Yesuq Lé Tsádán Gúnglaú É Hkyô
4
Yesuq gi, Chyoiyúng Sô èq byíng mù, Yodan làng mai dum taû lo é hkûn, Chyoiyúng Sô gi, Yhang lé yòso shut shuî e ri. 2 Haú má, Yesuq gi, buìnyì myi xê nyí jé shoq, nàt Tsádán èq gúnglaú é huî ri. Buìnyì haú gyoro má, Yesuq gi, haî le a zô é yánmai, zò-mut hui bê nghut ri.3 Haû mù luî, nàt Tsádán gi, “Nàng, Garai Gasâng é Yhangzo nghut le gi, lùqgòk shî lé mùk dùt nhâng àq.” ga luî, Yhang lé taî ri.
4 Haú hkûn, Yesuq gi, “‘Byù gi, mùk èq za chyungxe duì râ a nghut.’ ga luî, Chyúmdang má kâ tô ri.”a ga yhang lé tû taî ri.
5 Hau htâng, nàt Tsádán gi, Yesuq lé, gyai yhang myhang é bùm htoq má shuî dòq ló mù, mingkan má jòq é mîngdán pé bànshoq lé razùp má za tûn shit luî, 6 “Shî ahkáng ayá bànshoq eq haû mîngdán é hkìkhkâm hkyô bànshoq, ngò nang lé wó byî lhê; hkâsu mù gâ le, haú pé bànshoq gi, ngo lé àp byî to bê nghut mù, ngò byí nau é sû ó yùq lé nghut kôlhang, byi râ nghut lhê. 7 Haû mù, Nàng, ngo lé noq é nghut jáng, shí pé bànshoq Náng é dùt râ nghut lhê.” ga, Yesuq lé taî ri.
8 Haú hkûn, Yesuq gi, “‘Haû Yhûmsîng náng é Garai Gasang lé za, nàng noqkuq dójaú ra râ nghut lhê.’b ga luî, Chyúmdang má kâ tô ri.” ga luî, yhang lé tû taî ri.
9 Nàt Tsádán gi, Yesuq lé Yerusalem wà mó má shuî ê mù, noqkuq yhûm je myhang é shûhtâng htoq má yàp nhang to luî, “Nàng, Garai Gasâng é Yhangzo nghut le gi, shî mai byam gyó kat wú aq. 10 Hkâsu mù gâ le,
‘Nang lé ùpzúng byî nyì râ matú, Garai Gasang gi, Yhâng é maumang lagyô pé lé taî to râ nghut mù,
11 lùqgòk má náng é hkyî a ló htung shoq, yhángmòq é lòq èq Nang lé lhom bún yû kôrâ nghut lhê.’c
ga luî, Chyúmdang má kâ tô ri.” ga taî ri. 12 Nghut kôlhang, Yesuq gi, “‘Haû Yhûmsîng, núngmòq é Garai Gasang lé, wó chyam wú râ a nghut.’d ga luî, Chyúmdang má bo tô ri.” ga, yhang lé tû taî ri.
13 Nàt Tsádán gi, gúnglaú é hkyô pé bànshoq ban kut jáng, ahko ahkáng láng wú uchyang yhâng chyáng mai byam gâng nyi byùq ri.
Yesuq Lé Nazaret Wà Bang He-ngìk Pyâm É Hkyô
14 Yesuq kúm gi, Chyoiyúng Sô wum-o byíng é èq Galile mau shut dum taû lo ri. Haú mau jowò hkangmó má, Yhâng é hkyô lé taî pyo ló bùm bekô. 15 Yhángmòq é târâjong pé má, Yesuq mhoqshit byi mù, lhúnglhâng bang gi, Yhang lé taî hkya-ôn nyi bum akô.
16 Hau htâng má, Yhang nyi kô lo é Nazaret wà má dum taû jé ló bê; Yhang gi, hkâ-nhám le kut nyi é eq rajung za, Bánno Buìnyìe lé târâjong má wang ê mù, laiká nghap râ ga toq yàp é hkûn, 17 Yhang lé myìqhtoi Esai-a chyúmding byi kôjáng, Yhang chyúmding haû lé hpông kat le,
18 “Yhûmsîng é Sô gi, ngá é ahtoq má nyi nyi ri;
hkâsu mù gâ le, asho awuî é bang lé gabú danglù hko kyo râ matú, Yhang ngo lé hkyin yù bê.
Htóng lúng bang lé lhoqhtoq râ hkyô eq, myòqjìt bang lé myòq dum myàng nhâng râ hkyô hko kyo râ matú le,
zìk zo huî é bang lé nhang kat nhâng râ eq,
19 Yhûmsîng, Yhâng é byu pé lé hkyi yù râ ahkyíng zànwut lé hko kyo râ matú le, Yhang, ngo lé nhang kat bê nghut ri.”f
ga luî, kâ tô é jowò lé myang záng mù nghap ri.
20 Hau htâng, Yesuq gi, chyúmding haú lé ding mù, shuî-u sû lé tau byî pyám luî, dum zung tô ri; târâjong mâ é byù lhúnglhâng bang gi, Yesuq lé chôm wú tô é hkûn, 21 Yesuq gi, “Núngmòq é nohkyap má, ahkuî wó gyô é Chyúmdang shî gi, hkû-nyí yhang lo dìk bê.” ga luî, yhángmòq lé taî hi kat ri.
22 Lhúnglhâng bang gi, Yhang ge é hkyô lé sàksé hkám byi kômù, Yhâng é nhut mai htoq é jeju bo é dang lé le, maú kôluî, “Shí yùq gi, Yosep é yhang zo a nghut lhú?” ga taî bum akô.
23 Haû mù luî, Yesuq gi, “Núngmòq gè gè yhang, ‘Chi sará ê, yhûmsing gùng lé lhoqge yù àq.’g gâ é sânghkyang èq le, ‘Nàng, Kaperina‑um wà má kut shit wú é hkyô ngá-mòq wó gyo bê, haû eq rajung za, nàng, náng é yhum mau má le, kut shit wú aq.’ ga luî le, ngo lé taí kôrâ nghut lhê.” ga taî ri.
24 Yhang dum xoq taî é gi, “Ngò, núngmòq lé teng za taí kôlé, myìqhtoi ó yùq le yhûmsing é yhum mau má myòqdong wó wú é a nghut. 25 Ngò, núngmòq lé teng za taí kôlé, Eliya é pyàt lé, Isira-elaq ming má chuimó myo myo nyi bum akô. 26 Nghut kôlhang, haú ming má súm zan èq lha-mó hkyuq hkyap yhang, mau a wò dùt byùq mù, mùtmó gyó tô é hkûn, Garai Gasang gi, yhángmòq mâ é rayùq chyáng le, Eliya lé a nhang kat é za, Sidon mau Zarehpat wà mâ é, chuimó myhí rayùq chyáng shèq nhang kat byî é nghut lhê. 27 Myìqhtoi Elisha é pyàt má le, Isira-elaq ming má, yàpjèq nòlì dàp é byù myo myo nyì kôlhang, yhángmòq chyáng mâ é rayùq le wó sân-yúng yù kô é a nghut; Suriq byù Naman ga sû tûngbaù hpó za shèq wó sân-yúng é nghut lhê.” ga taî ri.
28 Târâjong hkaû mâ é lhúnglhâng bang gi, haú hkyô lé wó gyo kôjáng, gyai yhang nhik-yo nau bùm kômù, 29 toq yàp luî, Yhang lé wà mai hkat htoq mù, yhángmòq é wà xuq tô é bùm gùng htoq mâ é gampyoq má, ê chyûn hpyit hkyô pyám râ ga shuî e ló akô. 30 Nghut kôlhang, Yesuq kúm gi, byù hpûng haû mai sô hkoq htoq ló byùq bê nghut ri.
Agè Ashop É Nàt Lé Yesuq Hkat Htoq É Hkyô
31 Hau htâng, Yesuq gi, Galile mau mâ é Kaperina‑um wà má jé ê mù, Bánno Buìnyì má byu pé lé mhoqshit hi ló bê nghut ri. 32 Yhángmòq gi, Yhang mhoqshit é hkyô lé maú hong nyi bum akô; hkâsu mù gâ le, Yhang gi, ahko ahkáng bo é dang dông taî nyi é yánmai nghut ri.
33 Yesuq, târâjong hkaû má mhoqshit byî nyi é hkûn, nàt gang wang júng é byù rayùq htê mó o mó èq taî é gi, 34 “Ê, Nazaret wà byù Yesuq ê, ngá-mòq gi, Nàng eq haî sêng lhê lhú? Ngá-mòq lé lhoqhten râ matú, Nàng jé lé é nghut lhê lhú? Nàng gi, Garai Gasâng é Chyoiyúng Sû nghut é lé, ngò sê lhê.” gâ ri.
35 Haú hkûn, Yesuq gi, “Hkâjòp, yhâng chyáng mai htoq ló aq.” ga yhang lé tân kat jáng, nàt gi, haú yùq le yhángmòq é gung gûng má lhoqlheq to mù, a nò nhang é za, yhâng chyáng mai htoq ló byùq ri.
36 Haû mù luî, shiwa byù bànshoq bang gi, gyai yhang maú byùq kômù, rayùq eq rayùq, “Shí yùq é dang gi, hkâsû é dang wá nghut lhê lhú? Yhang gi, ahkáng ayá èq le, wum-o bo é èq le, agè ashop é nàt pé lé hkunmó hkyó jáng, haú bang htoq ló byùq akô.” ga taî lhûm bum akô. 37 Haú hkûn, haú mau mâ é awui ayàm jowò hkangmó má jàm shoq, Yhâng é hkyô lé taî pyo hû ló bûm bekô nghut ri.
Yesuq Nòhpyo Lhoqgê Byî É Hkyô
38 Yesuq gi, haû târâjong mai toq ló mù, Simûn é yhûm má wang ló ri. Simûn é yhâng aûmó gi, alì gyai nyé no nyi é nghut mù luî, lhoqgê byí râ matú, Yesuq lé garúm dung byî akô. 39 Yesuq gi, Simûn é yhâng aûmó nàm má yàp to mù, nòhpyo haû lé tân kat jáng, Simûn é yhâng aûmó gi, ge ló byùq bê; haú hkûn jáng, yhang gi, toq mù, yhángmòq lé gaí tso gaí huq bê nghut ri.
40 Buì wang ló jáng, nòhpyo hui bang eq awáng nòhpyo ajung jung dàp é bang lhúnglháng lé, Yesuq chyáng shuî lé lô kômù, yhángmòq rayùq htâng rayùq é ahtoq má Yesuq gi, lòq ke byi luî, lhoqgê byî ri. 41 Nàt gâng pé gi, Yesuq lé, “Nàng gi, Garai Gasâng é Yhangzo nghut ri.” ga luî, wùt taí mù byù myo myô chyáng mai htoq ló byùq akô; Yesuq gi, Hkrisidùq nghut é hkyô lé, yhángmòq sé kô é yánmai, yhángmòq lé dang a wó taí loshoq, Yesuq tân pyâm ri.
42 Maubó lô jáng, Yesuq gi, htoq ló mù, gaû é jowò yòso hkaû má ê nyi tô ri; shiwa byu pé kúm gi, Yhang lé hkat hô kômù, myang hô kôjáng, yhángmòq chyáng mai a ló byùq râ matú châng hkûm wú akô. 43 Nghut kôlhang, Yesuq gi, “Garai Gasâng é mîngdán é gabú danglù lé, gówâ pé má le ngò hko kyo râ ashî, hau é matú, Garai Gasang gi, ngo lé nhang kat bê nghut lhê.” ga luî, yhángmòq lé taî ri. 44 Haû mù, Yesuq gi, Yuda mau mâ é târâjong pé má, hko kyô wún nyi ri.