabhalomba bhahemba bhenaabho maghāmbo mengi gha kubhasīipya. 33 Bhobhakabhanga bhajhīkalako mafuku ghengana ku Antiokia, bhalya bhahemba bhalitāahya nabho ku maholo, bhaheleela ku bhalya ^bhakabhalaghilanga. [ 34 Tukubha Siila unyene ghasīibha kookoe.]g 35 Paulo no Bhalinaabha bhasīibhako ku Antiokia mafuku ghengana. Bhalāngulula bhanatangaasya Ighāmbo lyeke Sifwe Bhusya hamwi na bhandi bhantu bhengi.
Lwēndo lwa bhubhili lweke Paulo lwa kutangaasya Sikūla Sisogha
36 Mukubha syahita nfuku nse, Paulo ghamulomba Bhalinaabha kubhala, “Tujhyāte tukabhajhumbile bheneetu mu ngo syotwakahitanga tulikutangaasya Ighāmbo lyeke Sifwe Bhusya, tukalōle meekasi ghaabho.” 37 Bhalinaabha akabheele nahensile bhamutwale no Jhohana ^akabheele najhitilwe Maaliko. 38 Tukubha Paulo teghakalinyomwanga lya kulōndekana naajhe, bhukohela Maaliko ghakabhalēkanga ku Pamufilia ghatuna kulōndekana nabho ku milīmo. 39 Hasūlika fihando fingi fya kubhula kwihulika Paulo no Bhalinaabha, bhalekunkana. Bhalinaabha ghamutwala Maaliko, bhatanda meeli bhaajha ku Kiipulo. 40 Paulo naagho ghamusāaghula Siila, bhahemba bhabhatendajhyukila bhatambe lwa mpemba, naagho bhabhuuka bhaajha. 41 Ghahita ku Siilia no ku Kilikia, ghaajha ghabhasīipya bhahemba bha kooko.