MARIKUQ
é Gabú Danglù Laiká
(The Gospel of Mark)
Yesuq É Matú Hkyô Htong Byî É Hkyô
1
Haû Garai Gasâng é Yhangzo, Yesuq Hkrisidùq eq sêng é gabú danglù hi é hkyô gi, 2 haû myìqhtoi Esai-a laiká má:“Náng é hkyô lajang láng râ matú, Ngá é lagyo lé, Náng é hí má Ngò nhang kat râ nghut lhê.”a
ga luî le,
3 “Haû yòso má, byù rayùq garû taî é htê gi,
‘Haû Yhûmsing é matú, hkyô hen to keq; Yhâng é matú hkyô lhoqnyhang to keq.’ gâ ri.”b
ga luî le, kâ tô é eq rajung za nghut lhê. 4 Haû mù, Wuìmyhup Sará Yohan gi, yòso hkaû má jé lé luî, wuìmyhup hkám byî nyi é eq, yubàk mara hkyut pyám byî é hui râ matú myìt lhîng mù, wuìmyhup hkâm yù râ hkyô lé, hko kyô nyi ri. 5 Haú hkûn, Yuda mau jowò hkangmó mâ é bang eq Yerusalem wà mó mâ é bànshoq bang gi, yhâng chyáng htoq e bum akô. Yhángmòq gi, yhûmsing é mara lé yín yû kôluî, yhâng chyáng mai Yodan làng má wuìmyhup hkâm yu bum akô nghut ri. 6 Yohan gi, gola-uk sho-maú èq saî é mèbu wùt mù, yhâng é hpyidum má gi sho-kuq hpyihit hit ri; yhang gi, dinggám eq yòsô byo-î pé lé zo sû nghut ri. 7 Yhang taî kyô é dang gi, “Ngá htoq má wum-o a-tsam je bo é sû rayùq, ngá htâng má jé lé râ nghut lhê; ngò gi, yhâng é hkyî-tsung tui lé hpyî râ lháng a gíngdán é nghut lhê. 8 Ngò gi, núngmòq lé, wui èq za wuìmyhup wó hkám byî lhê; nghut kôlhang, Yhang gi, Chyoiyúng Sô má núngmòq lé wuìmyhup hkám byi râ nghut lhê.” gâ ri.
Yesuq, Wuìmyhup Hkâm Yu É Hkyô Eq Gúnglaú Huî É Hkyô
9 Haú yòq má, Yesuq gi, Galile mau Nazaret wà mai lé jé mù, Yohan chyáng Yodan làng má wuìmyhup hkâm yu ri. 10 Yesuq gi, wuì mai htoq lo é u lé, mauhkûng bóng lo é lé le, Sô gi, hpûngkyui gùnghkyâng sû é dông mai, Yhâng ahtoq má gyó lé lo é lé le, Yhang myang kat ri. 11 Haú hkûn, “Nàng gi, Ngò chyitdàp é Ngá zo nghut lhê; Náng é ahtoq má Ngò gabú myìt ngón nyi lhê.” ga mauhkûng mai danghtê htoq lo ri.
12 Haú hkûn jáng, Sô gi, Yhang lé yòso shut wang e ló nhang ri. 13 Haû mù, Yhang gi, yòso má myi xê nyí nyì luî, Tsádán èq gúnglaú é huî ri; tân jung yòsô zè pé le, Yhang eq rahá nghut nyi ri; maumang lagyô pé gi, Yhang lé, lé dójaú nyi akô nghut ri.
Sânghi Lhê É Chángzô Pé
14 Yohan htóng gyó é htâng má, Yesuq gi, Galile mau má ló jé mù, 15 “Ahkyíng gi, jé bê; Garai Gasâng é mîngdán gi, chyâng lò bê nghut ri; myìt lhîng mù, haû gabú danglù lé lùmjíng keq hkoi.” ga luî, Garai Gasâng é gabú danglù lé hko kyô wún ri.
16 Yesuq gi, Galile nhông yàm mai sô laî ló le, Simun eq yhang gu Andire nhiktâng, nhông má gùn dú nyî kô é lé, myang ri; haû nhik gi, ngozo kóng zo su nhik nghut akô. 17 Haû mù, Yesuq gi, haú nhiktâng lé, “Ngá htâng cháng keq; Ngò, núngnhik lé, byù lé châng kóng su nhik dùt nhâng râ nghut lhê.” ga taî ri. 18 Haú hkûn, yhángnhik gi, radá dâm, gùn pé lé tô pyâm to luî, Yhâng htâng cháng bekô nghut ri.
19 Yesuq gi, radun zo dum sô e ló é hkûn, Zebedi é yhang zo, Yakuq eq yhang gu Yohan nhiktâng, lhaî hkaû má gùn hpo nyì kô é lé, myang ri. 20 Haú hkûn, Yhang gi, radá dâm, yhángnhik tâng lé wùt kat jáng, yhángnhik tâng gi, yhángnhik é yhâng wa Zebedi eq langchyâng pé lé, lhaî hkaû má nyhi pyâm to kôluî, Yhâng htâng cháng bekô nghut ri.
Nàt Lé, Yesuq Hkat Htoq Pyâm É Hkyô
21 Yhángmòq gi, Kaperina‑um wà má e akô; Bánno Buìnyì nyí jé jáng, Yesuq gi, târâjong má wang ê mù, mhoqshit hi ló bê nghut ri. 22 Shiwa byu pé kúm gi, Yhang mhoqshit é hkyô lé maú hong bum akô; hkâsu mù gâ le, Yhang gi, târâ sará pé eq a pung é za, ahkáng ayá wó sû rayùq su, yhángmòq lé mhoqshit é yánmai nghut ri. 23 Haú u lé, agè ashop é nàt wang júng é byù rayùq târâjong má bo lom nyì luî, wùt garû kat é gi, 24 “Nazaret wà byù Yesuq ê, ngá-mòq gi, Nàng eq haî sêng lhê lhú? Ngá-mòq lé lhoqhten râ matú, Nàng jé lé é nghut lhê lhú? Nàng gi, Garai Gasâng é Chyoiyúng Sû nghut é lé, ngò sê lhê.” gâ ri.
25 Haú hkûn, Yesuq gi, “Hkâjòp, yhâng chyáng mai htoq ló aq.” ga yhang lé tân kat ri. 26 Haú hkûn, agè ashop é nàt haû gi, byù haú yùq lé wum kat lânghtân nhâng luî, htê mó èq garu uchyang htoq ló byùq bê nghut ri.
27 Shiwa byù bànshoq bang gi, gyai yhang maú byùq kômù, rayùq eq rayùq, “Shí yùq é dang gi, hkâsû é dang wá nghut lhê lhú? Ahko ahkáng bo é dông mhoqshit é hkyô asik nghut rî-nhung! Yhang gi, agè ashop é nàt pé lé hkunmó hkyó jáng, haú bang lháng gyo byî akô nghut ri.” ga luî, taî lhûm bum akô nghut ri. 28 Yesuq eq sêng é lùdang gi, Galile mau jàm shoq, yang é dông byo myín ló bê nghut ri.
Byù Myo Myo Lé, Yesuq Lhoqgê Byî É Hkyô
29 Yhángmòq gi, târâjong mai htoq luî, haú hkûn jáng, Yakuq eq Yohan nhik le mù, Simun eq Andire nhiktâng é yhûm má wang e ló bekô nghut ri. 30 Simûn é yhâng aûmó gi, gyai yhang no lèq tô é nghut mù luî, yhángmòq gi, Yesuq lé haú yùq no é hkyô lhom taî kyô akô nghut ri. 31 Haû mù luî, Yesuq gi, yhâng chyáng huî ê mù, yhâng é lòq má zui luî tu tsung ri; haú hkûn jáng, nò ge byùq luî, yhang gi, yhángmòq lé gaí tso gaí huq bê nghut ri.
32 Haú nyí buìwang é htâng má, byu pé gi, no é bang eq nàt gang wang júng nyi é bang bànshoq lé, Yesuq chyáng shuî lé lo bum akô nghut ri. 33 Rawa bang, hkúmdong nàm má lé zùp zîng tô akô. 34 Haû mù, Yesuq gi, awáng nòhpyo ajung jung huî é bang myo myo lé lhoqgê byî ri; nàt gang myo myo lé le, hkat htoq pyâm ri; nghut kôlhang, Yhang ó nghut é lé nàt gang haú bang sé kô é yánmai, nàt gang haú bang lé dang a taí nhâng nghut ri.
35 Yesuq gi, htang nàpkyó mau lháng a bó shi-má, toq mù, gaû é jowò ralhum má htoq ê luî, kyû ê dûng ri. 36 Simun eq yhâng é luzúm wuî kúm gi, Yhang lé châng hô kômù, 37 Yhang lé myang hô kôjáng, “Yùq hkangmó gi, Nang lé châng hkat ho nyi akô.” ga luî, taî kyô akô nghut ri.
38 Haú hkûn, Yesuq gi, yhángmòq lé, “Awui ayàm mâ é wà pé má le, ngò, mungdang wó hkô râ matú ê sháng, hau é matú ngò lé é ru nghut lhê.” ga tû taî ri. 39 Haû mù luî, Yhang gi, Galile mau ra-mau gón, târâjong pé má mungdang hkat hko wún é htoq agó, nàt gâng pé lé le hkat htoq pyám byî wún ri.
Yàpjèq Dàp Sû Lé, Yesuq Lhoqgê Byî É Hkyô
40 Yàpjèq dàp é byù rayùq gi, Yesuq chyáng lé mù, hkyîhput htuq luî, “Nàng dóng é nghut le gi, ngo lé Nàng wó lhoq sân-yúng byi râ nghut lhê.” ga dûng wùt ri.
41 Haú hkûn, Yesuq gi, yhang lé wú shogyo luî, lòq lhâm kat mù, haú yùq lé ê záng luî, “Ngò dóng lhê, sân-yúng àq hkoi.” ga taî ri. 42 Haú hkûn jáng, yàpjèq nòlì byùq byùq luî, yhang gi, gè bê nghut ri.
43-44 Yesuq gi, “Nàng, shí hkyô ó lé le hkâtaî kyo. Nghut kôlhang, náng é gùngdu lé, hkyangjong hpô chyáng ló tûn shit mù, nàng sân-yúng bê hkyô lé yhángmòq é matú sàksé dùt sháng gàq, Mosheq târâ tô tô é eq rajung za, hkungga ló nhông byi aq.” ga, yhang lé gyai yhang sidìq byi mù, radá dâm nhang kat bê nghut ri. 45 Nghut kôlhang, haú yùq gi, htoq ló mù, haú hkyô lé je taî pyo myhîn ló bê nghut ri. Hau é yánmai, Yesuq gi, wà hkaû má de de a ge wang ló lo mù, shinggan mâ é chamchyuîyuì dùt é jowò má za nyi nyi ri. Nghut kôlhang, byu pé gi, jowò hkangmó mai Yhâng chyáng ru zîng lé nyi bum ashi kô nghut ri.