Târâ Sará Pé Eq Hparishe Pé Lé Sidìq Râ Hkyô
23
Hau htâng, Yesuq gi, byù mòqmó eq Yhâng é chángzô pé lé taî é má, 2 “Târâ sará pé eq Hparishe pé gi, Mosheq é tánghkuq má zung akô. 3 Haû mù, yhángmòq mhoqshit é hkyô chângjup lé, núngmòq châng kut ra kôrâ nghut lhê. Nghut kôlhang, yhángmòq kut é dông gi, hkâkut kó; hkâsu mù gâ le, yhángmòq gi, yhángmòq taî é dông a kut kó nghut ri. 4 Yhángmòq gi, byu pê é gòqsân má wòlai ke byi kôlhang, yhángmòq yhang gi, wò haú pé lé bo wàq râ matú, lòqnyhui lháng a kâm lhoqduî kó nghut ri.5 Yhángmòq kut é hkyô lhúnglháng gi, byu pé myàng râ matú za kut shit é nghut akô; haû chyúmbun bo é sho-kuq htûng pé lé lhoqkô yù kômù, buhîng pé mâ é banbyaú pé lé lhoqhing yu akô nghut ri; 6 yhángmòq gi, poî pé mâ é réng é jowò pé eq târâjong pé mâ é ahkyàk dik é zùng jang pé má, myang zùng râ lé ô nau nyi akô; 7 yhángmòq gi, gaì pé má lhom shi-kyâm yù kôrâ eq, byu pé mai, yhángmòq lé, ‘Rabai’a ga lhom wùt kôrâ lé ô nau nyi bum akô.
8 Núngmòq kúm gi, ‘Rabai’ ga wùt râ lé hkâ‑ô naù kó; hkâsu mù gâ le, núngmòq gi, sará rayùq za wó lhê nghut é htoq agó, núngmòq bànshoq bang gi, gu-mang chyat ru nghut lhê. 9 Haû mù, myìdàm htoq má, ó yùq lé le, ‘âwa’ hkâ-nghû kó; hkâsu mù gâ le, mauhkûng htoq mâ é Îwa rayùq za, núngmòq é Îwa nghut lhê. 10 Hau htoq agó, ‘sará’ ga wùt râ lé, hkâ‑ô naù kó; hkâsu mù gâ le, Hkrisidùq za, núngmòq é Sará nghut lhê. 11 Núngmòq mâ é je gyaú sû gi, núngmòq é duìnhâng zoshâng dùt râ nghut lhê. 12 Hkâsu mù gâ le, yhûmsing gùng lé wàq toq sû ó yùq nghut kôle, lhoqnyhum pyâm é hui râ nghut lhê, yhûmsing gùng lé lhoqnyhum é sû kúm gi, wàq toq é hui râ nghut lhê.
13 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, byu pê hí má, mauhkûng mîngdán hkyô lé xaû tô akô; núngmòq yhang le a wàng kó, wàng nau nyì bang lé le a wàng nhâng kó nghut ri. 14 (Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, chuimó pê é yhûm-yò pé lé hpyoq zo hpyoq shuq é eq kyû hîng hîng dûng shit mhaû é bang nghut akô; haû mù, dam byî é je myo hui zo kôrâ nghut lhê.)b
15 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, byù rayùq lé núngmòq é noqkuq htûng má wó lhoqlhik yû râ matú, myì hkyô, wuì hkyô, châng jón wún kômù, wó lhoqlhik yu é sû lé gi, núngmòq su ngaraî byù í tú shuî dùt akô nghut ri.
16 Hkyô-u she é myòqjìt pé ê, núngmòq gi, dingnyé wó ri. Núngmòq gi, ‘Noqkuq yhûm lé lang luî dâkam é sû gi, haî a ra; noqkuq yhûm mâ é hîng lé lang mù dâkam é sû kúm gi, cháng ra bê.’ ga lhaq taî akô. 17 Myòqjìt é byù nâ pé ê! Haû hîng eq hîng lé lhoq yúnglhô é noqkuq yhûm gi, hká lhum je ahkyàk lhê lhú? 18 Hau htoq agó, núngmòq gi, ‘Haû hkungga gyàp é myìng lé lang luî dâkam é sû gi, haî a ra, nghut kôlhang, haû hkungga zè lé lang mù dâkam é sû gi, cháng ra bê.’ ga le, lhaq taî akô nghut ri. 19 Myòqjìt pé ê! Haû hkungga zè eq hkungga zè lé lhoq yúnglhô é hkungga gyàp gi, hká lhum je ahkyàk lhê lhú? 20 Haû mù, haû hkungga gyàp lé lang luî dâkam é sû gi, haû hkungga gyàp eq hau é ahtoq má kê tô é zè bànshoq lé lang luî dâkam é sû dùt bê nghut ri. 21 Noqkuq yhum é myìng lé lang luî dâkam é sû gi, haû noqkuq yhûm eq haú má nyi é Sû lé lang luî dâkam é sû dùt bê nghut ri. 22 Hau htoq agó, mauhkûng lé lang luî dâkam é sû gi, Garai Gasâng é tánghkuq eq haú má zung é Sû lé lang luî dâkam é sû dùt bê nghut ri.
23 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, xunmân nghut é gau-tsáng shíngtón, bantsaí, hpakkyí pé mâ é xê gàmbùm ragàmbùm lé gi, byî nyì kômù, je ahkyàk é târâ nghut é, târâ ràp-rá hkyô, shogyo nhikmyin hkyô eq lhumzui hkyô pé lé gi, lhaî pyâm tô akô nghut ri. Hî lhum lé kut é su, htang lhum lé le kut râ lhê. 24 Hkyô-u she é myòqjìt pé ê! Núngmòq, pyup lé gi, jân pyám kômù, gola-uk lé gi, myui pyâm akô nghut ri.
25 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, zo hkoq shuq góm pé lé ahtoq shut za chî yúng mù, ahte má gi, lú zo lú shuq é eq yhûmsing maiwáng zàt é myìt byíng zan tô ri. 26 Hparishe myòqjìt pé ê! Zo hkoq shuq góm é ahte lé hí chî yúng pyám keq, haû jáng, ahtoq le sân-yúng râ nghut lhê.
27 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, bùt hpyu tô é lùp pé eq du akô; haú pé gi, ahtoq má wú yúng kôlhang, ahkaû má gi, màng bùp showui pé eq achaq achyut é chângjup byíng tô é nghut ri. 28 Haû eq rajung za, núngmòq gi, byu pê hí má, ahtoq pyâm díngmán é su kut shit kôlhang, ahkaû má gi, gègùn labyoq kut é eq agè ashop é hkyô pé byíng zan tô ri.
29 Gègùn labyoq nghut é, târâ sará pé eq Hparishe pé ê, núngmòq gi, dingnyé wó ri. Hkâsu mù gâ le, núngmòq gi, myìqhtoî pê é lùp lé lùptsuq tsuq kômù, díngmán bâng é lùp pé lé mhón byi kôluî, 30 ‘Ngá-mòq gi, ngá-mòq é îchyí îwâ pê é i-pyàt má nyì âng é ru nghut le gi, haû myìqhtoî pê é sui lhoqshun é bang má, ngá-mòq bo lòm râ a nghut.’ ga lhaq taî akô. 31 Haû su mù, núngmòq gi, haû myìqhtoî pé lé sat pyám bâng é awùt ashín pé nghut é hkyô lé, núngmòq gùng núngmòq sàksé hkâm yu nyi akô nghut ri. 32 Haû mù, núngmòq é îchyí îwâ pé hi tô é múzó lé, bànshoq châng kut pán keq!
33 Lhângmuì pé ê, dùq htân lhângmuì a-myû pé ê! Ngaraî mîng é dam byi hkyô mai, hkâsu wó hpang lùt kôrâ lhú? 34 Hau é yánmai, myìqhtoî pé, hpàqchyî bò bang eq chyúm sará pé lé, Ngò, núngmòq chyáng nhang kat râ nghut lhê. Haú bang mâ é ra-am lé gi, núngmòq lhom sat pyám mù, tapzîng má jén pyám kôrâ nghut lhê; ra-am lé gi, núngmòq é târâjong pé má, nhuq bàt kômù, wà mó rawà htâng rawà châng hkat zing-rî wún kôrâ nghut lhê. 35 Hau é yánmai, haû díngmán sû Abelaq é sui mai hî luî, noqkuq yhûm eq hkungga gyàp gyoro má núngmòq sat pyâm é, Berehki‑a é yhang zo Zehkariq é sui jé shoq, myìdàm htoq má shun pyâm é díngmán bang bànshoq é sui gi, núngmòq é ahtoq má jé lô râ nghut lhê. 36 Ngò, núngmòq lé teng za taí kôlé, shí hkyô bànshoq gi, i-pyàt shi é ahtoq má jé râ nghut lhê.
37 Yerusalem ê, Yerusalem ê, myìqhtoî pé lé sat pyám pyám kut mù, náng chyáng nhang kat é bang lé lùqgòk èq dú sat sat kut é wà mó nàng ê, wòqzìng gi, yhang zô pé lé, yhâng é dùng hkaû má tsîng lhûng yu é su, nungzô pé lé, Ngò, hkâ-myhó dâm shuî tsîng yù naù kôlhang, nàng a dóng nghut ri. 38 Wú keq, núngmòq é yhûm gi, núngmòq é matú chamchyuîyuì dùt pyâm to berâ nghut lhê. 39 Hkâsu mù gâ le, Ngò, núngmòq lé taí kôlé, ‘Yhûmsing é myìng mai jé lé lo é Sû gi, hkungsô wó nyî sháng gàq.’c ga, núngmòq a taí taí gi, Ngo lé wó myâng kôrâ a nghut lo.” gâ ri.