Chuimó Myhí Kat É Alû
21
Yesuq tu wú kat é hkûn lé, noqkuq yhûm mâ é alû sidèk má, wó bang alû kat nyi bùm kô é lé myang ri. 2 Dum nghut jáng, gyi htingchap ngùn zo í chap za kat é, myung é chuimó myhí rayùq lé le myang ri. 3 Haû mù, Yhang gi, “Ngò, núngmòq lé teng za taí kôlé, shî myung é chuimó myhí gi, góbang bànshoq htoq má je myo kat bê nghut ri. 4 Hkâsu mù gâ le, haû góbang bànshoq gi, yhûmsîng agùn agó wó é mâ é lé, lé kat akô; yhang kúm gi, myùng sû nghut kôle, yhâng chyungxe lé baú ra ngùn lhúnglháng lé kat bê nghut ri.” ga taî ri.
Ló Htâng Buìnyì Pé Má Dùt Lò Râ Hkyô
5 Noqkuq yhûm lé, yúng é lùqgòk pê èq le, alû chyûnghuq pê èq le, mhôn tô ri ga, chángzô pé ra-am hkya-ôn bùm kôjáng, Yesuq gi, 6 “Núngmòq myang nyi é shí pé gi, lùqgòk rachâm htoq racham lháng a kê lhum loshoq, hpyoq hpyi pyâm é buìnyì jé râ nghut lhê.” ga taî ri.
7 Haû su ga jáng, yhángmòq gi, “Sará ê, haû nghut le gi, haú hkyô pé gi, hkâ-nhám dùt lô râ lhú? Haû dùt râ chyâng lò jáng, hkâsû é alhô agàn htoq lô râ nghut lhê lhú?” ga, Yhang lé myî akô.
8 Haú hkûn, Yhang gi, “Núngmòq gi, hkyô shuî nghoq é a hui kó sháng gàq, sidìq nyì keq. Hkâsu mù gâ le, ‘Ngò gi, Mesai‑a nghut lhê.’ ga le, ‘Ahkyíng chyâng lò bê.’ ga le, Ngá myîng lé lâng é byù myo myo nyi htoq lô kôrâ nghut lhê. Nghut kôlhang, núngmòq gi, yhángmòq htâng hkâcháng kó. 9 Majan htoq é eq, gumlau toq é hkyô lé, wó gyo kôjáng, hkâgyùq hkâ-kyûm kó, haú hkyô pé hí dùt lò râ nghut lhê. Nghut kôlhang, ló htâng é buìnyì gi, haú hkûn jáng dùt râ a nghut shi.” ga taî ri.
10 Hau htâng, Yhang, yhángmòq lé dum taî é gi, “Ra-myû eq ra-myû, mîngdán ralhum eq ralhum majan zân lhûm lò kôrâ nghut lhê. 11 Jowò myo myo má, layàng mó nún lo é, nòlì nòjàng myô lo é eq mùtmó gyó lo é pé, dùt lò râ nghut lhê; gyùq chiq jung pé eq alhô agàn mó le, mauhkûng htoq mai htoq shit lô râ nghut lhê.
12 Nghut kôlhang, haû hkyô bànshoq a dùt shi-má, Ngá mying é yánmai, byu pé gi, núngmòq lé chyup yû luî, zing-rî yù mù, târâjong pé eq htóng pé má àp pyám kôrâ nghut lhê, hau htoq agó, núngmòq gi, hkóhkam pé eq zau pê chyáng ê àp byî é le, hui kôrâ nghut lhê. 13 Haû sû é pé mai, núngmòq gi, ngò eq séng luî, sàksé wó hkám râ hkyô htoq lô berâ nghut lhê. 14 Nghut kôlhang, hkâsu nghû lhom tû taí râ hkyô lé, hí mai a myìt wuî nyì râ lé, núngmòq myìt hpyit to keq. 15 Hkâsu mù gâ le, núngmòq é gyè pé lhúnglhâng bang, haî le a wó lhom tû taí loshoq, ngò, núngmòq lé dang eq hpàqchyî byi râ nghut lhê. 16 Nghut kôlhang, núngmòq gi, înu îwâ pé, âgu âmâng pé, mùng mòq eq buìnùm ji-myi wui èq lháng, àp pyâm é hui kôrâ nghut lhê. Yhángmòq gi, núngmòq chyáng mâ é ra-am lé lháng, sat pyám kôrâ nghut lhê. 17 Byù lhúnglhâng bang gi, Ngá é yánmai, núngmòq lé a nguì kut kôrâ nghut lhê. 18 Nghut kôlhang, núngmòq é xâm rahkat lháng wó htên byùq râ a nghut.a 19 Núngmòq gi, wó jân é hkyô mai, chyungxe lé wó yû kôrâ nghut lhê.
20 Yerusalem wà mó lé gyè hpúng mó èq lóm tô é lé, núngmòq myàng jáng, wà mó haû htên byùq râ ahkyíng chyâng lò bê lé, bûn sê nyì keq. 21 Haú hkûn lé, Yuda mau má nyi é bang gi, bùm pé shut hpang dòq ló kó sháng gàq; haû wà hkaû má nyi é bang le, hpang htoq kó sháng gàq; wà tiq wà zo pé má nyi é bang le, wà hkaû shut a wàng kó sháng gàq. 22 Hkâsu mù gâ le, Chyúmdang má kâ to má kâ to bànshoq dìk lò râ matú, buìnyì haú pé gi, mara dam byî é buìnyì pé dùt râ nghut lhê. 23 Haû buìnyì pé má, zogûng dùt é myiwe wuì eq naú huq ashî nghut é înu wuì gi, gyai yhang wuîhke kôrâ nghut lhê; hkâsu mù gâ le, shí mîng ahtoq má wuîhke mó eq, shí a-myû ahtoq má Garai Gasang nhikmó-yô é jé lô râ nghut lhê. 24 Yhángmòq gi, shâm lhâm èq sat pyám huî é eq, ming hkang ming mó má chyup shuî ló é le hui kôrâ nghut lhê. Tûngbaù pé lé byî tô é buìnyì ahkyíng htáng shoq, Yerusalem wà mó gi, tûngbaù pê èq nâng zìk tô é hui râ nghut lhê.
25 Haú hkûn, buì, kyî, lha-mó pé má, alhô agàn htoq shit râ nghut lhê. Wuìshuq lung-aû mâ é wuìlhêng pê é mying é htê mó é yánmai, myigùng htoq má, byù myû chângjup gi, hkâsu kut râ a sé loshoq maú é eq myìt wui myìt hkê é hui bekô râ nghut lhê. 26 Byu pé gi, mingkan htoq má dùt lò râ é hkyô pé lé, a jé shi mai myìt gyùq kô é yánmai, mòq byùq ló bûm kôrâ nghut lhê; hkâsu mù gâ le, mauhkûng mâ é wum-o a-tsam pé gi, lhoqnhûn é huî bùm kôrâ nghut lhê. 27 Haú hkûn, haû Byu Yhangzo gi, mhut ji mù, hpungwup a-tsam mó eq le, hpungwup shingkang mó eq le, gyó lé lo é lé, yhángmòq byu-myàng kôrâ nghut lhê. 28 Haú hkyô pé dùt hi lò jáng, ulhum tû mù wú kat keq, hkâsu mù gâ le, núngmòq lé hkyi yù râ buìnyì gi, chyâng lò bê nghut ri.” gâ ri.
29 Yhang, yhángmòq lé dangtú dông xoq taî é gi, “Hkohúm gâm eq sikgâm bànshoq lé wú wú keq. 30 Sikbu nyún lo é lé myàng jáng, buì nyé nám chyâng lò bê ga luî, núngmòq yhang dàt wú sê akô. 31 Haû eq rajung za, haú hkyô pé dùt nyi é lé, núngmòq myàng kôjáng, Garai Gasâng é mîngdán gi, chyáng bê nghut é hkyô lé, núngmòq sé lo keq.
32 Ngò, núngmòq lé teng za taí kôlé, shí pyàt mâ é byu pé a ban shi byùq shi-má, haú hkyô pé bànshoq dùt byùq râ nghut lhê. 33 Mauhkûng eq myigùng gi, a jòq lo dùt byùq râ nghut lhê; nghut kôlhang, Ngá é dang gi, ru joq nyî râ nghut lhê.
34 Nghut kôlhang, zo myo shuq myô é, î shuq wùt é, mingkan htoq mâ é myìt wui myìt hkê é pê èq, núngmòq é i‑myìt wò laî nyì luî, haû ngò jé lé é buìnyì gi, lhaí bìk lo é su, núngmòq ahtoq má byò dàn tung a jé lò sháng gàq, sidìq nyì keq. 35 Hkâsu mù gâ le, buìnyì haû gi, mingkan htoq má nyi é byù bànshoq bâng é ahtoq má, haû su jé lô râ nghut lhê. 36 Haû mù luî, haû dùt lò râ hkyô bànshoq mai, núngmòq wó lùt lai mù, haû Byu Yhangzô é hí má, wó yàp gîng é bang dùt sháng gàq, hkâ-nhám le kyûdung luî, ahkyíng hkangmó má machyâ nyì keq.” gâ ri.