Myi, Làng Gâng É Hkyô
10
Hau htâng má, Yesuq gi, Kaperina‑um mai htoq ló mù, Yuda mau mâ é maukyo má ê jé luî, Yodan làng tû-tap má dàp ló bê nghut ri; byù myo myo gi, Yhâng chyáng dum zîng lé lô kôluî, Yesuq gi, Yhang lhaq kut nyi é eq rajung za, haú bang lé mhoqshit byî ri.2 Hparishe pé ra-am gi, lé jé kômù, “Byù rayùq, yhûmsing é yhang myi lé lhoqkâng pyâm le, târâ wang lhê lhú?” ga myî é dông, Yhang lé chyam wú akô.
3 Yesuq gi, “Mosheq, núngmòq lé, hkâsu ga hkunmó hkyô tô é lhú?” ga taû myî ri.
4 Haú hkûn, yhángmòq gi, “Yùqgè rayùq gi, lhoqkang laiká ká mù, yhang myi lé wó nhang pyâm lhê ga, Mosheq, ahkáng byî tô ri.” ga tû taî akô.
5 Yesuq dum tû taî é gi, “Núngmòq é myìt nhiklhum htân kô é yánmai, Mosheq gi, târâ haú lé kâ tô é nghut lhê. 6 Nghut kôlhang, mau htoq xâng hkun lé, ‘Garai Gasang gi, yùqgè eq myiwe lé hpan é nghut lhê.’a 7 ‘Hau é yánmai, yùqgè gi, yhûmsing înu îwâ chyáng mai htoq luî, yhang myi eq rahá rading ralhum za kut nyî mù, 8 yhángnhik gi, gùngsho ralhum za dùt byùq kôrâ nghut lhê.’b Haû mù luî, yhángnhik gi, í yùq a nghut lô é za, rayùq za dùt bê nghut ri. 9 Haû mù luî, Garai Gasang lhoqtsûm tô é lé, byù gi, a lhoqkang sháng gàq.” gâ ri.
10 Yhúmhkaû má, yhángmòq nyi tô é hkûn lé, chángzô pé gi, haú hkyô eq séng luî, Yhang lé dum saî myî akô. 11 Haú hkûn, Yhang gi, “Yhûmsing é yhang myi lé kâng pyám mù, myiwe gótû dum hâng yu é sû ó yùq nghut kôle, su-myi lú é sû dùt bê nghut mù, yhang myi lé shut é sû nghut bê. 12 Myiwe rayùq le, yhûmsing é yhang lâng lé kâng pyám mù, yùqgè góyùq eq dum hâng é nghut le gi, sulàng lú é hkyô lé kut bê nghut ri.” ga tû taî ri.
Zoshâng Wuì Eq Yesuq É Hkyô
13 Byu pé gi, zoshâng wuì lé Yesuq záng byi sháng gàq ga, Yesuq chyáng shuî lé lo akô; nghut kôlhang, chángzô pé gi, yhángmòq lé lhom tân hkûm akô nghut ri. 14 Haû lé Yesuq myàng jáng, Yhang gi, wú nhik-yo naû luî, “Haû zoshâng wuì lé, Ngá chyáng lé nhâng keq; yhángmòq lé hkâhkûm zing to kó; hkâsu mù gâ le, Garai Gasâng é mîngdán gi, haû sû é bâng é mîngdán ru nghut lhê. 15 Ngò, núngmòq lé teng za taí kôlé, ó yùq nghut kôle, Garai Gasâng é mîngdán lé, zoshâng su kut a lhom hàp yu é nghut le gi, mîngdán haú má wó wâng râ a nghut.” ga yhángmòq lé taî ri. 16 Hau htâng, Yesuq gi, zoshâng wuì lé bún yû mù, yhángmòq ahtoq má lòq ke luî, shimân byî ri.
Sùt Wó É Zorâm Rayùq É Hkyô
17 Yesuq gi, hkyô dum sô xoq e ló é hkûn, byù rayùq gi, din lé lô mù, Yhâng é hí má hkyîhput htuq luî, “Ge é Sará ê, ahtum abyùq é chyungxe wó yû râ matú, ngò haî kut ra râ lhú?” ga myî ri.
18 Haû mù, Yesuq gi, “Haî mù, Ngo lé ge é Sará nghu lhê lhú? Garai Gasang mai lai luî, ge é ó yùq le a nyì. 19 Jep é târâ má, ‘Byù hkâsat, su-myi sulàng hkâlú, hkâhkau, a teng a mán é sàksé hkâhkám, hkâmô zo, náng nu náng wa lé hkúngga hpautap aq!’c ga bo tô é lé, nàng sê lhê.” ga tû taî ri.
20 Haú hkûn, haú yùq gi, “Sará ê, haú pé bànshoq lé, ngò, zoshâng hkûn mai cháng bê nghut lhê.” ga taî ri.
21 Yesuq gi, haú yùq lé wú tsuq to mù, yhang lé chyitdàp luî, taî é gi, “Nàng kut râ rajung râ tô ashî; ló mù, nàng wó mîwó lé ûng pyám luî, myùng bang lé byî pyám aq; haû jáng, nàng, mauhkûng htoq má sùtzè wó râ nghut lhê; haû mù, Ngá htâng lé cháng aq.” gâ ri.
22 Haú yùq gi, dang haú lé wó gyo jáng, sùtzè gyai wó sû nghut é yánmai, myòqdong shum byùq mù, gyai yhang myìt a ngón é èq ló byùq bê nghut ri.
23 Yesuq gi, lhînghkyùq byu wú mù, Yhâng é chángzô pé lé, “Sùtzè wó bang gi, Garai Gasâng é mîngdán má wàng râ matú, haû í yhang wuî rî-nhung!” ga taî ri.
24 Chángzô pé gi, Yhang taî é dâng é yánmai, maú hong bum akô nghut ri. Nghut kôlhang, Yesuq dum xoq taî é gi, “Zo wuî ê, Garai Gasâng é mîngdán má wàng râ matú, haû í yhang wuî rî-nhung! 25 Sùtzè wó sû rayùq, Garai Gasâng é mîngdán má wó wâng râ htoq, gola-uk radu âpno mai wó wang lai râ gi, je luì râ nghut lhê.” ga taî ri.
26 Haú hkûn, chángzô pé gi, je riyhang maú byùq kômù, rayùq eq rayùq, “Haû su ru nghut le gi, ó yùq za hkyi yu é hui râ nghut lhê lhú?” ga, taî lhûm bum akô nghut ri.
27 Haú hkûn, Yesuq gi, yhángmòq lé wú kat mù, “Haú hkyô lé, byù mai gi, wó kut râ a nghut; nghut kôlhang, Garai Gasang gi, wó dùt lhê; hkâsu mù gâ le, Garai Gasang gi, lhúnglháng lé wó kut é Sû nghut lhê.” ga taî ri.
28 Haú hkûn, Petiruq gi, Yhang lé, “Ngá-mòq gi, wó é gû lhúnglháng lé tô pyâm to luî, Náng htâng cháng bê nghut lhê.” ga taî ri.
29 Haû mù, Yesuq tû taî é gi, “Ngò, núngmòq lé teng za taí kôlé, Ngá é yánmai le, gabú danglu é yánmai le, yhûmsing é yhûm, gu-mang gu-nhá, înu îwa, zodù wuì eq yò pé lé tô pyâm tô é sû ó yùq nghut kôle, 30 shí pyàt lhê é yhûm pé, gu-mang gu-nhá wuî, înu pé, zodù wuì eq yò pé lé, rashô tú wó hkam yù luî, zing-rî é hkyô pé lé le hui kôrâ nghut é htoq agó, htang pyàt má le, ahtum abyùq é chyungxe wó yû râ nghut lhê. 31 Nghut kôlhang, hí nghut nyi é bang myo myo gi, htâng gyó byùq kôrâ nghut mù, htâng gyó nyì bang yùq gi, hí bekô râ nghut lhê.” gâ ri.
Yesuq, Yhang Shî Râ Hkyô Lé Dum Taî É Hkyô
32 Yhángmòq gi, Yerusalem wà mó shut dòq ló nyî kô é u lé, Yesuq gi, yhángmòq é hí má sô tô ri; haú hkûn, htâng má sô é bang gi, gyùq nyi bùm kô é u lé, haû chángzô pé gi, maú byùq bum akô nghut ri; Yesuq gi, haû chángzo raxe í yùq lé gótû kut dum wùt yù mù, Yhâng chyáng dùt lò râ hkyô, yhángmòq lé taî kyô é gi, 33 “Wú keq, ngá-nhúng gi, Yerusalem wà mó shut dòq ló nyi lhê; haû Byu Yhangzo gi, hkyangjong agyi pé eq târâ sará pê é lòq má àp byî pyâm é hui râ nghut lhê; haú bang gi, Yhang lé, shî râ mara byi luî, tûngbaù pê é lòq má àp byî pyám kôrâ nghut lhê. 34 Haú bang gi, Yhang lé, wuìzuì kut pyâm é, sôkan byé gyûn é, nhuq bàt é kut yû mù, sat pyám kôrâ nghut lhê. Hau htâng sum nyí má, Yhang dum dui toq lô râ nghut lhê.” gâ ri.
Yakuq eq Yohan Nhik dûng é hkyô
35 Hau htâng má, Zebedi é yhang zo Yakuq eq Yohan nhik gi, Yesuq chyáng lé kômù, “Sará ê, ngá-nhik dûng é gû bànshoq, Nàng kut byi râ lé, ngá-nhik ô nau ri.” ga taî akô.
36 Haú hkûn, Yhang gi, “Ngò, núngnhik lé haî kut byi râ ô naû akô lhú?” ga myî ri.
37 Yhángnhik gi, “Náng é hpungwup shingkang hkaû má, ngá-nhik tâng lé, Náng é lòqyò hkyam má rayùq, lòqpaî hkyam má rayùq kut, zùng nhâng laq.” ga tû taî akô.
38 Nghut kôlhang, Yesuq gi, “Núngnhik haî dûng nyi é lé, núngnhik a sé kó nghut ri. Ngò shuq râ gómd lé, núngnhik wó shuq kôrâ lhú? Ngò hkam yù râ baptisima lé, núngnhik wó hkam yù kôrâ lhú?” ga yhángnhik lé tû taî ri.
39 Haú hkûn, yhángnhik gi, “Ngá-nhik wó dùt lhê.” ga tû taí kôjáng, Yesuq gi, “Ngò shuq râ góm lé, núngnhik shuq kôrâ nghut lhê; ngò hkam yù râ baptisima lé le, núngnhik hkam yù kôrâ nghut lhê. 40 Nghut kôlhang, Ngá é lòqyò, lòqpaî hkyam má zùng râ ahkáng lé gi, Ngò byî jung a nghut. Jowò haú pé gi, hen to byî é hui bâng matú za nghut lhê.” ga yhángnhik lé taî ri.
41 Haû su gâ é hkyô lé, haû gótû chángzo raxê yùq wó gyo kôjáng, yhángmòq gi, Yakuq eq Yohan nhik lé nhik-yô akô nghut ri. 42 Yesuq gi, yhángmòq bànshoq bang lé wùt tsîng yù luî, “Tûngbaù pé lé ùphkang é ga bang gi, tûngbaù pé lé ùp zô nyì kô é hkyô lé le, haû eq rajung za, yhángmòq é ming ùp sûwún wuî le, yhûmsing é ahkáng ayá lé chûng mù, ùp zô nyì kô é hkyô lé le, núngmòq sê lhê. 43 Nghut kôlhang, núngmòq chyáng gi, haû su a dùt kó sháng gàq, núngmòq má, byù mó dùt naù sû ó yùq nghut kôle, núngmòq é duìnhâng zoshâng dùt ra râ nghut lhê. 44 Hau htoq agó, núngmòq má ushuq dùt naù sû ó yùq nghut kôle, bànshoq bâng é jùn dùt ra râ nghut lhê. 45 Hkâsu mù gâ le, haû Byu Yhangzo lháng gi, dójaú é lé hkam yù râ matú jé lé é a nghut é za, dójaú râ matú eq byù myo myô é matú, shîhtaí gùnglik hkungga dông, Yhâng é chyungxe lé byî pyám râ matú shèq, jé lé é ru nghut lhê.” ga, yhángmòq lé taî ri.
Myòqjìt Sû Barateme, Myòq Dum Myang É Hkyô
46 Hau htâng, yhángmòq gi, Yerihko wà má jé ló akô nghut ri. Yesuq eq Yhâng é chángzô pé gi, byù mòqmó eq rahá, wà mai htoq ló nyî kô é hkûn, Barateme (Teme é yhang zo) gâ é myòqjìt sû rayùq gi, hkyô yàm má dung zô zung tô ri. 47 Yhang gi, Nazaret wà byù Yesuq laî ló é lé wó gyo jáng, “Dawiq é Yhang zo Yesuq ê, ngo lé shogyô yù laq ô!” ga garû kat ri.
48 Haû mù, byù myo myo gi, zim za nyì râ matú yhang lé tân hkûm akô; nghut kôlhang, yhang gi, “Dawiq é Yhang zo ê, ngo lé shogyô yù laq ô!” ga, je riyhang garû kat ri.
49 Haû mù luî, Yesuq gi, yàp nô kat mù, “Yhang lé ji kat keq.” ga taí jáng, yhángmòq gi, “Myìt ngón àq hkoi; Yhang, nang lé ji nyi ri; toq àq.” ga myòqjìt sû haû lé taî akô. 50 Haú hkûn, haú yùq gi, yhâng é buhîng lé hkyut pyám mù, byam chyu luî, Yesuq chyáng lé jé ri.
51 Yesuq gi, yhang lé, “Ngò, nang lé haî kut byi râ ô nau ri lhú?” ga myi jáng, yhang gi, “Sará ê, ngò myòq myàng nau ri.” ga tû taî ri.
52 Yesuq gi, “Ló aq hkoi, náng é lùmjíng myìt gi, nang lé lhoqgê byi bê nghut ri.” ga taî kat é hkûn jáng, yhang gi, myòq wó myâng mù, Yesuq e ló é hkyô shut cháng e ló bê nghut ri.