Yesuq, Yerusalem Wà Mó Má Wang Ló É Hkyô
11
Yesuq eq Yhâng é chángzô pé gi, Yerusalem wà mó eq chyâng lo nyì kô é hkûn, Tsanlun bùm mâ é Bet-hpage wà eq Behtani wà má jé ló kôjáng, Yesuq gi, Yhâng é chángzo í yùq lé, 2 “Núngnhik, hí mâ é wà má ê keq; wà haú má wang é hkûn jáng, ó le a jî wú shî é loze zo tuî to láng é lé, ê myâng kôrâ nghut lhê; haú lé hpyi yù mù, Ngá chyáng she lò keq. 3 Byù rayùq yùq mai, ‘Haî mù, haû su kut nyi akô lhú?’ ga núngnhik lé lhom myi jáng, ‘Shí du lé, haû Yhûmsîng râ ri ga, razùp má dum taû dé byi râ nghut lhê.’ nghû tû taí keq.” ga pyîng luî, nhang kat ri.4 Haú nhik gi, e ló mù, hkyô mó yâm mâ é hkúmdong nàm má tuî tô é loze zo radu lé, ê myâng kôluî, haú lé tui hpyi nyi akô. 5 Haú hkûn, haú má yàp tô é bang ra-am gi, “Haî mù, loze tui hpyi nyi akô lhú?” ga myî akô. 6 Haû jáng, yhángnhik gi, Yesuq pying kat é eq rajung za taî kyo kôjáng, yhángmòq gi, she ló râ ahkáng byî kat akô nghut ri. 7 Yhángnhik, loze zo haû lé Yesuq chyáng she jé lo é hkûn, loze hau é gùng htoq má, yhángmòq é buhîng pé lé zùngnhe kut byi jáng, hau é ahtoq má, Yesuq dòq jî ri. 8 Byù myo myo gi, yhángmòq é buhîng pé lé, hkyô má hkyut hkang byî akô; ra-am gi, yò pé má zân yu é mhandíng lé hkang byî akô nghut ri. 9 Hí má so bang eq htâng má châng é bang gi,
“Hosana!a
Haû Yhûmsing é myìng mai jé lé lo é Sû gi, hkungsô wó nyî sháng gàq ô!
10 Jé lé lô râ nghut é, ngá-nhûng é îwa Dawiq é mîngdán gi, hkungsô wó nyî sháng gàq ô!
Htoq tsáng myhâng má hosana nghut sháng gàq ô!”b
ga luî, taî garû bum akô nghut ri.
11 Yesuq gi, Yerusalem wà mó má jé mù, noqkuq yhûm má wang ê luî, lhînghkyùq mâ é jung hkangmó lé wú ri; nghut kôlhang, buì gyum ló bê nghut é yánmai, Yhâng é chángzo raxe í yùq eq rahá, Behtani wà shut htoq e ló bekô nghut ri.
Hkohúm Gâm Ashi A Zui Râ Matú Taî É Hkyô
12 Hau htang nyí, yhángmòq, Behtani wà mai htoq ló kô é hkûn, Yesuq gi, zò-mut bê nghut ri. 13 Yhang gi, ahaq wúm é hkohúm gâm ragàm lé, we we mai byu-myang kat jáng, agàm haú má ashi zuî lhê làq ga ê jé wú le, ahaq mai lai luî, haî le a myàng nghut ri. Haî mù gâ le, hkohúm-shi zui yâm a nghut é yánmai nghut ri. 14 Haû mù, Yesuq gi, shigâm haû lé, “Ahkuî mai gi, náng chyáng mâ é ashi, ó yùq le a myàng zo lo kó sháng gàq.” ga taî ri. Yhâng é chángzô pé gi, haû su ga taî é dang lé wó gyô yu akô nghut ri.
Yesuq, Noqkuq Yhûm Lé Lhoq Sansêng Pyâm É Hkyô
15 Yhángmòq, Yerusalem wà mó má jé é hkûn, Yesuq gi, noqkuq yhûm má wang ê mù, haú mâ é zè ung zè wuì kut nyi é bang lé, hkat htoq pyám luî, ngùn htaí zo bâng é zègyap pé eq hpûngkyui ung zo bâng é tánghkuq pé lé tu mhuq pyám byî ri. 16 Hau htoq agó, Yhang gi, ó yùq lé nghut kôle, ung zê lé noqkuq yhûm mai a wàq lai nhâng kut pyâm ri. 17 Yesuq, yhángmòq lé mhoqshit é gi,
“‘Ngá yhûm gi, byù myû lhúnglhâng bâng é matú, kyûdung yhûm ga râ nghut lhê.’c
ga kâ tô é a nghut kó lhú? Nghut kôlhang, núngmòq gi, ‘da-myàq hkyûng’ kut pyám bekô nghut ri.” gâ ri.d
18 Hkyangjong agyi pé eq târâ sará pé gi, haú lé wó gyo kômù, Yhang lé hkâsu kut wó sat pyám râ hkyô ho nyi akô; nghut kôlhang, shiwa byu pé gi, Yhang mhoqshit é hkyô má, myìt zìng zùq bùm kô é yánmai, yhángmòq gi, Yhang lé gyùq bum akô nghut ri.
19 Myínhtâng jé jáng, Yesuq eq Yhâng é chángzô pé gi, wà hkaû mai htoq ló bekô nghut ri.
Hkohúm Gâm Nyhuî Shi Byùq É Hkyô
20 Htang nàpkyó, yhángmòq sô laî ló le, hkohúm gâm gi, a-myìt mai yhang nyhuî kyuq shi byùq é lé myang akô. 21 Petiruq gi, myìtbûn kat luî, “Rabai ê, wú aq! Nàng nhîng pyâm é hkohúm gâm gi, nyhuî shi byùq bê nghut ri.” ga luî, Yesuq lé taî ri.
22 Haú hkûn, Yesuq gi, “Garai Gasang lé lùmjíng keq. 23 Ngò, núngmòq lé teng za taí kôlé, ó yùq nghut kôle, i‑myìt má uq-ô é hkyô a bo é za, yhûmsîng taî é hkyô gi, dùt lò râ nghut lhê ga lùmjíng kô é nghut le gi, bùm shî lé, ‘Htòt mù, wuimau má ló gyó wâng aq.’ ga taî le lháng, haú hkyô dùt byi râ nghut lhê. 24 Haû mù luî, Ngò, núngmòq lé taí kôlé, núngmòq haî dûng le le wó yû râ nghut lhê nghû lùmjíng kô é nghut le gi, wó yû kôrâ za nghut lhê. 25 Mauhkûng htoq mâ é núngmòq é Îwa gi, núngmòq é mara lé hkyut pyám byi sháng gàq, núngmòq gi, kyûdûng yàp tô é hkûn lé, rayùq yùq, núngmòq lé shut é mara bo é nghut jáng, mara hkyut pyám byi keq. 26 (Nghut kôlhang, núngmòq mai mara a hkyut pyám byî é nghut le gi, mauhkûng htoq mâ é núngmòq é Îwa le, núngmòq é mara lé hkyut pyám byi râ a nghut.)” ga tû taî ri.e
Yesuq É Ahko Ahkáng Lé Myî Chyam É Hkyô
27 Yhángmòq, Yerusalem wà mó má dum jé mù, Yesuq gi, noqkuq yhûm wàng hkaû má sô yông wún é u lé, hkyangjong agyi pé, târâ sará pé eq sûwún wuî gi, Yhâng chyáng lé jé kômù, 28 “Hai ahko ahkáng èq, Nàng, shí pé lé kut nyi lhê lhú? Haû su kut râ ahko ahkáng, Nang lé ó yùq byî é lhú?” ga myî akô.
29 Haû jáng, Yesuq gi, “Ngò le, núngmòq lé rajung myî wú kôlé, tû taî wú keq; haú hkûn, hai ahko ahkáng èq, Ngò, shí pé kut é hkyô lé taî kyo râ nghut lhê. 30 Yohan byî é baptisima gi, mauhkûng mai lhú? A nghut jáng, byu chyáng mai lhú? Taî wú keq!” ga taû myî kat ri.
31 Haú hkûn, yhángmòq chôm hpyê lhum kô é gi, “‘Mauhkûng mai nghut lhê’ nghû ngá-nhúng taí jáng le, ‘Haû nghut le nhîng, haî mù, yhang lé a lùmjíng kô é lhú?’ ga râ nghut. 32 ‘Byu chyáng mai nghut lhê.’ nghû jáng le....” gâ ri. (Yohan gi, myìqhtoi rayùq gè gè nghut lhê ga, lhúnglhâng bang lùmjíng bûm kô é yánmai, yhángmòq gi, haû byu pé lé gyùq bum akô nghut ri.)
33 Haû mù, yhángmòq gi, Yesuq lé, “Ngá-mòq a sé.” ga tû taî akô.
Haú hkûn, Yesuq gi, “Haû jáng, Ngò le, hai ahko ahkáng èq shí pé kut é hkyô lé, núngmòq lé a taî kyo.” ga, yhángmòq lé taî ri.