Bhalinaabha no Sauli bhalikulaghiilwa kutangaasya Ighāmbo lyeke Kabhumba
13
Mu bhahemba bheke Jheesu ^bhakabheele ku Antiokia mukabheele bhaghwelaghu na bhamakota. Bhaabho bhantu masiina ghaabho ni Bhalinaabha, Simehoni ^akabheele najhitilwe lindi isiina “Mwilabhufu,” Lukio Mukilene, Manaeni ^ghakatobhelwanga hamwi no mwami Helode Antipa,a no Sauli. 2 Bhaabho mukubha bhalikumupeela Kabhumba, no mu kutendajhyuka ketebhasīngwa bhusila kulya, Mwēgho Mulafu ghweke Kabhumbab ghaabhala, “Ntabhulile Bhalinaabha no Sauli ku ghulya mulīmo ghomijhitiile.” 3 Bhobhakabhanga bhahwa kutendajhyuka kwa kusīngwa bhusila kulya, bhabhaghambikako mabhoko Bhalinaabha no Sauli, bhabhatenteka kundi bhabhalaghiila bhajhe.Bhalinaabha no Sauli bhaajha ku Kiipulo
4 Kafumilo ka haaho Bhalinaabha no Sauli bhakajhanga mpaka ku lugho lwa Selukila, bhalaghiilwa na Mwēgho Mulafu ghweke Kabhumba. Kufuma haaho bhaajha mu tanganika mpaka ku kalila ka Kiipulo. 5 Bhobhakabhanga bhafīka mu lugho lwa Salami, bhatangaasya Ighāmbo lyeke Kabhumba mu nyumba sya kusangaanilamo Bhajhahudi.c Kooko bhakabheele no Jhohana Maaliko nalikubhanīghilisya. 6 Mukubha bhahwa kuhita mu ngo ^sikabheele mu Kiipulo, bhafīka mu lugho lwa Paafo. Moomo bhasangaana na Mujhahudi ghumwi mulōsi, mughwelaghu ghwa malami, isiina lyajhe Bhali-Jheesu. 7 Ghoogho muntu akabheele muhelekesi nalikumufūnaanila Selighio Paulo, gho akabheele mukulu ghwa kaako kalila. Selighio Paulo ghabhajhita Bhalinaabha no Sauli nalikuhensa kuhulika Ighāmbo lyeke Kabhumba. 8 Tukubha Bhali-Jheesu ghulya mulōsi, mu Sijhunani bhamujhita ti Elima, ghoogho ghakahisyunkananga nabho mu katendelo akulinga amulēsye ghooghu mukulu ghwa kalila nasipokeeli Sikūla Sisogha syeke Jheesu. 9 Haaho Sauli,d ^akabheele ne lindi isiina ghajhitwa Paulo, nabhumbiike Mwēgho Mulafu ghweke Kabhumba, ghamuhusulila menso ghulya Elima mulōsi, 10 ghaabhala, “Ale mwana ghweke Syetani,e ubhumbiike malami no bhulānfya, mwimba ghwa bhatenda bhwene. Teeti tubhwenehi nkake kubhiihya maghāmbo maghololoke gheke Kabhumba? 11 Nonwe Sifwe Bhusya alakukulēkanyia, ulakubha muhofu kwi ikunka itooli, tulakulilōla isyubha.”
Haaho na haaho ghaalōla kobha kanfwa ku menso kwajhilabhula, ghasumbula kupamantika kooku no kooku, nalikuhensa muntu ghwa kumunīgha ku kubhoko. 12 Ghulya mukulu ghwa kalya kalila bhoghakalōlanga teetyo, ghamwisigha Sifwe Bhusya, bhukohela ghakasusukanga nkana ku malāngululo ghoghakahulikanga.
Paulo no Bhalinaabha bhali ku Antiokia jhya ku Pisidia
13 Kundi Paulo na bhenaajhe bhatanda mu meeli jhya itanga, bhaajha lwēndo kufuma ku Paafo, bhafīka mu lugho lwa Pelighe ^lukabheele mu sihugho sya Pamufilia. Tukubha Jhohana Maaliko ghakabhalēkangako bhenaajhe, ghaheleela ku Jhelusalemu. 14 Kufuma ku Pelighe bhaajha mpaka ku Antiokia jhya ku Pisidia. Ifuku lya Kutamukaf bhajhingila mu nyumba jhya kusangaanilamo Bhajhahudi,g bhajhīkala. 15 Mukubha bhantu bhahwa kusōma fitaabhu fya Kabhāngo keke Musa ne fitaabhu fya bhaghwelaghu, bhakulu bha nyumba jhya kusangaanilamo bhalaghiila sikūla bhabhala, “Bhamughana ghwetu, kubha muli ne ighāmbo lyomunatenda ku bhantu, tende.”
16 Paulo ghajhughalala, ghabhatalikila kubhoko ghabhasibhila, ghaabhala, “Ale bhajhango Bhesilaheeli nomwe mwense mumwisighile Kabhumba, hulikisye! 17 Kabhumba ghwa Bhesilaheeli ghakabhasāaghulanga bhanyinefwekulu, ghabhajhimbika mafuku ghobhakabheele bhēkeele bhali bhanyēnyi bhahita nsīla mu sihugho sya Miisili. Ku managha mengi ghakabhalombolanga kufuma ku sihugho sya Miisili. 18 Ghakalyātanga kumwi nabho mwi ighulungu myaka makumi ane nabhatusisye mwēgho. 19 Bhoghakabhanga ghahwa kughahumba makabhila ndwi gha sihugho sya Kanaani, ghakabhaheekesyanga Bhesilaheeli seesyo sihugho sibhe bhuhyana bhwabho. 20 Ghonse ghaagho ghakatwalanga myaka maghāna ane na makumi ataanu. Kafumilo ka haaho, Kabhumba ghabhaheekesya bhatwale bha kubhalombola mpaka mu nfuku sya mughwelaghu Samweli. 21 Kundi Bhesilaheeli bhahensa bhaheebhwe mwami, Kabhumba ghabhaheekesya Sauli mwana Kiisi, ghwa bhukwa bhweke Bhenjamini. Ghoogho ghabha mwami ku myaka makumi ane. 22 Bhoghakabhanga ghamufumyamo ghoogho, ghamujhimikamo Daudih abhe mwami ghwabho. Kabhumba ghamutendela masogha ghaabhala, ‘Namulōla Daudi mwana Jheese, ghandyohya kali ku mwēgho, ghwalokola fyondikulanganyia.’
23 “Mu nfuuke jhyajhe ghoogho muntu, Kabhumba ghabhalentela Bhesilaheeli Kasābhula, gho Jheesu kobha bhoghakabhalanga. 24 Nasyali kwisa Jheesu, Jhohana Mubhatisi ghakalombolanga nalikubhatangasisya bhantu bhonse Bhesilaheeli bhaghalaghale, bhabhatisibhwe. 25 Jhohana mukubha nalikuhwa mulīmo ghwajhe ghaabhala, ‘Umwe munyinsi ti ndi ghanyi? Une nsili ghulya Muhosyai ghomuhembeele! Unyene alojhisa mu nyuma jhyane. Une nsinamwiteelako nenga tu kulimbula mighīla jhya nkwābho syajhe!’
26 “Bhamughana ghwane, umwe bha nfuuke jhyeke Bhulahimu,j nomwe mwakepampika ku Bhajhahudi kumupeela Kabhumba, sikūla syeke Kabhumba sya kubhasābhula bhantu syafīka kumwetu. 27 Bhekasi bha mu Jhelusalemu na bhakulu bhaabho bha lugho, tebhakamumānyanga Jheesu kubha ti gho Kasābhula, tukubha mu kumwihagha bhakaghakwisyanga maghāmbo gha bhaghwelaghu, ghobhakabheele bhalikulāngwa Nfuku syonse sya Kutamuka. 28 Hamwi no kubha tebhakajhilōlanga nfūno jhya bhwene jhya kumwihagha, bhakamulombanga Pilaato amwihaghe. 29 Bhobhakabhanga bhakwisya ghonse ghwakabheele nanyegheelwe Jheesu, bhamusoosya ku musalabha bhamusiika mu lulaalo. 30 Tukubha Kabhumba ghamusyula kufuma ku bhafu. 31 Mukubha nasyukile, ghakalōlekanga ku bhalya bhwakabheele nabho kusumbulila ku Ghalilaajha mpaka ku Jhelusalemu ku nfuku singi. Nonwe bhaabho gho bhakalōla bhaajhe ku bhantu.
32 “Bhwalelo twamulentela Sikūla Sisogha kubhala, ghalya ghoghakabhalanga Kabhumba ku bhanyinefwekulu, 33 nonwe ghakwila ku ufwe bhaana bhaabho bha kabhili, ku kumusyula Jheesu kobhe bhofinyeghilwe mu Sabhuli jhya bhubhili,
‘Ughwe ghoghwe Mwanaane,
bhwalelo une namba So.’k
34 “Bhukohela Kabhumba ghakamusyulanga kufuma ku bhafu, te ghwakubhōla na kale. Kabhumba ghakabhalanga,
‘Nonkupambulila ughwe fya bhwene fisila kanyanyala,
fyonankamulombanga Daudi.’l
35 “Kobhe bhofibhasile handi mu Sabhuli sindi kubhala,
‘Teghwaghulēke mutūmba ghwane ghubhōle,
une mukola milīmo ghoobhe musila kanyanyala.’m
36 “Daudi bhoghakahwanga kukola ghwabhasile Kabhumba mu nfuku syajhe, ghaghābha ngōma, ghasiikwa hamwi na bhaasye, mutūmba ghwajhe ghwabhōla. 37 Tukubha ghulya ghoghakasyulanga Kabhumba kufuma ku bhafu teghakabhōlangehi. 38 Kansi bhamughana ghwane, ndikuhensa mumānye kubhala, ku kuhitila isiina lyeke Jheesu, sighōngo sya kulesya bhubhi silikutangasibhwa kumwenyu. 39 Ku kuhitila kumwajhe, muntu ghoghonse ghwakukabha namwisighile, Kabhumba alomulesisya bhubhi bhwajhe, fintu fisinakoleka ku Kabhāngo keke Musa. 40 Kansi lijhande akulinga ghasimifīkiko ghalya ghatensilwe na bhaghwelaghu.
41 ‘Hulikisye umwe bhakanya kahambaasya,
mulohuulwa fibhi mwalobheela,
bhukohela ndokola milīmo mu nfuku syenyu,
milīmo jhyomusinaswa,
nenga muntu ghamilomba nkana.’n”
42 Paulo no Bhalinaabha mukubha bhalikufuma mu jhilya nyumba jhya kusangaanilamo Bhajhahudi, bhalya bhantu bhakabhakaatikanga kabhili Ifuku lya Kutamuka ^likabheele lilōnsile, bhakaghasāhule kabhili ghaagho. 43 Bhobhakabhanga bhantu bhasambaalana, bhantu bhengi bhabhalōnda Paulo no Bhalinaabha, Bhajhahudi na bhantu tue bhakepampika kumupeela Kabhumba. Mu kubhasīipya bhasāhula nabho, bhalikubhalomba bhasisilēki seesyo sighōngo syeke Kabhumba.
44 Ifuku lya Kutamuka lyakalōndanga, bhantu bhengi kobhe lugho lonse bhakakomenkananga mu kuhulikisya Ighāmbo lyeke Kabhumba. 45 Bhajhahudi bhobhakabhanga bhalōla mulēgha ghwa bhantu, bhalōla ibhubha, bhajha kufumya maghāmbo gha kubhasyenteka bha Paulo ku maghāmbo ghobhakabheele bhalikutenda. 46 Kundi Paulo no Bhalinaabha bhatenda sighoosi bhabhala, “Jhilikuhenselwa Ighāmbo lyeke Kabhumba lisumbulile kumwenyu umwe Bhajhahudi nyinambele. Tukubha bhomwalituna, mwalikalila mwebheene kubhala ti temubhuhensile bhupanga bhwa nfuku syonse, kansi ufwe twamulēka, twabhijhukila bhantu bhasili Bhajhahudi. 47 Bhukohela leeli lyatulaghiisile Sifwe Bhusya Kabhumba kubhala,
‘Nankubhiika ughwe ubhe kamūni ku bhantu bha findi fihugho,
akulinga bhantu bhonse ha bhweleelo bhasābhuke.’o”
48 Bhantu bhasili Bhajhahudi bhobhakahulikanga leelyo ighāmbo bhaatēha, bhalisīima Ighāmbo lyeke Kabhumba. Bhalya bhakabheele bhalasilwe bhupanga bhwa nfuku syonse bhaghesigha maghāmbo ghaagho. 49 Ighāmbo lyeke Kabhumba lyakwila honse mu silya sihugho. 50 Tukubha, bhandi bhakalombo bha Bhajhahudi, bhaajha mukasonganyia ku bhanabhakeema bha ntighili bhasili Bhajhahudi, tukubha bhakabheele bhakepampika kumupeela Kabhumba. Kabhili bhabhasonganyia bhakulu bha lugho, bhabhasūlila kajhunga Paulo no Bhalinaabha. Kundi bhabhabhīnga bhafume mumyabho. 51 Kundi Paulo no Bhalinaabha bhakunkumula lufundu ku maghūlu ghaabho,p bhaajha ku lugho lwa Ikonilo. 52 Tukubha bhahemba bheke Jheesu bha ku Antiokia jhya ku Pisidia, bhakabheele bhasangabheele, bhabhumbiike Mwēgho Mulafu ghweke Kabhumba.