Tsibyiq Hkyâm Mû Zui Bang Lé Dangtú Yu É Hkyô
20
Hkâsu mù gâ le, mauhkûng mîngdán gi, yhûmsing é tsibyiq hkyâm má mû zui nhâng râ langchyáng ê lûng râ ga, nàpsûn noq le htoq e ló é hkyâm yhûmsîng eq du ri. 2 Yhang gi, ra-nyí é matú denari rachap byi râ dông, haú bang eq myìt huî yù mù, yhángmòq lé, yhâng é tsibyiq hkyâm má nhang hâng kat ri.3 Nàpkyó gau hkyínga kô má, yhang gi, htoq e ló le, hai mû le a kut é za, gaì má yàp tô é bang ra-am lé ê myang ri. 4 Haû mù, yhang gi, haú bang lé, ‘Núngmòq le, ngá é hkyâm má mû ê zui keq; byi âng é ahpau, ngò, núngmòq lé byi râ nghut lhê.’ ga taí jáng, yhángmòq gi, e ló bekô nghut ri.
5 Hau htâng, yhang gi, raxe í hkyíng má le, myínhtâng sum hkyíng kô má le, dum htoq ê mù, haû eq rajung za langchyâng pé ê lung kat ri. 6 Myínhtâng ngo hkyíng kô má, yhang dum htoq e ló wú le, góbang ra-am le yàp tô bum é lé, ê myâng mù, haú bang lé, ‘Núngmòq gi, haî le a kut é za, ra-nyí buî haî mù shî má yàp tô bum akô lhú?’ ga myi jáng, 7 haú bang gi, ‘Ngá-mòq lé, ó yùq èq le a lùng kô é yánmai nghut lhê.’ ga tû taî akô.
Haú hkûn, yhang gi, ‘Núngmòq le, ngá é hkyâm má mû ê zui keq.’ ga taî ri.
8 Myínhtâng jé jáng, tsibyiq hkyâm yhûmsîng gi, yhâng é mû shuî u sû lé, ‘Haû langchyâng pé lé ji yù mù, je htâng má lung yu é bang mai hî luî, sânghi lung yu é bang jé shoq, mû zui hpau byi aq.’ ga taî ri.
9 Myínhtâng ngo hkyíng má mû wàng bang le, denari rachap chap wó yu bum akô. 10 Haû mù, je hí má mû wàng bang gi, yhángmòq je myo wó nhô ngam akô. Nghut kôlhang, yhángmòq le, rayùq denari rachap chap za wó akô nghut ri. 11 Yhángmòq gi, haú myhó za wó yu bùm kô é yánmai, haû hkyâm yhûmsîng lé, 12 ‘Shí bang gi, je htâng má mû lé wâng mù, hkyíng hkum rahkum za mû zui kôlhang, nàng gi, ra-nyí buìgyùm chap buì htân yò má mû zuî é bang ngá-mòq eq rajung za byî ri.’ ga mara hûn dang taî akô.
13 Nghut kôlhang, haû hkyâm yhûmsîng gi, haú bang mâ é rayùq lé, ‘Buìnùm hpó ê, ngò, nang lé a târâ é dông kut é a nghut. Denari rachap byi râ nghû, nàng eq ngò myìt huî to bê a nghut lhú? 14 Nàng wó âng é lé yu chûng mù, ló aq. Je htâng má mû lé wang é sû lé le, nang lé byî é myhó, ngò byí nau ri. 15 Ngá é ngùn lé, ngò kut nau é su a ge kut lhú? Ngò, ge é kut le, nàng manôn ri lhú?’ ga taî ri.
16 Haû mù luî, htâng gyó nyî bang gi, hí bekô râ nghut mù, hí nghut nyî bang gi, htâng gyó byùq kôrâ nghut lhê.” gâ ri.
Yesuq Yhang Shî Râ Hkyô Lé Dum Taî É Hkyô
17 Ahkuî, Yesuq gi, Yerusalem wà mó shut dòq ló nyi é u lé, haû chángzo raxe í yùq lé, gótû kut wùt yù mù, 18 “Ngá-nhúng gi, Yerusalem wà mó shut dòq ló nyi lhê; haû Byu Yhangzo gi, hkyangjong agyi pé eq târâ sará pê é lòq má àp byî pyâm é hui râ nghut lhê; haú bang gi, Yhang lé, shî râ mara byi kôrâ nghut é htoq agó, 19 jóng pyâm é, nhuq bàt é eq tapzîng má jén sat pyâm é hui râ matú, haû tûngbaù pê é lòq má àp pyám kôrâ nghut lhê. Nghut kôlhang, Yhang gi, sum nyí nghû râ buìnyì má, lhoqdui toq é dum hui râ nghut lhê.” ga taî ri.
Zô Nhik Matú Înu Èq Dung Byî É Hkyô
20 Hau htâng má, Zebedi é yhang zô nhiktang é yhâng nu gi, yhang zô nhik eq rahá jé lé lô kômù, rajung dung râ matú, Yesuq é hí má hkyîhput htuq nyi ri.
21 Haû mù, Yesuq gi, “Nàng, haî ô nau ri lhú?” ga yhang lé myi jáng, yhang gi, “Náng é mîngdán má, shî ngá zô nhiktâng lé, Náng é lòqyò hkyam má rayùq, lòqpaî hkyam má rayùq kut, zùng râ ahkáng byi laq.” ga taî ri.
22 Haú hkûn, Yesuq gi, “Núngnhik haî dûng nyi é lé, núngnhik a sé kó nghut ri. Ngò shuq râ gómb lé, núngnhik wó shuq kôrâ lhú?” ga myi jáng, yhángnhik tâng gi, “Wó shuq lhê.” ga tû taî akô nghut ri.
23 Haû mù, Yesuq gi, yhángnhik lé, “Ngò shuq râ góm lé, núngnhik shuq ra kôrâ za nghut lhê. Nghut kôlhang, Ngá é lòqyò, lòqpaî hkyam má zùng râ ahkáng lé gi, Ngò byî jung a nghut. Jowò haú pé gi, Ngá wa hen to byi bâng é matú za ru nghut lhê.” ga taî ri.
24 Gótû chángzo raxê yùq gi, haú hkyô lé wó gyo kôjáng, haú nhiktâng lé nhik-yô akô nghut ri. 25 Haû mù, Yesuq gi, yhángmòq bànshoq bang lé wùt tsîng yù luî, “Tûngbaù pé lé ùphkang é ga bang gi, tûngbaù pé lé ùp zô nyì kô é hkyô lé le, haû eq rajung za, yhángmòq é ming ùp sûwún wuî le, yhûmsing é ahkáng ayá lé chûng mù, ùp zô nyì kô é hkyô lé le, núngmòq sê lhê. 26 Núngmòq chyáng gi, haû su a dùt kó sháng gàq; haû Byu Yhangzo lháng gi, dójaú é lé hkam yù râ matú jé lé é a nghut é za, dójaú râ matú eq byù myo myô é matú, shîhtaí gùnglik hkungga dông, Yhâng é chyungxe lé byî pyám râ matú shèq, jé lé é ru nghut é su, 27 núngmòq má, byù mó dùt naù sû ó yùq nghut kôle, núngmòq é duìnhâng zoshâng dùt ra râ nghut lhê. 28 Hau htoq agó, núngmòq má ushuq dùt naù sû ó yùq nghut kôle, núngmòq é jùn dùt ra râ nghut lhê.” ga taî ri.
Myòqjìt Í Yùq Myòq Dum Myang É Hkyô
29 Yesuq eq Yhâng é chángzô pé gi, Yerihko wà mó mai htoq ló nyî kô é hkûn, byù mòqmó gi, yhángmòq é htâng má châng e ló bum akô. 30 Haû hkyô yàm má zung tô é myòqjìt í yùq gi, Yesuq laî ló nyi é hkyô lé wó gyo kôjáng, “Dawiq é Yhang zo, Yhûmsîng ê, ngá-nhik lé shogyô yù làq ô!” ga, wùt garû kat akô nghut ri.
31 Byù mòqmó gi, yhángnhik zîm byùq râ matú tân hkúm kôlhang, yhángnhik gi, “Dawiq é Yhang zo, Yhûmsîng ê, ngá-nhik lé shogyô yù làq ô!” ga, je riyhang htê mó èq wùt garû kat akô nghut ri.
32 Haû mù, Yesuq gi, yàp kat mù, “Ngò, núngnhik lé haî kut byi râ ô nau akô lhú?” ga, yhángnhik lé wùt myî kat ri.
33 Haú hkûn, yhángnhik gi, “Yhûmsîng ê, ngá-nhik myòq myàng nau ri.” ga tû taî akô.
34 Yesuq gi, yhángnhik lé wú shogyo luî, yhángnhik é myòqjí má ê záng byî ri. Haú hkûn jáng, yhángnhik gi, myòq wó myâng kômù, Yhâng htâng cháng bekô nghut ri.