Yesuq Lé, Sat Râ Da Kô É Hkyô
26
Yesuq gi, haú hkyô pé lé ban taî é htâng má, Yhâng é chángzô pé lé, 2 “Núngmòq sê tô é eq rajung za, í nyí laî é htâng má, Lhoqlhai Poî jé râ nghut mù, haû Byu Yhangzo gi, tapzîng má jén sat é hui râ matú, àp pyâm é hui râ nghut lhê.” ga taî ri.3 Haú u lé, hkyangjong agyi pé eq sûwún wuî gi, Kayahpaq gâ é hkyangjong mó rayùq é yhûmwàng má zùp zîng to kômù, 4 Yesuq lé haq chyup yû râ eq sat pyám râ hkyô lé, hpyê lhûm bum akô nghut ri. 5 Nghut kôlhang, yhángmòq gi, “Byu pé gabyông lò kó âbe, poî gyoro má gi, a kut shi sháng.” ga, taî lhûm akô nghut ri.
Yesuq, Xû Hut Gyun Huî É Hkyô
6 Yesuq gi, Behtani wà má nyi é yàpjèq nòlì dàp wú sû Simûn é yhûm má nyi tô é hkûn, 7 myiwe myhí rayùq gi, gyai hpaû é namngón xû bo é lùq hpyû bòng yu lé lô mù, Yesuq zo shuq nyi é hkûn, namngón xû haú lé, Yhâng é ulhum má hut gyun byî ri.
8 Haú hkyô lé, haû chángzô pé myàng kôjáng, wú nhik-yo kômù, “Haî mù luî, haú lé aha agó kut pyâm lhê lhú? 9 Xû haú lé, ahpau myo myô èq ûng pyám mù, myùng bang lé byî le ge lhê mhaî!” ga taî kat akô.
10 Yesuq gi, haú hkyô lé sé luî, “Haî mù, myiwe zo haú lé, i‑myìt lhoqmyô nyi akô lhú? Yhang gi, Ngá é ahtoq má ge é hkyô kut bê nghut ri. 11 Haû myùng bang gi, núngmòq eq rahá hkâ-nhám le nyì râ nghut lhê; nghut kôlhang, Ngò gi, núngmòq eq rahá ayang nyi nyì râ sû a nghut. 12 Yhang, Ngá gûng má namngón xû hut gyûn é gi, Ngá gûng lé yhum râ matú, hen lajâng é hkyô nghut ri. 13 Ngò, núngmòq lé teng za taí kôlé, haû gabú danglù lé, mingkan gón hko kyô é jowò hkangmó má, yhang lé myìtbûn é dông, yhang kut é hkyô shî lé, taî kyo bekô râ nghut lhê.” ga taî kyô ri.
Yesuq Lé, Yudaq Èq Ung Zô Pyâm É Hkyô
14 Hau htâng, haû chángzo raxe í yùq má bo é Yudaq Isikarut ga sû gi, hkyangjong agyi pê chyáng ê mù, 15 “Ngò, Yesuq lé núngmòq é lòq má àp byî é nghut jáng, núngmòq, ngo lé haî byi kôrâ lhú?” ga myî ri. Haû mù, yhángmòq gi, yhang lé ngùn dénggá sum xê chap nghap byî akô. 16 Haú hkûn mai, Yudaq gi, Yesuq lé àp pyám râ hkyô ho nyì bê nghut ri.
Yhûmsing É Myínzang
17 Múnchi a kat é Mùk Zo Poî sânghî nyí má, haû chángzô pé gi, Yesuq chyáng lé lô kômù, “Nàng zo râ Lhoqlhai Poî zoshuq lé, ngá-mòq hká má món to râ lhú?” ga myî akô.
18 Haû mù, Yhang gi, “Wà mó hkaû shut wang ló mù, byù rayùq chyáng ê luî, haú yùq lé, ‘Ngá é ahkyíng chyáng bê; Ngá é chángzô pé eq rahá, Ngò, náng é yhûm má Lhoqlhai Poî kut râ nghut lhê.’ ga Sará taî ri nghû, ê taí keq.” ga pying kat ri. 19 Haû mù, haû chángzô pé gi, Yesuq pying kat é eq rajung za ê taí kômù, Lhoqlhai Poî lé món to bekô nghut ri.
20 Myínhtâng jé lô jáng, Yesuq gi, haû chángzo raxe í yùq eq rahá, zohpoq má zung tô ri. 21 Yhángmòq zô nyi bùm kô é u lé, Yesuq gi, “Ngò, núngmòq lé teng za taí kôlé, núngmòq mâ é rayùq sû gi, Ngo lé àp pyám râ nghut lhê.” ga taî ri.
22 Haú hkûn, yhángmòq gi, gyai gyô yón kômù, rayùq htâng rayùq, “Yhûmsîng ê, ngò a nghut hkaî?” ga, Yhang lé chôm myî akô.
23 Haú hkûn, Yesuq gi, “Ngò eq rahá, hkoq shí má lòq làp bê sû gi, Ngo lé àp pyám râ sû nghut lhê. 24 Haû Byu Yhangzo gi, Yhang eq séng luî kâ tô é eq rajung za, shî râ za nghut lhê. Nghut kôlhang, haû Byu Yhangzo lé àp pyâm é sû gi, dingnyé wó ri; haú yùq gi, a hku lé le lháng, je ge ri.” ga dum taî kat ri.
25 Hau htâng, Yhang lé àp pyám râ sû, Yudaq gi, “Rabai ê, ngò a nghut hkaî?” ga myi jáng, Yesuq gi, “Nàng nghut ri.” ga tû taî kat ri.
26 Yhángmòq zô nyì kô é u lé, Yesuq gi, mùk lé yù mù, jeju hkya-on luî, mùk lé myhik hpé mù, “Shî gi, Ngá é gùngsho nghut lhê; yù mù zo keq.” ga taí uchyang, Yhâng é chángzô pé lé gàm byî ri.
27 Hau htâng, Yhang gi, góm lé le, yù mù, jeju hkya-on luî, yhángmòq lé byi mù, taî é gi, “Núngmòq bànshoq bang, shuq keq. 28 Shî gi, yubàk mara hkyut pyám byi râ, byù myo myô é matú htoq pyâm é, dangshikaq eq sêng é Ngá sui nghut lhê. 29 Ngò, núngmòq lé taí kôlé, ahkuî mai gi, Ngò, Ngá wâ é mîngdán má, núngmòq eq rahá tsibyiq wing asik lé shuq é buìnyì a jé jé, tsibyiq wing lé dum shuq râ a nghut lo.” ga taî ri.
30 Yhángmòq gi, hkya-on mahkôn ralhum ban hkôn jáng, Tsanlun bùm shut htoq e ló bekô nghut ri.
Petiruq He-ngìk Râ Lé, Te Taî É Hkyô
31 Hau htâng má, Yesuq gi, yhángmòq lé, “Núngmòq lhúnglhâng bang gi, hkû-myîn yhang jáng, Ngá é yánmai, myìt lingbàt kôrâ nghut lhê; hkâsu mù gâ le,
‘Haû sau zúng sû lé, Ngò bàt sat pyám mù, sau hpúng mâ é sau pé gi, lhoqpyo pyâm é hui kôrâ nghut lhê.’a
ga kâ tô ri. 32 Nghut kôlhang, Ngò gi, lhoqdui toq é huî htâng má, Galile mau shut, núngmòq é hí má e ló láng râ nghut lhê.” gâ ri.
33 Haú hkûn, Petiruq gi, “Náng é yánmai, góbang bànshoq myìt lingbàt kôlhang, ngò gi, hkâ-nhám le myìt lingbàt râ a nghut.” ga tû taî ri.
34 Yesuq gi, “Ngò, nang lé teng za taí lé, hkû-myîn yhang jáng, wòq a tûn shi-má, nàng, Ngo lé sum dâm he-ngìk pyám râ nghut lhê.” ga tû taî ri.
35 Nghut kôlhang, Petiruq gi, “Ngò, Nàng eq rahá shî râ dùt kôlhang, Nang lé ngò he-ngìk pyám râ a nghut.” ga saî taî ri. Haû chángzô pé góbang bànshoq le, haû su ga châng taî bum akô nghut ri.
Get-samane Gâ É Jowò Má Kyûdûng É Hkyô
36 Hau htâng má, Yesuq gi, Yhâng é chángzô pé eq rahá Get-samane gâ é jowò má ê kômù, yhángmòq lé, “Ngò, hé má ê mù, kyûdûng nyi é u lé, núngmòq shí má zùng láng keq.” ga taî ri. 37 Yesuq gi, Petiruq eq Zebedi yhang zô nhik lé shuî chûng ri. Yhang gi, myìt gyai a ngón é eq myìt wui myìt hke dùt lò bê nghut ri. 38 Hau htâng, Yhang gi, yhángmòq lé, “Ngò gi, shî râ í yhang myìt yón nyi ri; núngmòq gi, Ngò su machyâ luî, shî má láng nyî keq.” ga taî ri.
39 Yesuq gi, haû mai ra-tsuí zo sô ê mù, myigùng má ngóm gòp to luî, “Âwa ê, wó dùt é nghut le gi, gómb shí lé, Ngá chyáng mai lhaî pyám byi laq. Nghut kôlhang, Ngò ô nau é dông a nghut, Nàng ô nau é dông shèq nghut sháng gàq.” ga kyûdûng ri.
40 Hau htâng, Yhang gi, Yhâng é chángzô pê chyáng dum taû lo le, yhángmòq yhup myhî to kô é lé lo myang ri. Haû mù, Yhang gi, Petiruq lé, “Núngmòq gi, hkyíng hkum rahkum za lháng, Ngò eq rahá a wó machyâ nyì kó lhú? 41 Gúnglaú é a hui sháng gàq, machyâ luî, kyûdûng nyì keq. Haû sô gi, kâm nyì kôlhang, gùngsho gi, wum nyhôm nyi ri.” ga taî ri.
42 Yhang gi, radàm dum ê mù, “Âwa ê, góm shî lé, Ngò a shuq é a wó lai râ nghut jáng gi, Nàng ô nau é dông nghut sháng gàq hkoi.” ga kyû dum dûng ri.
43 Yhang dum taû lo le, yhángmòq gi, myòqkuq lai kô é yánmai, yhup myhî to láng kô é lé, lo dum myang ri. 44 Haû mù, Yhang gi, yhángmòq lé tô pyâm to mù, sum dâm nghû râ dàm dum ê luî, hí lé dûng é dang lé roq ê dum dûng ri.
45 Haû mù, Yhang gi, haû chángzô pê chyáng dum taû jé lô mù, yhángmòq lé, “Núngmòq gi, ahkuî jé shoq yhup ngón nyi ashî kó lhú? Wú keq! Haû ahkyíng gi, jé bê nghut luî, haû Byu Yhangzo gi, yubàk dàp bâng é lòq má àp pyâm é hui râ nghut bê. 46 Toq keq! Ló losháng hkoi! Ngo lé àp pyám râ sû gi, jé lé lô bê nghut ri.” ga taî ri.
Yesuq, Chyup Yû Huî É Hkyô
47 Yesuq, dáng nyo nyi ashî u lé, haû chángzo raxe í yùq má bo é Yudaq gi, jé lé lo ri; haû hkyangjong agyi pé eq míngbyu é sûwún wui chyáng mai nhang kat é bang nghut é, shâm eq dumbáng pé chung tô é byù mòqmó le, yhang eq rahá nghut akô. 48 Yesuq lé àp pyám râ sû gi, haú bang lé, “Ngò, bo-puq puq é sû gi, haú yùq nghut bê; Yhang lé chyup yû keq.” ga alhô agàn byî tô ri. 49 Yudaq gi, Yesuq chyáng hkyê za ê mù, “Rabai ê, wángzán nyi lhê lhú?” ga taí luî, Yhang lé bo-puq puq byî ri.
50 Haú hkûn, Yesuq gi, “Buìnùm hpó ê, nàng kut râ múzó lé kut àq hkoi.” ga tû taî kat ri.
Hau htâng, yhángmòq gi, hí shut huî ê luî, Yesuq lé chôm zuî zìng mù, chyup yû bekô nghut ri. 51 Haû mù, Yesuq eq rahá nyì bang mâ é rayùq gi, shâm she htoq yû mù, hkyangjong mó é duìnhâng zôshang é nohkyap lé pyoq hkyô kat byi bê nghut ri.
52 Haû jáng, Yesuq gi, haú yùq lé, “Náng é shâm lé, xâng pyám aq; hkâsu mù gâ le, shâm shê sû gi, ó yùq nghut kôle, sham èq shî râ nghut lhê. 53 Ngò gi, Ngá wa lé dung jáng, Yhang gi, radá dâm, maumang lagyo dàp pé raxe í dàp htoq myo shoq nhang kat byi râ nghut é lé, núngmòq a sé kó lhú? 54 Nghut kôlhang, haû su nghut é nghut jáng, shí hkyô dùt lò râ nghut lhê ga Chyúmdang pé má bò tô é hkyô gi, hkâsu wó dik lò râ lhú?” ga taî kat ri.
55 Hau htâng, Yhang gi, byù mòqmó lé, “Núngmòq gi, da-myàq rayùq lé chyup é su, Ngo lé chyup râ matú, shâm eq dumbáng pé chûng mù, lé lo akô lhú? Ngò gi, nyí wuî, noqkuq yhûm má zùng mù, mhoqshit nyî kôlhang, núngmòq, Ngo lé a chyup yû kô é nghut lhê. 56 Nghut kôlhang, shî su dùt é hkyô pé bànshoq gi, haû myìqhtoî pé kâ tô é hkyô pé lo dìk râ matú dùt é nghut ri.” ga taî ri. Haú hkûn, haû chángzô pé bànshoq gi, Yesuq lé tô pyâm to kôluî, hpang byo byùq bekô nghut ri.
Yudaq Byìn Tú Wàpdòq Má Jep Huî É Hkyô
57 Yesuq lé chyup yu é bang gi, haû târâ sará pé eq sûwún wuî zùp zîng nyi é jang, hkyangjong mó Kayahpaq é yhûm má, Yhang lé shuî e akô. 58 Petiruq gi, hkyangjong mó é yhûmwàng hkaû má châng jé wâng shoq, we we mai Yesuq htâng châng tô ri. Yhang gi, hkâsu dùt lò râ lé myàng naù luî, wânghkaû má wang ê mù, zúng bang eq rahá zung tô ri.
59 Haû hkyangjong agyi pé eq Yudaq byìn tú wàpdòq mâ é góbang gi, Yesuq lé sat pyám nhâng râ matú, a têng é sàksé ho nyi akô. 60 A têng é sàksé myo myo htoq lô kôlhang, wó sat râ î é sàksé a myàng kó nghut ri.
Ló htáng má, byù í yùq gi, lé lô kômù, 61 “Shí yùq gi, ‘Ngò gi, haû Garai Gasâng é noqkuq yhûm lé lhoqhtên pyám mù, sum nyí gyoro má dum wó saî lhê.’ ga taí sû nghut ri.” ga taî akô.
62 Haú hkûn, haû hkyangjong mó gi, toq yàp mù, “Nàng, haî le a tû taí lùq? Shí bang, Nang lé mara hun nyi é sàksé gi, hká dông nghut lhê lhú?” ga, Yesuq lé myî ri. 63 Nghut kôlhang, Yesuq gi, jit le a ga nyi tô ri.
Haú mù, hkyangjong mó gi, Yhang lé, “Haû rû dui nyi é Garai Gasâng é myìng lé lang luî, ngò, Nang lé myî wú lé: Nàng gi, Garai Gasâng é Yhangzo, Hkrisidùq nghut lhê lùq, ngá-mòq lé taî kyô wú aq.” ga taí jáng, 64 Yesuq gi, “Nàng taî é eq rajung za nghut lhê. Ngò, núngmòq bànshoq lé taí kôlé, núngmòq gi, ahkuî mai htâng hpyang má, haû Byu Yhangzo gi, Wum-o a-tsam mó bò Su é lòqyo hkyam má zung tô é lé le, mhuthtui ji mù, mauhkûng mai lé lo é lé le, núngmòq myàng kôrâ nghut lhê.” ga taî ri.
65 Haú hkûn, hkyangjong mó gi, yhâng é bu lé lâng cheq pyám mù, “Yhang gi, Garai Gasang lé rhoî dang taí bê nghut ri! Ngá-nhúng, hai sàksé râ ashî lhú? Yhang, Garai Gasang lé rhoî dang taî é lé, núngmòq, ahkuî wó gyo bekô nghut lhê. 66 Núngmòq hkâsu wó myìt akô lhú?” ga myi jáng, yhángmòq gi, “Yhang gi, shî gíng sû nghut lhê.” ga tû taî akô nghut ri.
67 Hau htâng má, yhángmòq gi, Yesuq é myòqdong má sôkan byé gyun luî, lòqtsup èq htuí byî akô nghut ri. Góbang gi, Yhang lé bo-pyuq pyuq byi luî, 68 “Hkrisidùq Nàng, Nàng lé bàt sû ó yùq nghut é lé, myìqhtoi htoî wú aq.” ga taî akô.
Yesuq Lé, Petiruq He-ngìk Pyâm É Hkyô
69 Petiruq gi, wânghkaû má nyi tô é u lé, duìnhâng zoshâng myhí rayùq gi, yhâng chyáng lé jé mù, “Nàng le, haû Galile byù Yesuq eq rahá nyì sû nghut ri.” ga taî ri.
70 Nghut kôlhang, Petiruq gi, haú bang bànshoq é hí má yhang, “Nàng haî taî nyi é lé, ngò a sé.” ga he kat ri.
71 Hau htâng, yhang gi, wâng hkúmdong shut htoq e ló le, haú jowò má, duìnhâng zoshâng myhí góyùq le, yhang lé myàng mù, “Shí yùq gi, Nazaret wà byù Yesuq eq rahá nyì sû nghut ri.” ga, haú mâ é bang lé taî kat ri.
72 Haú hkûn, yhang gi, “Byù haú yùq lé, ngò a sé!” ga dâkam é dông he pyâm ri.
73 Hau htâng razùp zo má, haú jowò má yàp to bang gi, Petiruq chyáng huî ê kômù, “Nàng le, haú bang má bò sû yhang nghut ri; náng é danghtê lé sê gyô ri.” ga taî akô.
74 Haú hkûn, yhang gi, yhânggùng yhang nhing luî, “Haú yùq lé, ngò a sé.” ga dakâm dang taî ri.