Yesuq, Yerusalem Wà Mó Má Wang E Ló É Hkyô
21
Yesuq eq Yhâng é chángzô pé gi, Yerusalem wà mó eq chyâng lo nyì kô é hkûn, Tsanlun bùm mâ é Bet-hpage wà má jé ló kôjáng, Yesuq gi, chángzo í yùq lé, 2 “Núngnhik, hí mâ é wà má ê keq; wà haú má, loze zîng radu lé, loze zo eq rahá tuî to láng é lé, ê myâng kôrâ nghut lhê; haú lé hpyi yù mù, Ngá chyáng she lò keq. 3 Byù rayùq yùq, núngnhik lé rajung jung gâ lò jáng, ‘Shî í du lé, haû Yhûmsîng chûng râ ri.’ gâ nghû tû taí keq; haû jáng, yhang, radá dâm nhâng byi râ nghut lhê.” ga Yesuq taí luî, nhang kat ri.“Zi-un byìzoa lé, shî su nghû keq, ‘Wú aq, náng é hkóhkâm gi,
nú nhâm é myìt eq loze htoq má ji mù, nghut bê, loze zo htoq má ji mù, náng chyáng lé lô bê nghut ri.’”b
gâ ri.
6 Haû chángzô nhik gi, e ló mù, Yesuq taî kat é eq rajung za ê kut bekô nghut ri. 7 Yhángnhik gi, lozê me lé she lò mù, yhángnhik é buhîng pé lé, haû loze mê é htoq má ke byi kôjáng, Yesuq gi, dòq jî ri. 8 Byù mòqmó mâ é myo myo gi, yhángmòq é buhîng lé, hkyô má hkyut hkang byî akô; ra-am gi, mhandíng pé lé zân hkyô yù mù, hkyô má hkang byî akô nghut ri. 9 Yhâng é hí má htâng má châng sô nyi bum é bang gi,
“Dawiq é Yhang zo gi, hosanac nghut nyî sháng gàq ô!”
“Haû Yhûmsing é myìng mai jé lé lo é Sû gi, hkungsô wó nyî sháng gàq ô!”d
“Htoq tsáng myhâng má, hosana nghut nyî sháng gàq ô!”
ga luî, taî garû bum akô nghut ri.
10 Yesuq, Yerusalem wà mó má wang ló é hkûn, rawà gón é bang gi, gabyông lo bùm kômù, “Shí yùq gi, ó wá nghut lhê lhâ?” ga luî, myî lhûm bum akô.
11 Haú hkûn, byù mòqmó gi, “Shí yùq gi, Galile mau, Nazaret wà byù Yesuq gâ é myìqhtoi nghut lhê.” ga taî akô nghut ri.
Yesuq Noqkuq Yhûm Lé Lhoq Sansêng Pyâm É Hkyô
12 Yesuq gi, noqkuq yhûm má wang ê mù, haú mâ é zè ung zè wuì kut nyi é bang bànshoq lé, hkat htoq pyám luî, ngùn htaí zo bâng é zègyap pé eq hpûngkyui ung zo bâng é tánghkuq pé lé, tu mhuq pyám byî ri. 13 Haú hkûn, Yhang gi, “‘Ngá yhûm gi, kyûdung yhûm ga râ nghut lhê.’e ga kâ to kôlhang, núngmòq gi, jowò shî lé ‘da-myàq hkyûng’f kut nyi akô.” ga, yhángmòq lé taî ri.
14 Yesuq, noqkuq yhûm má nyi tô é hkûn, myòqjìt bang eq hkyî hten bang Yhâng chyáng lé lô kômù, Yhang gi, haú bang lé lhom lhoqgê byî ri. 15 Nghut kôlhang, hkyangjong agyi pé eq târâ sará pé gi, Yhang kut é maúhpo múzó pé lé le, “Dawiq é Yhang zo gi, hosana nghut sháng gàq.” ga, noqkuq yhûm má zoshâng wuì garû nyi bùm kô é lé le, myàng kôjáng, wú nhik-yô bum akô nghut ri.
16 Haû mù, yhángmòq gi, “Zoshâng shí bang haî taî nyì kô é lé, Nàng wó gyô lhê lhú?” ga, Yesuq lé myi kôjáng, Yhang gi, “Wó gyô ri. Núngmòq gi,
‘Zoshâng wuì eq nyheqnú pê é nhut mai hkya-on kúngtôn râ matú, nàng lajâng to bê nghut ri.’g
ga kâ tô é lé, Chyúmdang má a nghap wú kó lhú?” ga yhángmòq lé taî ri.
17 Hau htâng má, Yhang gi, haú bang lé nyhi to luî, wà hkaû mai htoq ló mù, Behtani wà má ê jé luî, haú myîn, haú má bíng yu ri.
Hkohúm Gâm Nyhuî Kyuq Shi Byùq É Hkyô
18 Yhang gi, htang nàpkyó noq le, Yerusalem wà mó shut dum taû ló é hkûn, hkyô má zò-mut hui bê nghut ri. 19 Haû mù, Yhang gi, hkyô yàm má yùq tô é hkohúm gâm lé myang kat mù, chyâng e wú le, ahaq mai lai luî, haî lé le a myàng nghut ri. Haû mù, Yhang gi, shigâm haú lé, “Nàng má, hkâ-nhám le ashi a zui sháng gàq.” ga taî kat ri. Haú hkûn jáng, agàm haû gi, nyhuî kyuq shi ló byùq bê nghut ri.
20 Haû chángzô pé gi, haú lé myàng kôjáng, maú byùq kômù, “Hkohúm gâm shî gi, haî mù haû í hân nyhuî kyuq shi ló lhê lhâ?” ga myî akô.
21 Yesuq gi, “Ngò, núngmòq lé teng za taí kôlé, núngmòq, myìt gyàmkyô é hkyô a bo é za, lùmjíng kô é nghut le gi, hkohúm gâm má Ngò kut é múzó lé, núngmòq wó kut kôrâ nghut é htoq agó, bùm shî lé, ‘Htòt mù, wuimau má ló gyó wâng àq.’ ga taí jáng, taî é eq rajung za dùt râ nghut lhê. 22 Núngmòq, lùmjíng myìt èq dung kô é nghut jáng, haî dûng le le wó yû kôrâ nghut lhê.” ga tû taî ri.
Yesuq É Ahkáng Ayá Lé Myî Chyam É Hkyô
23 Yesuq gi, noqkuq yhûm wâng hkaû má wang ê mù, mhoqshit nyi é hkûn, hkyangjong agyi pé eq míngbyu é sûwún wuî gi, Yhâng chyáng lé jé kômù, “Hai ahko ahkáng èq, Nàng, shí pé lé kut nyi lhê lhú? Ahko ahkáng shî, Nang lé ó yùq byî é lhú?” ga myî akô.
24 Haú hkûn, Yesuq gi, “Ngò le, núngmòq lé rajung myî wú kôlé, núngmòq wó tû taí kô é nghut jáng, hai ahko ahkáng èq, Ngò, shí pé kut é hkyô lé taî kyo râ nghut lhê. 25 Yohan byî é baptisima gi, ó yùq é ahko ahkáng mai nghut lhê lhú? Mauhkûng mai lhú? A nghut jáng, byu chyáng mai lhú?” ga taû myî kat ri.
Haú hkûn, yhángmòq, chôm hpyê lhum kô é gi, “‘Mauhkûng mai nghut lhê.’ nghû, ngá-nhúng taí jáng le, ‘Haû nghut le nhîng, haî mù, yhang lé a lùmjíng kô é lhú?’ ga râ nghut. 26 ‘Byu chyáng mai nghut lhê.’ nghû jáng le, yhángmòq lhúnglhâng bang gi, Yohan lé, myìqhtoi rayùq ga lùmjíng bûm kô é nghut lhê yánmai, haú bang lé, ngá-nhúng gyùq râ lhê nghut.” gâ akô.
27 Haû mù, yhángmòq gi, Yesuq lé, “Ngá-mòq a sé.” ga tû taî akô.
Haú hkûn, Yesuq gi, “Haû jáng, Ngò le, hai ahko ahkáng èq shí pé kut é hkyô lé, núngmòq lé a taî kyo.” ga, yhángmòq lé taî ri.
Yùqzô Nhiktâng Lé Dangtú Yu É Hkyô
28 Yesuq xoq taî é gi, “Núngmòq hkâsu wó myìt akô lhú? Byù rayùq gi, yùqzo í yùq wó ri. Yhang gi, ko sû yùq chyáng ê mù, ‘Ngá zo ê, nàng, hkû-nyí tsibyiq hkyâm má mû ê zui aq.’ ga taí jáng, 29 yùqzo haû gi, ‘Ngò a kâm ê.’ ga tû taî ri; nghut kôlhang, htâng má, yhang gi, myìt dum lhîng mù, ê bê nghut ri.
30 Hau htâng, yhâng wa gi, yhang zo tiq sû yùq chyáng ê mù, rajung za ga ê dum taí jáng, yùqzo haû gi, ‘Ê râ, âwa!’ ga yín yû kôlhang, a ê kut ri.
31 Haú nhiktâng mâ é hká yùq shèq, yhâng wa ô nau é hkyô lé kut sû nghut ri lhú?” gâ ri.
Haú hkûn, yhángmòq gi, “Ko sû nghut ri.” ga tû taî akô.
Haû mù, Yesuq gi, yhángmòq lé, “Ngò, núngmòq lé teng za taí kôlé, hkán hkyuî bang eq shiwa myhî pé gi, Garai Gasâng é mîngdán má, núngmòq a wàng shi-má, wang ló nyi bùm kôrâ nghut lhê. 32 Hkâsu mù gâ le, Yohan gi, núngmòq chyáng lé jé mù, díngmán hkyô lé tûn shit kôlhang, núngmòq gi, yhang lé a jíng kut akô nghut ri; nghut kôlhang, haû hkán hkyuî bang eq shiwa myhî pé gi, yhâng dang lé jíng akô nghut ri. Núngmòq gi, haú hkyô lé myang é nghut kôlhang, myìt a lhîng kô é htoq agó, yhang lé a lùmjíng shi kó nghut ri.
Tsibyiq Hkyâm Saí Bang Lé Dangtú Yu É Hkyô
33 Gótû dangtú lé gyô wú shi keq; hkyâm yhûmsîng rayùq gi, tsibyiq hkyâm ralhum saî to mù, lhînghkyùq kyâm to luî, tsibyiq wing pyik htoq râ donghkong dû to mù, mâchya ralhum saî tô ri. Hau htâng, yhang gi, hkyâm haú lé, hkyâm saí zo bâng chyáng ngho byî to mù, gó-ming shut e ló byùq bê nghut ri. 34 Kyô shu yòq jé jáng, yhang gi, yhang eq sêng é tsibyiq shi ê yû râ matú, yhâng é duìnhâng zoshâng wuì lé, haû hkyâm saí zo bâng chyáng nhang kat ri.
35 Haû hkyâm saí zo bang gi, duìnhâng zoshâng wuì lé, lhom chyup yû kômù, rayùq lé gi, lhom nhuq bat, rayùq lé gi, lhom sat pyám, rayùq lé gi, lùqgòk èq lhom dú sat pyám, kut akô nghut ri. 36 Hau htâng má, yhang gi, hî dam lhê htoq je myo shoq gótû duìnhâng zoshâng wuì lé dum nhang kat le le, haû hkyâm saí zo bang gi, hí lhê bang lé su lhom dum kut akô nghut ri. 37 Ló htáng má, yhang gi, ‘Ngá zo lé gi, yhángmòq lhom hkúngga kôrâ nghut lhê.’ ga, yhang zo lé, haú bâng chyáng nhang kat ri.
38 Nghut kôlhang, haû hkyâm saí zo bang gi, yhang zo lé myàng kôjáng, ‘Shí yùq gi, silî wunlî sing yù râ sû nghut lhê; lé keq, yhang lé sat pyám mù, yhâng é silî wunlî lé yu pyám byi sháng.’ ga, rayùq eq rayùq taî lhûm bum akô nghut ri. 39 Haû mù, yhángmòq gi, yhang lé, chyup yû luî, hkyâm shinggan shut dú htoq kômù, sat pyám bekô nghut ri.
40 Haû mù luî, tsibyiq hkyâm yhûmsîng lé jé é hkûn lé, haû hkyâm saí zo bang lé hkâsu kut nhô ngam akô lhú?” ga Yesuq myî ri.
41 Haú hkûn, haû hkyangjong agyi pé eq sûwún wuî gi, “Haû agè ashop bang lé gi, agè ashop é dông sat pyám râ nghut lhê. Haû tsibyiq hkyâm lé gi, kyô shu yòq má, yhâng é gàmbùm lé byi râ bang lé, htòt ngho byî pyám râ nghut lhê.” ga, tû taî akô nghut ri.
42 Haû jáng, Yesuq dum taî é gi, “Chyúmdang má,
‘Yhûm saí bâng èq hkyin htoq pyâm é lùqgòk gi, htúngchyûn mâ é ahkyàk dìk é lùqgòk dùt bê.
Shí hkyô gi, haû Yhûmsîng kut é nghut luî, ngá-nhûng é myòq hí má maúhpo dùt bê nghut ri.’h
ga bo tô é lé, núngmòq a nghap wú kó lhú?
43 Haû mù, Ngò, núngmòq lé taí kôlé, Garai Gasâng é mîngdán lé, núngmòq chyáng mai yù mù, hau é ashi wó zui râ byùhú lé byî pyám râ nghut lhê. 44 Lùqgòk haú má gyó záng é sû gi, gyuî gyòp byùq râ nghut lhê. Lùqgòk hau èq gyó nhê záng é sû le, nhê pyeq pyâm é hui râ nghut lhê.” gâ ri.
45 Hkyangjong agyi pé eq Hparishe pé gi, haû Yesuq taî é dangtú pé lé wó gyo kôjáng, yhángmòq lé taî nyi é hkyô lé, sê gyô akô nghut ri. 46 Haû mù, yhángmòq gi, Yhang lé chyup yû râ hkyô ho nyi akô; nghut kôlhang, byu pé gi, Yhang lé, myìqhtoi rayùq ga myìt lum to kô é yánmai, yhángmòq gi, haú bang lé gyùq akô nghut ri.