Paulo no Bhalinaabha bhali kwi Ikonilo
14
Mukubha Paulo no Bhalinaabha bhali kooko kwi Ikonilo, bhajhingila syahamwi mu nyumba jhya kusangaanilamo Bhajhahudi kobhe mughenyi ghwabho. Kooko bhalitangaasya fisogha Ighāmbo lyeke Kabhumba, na bhantu bhengi Bhajhahudi na bhasili Bhajhahudi, bhamwisigha Jheesu. 2 Tukubha bhalya Bhajhahudi bhakatunanga kumwisigha Jheesu, bhajhingisyaho maghāmbo gha bhukasonganyia ku bhantu bhasili Bhajhahudi, bhabhatune bhahemba bheke Jheesu. 3 Paulo no Bhalinaabha bhakēkalanga kooko mafuku mengi, bhalikutenda ku bhusimu Ighāmbo lya sighōngo syeke Sifwe Bhusya Kabhumba. Nonyene mu kwilubhusya ghakabhaheekesyanga managha gha kujhōojhya lusante na maleebha. 4 Tukubha bhantu bha mu lulya lugho bhapuughana, bhandi bhalihulika na Bhajhahudi, bhandi bhalihulika na bhalya mintengwe.5 Kafumilo ka haaho bhandi Bhajhahudi na bhantu bhasili Bhajhahudi, hamwi na bhandi bhakulu bhakulu, bhajhīkala kalimbo kabhi bhabhahuule na mabhwe Paulo no Bhalinaabha. 6 Mintengwe bhobhakabhanga bhamānya kalimbo kaako, bhakakilimanga kufuma mu lugho lwa Ikonilo, bhaajha mu ngo sya Lisitila ne Delibhe ^sikabheele mu sihugho sya Likaonila. 7 Kooko bhajhililika na mulīmo ghwa kutangaasya Sikūla Sisogha.
Paulo no Bhalinaabha bhali mu lugho lwa Lisitila no lwa Delibhe
8 Mu lugho lwa Lisitila, mukabheele muntu ghumwi ^akabheele sisyeta ghwa kafuuko tyanalyāte. 9 Ghoogho muntu ghakamuhulikanga Paulo nalikutenda. Paulo bhoghakabhanga ghamutembeekesya, ghamulōla kubha ti alisighile kwa Kabhumba, alakumusisya. 10 Paulo ghamulomba ku silongo sikulu ghaabhala, “Bhuuka ujhughalale na maghūlu ghoobhe.” Kundi ghulya muntu ghabhuuka ghajhughalala, ghajha kulyāta!
11 Bhantu ^bhakabheele bhakomenkana halya bhobhakalōlanga fyoghajhīla Paulo, bhatangiila ku katendelo kaabho ka Kilikaonila bhabhala, “Mighābho jhyatusookela jhilōleeke kobha bhantu!” 12 Bhalinaabha bhamwilikako Seu, no Paulo bhamwilikako Helime,a bhukohela ghwakabheele nalikutenda. 13 Mupeesi ghwa ipeelelo lya Seu ^likabheele ha mbali fise no lugho, ghalenta masiili gha ng'ombe ne ntulo sya fiti ha musīgho ghwa lugho. Unyene no mulēgha ghwa bhantu bhwakabheele nabho bhakabheele bhalikuhensa kubhafumisya mpeesi Paulo no Bhalinaabha.
14 Tukubha Paulo no Bhalinaabha bhobhakabhanga bhamānya fyobhalikuhensa kwīla bhalya bhantu, bhatandula myenda jhyabho ku mitumba kulānsya bhuli bhobhaghajha. Bhakilima bhajhingila mu ghulya mulēgha ghwa bhantu, bhatenda ku silongo sikulu bhabhala, 15 “Ale bhajhango, nasi bhomulikukola ghaagho? Ufwe tuli bhantu tue kobhe umwe. Tulikumulentela Sikūla Sisogha akulinga mujhilēke jheejhi mikiti, mumumānye Kabhumba kanya bhupanga, abhunfile ighūlu ne nsi, tanganika ne fyonse filimo. 16 Nfuku sya ku nyuma Kabhumba ghakabhalēkanga bhantu bhakole fyobhatēhile. 17 Hamwi na ghaagho, teghakalēkanga kumilānsya kubha ti aliho. Akabheele nalikumīilila matendeke nalikumiha nfula jhya mwi ighūlu, mwasuughula mwapāta fyakulya fya kusyelukwa mulikulya. Kabhili akabheele keteghasangabhasya myēgho jhyenyu.” 18 Ghaagho maghāmbo ghobhakabheele bhalikutenda Paulo no Bhalinaabha, bhakabheele bhalikuhensa kubhalesya bhalya bhantu bhasibhafumisi jhilya mpeesi, tukubha fikabheele fikaka kubhalesya.
19 Kundi hajhisa Bhajhahudi bha kufuma ku Antiokia no kwi Ikonilo, bhabhalomba bhalya bhantu ^bhakabheele halya bhamusangiile. Kundi bhamuhuula Paulo na mabhwe, bhamubhulumula mpaka kunse na lugho bhajhinsi ti ghafwa. 20 Tukubha bhobhakabhanga bhahemba bhamukomenkanila Paulo, ghakabhuukanga ghajhughalala, ghaheleela mu lugho. Mulāabho ghwajhe bhabhuuka no Bhalinaabha kujha ku Delibhe.
Paulo no Bhalinaabha bhalikuheleela ku Antiokia jhya ku Siilia
21 Bhobhakabhanga bhahwa kutangaasya Sikūla Sisogha mu lugho lwa Delibhe, bhanapāta na bhahemba bhengi, bhaheleela ku Antiokia jhya ku Pisidia bhahita nsīla jhya Lisitila ne Ikonilo. 22 Bhakabheele bhalikubhasīipya bhahemba bhaabho, bhasīipe mu malāngululo ghaabho gha kumwisigha Kabhumba. Bhakabheele bhalikubhalomba kubhala, “Kujhingila mu Bhwami bhweke Kabhumbab ni kusanfisibhwa no kubhunusibhwa kukulu.”
23 Bhobhakabhanga bhahwa kubhiika bhaghosibhakulu mu kaniisa syonse no kubhatendajhyukila, no kooku bhalikusīngwa bhusila kulya, bhakabhabhikanga mu mabhoko gheke Kabhumba ghobhesighiile. 24 Kafumilo ka haaho bhahita ku sihugho sya Pisidia, bhaajha mpaka ku Pamufilia. 25 Mukubha bhakwisya kutenda Ighāmbo lyeke Kabhumba ku Pelighe, bhasooka kujha ku Atalia. 26 Kafumilo ka haaho, bhatanda mu meeli, bhaheleela ku Antiokia jhya ku Siilia, kooko bhahemba kobhakabhabhiikilanga mabhoko bhabhatendajhyukila kwa Kabhumba ku milīmo jhyobhakabheele bhahwa kukola. 27 Bhobhakabhanga bhafīka bhakomenkanyia bhahemba bhonse, bhabhatānyisya ghonse Kabhumba ghwakakolite kuhitila mu mabhoko ghaabho, no bhuli bhoghajhīghula nsīla jhya kumwisigha Kabhumba ku bhantu bhasili Bhajhahudi. 28 Bhajhīkala na bhalya bhahemba mafuku mengi.