Yesuq Lé, Yudaq Èq Ung Zô É Hkyô
22
Ahkuî, Lhoqlhai Poî gâ é Azuma (múnchi a kat é Mùk Zo Poî) jé râ chyâng lò bê. 2 Haû mù, hkyangjong agyi pé eq târâ sará pé gi, Yesuq lé hkâsu kut wó sat pyám râ hkyô, ho nyi akô; hkâsu mù gâ le, yhángmòq gi, mingbyû wuì lé gyùq bùm kô é yánmai nghut ri. 3 Haú hkûn, chángzo raxe í yùq má bo é Isikarut gâ é Yudaq chyáng Tsádán wàng mù luî, 4 yhang gi, htoq ê mù Yesuq lé hkâsu kut àp pyám râ hkyô lé hkyangjong agyi pé, noqkuq yhûm zúng é gyèzaû pé eq, ê hpyê ri. 5 Haû mù, yhángmòq gi, gyô nguì luî, Yudaq lé ngùn byi râ hkyô myìt hui bekô. 6 Yudaq le hàp yù luî, byù hpúng má a nghut é hkûn, Yesuq lé àp pyám râ hkyô ho nyì bê nghut ri.Lhoqlhai Poî Lé Món É Hkyô
7 Ahkuî, haû Lhoqlhai Poî mâ é sau zo shigu hkungga sat nhông byi râ é Azuma buìnyì jé bê. 8 Haú hkûn, Yesuq gi, Petiruq eq Yohan lé, “Ngá-nhúng zo râ matú Lhoqlhai Poî ê món láng keq.” ga luî, nhang kat ri.
9 Haú nhik gi, “Hkâmá ê món to nhâng nau ri lhú?” ga luî, Yhang lé myî akô.
10 Haú hkûn, Yesuq gi, “Núngnhik, wà mó hkaû shut wang e ló le wuì yambú wàq é byù rayùq lhom hui râ nghut lhê; haú yùq chyáng châng ló luî, yhang wang ló é yhûm má châng wàng mù, 11 yhûmsîng lé, ‘Ngò Ngá é chángzô pé eq rahá, Lhoqlhai Poî zo râ bíng wàp hká má nghut lhê lhú ga, Sará myí nhang kat ri.’ nghû taí keq. 12 Haú hkûn, hen tô é ahtoq mâ é wàp mó lé, núngnhik lé lhom tûn shit râ nghut lhê; wàp haú má ê món to keq.” ga taî kat ri.
13 Haû chángzô nhik htoq e ló le, Yesuq taî kat é eq roq za ê myâng kômù, Lhoqlhai Poî lé món to bekô nghut ri.
Yhûmsing É Myínzang
14 Ahkuî, ahkyíng jé jáng, Yesuq eq Yhâng é lagyô pé rahá za zohpoq má zung tô akô. 15 Haú hkûn, Yesuq gi, “Ngò wuîhke jamjau hpuzô é a hui shi-má, Lhoqlhai Poî shî lé núngmòq eq rahá zo râ lé, Ngò gyai ô nau nyi lhê. 16 Hkâsu mù gâ le, ngò, núngmòq lé taí kôlé, Garai Gasâng é mîngdán má poî shî a ló dìk dìk gi, ngò haú lé dum zo râ a nghut lo.” ga luî, yhángmòq lé taî ri.
17 Hau htâng, Yesuq gi, góm lé yù mù jeju ban hkya-on jáng, “Góm shí lé yù luî, núngmòq yhangchang gàm shuq lhum keq. 18 Ngò, núngmòq lé taí kôlé, ahkuî mai gi, Ngò, Garai Gasâng é mîngdán a jé jé tsibyiq wing lé dum shuq râ a nghut lo.” ga taî ri.
19 Hau htâng, Yhang gi, mùk lé yù mù, jeju hkya-on luî, mùk lé myhik hpé mù, yhángmòq lé byi uchyang, “Shî gi, núngmòq é matú byî pyâm é, Ngá é gùngdu nghut lhê; Ngo lé bûn nyì râ matú, shî su kut nyî keq.” ga taî ri.
20 Haû eq rajung za, myínzang ban zo jáng, góm lé le yù mù, “Góm shî gi, núngmòq é matú htoq pyâm é, Ngá é sui má xuq tô é dangshikaq asik nghut lhê. 21 Nghut kôlhang, wú keq, Ngo lé àp pyám râ sû gi, zang bó shî má ngò eq rahá nyi tô ri. 22 Haû Byu Yhangzo gi, hkyin to huî é eq rajung za shî râ nghut lhê; nghut kôlhang, Yhang lé àp pyâm é sû gi, dingnyé wó ri.” ga taî ri. 23 Haû su ga jáng, lagyô pé gi, yhángmòq má shí hkyô kut râ sû gi, hká yùq nghut râ lhú ga, rayùq eq rayùq myî lhûm bum akô.
24 Haû htoq agó, yhángmòq mâ é hká yùq shèq je kô lhê lhú ga le, rayùq eq rayùq taî htîng lhûm bum akô. 25 Haû mù luî, Yesuq gi, “Tûngbaù pê é hkóhkam pé gi, yhángmòq byù myû pê é ahtoq má ùp zô nyì kô é nghut luî, byu pé gi, ahkáng ayá wó é bang lé jeju yhûmsîng pé ga luî, taî hkúngga nyi bum akô. 26 Núngmòq kúm gi, haû su hkâkut kó. Núngmòq má je ko sû gi, chyungxe zànwut je tiq é sû su, ùp é sû le, duìnhâng zoshâng su nghut nyì sháng gàq. 27 Hká yùq shèq je kô lhê lhú? Zô zung nyì sû lhú? Haû a nghut jáng, saí tsô é sû lhú? Zô zung nyi é sû shèq nghut ri. Nghut kôlhang, ngò gi, núngmòq mâ é saí tso sû su za nghut nyi lhê. 28 Núngmòq kúm gi, Ngò jamjau huî nyi le, Ngò eq rahá nyi nyi é bang nghut nyi akô. 29 Haû su mù, Ngá wa gi, Ngo lé, mîngdán àp byî é su, Ngò le, núngmòq lé mîngdán àp byi râ nghut lhê. 30 Haû mù, Ngá é mîngdán mâ é, Ngá é zangbó má, núngmòq wó zo kôrâ nghut lhê; núngmòq le hkóhkâm tángmyhâng má zung to mù, Isira-elaq a-myû raxe í hú lé jéyáng kôrâ nghut lhê.
Yesuq Lé, Petiruq (Simun) He-ngìk Pyám Râ Hkyô
31 Simun, Simun ê, wú aq, súngsô cham lé shaî é su, núngmòq lé wó shaí shoq ga, Tsádán wá gi, ahkáng dung bê. 32 Nghut kôlhang, náng é lùmjíng myìt a hten sháng gàq nghû, Ngò, náng é matú kyûdung byî bê; nàng dum lhing bûn lò jáng, nunggu nungmâng pé lé wum-o lhoqging byi aq.” ga taî ri.
33 Haú hkûn, Simun gi, “Yhûmsîng ê, htóng wâng kôlhang, shî kôlhang, ngò gi, nàng eq rahá cháng râ matú myìt hpyit to bê.” ga tû taî ri.
34 Yesuq gi, “Petiruq ê, nang lé Ngò taí lé, hkû-nyía lháng wòq a tûn shi-má, nàng, Ngo lé a sé ga luî sum dâm he-ngìk pyám râ nghut lhê.” ga taî ri.
35 Hau htâng, Yesuq, yhángmòq lé taî é gi, “Ngò, núngmòq lé ngùnhtûng, jihtûng, hkyî-tsung a wùn a chûng nhang é za, nhang kat é hkûn, núngmòq chyáng haî râ akô lhú?” ga myi jáng, yhángmòq gi, “Haî le a ra lo.” ga taî akô.
36 Haú hkûn, Yhang gi, “Ahkuî kúm gi, ngùnhtûng wó sû gi, yu wùn sháng gàq, jihtûng wó sû le, yù wùn sháng gàq, shâm a wó sû gi, bumó ung luî wuì sháng gàq. 37 Hkâsu mù gâ le, Ngò, núngmòq lé taí kôlé, Ngò eq séng luî Chyúmdang má kâ tô é gi, dùt lò berâ nghut lhê. ‘Haú yùq gi, yubàk mara wó bang má nghap lhôm to bê.’b ga kâ tô é dang gi, Ngá chyáng dìk lò râ nghut lhê.” ga luî, yhángmòq lé taî ri.
38 Haû mù, lagyô pé gi, “Yhûmsîng ê, wú aq, shî má shâm í hkyam jòq tô ri.” ga taí kôjáng, Yesuq gi, “Gé bê.” ga luî, yhángmòq lé taî ri.
Tsanlun Bùm Má Yesuq Kyûdûng É Hkyô
39 Ahkuî, Yesuq gi, htoq luî, góhkûn e é eq rajung za, Tsanlun bùm shut htoq e ló bê nghut ri; Yhâng é chángzô pé le Yhâng htâng châng e ló akô. 40 Haú jowò má jé jáng, Yhang gi, “Núngmòq, gúnglaú é a hui sháng gàq, kyûdûng nyì keq.” ga luî, yhángmòq lé taî to mù, 41 chángzô pé nyi é mai lùqgòk radú we kô gâng e ló luî, hkyîhput htuq mù, 42 “Âwa ê, Nàng ô nau é nghut le gi, gómc shî lé Ngá chyáng mai lhaî pyám byi laq. Nghut kôlhang, Ngò ô nau é dông a nghut, Nàng o é dông shèq nghut sháng gàq.” ga kyûdûng ri. 43 Haú hkûn, mauhkûng mai maumang lagyo rayùq htoq lé luî, Yhang lé i‑myìt nhik lé taî tîng ri. 44 I‑myìt hkaû má dìk shoq hkâm zo wuî é yánmai, Yhang je riyhang kyûdung wum kat nyi ri; Yhâng é buìbù le, sui hkyí sui pat su myigùng má yui gyó ri.
45 Haû mù, kyû ban dung jáng, Yhang toq luî, chángzô pê chyáng ló wú le, yhángmòq gi, myìt yón mù luî, yhup myhî to kô é lé ló myâng mù, 46 “Haî mù yhup nyi akô lhú? Toq keq! Gúnglaú é a hui sháng gàq, kyûdûng nyì keq.” ga luî, yhángmòq lé taî ri.
Yesuq Lé Chyup É Hkyô
47 Haû su ga, ru taî nyi ashî le, wú keq, haû chángzo raxe í yùq má bo é Yudaq gi, hkyô hí mù byù rajùm rayò lé shuî lé lô luî, yhang gi, Yesuq lé bo-puq puq râ ga huî lé lo ri. 48 Haû mù luî, Yesuq gi, “Yudaq ê, nàng gi, haû Byu Yhangzo lé bo-puq puq é èq gyè pê chyáng àp pyâm lhê lhú?” ga luî, yhang lé lhom myî ri.
49 Haú hkûn, Yesuq htâng cháng bang gi, haî dùt lò râ lé bûn sé kô é yánmai, “Yhûmsîng ê, ngá-mòq gi, sham èq zân le, gè râ lhú?” ga myî akô. 50 Yhángmòq chyáng mâ é rayùq gi, hkyangjong mó é duìnhâng zoshâng lé zân kat luî, yhâng é lòqyo nohkyap byìt byùq bê nghut ri.
51 Yesuq kúm gi, “Gé bê. Yhángmòq ô nau é su nghut kó sháng gàq.” ga tû taí mù, haú yùq é nohkyap lé ê záng luî lhoqgê byî ri.
52 Yesuq gi, Yhang lé chyup râ ga jé lé é hkyangjong agyi pé, noqkuq yhûm zúng é zau pé eq agyì sûwún wuî lé, “Núngmòq gi, da-myàq rayùq lé chyup é su, shâm, dumbáng eq kut luî, lé lo akô lhú? 53 Ngò gi, nyí wuî, noqkuq yhûm má núngmòq eq rahá nyì kôlhang, núngmòq Ngo lé chyup yû râ ga a hen wú kó; ahkuî gi, mauchut èq ùpd nyi bê yánmai, núngmòq é ahkyíng nghut nyi ri.” ga taî ri.
Yesuq Lé, Petiruq Èq He-ngìk Pyâm É Hkyô
54 Haú hkûn, yhángmòq gi, Yhang lé chyup yû mù she ló luî, hkyangjong mó é yhûm shut shuî wang ló akô. Petiruq le we we mai châng tô ri. 55 Ahkuî, yhángmòq gi, wàng hkaû má myi mut yû luî zung tô bum é hkûn, Petiruq le yhángmòq é ahkaû má bo tô ri. 56 Langchyáng myhí rayùq gi, myihkyóm yâm má Petiruq zung tô é lé, myang kat mù, yhang lé rago wú tsuq to luî, “Shí yùq le Yesuq eq rahá nyì sû nghut ri.” ga taî ri.
57 Haú hkûn, Petiruq gi, “Myiwe myhí ê, nàng taî é sû lé, ngò a sé.” ga he pyâm ri.
58 Hau htâng hkâ-myháng a myáng má, byù rayùq gi, yhang lé dum myàng luî, “Nàng le yhángmòq chyáng bo nyì sû nghut ri.” ga taî kat jáng, Petiruq gi, “Byù hpó ê, ngò a nghut.” ga tû taî ri.
59 Hkyíng hkum rahkum kô myáng jáng, rayùq le, “Gè gè yhang, shí yùq gi, Yhang eq rahá nyi wún sû nghut ri; haî mù gâ le, yhang gi, Galile byù le nghut ri.” ga zùq zùq taî ri.
60 Petiruq gi, “Byù hpó ê, nàng taî nyi é hkyô lé, ngò a sé.” ga tû taî ri. Haû su ga ru taî nyi ashî le, wòq tûn bê nghut ri. 61 Haú hkûn, Yesuq gi, lhîng luî, Petiruq lé wú kat ri. Haû mù, Petiruq gi, “Hkû-nyí lháng, wòq a tûn shi má, nàng Ngo lé sum dâm he pyám râ nghut lhê.” ga luî, Yhûmsîng yhang lé taî é dang lé bûn kat ri. 62 Haû mù, yhang gi, shinggan shut htoq ê luî, gyai yhang ê ngau nyi ri.
Gyèzô Pé Yesuq Lé Rhoi É Hkyô
63 Yesuq lé zúng nyi é bang gi, Yhang lé rhoî luî nyhàp myíng nyhàp htê mu nyi akô. 64 Yhángmòq gi, Yhâng é myòqdong nghop pyám byi luî, “Nang lé bàt sû gi, ó yùq nghut ri lhú? Myìqhtoi htoî wú aq.” ga myî akô. 65 Yhángmòq gi, Yhang lé nyhàp é dang ajung jung dông taî rhoi nyi akô.
Sûwún Wui É Hí Má Yesuq Jé Nyi É Hkyô
66 Nàpkyó myòqmyàng jáng, mingbyû wui é sûwún hpúng bang eq rahá, hkyangjong agyi pé, târâ sará pé, zùp hpong kut nyi é má, Yesuq lé shuî ê mù, 67 “Nàng Hkrisidùq nghut é têng le gi, ngá-mòq lé taî kyo laq.” gâ akô.
Yesuq gi, “Ngò gi, Hkrisidùq nghut lhê nghû taí kôlhang, núngmòq jíng kôrâ a nghut. 68 Ngò, núngmòq lé myi kôlhang, núngmòq gi, tû taí kôrâ a nghut. 69 Nghut kôlhang, ahkuî mai haû Byu Yhangzo gi, a-tsam bo dik é Garai Gasâng é lòqyò hkyam má wó zung nyì berâ nghut lhê.” ga luî, yhángmòq lé taî ri.
70 Haú hkûn, yhángmòq bànshoq bang gi, “Haû nghut le gi, Nàng, Garai Gasâng é Yhangzo nghut lhê lhú?” ga myî akô.
Yesuq gi, “Núngmòq taî é eq rajung za Ngò nghut lhê.” ga luî, yhángmòq lé tû taî ri.
71 Haú hkûn, yhángmòq gi, “Ngá-nhúng haí jung sàksé wá râ nyi ashî lhú? Yhâng é nhut mai yhang, taî htoq kat é dang lé, ngá-nhúng wó gyo bê nghut lhê.” ga akô.