تیموتاووسئے همراهی
16
1 پدا پولُس، دِرْبِه و لِسْتْرَهئے شهران آتک و رَست.
لِسْتْرَها تیموتاووس نامێن مریدے هست‌اَت که آییئے مات باورمندێن یَهودی و پت یونانیے اَت.
2 لِسْتْرَه و اِکُنیَهئے براتانی نیاما تیموتاووس باز نێکنامێن مردے اَت.
3 پولُسئے واهگ اَت که تیموتاووسا وتی سات و سپرا همراه بکنت، پمێشکا چه رئوگا پێسر، په یَهودیانی هاترا سُنّتی کناێنت، چیا که آ هَند و دَمگانی سجّهێن مردمان زانتگ‌اَت که تیموتاووسئے پت یونانیے.
4 شهر په شهر تَرّان بوتنت و چه اورْشَلیمئے کاسِد و کماشانی گیشّێنتگێن راه و رهبندان،* براتِش په مَنّگا سهیگ و سرپدَ کرتنت.
5 اے ڈئولا، کِلیسایانی باورمند رۆچ په رۆچ گێشترَ بوتنت و باورِش هم مُهرترَ بوت.
پولُسئے اِلهام
6 پولُس و آییئے همراه چه پْریجیَه و گَلاتیَهئے دَمگان گوَستنت، چیا که پاکێن روها آ، آسیائے دَمگا هُدائے هبرئے رسێنگ و شِنگ کنگا مکن کرتنت.
7 وهدے میسیَهئے سیمسران رَستنت، بیتینیَهئے نێمگا رئوگئے جُهدِش کرت بله ایسّائے روها په اۆدئے رئوگا نه‌اِشتنت.
8 گڑا چه میسیَها گوَزان بوت و تْرواسئے بندنا آتکنت.
9 همۆدا شپا پولُسا یک مَکْدونی مردے په شُبێن دیست که اۆشتاتگ‌اَت و مِنَّت کنان اَت که:
«دریایا بگوازێن، مَکْدونیَها* بیا و مارا کُمک کن.»
10 چه اے شُبێنا رَند، ما* په مَکْدونیَهئے رسگا اشتاپ کرت، چیا که چه اے شُبێنا دلجم بوتێن، هُدائے رَزا همِش اِنت که ما برئوێن و وشّێن مستاگا اۆدئے مردمانی نیاما شِنگ و تالان بکنێن.
لیدیَهئے باورمندی
11 ما چه تْرواسا بۆجیگا سوار بوت و دێم په ساموتْراکیئے جَزیرها شتێن.
دومی رۆچا چه اۆدا نیاپولیسئے بندنا آتک و رَستێن.
12 چه اۆدا پیلیپیا شتێن، که مَکْدونیَهئے آ بهرئے* مزنێن شهرے و رومیانی مِنندجاه اِنت و تان چیزے رۆچا همۆدا مهتل بوتێن.
13 شَبَّتئے رۆچا، چه شهرئے دروازگا در کپت و کئورئے لَمبا شتێن.
مئے هئیال اَت بلکێن اۆدا یَهودیانی زِگر و دْوائے جاگهے ببیت.
همۆدا نِشتێن و گۆن لهتێن جنێنا که په زِگر و دْوایا آتکگ‌اتنت، هبرا گُلاێش بوتێن.
14 جنێنانی نیاما، لیدیَه نامێن هُداتُرسێن* جنێنے هم گۆن اَت که تیاتیرَهئے شهرئے مردمے اَت و جَمورنگێن* گران‌کیمّتێن گُد بها کنۆکے اَت.
آ پولُسئے هبران گۆش دارگا اَت که هُداوندا آییئے دِلئے چمّ پَچ کرتنت و آییا پولُسئے هبر مَنِّتنت.
15 لیدیَها گۆن وتی لۆگئے سجّهێن مردمان پاکشۆدی کرت.
پاکشۆدیا رَند، آییا دَزبندی کرت و گوَشت:
«اگن شما منا هُداوندێن ایسّائے هَکّێن مَنّۆگرے زانێت، گڑا بیاێت منی لۆگا بدارێت.»
لیدیَها گۆن وتی بازێن گوَشگا مارا مَنّێنت.
پولُس و سیلاس بَندیجاها
16 یک رۆچے ما زِگر و دْوائے جاگها رئوگا اتێن، مۆلدے دیستێن.
مۆلدا جِنّے پِر اَت که چه آییئے زۆرا گئیب‌گوییَ کرت و چه اِشیا په وتی هُدابُندان بازێن زَرّ و مالیَ کَٹّت.
17 آ، پولُس و مئے رَندا آتک و په کوکّار گوَشگا اَت که:
«اے مردم، بُرزێن اَرشئے هُدائے هِزمتکار اَنت و شمارا رَکّێنگئے یک راهے سۆجَ دئینت.»
18 آییا تان باز رۆچا انچُش گوَشان کرت.
گُڈسرا، پولُس دِلرێش و بێزار بوت، چَکّی تَرّێنت و گۆن جِنّا گوَشتی:
«من ترا په ایسّا مَسیهئے ناما هُکمَ دئیان که چه اِشیا در کَپ.»
هما دمانا جِنّ چه آییا در آتک.
19 وهدے مۆلدئے هُدابُندان دیست که آیانی نپ و کَٹّئے اُمێت هلاس بوت، گڑا آیان پولُس و سیلاس گپت، کَشّان کرت و بازارا، شهرئے مسترانی کِرّا برتنت.
20 کازیانی دێما پێش کرتنت و گوَشتِش:
«اے مردم یَهودی اَنت و مئے شهرا جێڑه و پلێنڈی کنگا اَنت.
21 ما رومی اێن و اے مارا انچێن دۆد و رَبێدگ تالیم دئیگا اَنت که آیانی مَنّگ و کار بندگ په ما رئوا نه‌اِنت.»
22 اے دگه مردم هم گۆن بوت و پولُس و سیلاسئے دێما اۆشتاتنت.
شهرئے مستران پرمان داتنت که پولُس و سیلاسئے پُچّان بکَشّنت و آیان لَٹّ بجننت.
23 چه بازێن لَٹّ و کُٹّا رند، بَندیجاها برت و بندِش کرتنت.
بَندیجاهئے نِگهپانِش پرمان دات که آیانی نگهپانیا شَرّ دلگۆش بکنت.
24 همے هُکمئے سرا، بَندیجاهئے نگهپانا بَندیجاهئے تۆک تۆکی کۆٹیا برتنت و آیانی پاد کُنٹبند کرتنت.
25 شپنێما، پولُس و سیلاس جێلئے تها دْوا کنان، هُدایا ستا کنگا اتنت.
اے دگه بندیگ گۆش دارگا اتنت.
26 اَناگت، مزنێن زمین‌چَنڈے بوت که بَندیجاهئے بُنرِد،* سُرگ و جُمبگا لگّت.
هما دمانا، سجّهێن دروازگ پَچ بوتنت و جێلیانی زمزیل بُتکنت.
27 جێلئے نِگهپان، چه وابا پَچ لَرزت و آگاه بوت، دیستی که بَندیجاهئے سجّهێن دروازگ پَچ اَنت، گُمانی کرت که کئیدی تتکگ و شتگ‌اَنت.
نون په وت‌کُشیا زَهمی کَشّت.
28 بله پولُسا تئوار کرت و گوَشت:
«وتا تاوان مدئے، ما سجّهێن وتی جاگها اێن.»
29 جێلئے نِگهپانا چِراگے لۆٹت و تچانا بَندیجاهئے تۆکا شت و گۆن درَهگا پولُس و سیلاسئے پادان کپت.
30 آ چه جێلا در کرتنت و گوَشتی:
«او واجهان!
من په وتی رَکّگا چے بکنان؟»
31 آیان پَسّئو دات:
«هُداوندێن ایسّائے سرا ایمان بیار گڑا تئو و تئیی لۆگئے سجّهێن مردمَ رَکّێت.»
32 آیان هُداوندێن ایسّائے وشّێن کُلئو په آییا و آییئے لۆگئے سجّهێن مردمان رَسێنت.
33 شپئے وهدا، پولُس و سیلاسی گۆن وت برتنت و آیانی ٹپّی شُشتنت.
آ و آییئے لۆگئے مردمان هما دمانا پاکشۆدی کرت.
34 رَندا آییا وتی لۆگا برت و وَرَگ داتنت، آییئے جند و آییئے لۆگئے سجّهێن مردم، چه آییئے هُداباوریا گَل و شادان بوتنت.
35 دومی رۆچا، کازیان وتی کاردار جێلئے نِگهپانئے گوَرا راه داتنت که:
«اے مردمان یله بدئے.»
36 جێلئے نگهپانا پولُس هال دات و گوَشت:
«منا چه کازیانی نێمگا پرمان رَستگ که شمارا یله بدئیان.
پمێشکا شما په وشّی و سلامَتی برئوێت.»
37 پولُسا پَسّئو دات:
«ما رومی باشندَه* اێن، بله اے شهرئے مستران، مارا بے هُکمئے بُرّگا شهرئے مردمانی دێما جناێنتگ و جێل کرتگ.
نون، آ چێرکایی مارا چه جێلا کَشّگَ لۆٹنت.
چُشَ نبیت، باید اِنت پادِ وت همِدا بیاینت و مارا در بکننت.»
38 کارداران، اے پَسّئو په کازیان رَسێنت.
وهدے سهیگ بوتنت که آ دوێن رومی باشندَه اَنت، تُرستِش.
39 نون وت آیانی کِرّا آتکنت و چه آیان پهِلّی‌اِش لۆٹت و مِنّتوار بوتنت که چه اے شهرا برئونت.
40 چه بَندیجاها در آیگا رَند، پولُس و سیلاس لیدیَهئے لۆگا شتنت و گۆن باورمندان* گِند و نندِش کرت، دِلبڈّی‌اِش داتنت که وتی ایمانئے سرا مُهر و کاهِم بۆشتنت و پدا چه پیلیپیئے شهرا در کپت و شتنت.