کاسِدانی کار
کاسِدانی کارئے پجّار
اے کتابئے نبیسۆک هما لوکا اِنت که اِنجیلی نبشتگ و وت داکترے اَت. کاسِدانی کارئے کتاب، ایسّائے زندگ بئیگ و جاه جنَگئے سرگوَستئے بارئوا آییئے مریدانی چَمدیستێن گواهیا دنت. وهدے ایسّا مَسیه، سلیبئے سرا درنجگ و کُشگ بوت، آییئے مریدان ترست و په وتی رَکّێنگا چێر بوتنت. بله ایسّائے مَرکئے سئیمی رۆچا، آیان ایسّا وتی نیاما زِندکا دیست. هئو! ایسّا مَسیه زندگ بوتگ‌اَت. دێمترا، اے کتاب پێشَ داریت که پاکێن روه چِه پئیما گۆن آیان هۆر بوت و آیان اورْشَلیما بگر تان روما ایسّائے وشّێن مستاگ په مردمان رسێنت.
کاسِدانی کارئے تها، ایسّائے گُڈّی هُکم و پرمان، آییئے آسمانا رئوگ، اورْشَلیما کِلیسائے بُنگێج، یَهودیَه و سامِرَهئے دَمگان هُدائے کُلئوئے شنگ بئیگ، ایسّائے سرا پولُسئے باورمند بئیگ و درکئومانی نیاما ایسّائے کُلئوئے رسێنگئے هال نبیسگ بوتگ‌اَنت. چه اِشان و اَبێد، پولُسئے کار و کِرد، آییئے ائولی مستاگی سپر، اورْشَلیمئے دیوان، پولُسئے دومی و سئیمی مستاگی سپر و آییئے بَندیجاها گوازێنتگێن وهدانی کِسّه هم مان اَنت. لوکا وت هم برے برے اے سات و سپران گۆن اَت. په مِسالے، گپّانی تها چُشَ گوَشیت: «ما په مَکْدونیَهئے رسگا اشتاپ کرت» (16:10).
کاسِدانی کارئے کتاب پێشَ داریت که کتابئے ائولی بهرا (1:8) آتکگێن اے هبر چۆن سرجم بوت که گوَشیت: «...وهدے پاکێن روه شمئے دلانَ نندیت، شمارا وس و واکَ رسیت و اورْشَلیمئے شهرا، یَهودیَه و سامِرَهئے دَمگان، تان سرجمێن دنیائے گُڈّی مرز و سیمسران هم، په من شاهدیَ دئیێت و منی وشّێن مستاگا رَسێنێت.»