Yesuq É Ahko Ahkáng Lé Myî Chyam Wú É Hkyô
20
Ra-nyí lé, Yesuq gi, noqkuq yhûm wàng hkaû má, byu pé lé mhoqshit nyi é eq, gabú danglù hko kyô nyi é hkûn, hkyangjong agyi pé gi, târâ sará pé, sûwún wuî eq rahá kut, Yhâng chyáng lé jé kômù, 2 “Hai ahko ahkáng èq Nàng shí pé lé kut nyi lhê lhú? Ahko ahkáng shî, Nang lé ó yùq byî é lhú? Ngá-mòq lé taî kyô wú aq.” ga Yhang lé myî akô.3 Haú hkûn, Yhang gi, “Ngò le, núngmòq lé rajung myî wú kôlé; 4 Yohan byî é baptisima gi, mauhkûng mai lhú? A nghut jáng, byu chyáng mai lhú? Ngo lé taî kyô wú keq?” ga yhángmòq lé myî ri.
5 Haú hkûn, yhángmòq chôm hpyê lhum kô é gi, “‘Mauhkûng mai nghut lhê.’ nghû ngá-nhúng taí jáng le, ‘Haî mù, yhang lé a lùmjíng kô é lhú?’ ga râ nghut. 6 ‘Byu chyáng mai nghut lhê.’ nghû jáng le, shiwa byù bànshoq gi, Yohan lé, myìqhtoi rayùq ga lùmjíng to kô é yánmai, yhángmòq, ngá-nhúng lé lùqgòk èq dú sat kôrâ nghut.” gâ akô.
7 Haû mù, yhángmòq gi, “Hkâmai nghut é lé, ngá-mòq a sé.” ga tû taî akô.
8 Yesuq gi, “Haû jáng, Ngò le, hai ahko ahkáng èq shí pé kut é hkyô lé, núngmòq lé a taî kyo.” ga, yhángmòq lé taî ri.
Tsibyiq Hkyâm Yhûmsîng Eq Hkyâm Saí Zo Bang
9 Byu pé lé, Yesuq dangtú dông xoq taî kyô é gi, “Byù rayùq gi, tsibyiq hkyâm ralhum saî to mù, hkyâm saí zo bâng chyáng ngho byî to luî, gó-ming shut myáng myáng ê nyi byùq ri. 10 Kyô shu yòq jé jáng, yhang gi, hkyâm saí zo bâng èq, hkyâm mâ é tsibyiq shi pé lé lhom byî kat sháng gàq ga, duìnhâng zoshâng rayùq lé yhángmòq chyáng nhang kat ri. Nghut kôlhang, hkyâm saí zo bang gi, haú yùq lé lhom bàt mù, lòq kôm taû nhang kat akô. 11 Gótû duìnhâng zoshâng rayùq lé, yhángmòq chyáng dum nhang kat ri. Nghut kôlhang, yhángmòq gi, haú yùq lé le, lhom bàt mù, hoq lhoqhpu luî, lòq kôm dum taû nhang kat akô. 12 Sum yùq nghû râ duìnhâng zoshâng lé dum nhang kat ri. Yhángmòq gi, haú yùq lé le bàt cheq luî, hkyâm mai hkat htoq kat akô.
13 Haú hkûn, tsibyiq hkyâm yhûmsîng gi, ‘Ngò hkâsu kut wú râ lhú? Ngò chyitdàp é ngá zo lé, nhang kat wú râ nghut ri. Yhang lé kúm gi, yhángmòq lhom hkúngga kó âbe.’ ga taî ri.
14 Hkyâm saí zo bang gi, yhûmsîng hpô é yhang zo lé myàng kôjáng, ‘Shí yùq gi, silî wunlî sing yù râ sû nghut lhê; ngá-nhúng, silî wunlî haú pé wó yû shoq, yhang lé sat pyám sháng.’ ga rayùq eq rayùq taî lhûm bum akô. 15 Haû mù, yhang lé hkyâm shinggan shut dú htoq kômù, sat pyâm akô.
Haû su kut kôjáng, tsibyiq hkyâm yhûmsîng gi, yhángmòq lé hkâsu kut râ lhú? 16 Yhang gi, ê mù, haû hkyâm saí zo bang lé sat pyám luî, hkyâm haû lé góbang lé htòt ngho byî pyám râ nghut lhê.” gâ ri.
Dang haú lé wó gyo bang gi, “Haû su gi, hkâ-nhám le a dùt sháng gàq ô!” gâ akô.
17 Hau htâng, Yesuq gi, yhángmòq lé byu wú luî, “Haû jáng gi,
‘Yhûm saí bâng èq hkyin htoq pyâm é lùqgòk gi, htúngchyûn mâ é ahkyàk dìk é lùqgòk dùt bê.’a
ga Chyúmdang má kâ tô é gi, haî gá naú é nghut lhê lhú? 18 Lùqgòkb haú má gyó záng é sû ó yùq nghut kôle, gyuî gyòp byùq râ nghut lhê. Lùqgòk hau èq gyó nhê záng é sû le, nhê pyeq pyâm é hui râ nghut lhê.” ga taî ri.
19 Târâ sará pé eq hkyangjong agyi pé gi, dangtú shî gi, yhángmòq lé lhoq-ang luî taî é hkyô lé, sé kô é yánmai, haú hkûn jáng lháng Yhang lé chyup yû râ matú hkyô ho nyi akô. Nghut kôlhang, byu pé lé gyùq mù a chyup shi kó nghut ri.
Hkán Kat É Hkyô Eq Séng Luî Myî É Dang
20 Haû mù, yhángmòq gi, Yesuq é dang má mara wó chyup yû shoq ga, gègùn labyoq kut bang lé jówú nhang nyi akô. Haû gi, ahkáng ayá wó é mauzaû chyáng Yhang lé wó àp pyám râ matú nghut ri. 21 Haû jówú bang gi, “Sará ê, nàng gi, díng díng mán mán taî mhoqshit é eq, byu é myòqdong lé a tê byî é za, Garai Gasâng é hkyô lé, tengmán é dông mhoqshit é sû nghut é lé, ngá-mòq sê lhê. 22 Hkóséng Kehtaq lé, ngá-mòq hkán kat râ gi, târâ wang lhê lhú? A wang é lhú?” ga luî, Yhang lé myî wú akô.
23 Nghut kôlhang, Yesuq gi, haú bâng é myìt goí é hkyô lé sé mù luî, yhángmòq lé, 24 “Ngo lé, ngùn rachap tûn shit wú keq. Ó yùq é alhô eq masàt laiká dàp tô ri lhú?” ga myi jáng, 25 yhángmòq gi, “Kehtaq é nghut ri.” gâ akô.
Haú hkûn, Yesuq gi, “Haû nghut jang, Kehtaq é lé gi, Kehtaq lé byi keq; Garai Gasâng é lé gi, Garai Gasang lé byi keq.” ga yhángmòq lé taî ri.
26 Yhángmòq gi, byu pê hí má, Yhâng é dang má mara a wó ho myang é eq, Yhang tû taî é dâng é yánmai, maú hong byùq kôluî, zîm byùq akô.
Dum Dui Toq Lô Râ Hkyô Eq Séng Luî Myî É Dang
27 Haú hkûn, haû dum dui toq hkyô a jòq gâ é Saduke pé ra-am gi, Yesuq chyáng lé jé kômù, 28 “Sará ê, myiwe wó é byù rayùq gi, zodù a dàp é za shi byùq é nghut jáng, yhang gu gi, yhang mâng é awùt ashín xoq byi râ matú, yhâng rhat lé chui gon ra râ nghut lhê ga, ngá-nhúng lé, Mosheq kâ to byî ri. 29 Hí hpyang lé, gu-mang nhiktâng wuì nyhit yùq nyi akô. Lagám yùq gi, myiwe yù luî, zodù a dàp é za shi ló byùq bê nghut ri. 30 Lanóng yùq le, yhang mang mó é chui lé gon mù, zodù a dàp é za shi ló byùq bê. 31 Hau htâng, Lalaq yùq mai Lahkâ yùq jé shoq, chuimó haú lé rayùq htâng rayùq dum gon gon kut kôlhang, zodù a dàp é chyat shi ló byùq bùm bekô nghut ri. 32 Ló htáng má, myiwe myhí haû le châng shi ló byùq bê nghut ri. 33 Haû mù luî, haû dum dui toq é buìnyì má, myiwe myhí haû gi, haú nhiktâng wuì mâ é hká yùq é yhang myi nghut râ lhú? Hkâsu mù gâ le, yhang gi, haû nyhit yùq é yhang myi dùt wú bê sû nghut ri.” ga luî, Yhang lé myî wú akô.
34 Haú hkûn, Yesuq gi, “Shî mingkan htoq mâ é byu pé gi, i-kun kut é eq myi byi myi yû kut nyi bum akô. 35 Shi é mai dum dui toq râ eq, haú pyàt má nyì râ gíng bâng é matú gi, i-kun kut é eq myi byi myi yû hkyô jòq lo râ a nghut. 36 Haú bang gi, maumang lagyô pé su dùt byùq luî, a dàt shî lo kôrâ nghut lhê. Yhángmòq gi, dum dui toq lô su é yhang zô péc nghut é yánmai, Garai Gasâng é yhang zô pé nghut bekô. 37 Haû nyé dùq nyi é mhanpúng eq séng luî, Mosheq èq kâ tô é má lháng, Yhûmsîng gi, ‘Ngò gi, Abraham é Garai Gasang, Isak é Garai Gasang, Yakup é Garai Gasang nghut lhê.’d ga bo tô é yánmai, shi é bang dum dui toq lô râ hkyô lé tûn shit to bê nghut ri. 38 Garai Gasang gi, shî bê bâng é Garai Gasang a nghut, dui nyì bâng é Garai Gasang ru nghut nyi lhê; hkâsu mù gâ le, lhúnglhâng bang gi, Garai Gasâng é hí má dui nyi é bang chyat nghut akô.” ga yhángmòq lé tû taî ri.
39 Haú hkûn, târâ sará pé ra-am gi, “Sará ê, nàng taî é jô ri.” gâ akô. 40 Haû mù, yhángmòq gi, Yhang lé haî le a wám myî jàt lo kó nghut ri.
Hkrisidùq Gi, Ó Yùq É Yhang Zo?
41 Hau htâng, Yesuq gi, yhángmòq lé, “Byu pé gi, Hkrisidùq lé, Dawiq é yhang zo nghut lhê, ga hkâsu mù taî akô lhú? 42-43 Dawiq yhang yhang lháng gi, Hkya-on Kúngtôn Laiká má,
‘Haû Yhûmsîng Garai gi, ngá é Yhûmsîng lé, “Ngò, náng é gye pé lé,
náng é hkyî nang tánghkuq kut pyám byî é hkyíng jé shoq, Ngá é lòqyo hkyame shut zung nyì shi aq.” gâ ri.’f
ga kâ tô ri. 44 Haû mù, Dawiq yhang lháng, Hkrisidùq lé, Yhûmsîng gâ é nghut le gi, Hkrisidùq gi, yhang zo za hkâsu ge nghut râ lhú?” ga taî ri.
Târâ Sará Pé Lé Sidìq Râ Hkyô
45 Byù bànshoq gyô nyi é u lé, Yesuq, Yhâng é chángzô pé lé taî é gi, 46 “Târâ sará pé lé sidìq nyì keq. Yhángmòq gi, réng é buhîng wùt chûng mù, sô yông wún luî, gaì pé má hkúnggâ é èq dù nyo lò râ lé le, târâjong pé mâ é ahkyàk dìk é zùng jang pé eq poî pé mâ é je réng é zùng jowò pé má myang zùng râ lé le, ô nau nyi bum akô. 47 Yhángmòq gi, chuimó pê é yhûm-yò pé lé hpyoq zo hpyoq shuq kôluî, kyû hîng hîng dûng shit mhaû é bang nghut akô. Haû sû é bang gi, je riyhang htan é dông dam byî é hui zo kôrâ nghut lhê.” gâ ri.