Tsibyiq Hkyâm Saí Bang Lé Dangtú Yu É Hkyô
12
Hau htâng, Yesuq, dangtú dông yhángmòq lé taî é gi, “Byù rayùq gi, tsibyiq hkyâm rahkyâm saî to mù, lhînghkyùq kyâm to luî, tsibyiq wing pyik htoq râ donghkong dû to mù, mâchya ralhum saî tô ri. Hau htâng, yhang gi, hkyâm haú lé, hkyâm saí zo bâng chyáng ngho byî to mù, gó-ming shut e ló byùq bê nghut ri. 2 Kyô shu yòq jé jáng, yhang gi, yhang yù âng é tsibyiq shi ê yû râ matú, duìnhâng zoshâng rayùq lé, hkyâm saí zo bâng chyáng nhang kat ri. 3 Nghut kôlhang, haú bang gi, haú yùq lé lhom chyup bàt luî, lòq kôm taû nhang kat akô. 4 Haû mù, yhang gi, gótû duìnhâng zoshâng rayùq lé, yhángmòq chyáng dum nhang kat ri; yhángmòq gi, haú yùq lé le, ulhum má lhom bàt cheq byi kôluî, hoq lhoqhpû kat akô nghut ri. 5 Hau htâng, rayùq lé dum nhang kat jáng, haú yùq lé gi, lhom sat pyâm akô; Yhang gi, góbang myo myo lé le, yhángmòq chyáng nhang kat ashî nghut ri; yhángmòq kúm gi, ra-am lé lhom bat, ra-am lé lhom sat pyám, kut akô nghut ri.6 Ló htáng má, yhang gi, yhang chyitdàp é zo lé nhang kat râ za ru nghut alô; haû mù, yhang gi, ‘Ngá zo lé gi, yhángmòq lhom hkúngga kôrâ nghut lhê.’ ga, yhang zo lé nhang kat ri.
7 Nghut kôlhang, haú bang gi, ‘Shí yùq gi, silî wunlî sing yù râ sû nghut lhê; lé keq, yhang lé sat pyám sháng, haû jáng shèq, silî wunlî pé lé ngá-nhúng wó yû râ nghut lhê.’ ga rayùq eq rayùq taî lhûm bum akô. 8 Haû mù, yhang lé chyup yû luî, sat pyám mù, hkyâm shinggan shut dú htoq pyâm akô nghut ri.
9 Haû jáng, tsibyiq hkyâm yhûmsîng gi, yhángmòq lé hkâsu kut râ lhú? Yhang gi, ê mù, haû hkyâm saí zo bang lé sat pyám luî, hkyâm haú lé, góbang lé htòt ngho byî pyám râ nghut lhê. 10 Chyúmdang má,
‘Yhûm saí bâng èq hkyin htoq pyâm é lùqgòk gi, htúngchyûn mâ é ahkyàk dìk é lùqgòk dùt bê.
11 Shí hkyô gi, haû Yhûmsîng kut é nghut luî, ngá-nhûng é myòq hí má maúhpo dùt bê nghut ri.’ ga bò tô é lé, núngmòq a nghap wú kó lhú?”a
gâ ri.
12 Hau htâng, yhángmòq gi, dangtú haû, yhángmòq lé lhoq-ang luî taî é hkyô lé, sé kô é yánmai, Yhang lé chyup yû râ matú hkyô ho nyi akô. Nghut kôlhang, yhángmòq gi, byù mòqmó lé gyùq kô é yánmai, Yhang lé nyhi pyâm to luî, htoq ló byùq bekô nghut ri.
Kehtaqb Lé Hkán Kat Byî É Hkyô
13 Hau htâng má, yhángmòq gi, Yesuq é dang má mara hô luî Yhang lé chyup yû râ matú, Hparishe pé ra-am eq Herot é byu pé ra-am lé, Yesuq chyáng nhang kat akô. 14 Haú bang gi, Yhâng chyáng lé jé kômù, “Sará ê, Nàng gi, tengmán sû nghut é lé, ngá-mòq sê lhê. Nàng gi, ó haî ga râ lé le haî su a ngàm sû nghut é yánmai, ó yùq é myòqdong lé le a tê byî é za, Garai Gasâng é hkyô lé, tengmán é dông mhoqshit é sû nghut ri. Haû mù, Kehtaq lé hkán kat byî le gi, ge lhê lhú? 15 Ngá-mòq kat ra râ lhú? A kat ra râ lhú?” ga Yhang lé taî akô.
Yesuq kúm gi, yhángmòq, gègùn labyoq kut nyî kô é lé sé mù, “Núngmòq gi, haî mù, Ngo lé lé chyam wú akô lhú? Denari ngùn rachap yu lé keq, ngò wú wú bá.” ga taî kat ri. 16 Haú hkûn, yhángmòq yu jé lô jáng, Yhang gi, “Shí má, ó yùq é alhô eq masàt laiká dàp tô ri lhú?” ga myî ri.
Yhángmòq gi, “Kehtaq é nghut ri.” ga tû taî akô.
17 Haû mù, Yesuq gi, yhángmòq lé, “Kehtaq é lé gi, Kehtaq lé byi keq; Garai Gasâng é lé gi, Garai Gasang lé byi keq.” ga taí jáng, yhángmòq gi, maú byùq bùm bekô nghut ri.
Saduke Pé, Yesuq Lé Myî Chyam É Hkyô
18 Haû dum dui toq hkyô a jòq gâ é Saduke pé gi, Yesuq chyáng lé jé kômù, dangmyi lé myî akô. 19 Yhángmòq myi kô é gi, “Sará ê, myiwe wó é byù rayùq gi, zodù a dàp é za shi byùq é nghut jáng, yhang gu gi, yhang mâng é awùt ashín xoq byi râ matú, yhâng rhat lé chui gon ra râ nghut lhê ga, ngá-nhúng lé, Mosheq kâ to byî ri. 20 Hí hpyang lé, gu-mang nhiktâng wuì nyhit yùq nyi akô. Lagám yùq gi, myiwe yù luî, zodù a dàp é za shi ló byùq bê nghut ri. 21 Lanóng yùq gi, yhang mang mó é chui lé gon mù, zodù a dàp é za shi ló byùq bê. Lalaq yùq le, haû eq rajung za dùt byùq bê nghut ri. 22 Haú nhiktâng wuì nyhit yùq gi, zodù a dàp é chyat shi ló byùq bùm bekô nghut ri. Htâng má, myiwe myhí haû le châng shi ló byùq bê nghut ri. 23 Haû mù luî, haû dum dui toq é buìnyì má, myiwe myhí haû gi, hká yùq é yhang myi nghut râ lhú? Hkâsu mù gâ le, yhang gi, haú nyhit yùq é yhang myi dùt wú bê sû nghut ri.” gâ akô.
24 Yesuq gi, yhángmòq lé, “Núngmòq hkyô nghoq é gi, Chyúmdang eq Garai Gasâng é wum-o a-tsam lé, a sé kô é yánmai nghut lhê, a nghut kó lhú? 25 Haû shi byùq bê bang dum dui toq é hkûn gi, myi byi myi yû hkyô jòq lo râ a nghut; yhángmòq gi, mauhkûng htoq mâ é maumang lagyô pé su dùt byùq kôrâ nghut lhê. 26 Shi é mai dum lhoqdui toq é hkyô eq séng luî, Mosheq kâ tô é laiká má lháng, haû nyé dùq nyi é mhanpúng mai, Garai Gasang gi, yhang lé, ‘Ngò gi, Abraham é Garai Gasang, Isak é Garai Gasang, Yakup é Garai Gasang nghut lhê.’c ga kâ tô é lé, núngmòq a nghap wú kó lhú? 27 Garai Gasang gi, shî bê bâng é Garai Gasang a nghut, dui nyì bâng é Garai Gasang shèq ru nghut lhê. Núngmòq gi, shut dik bekô nghut ri.” ga taî ri.
Ahkyàk Dìk É Jep É Târâ
28 Târâ sará rayùq gi, lé lô mù, yhángmòq taî htîng lhûm nyì kô é lé, lé wó gyô ri. Yhang gi, haú bang lé, Yesuq rago tû taî nyi é lé myàng jáng, Yesuq lé, “Jep é târâ bànshoq má, hká lhum gi, ahkyàk dìk lhê lhú?” ga myî ri.
29 Haû jáng, Yesuq gi, “Ahkyàk dìk é jep é târâ gi, ‘Isira-elaq byu pé ê, gyô wú keq! Ngá-nhûng é Yhûmsîng Garai Gasang za, Garai Gasang nghut lhê. 30 Náng é Garai Gasang nghut é, haû Yhûmsîng Garai lé náng é i-myìt nhiklhum bànshoq, náng é i-myìt sô lhum gón, nàng myìt é hkyô bànshoq, náng é wum-o bànshoq èq, chyitdàp râ lhê.’d gâ é nghut lhê. 31 Hau htang lhum gi, ‘Náng gûng lé nàng chyitdàp é su, náng é chyáng nâm mâ é bang lé le chyitdàp àq.’e gâ é nghut lhê. Shî í lhûm htoq kô é târâ gótû a jòq lo.” ga yhángmòq lé tû taî ri.
32 Haú hkûn, târâ sará haú yùq gi, “Gyo naû bê, Sará ê! Garai Gasang rayùq za nghut lhê, gótû a nyì lo ga nàng taî é gi, têng ri. 33 Garai Gasang lé, náng é i-myìt nhiklhum bànshoq èq le, náng é sê gyô é u-nuq bànshoq èq le, náng é wum-o bànshoq èq le, chyitdàp râ lhê gâ é eq, náng gùng lé nàng chyitdàp é su, náng é chyáng nâm mâ é bang lé le chyitdàp râ lhê gâ é gi, myi nyhé hkungga eq gótû hkungga pé bànshoq htoq má, je ahkyàk lhê.” ga taî ri.
34 Yesuq gi, yhang hpàqchyî bo é dông tû taî nyi é lé myàng jáng, “Nàng gi, Garai Gasâng é mîngdán eq a we lo nghut ri.” ga yhang lé taî kat ri. Haú hkûn mai gi, ó yùq le, Yhang lé dangmyi a wám myi lo kó nghut ri.
Hkrisidùq Gi, Ó Yùq É Yhang zo?
35 Yesuq, noqkuq yhûm má mhoqshit nyi é hkûn lé taî é dang gi, “Haî mù, haû târâ sará pé gi, Hkrisidùq lé, Dawiq é yhang zo za nghut lhê gâ akô lhú? 36 Dawiq gi, Chyoiyúng So èq taí nhang é má,
‘Haû Yhûmsîng Garai gi, ngá é Yhûmsîng lé, “Ngò, náng é gumlau gye pé lé,
náng é hkyîwa ô má tô pyâm é hkyíng jé shoq, Ngá é lòqyo hkyam shut zung nyì shi aq.” ga taî ri.’f
gâ ri. 37 Haû mù, Dawiq yhang lháng, Hkrisidùq lé, Yhûmsîng gâ é nghut le gi, yhang zo za hkâsu ge nghut râ lhú?” gâ ri.
Byù hpûng mó gi, Yhâng é dang lé, gabú myìt èq gyô nyi bum akô nghut ri.
38 Yesuq gi, mhoqshit uchyang taî é má, “Târâ sará pé lé sidìq nyì keq. Yhángmòq gi, réng é buhîng wùt chûng mù, sô yông wún luî, gaì pé má lhom shi-kyâm yù râ lé le, 39 târâjong pé mâ é ahkyàk dìk é zùng jang pé eq poî pé mâ é réng é zùng jowò pé má myang zùng râ lé le, ô nau nyi bum akô. 40 Yhángmòq gi, chuimó pê é yhûm-yò pé lé hpyoq zo hpyoq shuq kôluî, kyû hîng hîng dûng shit mhaû é bang nghut akô. Haû sû é bang gi, je riyhang htan é dông dam byî é hui zo kôrâ nghut lhê.” gâ ri.
Chuimó Myhí Kat É Alû Ngùn
41 Yesuq gi, alû sidèk nàm má zung to mù, noqkuq yhûm mâ é alû sidèk haú má, byù mòqmó ngùn kat nyi é lé wú nyi ri. Sùt wó bang myo myo gi, ngùn ga-myhó myhó kat bum akô. 42 Haú hkûn, myung é chuimó myhí rayùq gi, lé mù, gyi htingchap ngùn zo í chap lé kat ri.
43 Yesuq gi, Yhâng é chángzô pé lé wùt yù mù, “Ngò, núngmòq lé teng za taí kôlé, shî myung é chuimó myhí gi, góbang bànshoq htoq má je myo kat bê nghut ri. 44 Haû góbang bànshoq gi, yhûmsîng agùn agó wó é mâ é lé, lé kat akô; yhang kúm gi, myùng sû nghut kôle, yhâng é chyungxe lé baú râ ngùn bànshoq lé, kat bê nghut ri.” ga taî ri.