Wuì Lé Tsibyiq Wing Dùt Nhang É Hkyô
2
Hau htâng, í nyí nghû râ nyí má, Galile mau mâ é Hkanaq wà mó má, myiháng poî ralhum jòq ri. Haû má, Yesuq é yhâng nu le, bo lom ri.
Yohan 2:1-12
2 Yesuq eq Yhâng é chángzô pé lé le, myiháng poî haû má ji akô nghut ri. 3 Tsibyiq wing jaú tûm to kô é hkûn, Yesuq é yhâng nu gi, “Yhángmòq, tsibyiq wing a wó lo kó nghut ri.” ga, Yesuq lé taî ri.
4 Haú hkûn, Yesuq gi, “Ânu ê,a haû, nàng gi, Ngò eq haî sêng lhê lhú? Ngá é ahkyíng a jé shî é nghut lhê.” ga tû taî ri.
5 Nghut kôlhang, Yhâng nu gi, haû duìnhâng zoshâng wuì lé, “Yhang haî taî le, haî kut keq.” ga taî ri.
6 Haú nàm má, í sum xê chyóng kô wang é lùqgòk wúng hkyuq cham jòq tô ri; haû gi, Yudaq byu pé mai, lhoqsan lhoqyúng hkîng é matú, chung é jung wúng nghut ri.
7 Yesuq gi, haû duìnhâng zoshâng wuì lé, “Wúng haú pé má wuì lhoqpyíng keq.” ga taî ri; haû mù, yhángmòq gi, wúng haú pé má byíng shoq shoq lhoqpyíng bekô nghut ri.
8 Hau htâng, Yhang gi, yhángmòq lé, “Ahkuî, ra-tsuí hkû yù mù, poî‑ùp lé yu ló byi keq.” ga taí jáng, yhángmòq gi, yu ló byî akô nghut ri.
9 Poî‑ùp hpó gi, wuì mai dùt é tsibyiq wing haû lé, shuq chyam wú ri; wuì hkam é duìnhâng zoshâng wuì gi, tsibyiq wing haû hká mai lo é hkyô lé sê to kôlhang, yhang gi, a sé nghut ri. Haû mù, yhang gi, lusik lé, ji yù luî, 10 “Yùq hkangmó gi, tsibyiq wing mún lé hí jaú mù, bíng pé shuq gyî bùm jáng shèq, tsibyiq wing a-pyâng lé ru yu htoq lhê; nghut kôlhang, nàng gi, nghâm é tsibyiq wing lé, ahkuî jé shoq wó hkong tô rî-nhung!” ga taî ri.
11 Galile mau mâ é Hkanaq wà mó má, Yesuq tûn shit é maúhpo alhô agàn gi, Yhang kut é maúhpo alhô agàn pé mâ é sânghî dàm nghut ri. Yhang gi, Yhâng é hpungwup shingkang lé, haú dông lhoqhtoq shit é nghut mù luî, Yhâng é chángzô pé gi, Yhang lé lùmjíng bum akô nghut ri.
Noqkuq Yhûm Lé Lhoq sansêng Pyâm É Hkyô
12 Hau htâng má, Yesuq gi, Yhâng nu, Yhang gu yùqzô pé eq Yhâng é chángzô pé le mù, Kaperina‑um wà má gyó ló ri; yhángmòq gi, haú má buìnyì myi ngo nyí nyi akô nghut ri.
13 Yudaq byu pê é Lhoqlhai Poî jé râ nghut é hkûn, Yesuq gi, Yerusalem wà mó má dòq ló ri.
Yohan 2:13-25
14 Haú hkûn, noqkuq yhûm wàng má, nojûng, sau, hpûngkyui pé lé ûng nyi é bang lé le, zègyap má ngùn htaí zô zung nyi é bang lé le, Yhang ló myang ri. 15 Haû mù, Yhang gi, tui lé, nhuq râ wase saî yù mù, bànshoq bang lé le, sau eq nojûng lé le, haû noqkuq yhûm wàng mai hkat htoq luî, ngùn htaí zo bâng é ngùn htingchap lé gi, tu hut pyám byi mù, yhángmòq é zègyap lé gi, tu mhuq pyám byî ri; 16 haû hpûngkyui ung zô é bang lé le, “Zè shi pé lé yu htoq ló keq! Ngá wâ é yhûm lé, wuìloq kut jowò hkâkut kó!” ga luî nhik-yô ri.
17 Haû mù, Yhâng é chángzô pé gi, “Ngò, Náng é yhûm lé chyitdàp kâng tuî é hkyô gi, Ngo lé myi su nyhê jôm pyám râ nghut lhê.”b ga kâ tô é lé, myìtbûn kat akô nghut ri.
18 Yudaq byu pé gi, Yhang lé, “Nàng, shí pé kut râ ahko ahkáng wó é hkyô lé sàksé tûn shit râ matú, ngá-mòq lé, haí jung maúhpo alhô agàn wó tûn shit râ lhú?” ga chôm myî akô nghut ri.
19 Haú hkûn, Yesuq gi, “Noqkuq yhûm shî lé núngmòq hpyoq pyám keq, sum nyí gyoro má, Ngò, haú lé dum tu shap râ nghut lhê.” ga, yhángmòq lé tû taî ri.
20 Haû Yudaq byu pé gi, “Noqkuq yhûm shî lé, myí xe hkyuq zân yhang saî é ru nghut lhê; sum nyí gyoro má za, Nàng wó tu shap râ lhú?” ga tû myî akô nghut ri. 21 Nghut kôlhang, Yesuq taî é noqkuq yhûm gi, Yhâng é gùng lé lhoq-ang luî taî é nghut ri. 22 Haû mù, Yhang, shi é mai lhoqdui toq huî é hkûn shèq, Yhâng é chángzô pé gi, Yhang haû su ga taî é dang lé myìtbun kômù, Chyúmdang lé le, Yesuq taî é dang pé lé le, lùmjíng akô nghut ri.
23 Haû Lhoqlhai Poî nghut é u lé, Yerusalem wà mó má Yesuq nyi nyi é hkûn, byù myo myo gi, Yhang kut shit é maúhpo alhô agàn pé lé myàng kômù, Yhang lé lùmjíng bum akô nghut ri. 24 Nghut kôlhang, Yesuq gi, byù lhúnglhâng bâng é myìt lé sê é yánmai, yhángmòq chyáng, Yhânggùng lé a àp to nghut ri. 25 Yhang gi, byu é i‑myìt ûnghkaû má haî lúng tô é lé sê é yánmai, byù yhangchang sàksé hkám byî é a ra nghut ri.