پاکێن اِنجیل چه
یوهَنّائے
کَلَما
یوهَنّائے اِنجیلئے پجّار
اے کتابئے نبیسۆک، یوهَنّا، وت یَهودیے اَت. چه ایسّا مَسیهئے مریدیا پێسر، شَمون پِتْرُسئے دۆست و ماهیگیریئے کارا آییئے شریکدار اَت (لوکا 5:1–11؛ مَرکاس 1:19–20). یوهَنّایا وتی نام اے کتابا ننبشتگ، بله وتا «هما مرید که ایسّایا باز دۆست اِنت» زانتگی (یوهَنّا 13:23؛ 19:26). چه کتابئے گُڈّی بهرا (یوهَنّا 21:20–24) پَدّرَ بیت که ایسّا مَسیهئے دۆسترێن مرید هماییئے جند اِنت.
انچُش که یوهَنّا وتَ نبیسیت، اے کتابئے سجّهێن سرگوَست آییا گۆن وتی چمّان دیستگ‌اتنت، پمێشکا اے هبرانی بارئوا وت شاهدیَ دنت (یوهَنّا 21:24). وتی اِنجیلئے نبیسگئے مولّ و مُرادانی بارئوا گوَشیت که اے سرگوَست و مۆجزه و اَجَبَّتێن نشانی، آییا پمێشکا نبشتنت «تان شما باور کنێت که ایسّا، مَسیه اِنت و هُدائے چُکّ، تانکه ایمان بیارێت و آییئے نامئے سرا نمیرانێن زِندئے واهند ببێت» (یوهَنّا 20:31).
یوهَنّائے اِنجیلا، پاکشۆدۆکێن یَهیائے ائولی مرید، ایسّائے ائولی مرید، ایسّائے تالیم و مۆجزه، اے جهانا ایسّائے گُڈّی هپتگ، آییئے مَرک و چه مُردگان جاه جنَگا رند، وتی مریدانی دێما زاهر بئیگئے هال مان اَنت.