YOHAN
é Gabú Danglù Laiká
(The Gospel of John)
Haû Mungdang, Xângzo Byù Gùng Lé Dùt É Hkyô
1
A-nham sânghi má, Mungdang jòq ri; Mungdang haû gi, Garai Gasang eq rahá nghut luî, haû Mungdang yhang Garai Gasang nghut ri.
Yohan 1:1-18
3 Nyì mî-nyì, jòq mîjòq gi, Yhang dông mai hpan tô é chyat nghut lhê; Yhang dông mai a hpan é gi, haî lháng a jòq nghut ri. 4 Chyungxe gi, Yhang má nghut lhê mù, chyungxe haû gi, byu pê é matú maubó nghut ri. 5 Haû maubó gi, mauchut má dùq bó byî nyì kôlhang, mauchut gi, haû lé a hàp yù nghut ri. 6 Garai Gasang mai nhang kat é, Yohan gâ é byù rayùq jé lé ri.
7 Yhang gi, maubó haû eq sêng é hkyô lé, sàksé hkám byi luî, yhâng é yánmai byù lhúnglhâng bang wó lùmjíng kó sháng gàq ga, sàksé rayùq dông jé lé é sû nghut ri. 8 Yhang gi, haû maubó a nghut; maubó haû lé sàksé hkám byi râ matú za shèq jé lé é ru nghut lhê. 9 Byù yùq jùp lé dùq bó byî é, maubó a-kyîng haû gi, mingkan htoq má jé nyi to bê.
10 Yhang gi, mingkan htoq má nyi to bê nghut ri; mingkan lé gi, Yhang dông mai hpan tô é nghut kôlhang, mingkan haû gi, Yhang lé a wú sé nghut ri. 11 Yhang gi, yhûmsîng mau má jé lé kôlhang, Yhâng é a-myû pé gi, Yhang lé a lhom hàp yù kó nghut ri. 12 Nghut kôlhang, Yhang gi, Yhang lé lhom hàp yù luî, Yhâng é myìng lé lùmjíng é bang lhúnglháng lé, Garai Gasâng é yhang zô pé dùt râ ahkáng byi bê nghut ri. 13 Haú bang gi, suisho dông hku kat é le a nghut, byù ô nau é dông hku kat é le a nghut, gùngsho ô nau é dông hku kat é le a nghut é za, Garai Gasâng chyáng mai hku kat é bang ru nghut lhê.
14 Haû Mungdang gi, xângzo byù gùng lé dùt luî, ngá-mòq chyáng nyi wú bê nghut lhê. Ngá-mòq gi, haû jeju eq tengmán hkyô byíng tô é, Yhâng é hpungwup shingkang lé myang wú bê nghut lhê; haû gi, haû Îwâ é zote rayùq dông, Yhang wó yu é hpungwup shingkang nghut ri.
15 Wuìmyhup Sará Yohan gi, Yhang eq sêng é hkyô lé sàksé hkâm é hkûn, garû taî é gi, “‘Ngá é htâng má jé lé é Sû gi, ngá é hí mai nyi to bê sû nghut é yánmai, ngá htoq je gyaú sû nghut ri.’ nghû, ngò taî é sû gi, shí yùq nghut bê.” gâ ri. 16 Yhâng é gúmjùp é jeju ahkaû mai, ngá-nhúng bànshoq bang gi, shimân jeju lé ralhûm htoq ralhum myang yu nyì bê nghut lhê. 17 Hkâsu mù gâ lé, haû jep é târâ gi, Mosheq é lòq dông mai byî é nghut lhê; jeju eq tengmán hkyô kúm gi, Yesuq Hkrisidùq é yánmai lé jòq é nghut lhê. 18 Garai Gasang lé, ó yùq èq le a myang wú wú é nghut lhê; nghut kôlhang, haû Îwâ é tanghkoí má lúng tô é, Yhang Zo zote gi, Garai Gasâng é gùng lé lhoqhtoq shit bê nghut ri.
Wuìmyhup Sará Yohan Hko Kyô É Hkyô
19 Yerusalem wà mó mâ é Yudaq byu pé gi, hkyangjông pé eq Lewiq byu pé lé, Yohan ó yùq nghut é hkyô myí nhang kat kô é hkûn, Yohan sàksé hkâm é gi, a‑ô mâ é hkyô pé nghut ri.
Yohan 1:19-34
21 Haú hkûn, yhángmòq gi, “Haû nghut jáng, nàng gi, ó yùq nghut lhê lhú? Nàng gi, Eliya lhú?” ga myi kôjáng, yhang gi, “A nghut.” ga taî ri. “Nàng gi, haû Myìqhtoi nghut lhê lhú?” ga dum myi kôjáng, yhang gi, “A nghut.” ga tû taî ri.
22 Haû mù, yhángmòq gi, “Ngá-mòq lé nhang kat bâng chyáng ló wó taî kyo râ matú, nàng gi, ó yùq nghut lhê lhú? Náng gûng lé nàng hkâsu nghu lhê lhú? Taî kyô wú làq.” ga dum myî akô.
23 Haú hkûn, Yohan gi, myìqhtoi Esai-a é dang eq rajung za, “Ngò gi, haû yòso má, ‘Yhûmsing é matú hkyô lhoqnyhang to keq.’ gâ é htê lé, garû taî é sû nghut lhê.”b ga tû taî ri.
24 Hparishe pé mai nhang kat é bang ra-am gi, yhang lé, 25 “Nàng gi, haû Hkrisidùq le a nghut, Eliya le a nghut, Myìqhtoi le a nghut é nhîng, haî mù luî, wuìmyhup hkám byî nyi lhê lhú?” ga dangmyi myî akô.
26 Haú hkûn, Yohan tû taî é gi, “Ngò gi, wui èq za wuìmyhup hkám byî lhê; nghut kôlhang, núngmòq a sê é sû rayùq núngmòq chyáng yàp tô ri. 27 Yhang gi, ngá htâng má lé é sû yùq nghut bê; ngò gi, Yhâng é hkyî-tsung tui lé hpyî râ lháng a gíngdán é nghut ri.” gâ ri.
28 Shí pé bànshoq gi, Yohan wuìmyhup hkám byî nyi é, Yodan làng hé hpoq mâ é Behtani wà má dùt é hkyô pé chyat nghut ri.
Yesuq Gi, Garai Gasâng É Sau Zo Nghut É Hkyô
29 Hau htang nyí, Yohan gi, yhâng chyáng Yesuq lé lo nyi é lé myàng luî, taî é gi, “Mingkan byu pê é yubàk mara lé yu pyám byî é Garai Gasâng é Sau zo lé, wú keq! 30 Shí yùq gi, ‘Ngá é htâng má jé lé é Sû gi, ngá é hí má nyì bê sû nghut é yánmai, ngá htoq je gyaú Sû nghut ri.’ nghû, ngò taî é sû yhang nghut bê. 31 Ngò gi, Yhang ó yùq nghut é lé a sê é nghut lhê, nghut kôlhang, Yhang lé, Isira-elaq byu pé wó sé kó sháng gàq nghû, ngò lé jé mù, wui èq wuìmyhup hkám byî nyi é nghut lhê.” gâ ri.
32 Hau htâng, Yohan sàksé hkâm é gi, “Haû Sô gi, mauhkûng mai hpûngkyui gùnghkyâng sû é dông mai gyó lé mù, Yhâng chyáng lé nô tô é lé, ngò myang ri. 33 Ngò gi, Yhang ó yùq nghut é lé a sê é nghut kôlhang, wui èq wuìmyhup hkám byi râ matú, ngo lé nhang kat é Sû, ngo lé taî kyô é gi, ‘Haû Sô gyó lé lô mù, ó yùq chyáng lé nô tô é lé, nàng myàng jáng, haú yùq gi, haû Chyoiyúng Sô má wuìmyhup hkám byi râ sû nghut lhê.’ gâ ri. 34 Haû eq rajung za ngò myàng bê nghut luî, shí yùq gi, Garai Gasâng é Yhangzo nghut lhê nghû, ngò sàksé hkâm lhê.” gâ ri.
Sânghi Lhê É Chángzô Pé
35 Hau htang nyí, Yohan gi, yhâng é chángzo í yùq eq rahá, haú má dum nyi tô akô.
Yohan 1:35-51
36 Haú hkûn, yhang gi, Yesuq laî ló nyi é lé myang kat jáng, “Hê, Garai Gasâng é sau zo lé, wú keq!” ga taî kat ri.
37 Chángzo haû í yùq gi, yhang haû su gâ é lé wó gyo kôjáng, Yesuq é htâng cháng bekô nghut ri. 38 Yesuq gi, lhing wú kat le, yhángnhik châng tô é lé myàng luî, “Núngnhik haî o akô lhú?” ga myi jáng, yhángnhik gi, “Rabai ê, Nàng hká má nyi lhê lhú?” ga taû myî kat akô nghut ri. (Rabai gâ é gi, Sará gâ é lichyúm nghut lhê.)
39 Haú hkûn, Yhang gi, “Lé keq, haû jáng, núngnhik myàng kôrâ nghut lhê.” ga tû taî ri.
(Haú u gi, raxê hkyíngc kô nghut ri.) Haû mù luî, yhángnhik gi, châng ê mù, Yhang hká má nyi é lé, ê myàng kôluî, haú nyí buìgyùm shoq, Yhang eq rahá ê nyi nyi akô nghut ri.
40 Yohan taî é dang lé wó gyo luî, Yesuq htâng châng é su nhik mâ é rayùq gi, Simun Petiruq é yhang gu Andire nghut ri. 41 Andire gi, yhang mang Simun lé hí myàng luî, “Ngá-nhik gi, Mesai‑a lé myàng bê.” ga yhang lé taî kyô ri. (Mesai‑a gâ é lichyúm gi, Hkrisidùq gâ é nghut lhê.) 42 Hau htâng, yhang gi, yhang mang lé Yesuq chyáng shuî e ri.
Yesuq gi, Simun lé lhom myàng jáng, “Nàng gi, Yohan é yhang zo Simun nghut ri; Kehpad gâ é myìng lé, nàng wó yû râ nghut lhê.” ga taî ri. (Kehpa gâ é lichyúm gi, Petiruq gâ é nghut lhê.)
Hpilip Eq Nahtanelaq Lé Hkyin Yu É Hkyô
43 Hau htang nyí, Yesuq gi, Galile mau shut ê râ matú, myìt hpyit yû bê nghut ri. Yhang gi, Hpilip lé myàng jáng, “Ngá htâng cháng aq.” ga taî ri.
44 Hpilip gi, Andire eq Petiruq nhik nyi é Bet‑saida wà mó mâ é byù nghut ri. 45 Yhang gi, Nahtanelaq lé myàng jáng, “Mosheq mai târâ laiká má kâ tô é eq myìqhtoî pé mai le lhoq-ang luî kâ tô é sû, Yosep é yhang zo, Nazaret wà byù Yesuq lé, ngá-mòq myàng bê.” ga yhang lé taî kyô ri.
46 Haú hkûn, Nahtanelaq gi, “Nazaret wà ô! Haû mai, ge é jung haî wá wó htoq lhê lhú?” ga myi jáng, Hpilip gi, “Ru lé wú aq.” ga yhang lé taî ri.
47 Yesuq gi, Yhâng chyáng Nahtanelaq lé lo nyi é lé myàng jáng, yhang lé lhoq-ang luî, “Wú keq, shí yùq gi, mhaû é myìt a bo é sû, Isira-elaq byù a-kyîng rayùq nghut ri.” ga taî ri.
48 Haú hkûn, Nahtanelaq gi, “Nàng, ngo lé hkâsu kut sê é lhú?” ga myi jáng, Yesuq gi, “Nang lé, Hpilip èq a wùt yù shi-má, nàng, hkohúm gâm ô má rû nyi tô ashî hkûn, Ngò, nang lé myàng bê nghut lhê.” ga tû taî ri.
49 Haû mù, Nahtanelaq gi, “Rabai ê, Nàng gi, Garai Gasâng é Yhangzo nghut ri; Nàng gi, Isira-elaq byu pê é Hkóhkâm le nghut ri.” ga taî ri.
50 Haú hkûn, Yesuq gi, “Ngò, nang lé, hkohúm gâm ô má myang é nghû taî kyô é yánmai, nàng lùmjíng lhê a nghut lhú? Hau htoq je kô é múzó pé lé, nàng myàng râ nghut lhê.” ga taî ri. 51 Hau htâng, Yesuq xoq taî é gi, “Ngò, núngmòq lé teng za taí kôlé, mauhkûng bóng lô luî, haû Byu Yhangzô ahtoq má, Garai Gasâng é maumang lagyô pé dòq ló gyó lô kut nyî kô é lé, núngmòq myàng kôrâ nghut lhê.” gâ ri.