Yesuq, Gúnglaú Huî É Hkyô
4
Hau htâng má, Chyoiyúng Sô gi, Yesuq lé, nàt Tsádán èq gúnglaú é hui nhâng râ matú, yòso shut shuî e ri. 2 Yesuq gi, zoshuq tûm é myi xê nyí myi xê myìn jé jáng, zò-mut hui bê nghut ri. 3 Haú hkûn, gúnglaú sû gi, Yhâng chyáng lé mù, “Nàng, Garai Gasâng é Yhangzo nghut le gi, lùqgòk shí pé lé mùk dùt nhâng àq.” ga taî ri.4 Haû jáng, Yesuq gi, “‘Byù gi, mùk èq za chyungxe duì râ a nghut; Garai Gasâng é nhut mai htoq lo é mungdang hkangmó èq shèq chyungxe duì râ nghut lhê.’a ga luî, Chyúmdang má kâ tô ri.” ga yhang lé tû taî ri.
5 Haú hkûn, nàt Tsádán gi, Yesuq lé, chyoiyúng wà mób má shuî ê mù, noqkuq yhûm je myhang é shûhtâng htoq má yàp nhang to luî, 6 “Nàng, Garai Gasâng é Yhangzo nghut le gi, byam gyó kat wú aq. Hkâsu mù gâ le,
‘Náng é matú, Garai Gasang gi, Yhâng é maumang lagyô pé lé taî to râ nghut mù,
lùqgòk má Náng é hkyî a ló htung shoq,
yhángmòq é lòq èq Nang lé lhom bún yû kôrâ nghut lhê.’c
ga luî, Chyúmdang má kâ tô ri.” ga taî ri.
7 Nghut kôlhang, Yesuq gi, “‘Haû Yhûmsîng, núngmòq é Garai Gasang lé, wó chyam wú râ a nghut.’d ga luî le, Chyúmdang má kâ tô ri.” ga, yhang lé tû taî ri.
8 Nàt Tsádán gi, Yesuq lé, gyai yhang myhang é bùm htoq má shuî dòq ló mù, mingkan má jòq é mîngdán pé bànshoq eq haú pê é hkìkhkâm hkyô lé tûn shit ri. 9 Hau htâng, yhang gi, “Nàng hkyîhput htuq mù, ngo lé noq é nghut jáng, shí pé bànshoq, Nang lé ngò byi râ.” ga, Yesuq lé taî ri.
10 Haú hkûn, Yesuq gi, “Tsádán nàng, ló byùq àq! Hkâsu mù gâ le, ‘Haû Yhûmsîng náng é Garai Gasang lé za, nàng noqkuq dójaú ra râ nghut lhê.’e ga luî, Chyúmdang má kâ tô ri.” ga, yhang lé taî ri.
11 Haû mù, nàt Tsádán gi, ló byùq bê nghut luî, maumang lagyô pé gi, Yesuq lé, lé dójaú nyi akô nghut ri.
Yesuq Mungdang Hko Hi Ló É Hkyô
12 Yesuq gi, Wuìmyhup Sará Yohan htóng gyó é hkyô lé wó gyo jáng, Galile mau shut dum taû ló bê nghut ri. 13 Yhang gi, Nazaret wà mai htoq ló mù, Zebulun eq Naphtali mau mâ é nhông yàm má jòq é Kaperina‑um wà má ló nyi nyi ri. 14 Haû gi, myìqhtoi Esai-a laiká má,
15 “Zebulun mau eq Naphtali mau, wuìmau mâ é hkyô, Yodan làng yàm, tûngbaù pé nyi é Galile mau ê,
16 mauchut hkaû má nyi nyi é bang, maubó mó lé myàng bê nghut ri;
shî wup hkaû má nyi to bâng é matú, maubó lô bê nghut ri.”f
ga kâ tô é dang lé lhoqdìk râ matú nghut ri.
17 Haú hkûn mai, Yesuq gi, “Myìt lhîng keq! Mauhkûng mîngdán gi, chyâng lò bê nghut ri.” ga, mungdang hko hi e ló bê nghut ri.
Yesuq É Chángzo Hí Dùt Bang
18 Yesuq gi, Galile nhông yàm má hkyô sô wún é hkûn, Petiruq gâ é Simun eq yhang gu Andire nhiktâng lé myang ri. Yháng nhiktâng gi, ngozo kóng zo su nhik nghut mù luî, nhông má gùn dú nyi akô nghut ri. 19 Haû mù, Yhang gi, haú nhiktâng lé, “Ngá htâng cháng keq; Ngò, núngnhik lé, byù lé châng kóng su nhik dùt nhâng râ nghut lhê.” ga taî ri. 20 Haú hkûn, yhángnhik gi, radá dâm, gùn pé lé tô pyâm to luî, Yhâng htâng cháng bekô nghut ri.
21 Yesuq gi, jowò haú mai xoq sô e ló le, Zebedi é yhang zo, Yakuq eq yhang gu Yohan nhiktâng lé myang ri. Yhángnhik gi, yhángnhik é yhâng wa Zebedi eq rahá, lhaî hkaû má gùn hpo nyi akô. Yhángnhik lé, Yesuq wùt kat jáng, 22 yhángnhik gi, radá dâm, yhángnhik é yhâng wa eq lhaî haú lé, tô pyâm to kôluî Yesuq htâng cháng bekô nghut ri.
Nò Bang Lé, Yesuq Lhoqgê Byî É Hkyô
23 Yesuq gi, Galile mau ra-mau gón má htoq ê mù, târâjong pé má, mhoqshit luî, mauhkûng mîngdán eq sêng é gabú danglù lé, hko kyo uchyang, byu pê chyáng mâ é nòhpyo ajung jung hui bang eq nòlì nòjàng a-myû myû dàp bang lé, lhoqgê byî wún ri. 24 Yesuq eq sêng é hkyô lùdang gi, Suriq ra-mau gón má byo myín ló mù, byu pé gi, awáng nòhpyo ajung jung huî é bang, hkê-nhô jamjaû nyi é bang, nàt gang wang júng é bang, mhûngtuq tuq é bang, gùngjum shi é bang lé, shuî lé lô kôluî, Yhang gi, haú bang lé lhoqgê byî ri. 25 Galile mau, Dekapoli,g Yerusalem wà mó, Yuda mau eq, Yodan làng tû-tap mâ é byù mòqmó gi, Yesuq htâng châng bum akô nghut ri.