Yesuq Chyup Yû Huî É Hkyô
18
Yesuq gi, haû su ga kyûdûng é htâng má, Yhâng é chángzô pé eq rahá, Kidron Langhkaû mai laî byìt dàp ló luî, haú hpoq má jòq é hkyâm ralhum má wang e akô nghut ri.
Yohan 18:1-27
2 Hkyâm haû gi, Yesuq eq Yhâng é chángzô pé lhaq hui hui kut é jowò nghut é yánmai, haû Yesuq lé àp pyám râ sû Yudaq le sê ri. 3 Haû mù, Yudaq gi, haû hkyangjong agyi pé eq Hparishe pê chyáng mai nhang kat é noqkuq yhûm zúng bang ra-am eq gyèzo rajùm lé, haú jowò shut shuî wang lé lo ri. Haú bang gi, myihu, myibung eq shâm lhâm pé chung lé lo akô.
4 Yesuq gi, Yhang má dùt lò râ hkyô lhúnglháng lé sé gû nghut mù, htoq ê luî, yhángmòq lé, “Núngmòq, ó yùq lé ho akô lhú?” ga myî ri.
5 Haú hkûn, yhángmòq gi, “Nazaret wà byù Yesuq lé ho lhê.” ga tû taí kôjáng, Yesuq gi, “Ngò gi, haú yùq nghut lhê.” ga taî ri (Yesuq lé àp pyám sû Yudaq le, yhángmòq eq rahá yàp tô ri.). 6 “Ngò gi, haú yùq nghut lhê.” ga Yesuq taî kat é hkûn jáng, yhángmòq gi, nùngzut zùt mù, myigùng má lêng lèq ló bum akô nghut ri.
7 Yhang gi, “Núngmòq, ó yùq lé ho akô lhú?” ga, yhángmòq lé dum myî kat jáng, yhángmòq gi, “Nazaret wà byù Yesuq lé ho lhê.” ga taî akô.
8 Haú hkûn, Yesuq gi, “Ngò gi, haú yùq nghut lhê nghû, núngmòq lé taî kyo bê nghut lhê; núngmòq, Ngo lé hô kô é nghut le gi, shí bang lé ló nhang pyám keq.” ga tû taî ri. 9 Haû gi, “Nàng, Ngo lé byî tô é bang rayùq lé lháng, Ngò, a lhoqhpyuq pyám.” ga, Yhang taî tô é dang dìk râ matú nghut ri.
10 Haú hkûn, Simun Petiruq gi, shâm wun tô é nghut luî, shâm shê mù, haû hkyangjong mó é duìnhâng zôshang é lòqyo nohkyap lé zân hpyit kat byî ri. (Duìnhâng zoshâng haú yùq é myìng gi, Malihku gâ ri.)
11 Haû mù, Yesuq gi, Petiruq lé, “Náng é shâm lé, shámbyâng má xâng pyám aq! Haû Îwa, Ngo lé byî é góma lé, Ngò a shuq é wó nyî râ lhú?” ga taî kat ri.
Yesuq Lé, Anna Chyáng Shuî E É Hkyô
12 Hau htâng, gyèzo haú jûm eq yhángmòq é gyèzau hpó, Yudaq byu pê é ming sûwún wuî gi, Yesuq lé chyup yû mù, tuî akô nghut ri. 13 Yhángmòq gi, haú zân mâ é hkyangjong mó Kayahpaq é yhâng tsa Anna chyáng hí, Yhang lé shuî ló akô nghut ri. 14 Kayahpaq gi, byu pê é matú rayùq shî hkám byî le je gè râ nghut lhê ga, haû Yudaq byu pé lé hpàqchyî byî é sû yùq nghut ri.
Yesuq Lé, Petiruq Sânghî Dàm He-ngìk Pyâm É Hkyô
15 Simun Petiruq eq gótû chángzo rayùq gi, Yesuq htâng châng e ló akô nghut ri. Gótû chángzo haú yùq gi, hkyangjong mó lé rago sê lhê nghut mù luî, hkyangjong mó é yhûmwàng hkaû shut, Yesuq é htâng má châng wang ló ri. 16 Petiruq kúm gi, hkúmdong shinggan má láng yàp tô ri. Haû hkyangjong mó lé rago sê é sû, gótû chángzo haú yùq gi, taû htoq ló mù, hkum zúng é myiwe myhí lé taí luî, Petiruq lé shuî hâng yu ri.
17 Haú hkûn, haû hkum zúng é myiwe myhí gi, Petiruq lé, “Nàng gi, haú yùq é chángzô pé mâ é rayùq a nghut lhú?” ga myi jáng, yhang gi, “Ngò a nghut.” ga tû taî ri.
18 Haú u lé, gyòq é yánmai, duìnhâng zoshâng wuì eq noqkuq yhûm zúng bang gi, yhángmòq gyòq gàng râ matú myigyê èq mùt tô é myihkyóm má, gyòq gang yàp nyi bum akô. Petiruq le, yhángmòq eq rahá gyòq gang yàp tô ri.
Yesuq Lé, Hkyangjong Mó Myî Choq Wú É Hkyô
19 Haú u lé, haû hkyangjong mó gi, Yesuq lé, Yhâng é chángzô pê hkyô eq Yhâng mhoqshit é hkyô eq séng luî myî ri.
20 Haú hkûn, Yesuq gi, “Haû mingkan htoq má, Ngò, de de taí bê nghut lhê. Ngò gi, haû Yudaq byu pé bànshoq bang chôm zîng é, târâjong pé má le, noqkuq yhûm má le, ayang mhoqshit é nghut lhê. Ngò gi, haq zaú luî taî é hkyô haî le a jòq. 21 Nàng, haî mù Ngo lé myî lhê lhú? Haû, Ngò taî é lé wó gyô é bang lé myi aq; Ngò haî taî é hkyô lé, yhángmòq gè gè sê akô nghut ri.” ga tû taî ri.
22 Yesuq haû su ga taí jáng, haû nàm má nyi tô é noqkuq yhûm zúng sû rayùq gi, Yhang lé pyuq kat luî, “Hkyangjong mó lé wá, Nàng, haû su nghû dang tû lhê lhú?” ga taî ri.
23 Haú hkûn, Yesuq gi, “Ngò taî shut é nghut le gi, shut é hkyô lé sàksé tûn shit àq. Nghut kôlhang, Ngò gi, têng é dông ru taî le nhîng, nàng, haî mù Ngo lé pyuq lhê lhú?” ga tû taî ri. 24 Hau htâng, Anna gi, Yhang lé tuî to gù, haû hkyangjong mó Kayahpaq chyáng dé kat nhang ri.
Yesuq Lé, Petiruq Xoq He-ngìk Pyâm É Hkyô
25 Haû Simun Petiruq gyòq gang yàp tô é hkûn, “Nàng gi, Yhâng é chángzô pé mâ é rayùq a nghut lhú?” ga, yhang lé myi kôjáng, yhang gi, “Ngò a nghut.” ga, dum he pyâm ri.
26 Haû Petiruq èq nohkyap zân hpyit pyám byî é huí su é buìnùm nghut é sû, haû hkyangjong mó é duìnhâng zoshâng rayùq gi, yhang lé, “Haû hkyâm má, nàng, Yhang eq rahá nghut nyi é lé, ngò a myang é su ngam lhê lhú?” ga taî ri. 27 Haú hkûn, Petiruq gi, xoq he pyâm ri; haú u yhang, wòq tûn bê nghut ri.
Pilat É Myòq Hí Má, Yesuq Jé Nyi É Hkun Lhê Hkyô
28 Hau htâng, yhángmòq gi, Yesuq lé, Kayahpaq chyáng mai, haû mau zau hpô é yhûmwàng shut shuî e ló akô. Haú u gi, nàpsûn noq ashî nghut ri. Yhángmòq gi, agòt a‑û a dùt é za, htûngli dông Lhoqlhai Poî lé wó zo râ matú, yhúmhkaû má a wàng kó nghut ri.
Yohan 18:28-40
29 Haû mù luî, mau zau Pilat gi, yhángmòq chyáng htoq ê mù, “Shí yùq lé, núngmòq hai mara hûn nau akô lhú?” ga myî ri.
30 Haú hkûn, yhángmòq gi, “Shí yuq, a ge é múzó kut é a nghut le gi, Yhang lé, náng é lòq má ngá-mòq lé àp byi râ a nghut.” ga tû taî akô.
31 Pilat gi, “Yhang lé, núngmòq yhang shuî ló mù, núngmòq é târâ dông ló jéyáng keq.” ga taí jáng, haû Yudaq byu pé gi, “Nghut kôlhang, ngá-mòq gi, ó yùq lé sat râ ahkáng le a wó é nghut lhê.” ga tû taî akô nghut ri. 32 Haû su dùt é hkyô gi, Yesuq, Yhang hká dông shî râ ga taî é dang lé lhoqdìk râ matú nghut lhê.
33 Haû mù, Pilat gi, yhúmhkaû má taû wang ló mù, Yesuq lé wùt yù luî, “Nàng gi, Yudaq byu pê é hkóhkâm nghut lhê lhú?” ga myî ri.
34 Haú hkûn, Yesuq gi, “Haû gi, náng é myìt dông taî é nghut lhê lhú? A nghut jáng, góbang mai, nang lé, Ngá é hkyô taî kyo luî nghut lhê lhú?” ga taû myî ri.
35 Pilat gi, “Ngò gi, Yudaq byù nghut lhê lhú? Haû Náng é byù myû eq Náng é hkyangjong agyi pé shèq, Nang lé, ngá lòq má àp byî é ru nghut lhê. Nàng gi, haî kut é nghut lhê lhú?” ga dum myî ri.
36 Haú hkûn, Yesuq gi, “Ngá é mîngdán gi, mingkan shî eq a séng. Mingkan shî eq sêng é ru nghut le gi, haû Yudaq byu pé, Ngo lé a wó chyup yù loshoq, Ngá é duìnhâng zoshâng wuì, Ngo lé chôm hung yù kôrâ nghut lhê. Nghut kôlhang, Ngá é mîngdán gi, mingkan shî eq a sêng é ru nghut lhê.” ga taî ri.
37 Haû mù, Pilat gi, “Haû jáng, Nàng gi, hkóhkâm nghut bê lhú?” ga myi jáng, Yesuq gi, “Ngo lé, hkóhkâm nghut lhê ga, nàng taî nyi é jô ri. Gè gè ga jáng, Ngò gi, hau é yánmai hku lé lo é sû nghut lhê; haû tengmán hkyô lé sàksé hkám râ matú, Ngò, mingkan htoq má jé lé é nghut lhê. Haû tengmán hkyô eq sêng é sû ó yùq le, Ngá é dang lé gyô ri.” ga tû taî ri.
38 Haú hkûn, Pilat gi, “Tengmán hkyô gâ é gi, haí jung lhú?” ga myî ri. Yhang gi, haû su ga myi luî, haû Yudaq byu pê chyáng dum htoq ê mù, “Shí yùq chyáng mara hûn râ hkyô, ngò a myàng nghut ri. 39 Nghut kôlhang, haû Lhoqlhai Poî u lé, núngmòq é matú, ngò, htóng byû rayùq nhang htoq kat byi byi kut é htûng, núngmòq wó akô. Haû mù, ‘Yudaq byu pê é hkóhkâm’ lé, nhang htoq kat byi râ lé, núngmòq ô nau akô lhú?” ga myî ri.
40 Haú hkûn, yhángmòq gi, “Haú yùq lé a nghut! Barabaq lé shèq nhâng byi aq.” ga, garû kat akô. Barabaq gi, da-myàq nghut ri.