LUKAQ
é Gabú Danglù Laiká
(The Gospel of Luke)
1
Xânghpoq nge wó dik é sû Htohpiluq ê, ngá-mòq chyáng dùt laî lò bê hkyô pé lé, sânghi mai yhûmsing myòq èq yhang, myang é bang eq, mungdang wùn wàq é bang mai shap kyô gyó lô mù luî, 2 byù myo myo gi, shi-kùt luî kâ to bekô nghut ri. 3-4 Ngò le haú pé bànshoq lé awang mai ahpyo hpyot jíhkúm nùqgùq ho myî yù luî, nàng wó sê yu to bê hkyô pé gi, je lhoqgîng é dùt sháng gàq nghû, náng é matú bànshoq tok za kâ kat byi râ lé, ngò wó myìt ri.
Wuìmyhup Sará Yohan Hku Lé Lô Râ Gâ É Hkyô
5 Yuda mau má Herot hkóhkâm ùp é u lé, Abiya hkyangjong hpúng má Zehkariq ga sû hkyangjong rayùq nyi ri. Yhang myi gi, Arun a-myû mâ é, Elizabet ga sû nghut ri. 6 Haú nhik gi, Yhûmsîng Garaî é jep é târâ eq htûng târâ bànshoq lé, rago za cháng mù, Garai Gasâng é hí má díngmán é su nhik nghut akô. 7 Nghut kôlhang, Elizabet gi, baùdung dung sû nghut é yánmai, yháng nhâm gi, zodù a dàp kó. Yhángnhik gi, chyungxe i-pyàt le ko bekô nghut ri.
8 Ahkuî, Zehkariq gi, dum lhing hkyùq lo é hkyangjong mû lé, yhâng é hpúng eq rahá, Garai Gasâng é hí má lé zuî le, 9 haû Yhûmsing é noqkuq yhûm ahkaû má namngón hkungga ê wang nyhé râ matú, hká yùq nghut râ lé hkyangjông pê é htûngli eq rajung za byù hkyîn shosé she wú é hkûn, yhâng chyáng âng ri. 10 Haû mù yhang namngón hkungga lé nyhê é u lé, shiwa byù bànshoq gi, yhûmpán má, kyûdûng nyi akô.
11 Haú hkûn, Yhûmsîng Garaî é maumang lagyo gi, namngón jung nyhé hkungga gyàp é lòqyo hkyam má, Zehkariq lé, lé yàp shit ri. 12 Zehkariq gi, maumang lagyo haú lé myàng jáng, dan gyùq nyi ri. 13 Nghut kôlhang, maumang lagyo gi, “Zehkariq ê, hkâgyùq, náng é kyûdung dang lé Garai Gasang gyo byi bê. Haû mù luî, náng é yhûmsîng myhí Elizabet gi, náng é matú yùqzo rayùq hkû byi berâ nghut lhê; nàng gi, yhang lé Yohan nghû myhíng byi ra râ nghut lhê. 14 Yhang gi, náng é matú gabú hpo eq nguì ngón é hkyô dùt berâ nghut lhê. Yhang lé baû lo é yánmai, byù myo myo le gabú lo bùm berâ nghut lhê. 15 Hkâsu mù gâ le, yhang gi, haû Yhûmsîng Garaî é hí má ahko ahkáng wó mù luî, byù mó dùt râ sû nghut lhê. Yhang gi, tsibyiq wing eq nyhûn tô é î lé ge shuq râ sû a nghut; yhâng nû é ûnghkaû mai yhang, Chyoiyúng Sô èq byíng nyî râ sû nghut lhê. 16 Yhang gi, Isira-elaq yhang zo yhang shû pé myo myo lé, Yhûmsîng yhángmòq é Garai Gasâng chyáng lhing lò nhâng râ sû nghut lhê. 17 Îwâ pê é myìt nhiklhum lé gi, zô wui shut, nyo é a gyo bang lé gi, díngmán bâng é hpàqchyî hkyô shut lhing lò nhâng luî, haû Yhûmsîng jé lé râ matú hen tô é byù myû dùt nhâng râ matú, Yohan gi, Eliya é sô wum-o wó é eq, Yhûmsing é hí má e ló râ nghut lhê.” ga luî, yhang lé taî ri.
18 Haú hkûn, Zehkariq gi, “Haú hkyô lé ngò hkâsu kut wó sé râ lhú? Ngò le mâng byùq bê, ngá é yhûmsîng myhí le chyungxe i-pyàt ko bê.” ga luî, maumang lagyo lé tû taî ri.
19 Maumang lagyo haû gi, “Ngò gi, Garai Gasang eq rahá nyi é sû Gabri-elaq nghut lhê. Nang lé gabú danglù shî taî kyo aq ga luî, Yhang, ngo lé nhang kat é nghut lhê. 20 Ahkyíng jé jáng, ngá dang gi, gè gè dùt lò râ nghut lhê. Dang shí pé lé nàng a lùmjíng é yánmai, mû haû dùt lo é buìnyì jé shoq, nàng gi, nhut jìt byùq râ nghut lhê.” ga luî, yhang lé tû taî ri.
21 Haú u, shiwa byu pé gi, Zehkariq noqkuq yhûm ahkaû má haû í myáng shoq lúng byùq é hkyô lé láng maú nyi akô. 22 Zehkariq dum htoq lo le, dang a wó nyo byùq mù shiwa byu pé lé lòq lìk za lìk shit nyi ri. Haû mù luî, yhángmòq gi, noqkuq yhûm ahkaû má yhang myòqwùp shing-rán rajung jung myàng ang bê lé, wú sê yu akô nghut ri.
23 Ahkuî, Zehkariq gi, hkyangjong jong âng é buìnyì ngàp jáng, yhûm shut dum taû ló byùq bê. 24 Hau htâng má, yhâng é yhûmsîng myhí Elizabet gi, zogûng dùt lò mù luî, hká le a htoq é za lha-mó ngo hkyap yhúmhkaû má lúng byùq ri. 25 Haú hkûn, yhang gi, “Byu pê hí má ngò hui zô é hoq hpu hkyô lé, Garai Gasang gi, myàng byi luî, shî su dùt nhang é dông mai huî sêng pyám byî é buìnyì má, Yhang ge é hkyô lé, ngo lé tûn shit bê nghut ri.” ga taî ri.
Yesuq Hku Lé Lô Berâ Gâ É Hkyô
26 Ahkuî, Elizabet zogûng dùt é lha-mó hkyuq hkyap jé jáng, Garai Gasang gi, maumang lagyo Gabri-elaq lé Galile mau, Nazaret wà má nyi é, zo-myi gyíng rayùq chyáng nhang kat ri. 27 Zo-myi hau é myìng gi, Mariq gâ ri; yhang gi, Dawiq a-myû mâ é Yosep gá su èq dûng tô é zo-myi nghut ri. 28 Maumang haû gi, Mariq chyáng jé jáng, “Mariq ê, nguì ngón nyî sháng gàq; Nàng, hkungsô wó nyi ri; Haû Yhûmsîng Garai gi, nàng eq rahá nyi nyi ri ô!” ga taî ri.
29 Mariq gi, dang haû lé gyô sing nán mù, shî su gâ é dang gi, haí jung gá nau é nghut lhê lhú ga luî, myìt maú nyi ri. 30 Haú hkûn, haû maumang lagyo gi, “Mariq ê, hkâgyùq, nàng gi, Garai Gasâng é hí má myòqdong wó bê nghut ri. 31 Wú aq, nàng zogûng dùt lò mù luî, yùqzo rayùq bau râ nghut lhê. Yhâng é myìng lé gi, ‘Yesuq’ nghû luî, nàng myhíng byi ra râ nghut lhê. 32 Yhang gi, hpung bô sû dùt râ nghut mù, Myhang htáng htúm Su é Yhang zo gâ é hui râ nghut lhê. Yhûmsîng Garai Gasang gi, yhang lé, yhâng é îchyí îwa Dawiq é hkóhkâm tánghkuq lé, byi râ nghut mù luî, 33 Yhang gi, Yakup yhûma lé hkâ-nhám le ru ùp nyì râ nghut lhê. Yhâng é mîngdán le htum nghu é jòq râ a nghut.” ga luî, yhang lé taî ri.
34 Haú hkûn, Mariq gi, “Ngò gi, zo-myi gyíng ru nghut ashî, haû gi, hkâsu wó dùt râ lhú?” ga luî, maumang lagyo lé tû taî ri.
35 Haû maumang lagyo gi, “Chyoiyúng Sô náng é ahtoq má jé lé mù, Myhang htáng htúm Su é wum-o a-tsam gi, nàng lé shum gum to byi luî, haû baû lò râ Chyoiyúng sû lé gi, Garai Gasâng é Yhangzo ga kôrâ nghut lhê. 36 Hau htoq agó, wú aq, náng é a-myû suisho baùdung myhí Elizabet lháng, mang bê le yùqgè zo wun to bê. Ahkuî, zogûng dùt é lha-mó hkyuq hkyap wàng bê nghut ri. 37 Hkâsu mù gâ le, Garai Gasang a wó kut é haî le a jòq.” ga luî, yhang lé tû taî ri.
38 Haú hkûn, Mariq gi, “Yhûmsing é jùn myhí ngò nghut nyi lhê; náng é dang eq rajung za ngá chyáng dùt lò sháng gàq.” ga tû taî ri. Hau htâng, maumang lagyo gi, yhâng chyáng mai ló byùq bê.
Elizabet Lé Mariq Ê Huî É Hkyô
39 Hau htâng hkâ-í a myáng má, Mariq gi, Yuda mau bum mau mâ é wà rawà shut hân hân e ló luî, 40 Zehkariq é yhûm má wàng mù, Elizabet eq huî nyo lhûm ri. 41 Mariq é danghtê lé Elizabet wó gyo jáng, yhâng é ûnghkaû mâ é zoshâng gi, byam chyû lo ri. 42 Elizabet le, Chyoiyúng Sô byíng to mù luî, Mariq lé htê mó èq taî é gi, “Myiwe bànshoq má, nàng gi, hkungsô wó dik sû nghut ri. Náng é ûnghkaû mâ é zoshâng le hkungsô wó nyi ri ô! 43 Ngá Yhûmsing é yhâng nu ngá chyáng jé lé é jeju gi, hai é yánmai nghut bê lhú? 44 Wú aq, náng danghtê lé wó gyô kat jáng, ngá ûnghkaû mâ é zoshâng gi, gabú luî byam chyû nyi ri. 45 Haû Yhûmsîng taî é dang gi, gè gè dìk lò râ nghut lhê ga luî, lùmjíng é myiwe gi, hkungsô wó nyi ri.” gâ ri.
Mariq É Hkya-on Dang
46 Haú hkûn, Mariq gi,
“Ngá é i-myìt mai haû Yhûmsîng lé hkya-ôn nyi lhê,
47 ngá é sô le, Garai Gasang ngá é hkyi yù Sû má gabú nyi lhê.
48 Ngò Yhâng é jùn myhí myìt nyhum nyi é lé, Yhang myàng byi bê nghut ri.
Wú aq, ahkuî mai i-pyàt dedu má, ngo lé gi, hkungsô wó nyî sû, gâ nyì bekô râ nghut lhê.
49 hkâsu mù gâ le, Wum-o a-tsam mó bo é Garai Gasang gi, ngo lé maúhpo mû mó kut byi bê nghut ri,
Yhâng é myìng gi, chyoiyúng nyi ri ô.
50 Yhang lé gyùq hoq nyî bâng é ahtoq má, Yhang shogyo nhikmyîn é hkyô gi,
pyàt bán hkangmó jé shoq hkâ-nhám le jòq nyì râ nghut lhê.
51 Yhâng é wum-o bo é lòq èq maúhpo mû mó pé lé tûn shit bê.
Yhûmsîng myìt é hkyô má nghutbûn nyi é bang lé, Yhang lhoqpyo pyám bê.
52 Zaugun sûwún wuî lé gi, zau zûng tánghkuq mai lhoqhkyô pyám mù,
i‑myìt nyhûm bang lé gi, lhoqmyhâng bê nghut ri.
53 Zò-mut hui bang lé gi, ge é zoshuq gyi shoq byi tso mù,
sùtzè wó bang lé gi, akôm nhang kat bê nghut ri.
54-55 Ngá-nhûng é îchyí îwâ pé lé taî tô é dang eq rajung za, Abraham eq yhang zo yhang shû pé lé,
hkâ-nhám le shogyo nhikmyîn nyì râ gâ é lé myìtbûn nyi é yánmai,
Yhâng é duìnhâng zoshâng Isira-elaq byu pé lé hku baú nyi ri.”
ga luî, taî ri.
56 Mariq gi, Elizabet chyáng lha-mó sum hkyap kô nyì mù luî, yhûm shut dum taû ló byùq bê.
Wuìmyhup Sará Yohan Baû É Hkyô
57 Hau htâng, Elizabet gi, zoshâng hkû râ buìnyì jé mù, yùqgè zo bau bê. 58 Yhang lé haû í kô é jeju Yhûmsîng tûn shit é hkyô lé, yhâng é yhûmkyo buìnùm wuì eq mùng mòq gu-mang wuì wó gyo kôjáng, yhang eq rahá gabú nyi akô.
59 Ahkuî shit nyí jé jáng, yhángmòq gi, zoshâng haû lé ahpyo-kuq hpyit byi râ matú lé kôluî, yhâng wâ é myìng eq rajung za, Zehkariq ga myhíng byi râ haq htung akô. 60 Nghut kôlhang, yhâng nu gi, “A nghut, Yohan nghû shèq myhíng râ nghut lhê.” ga tû taî ri.
61 Yhángmòq gi, “Náng é a-myû suisho má le, haû su gâ é myìng rayùq le a bo wú shi.” ga luî, yhang lé taî akô.
62 Haú hkûn, zoshâng haû lé hkâsu nghû myhíng nau lhê làq ga, yhâng wa lé lòq lìk lìk shit mù myî akô. 63 Zehkariq gi, kâ jung longpá dûng yù mù, “Yhâng é myìng gi, Yohan nghut lhê.” ga kâ shit ri. Haû mù, lhúnglhâng bang gi, maú byùq bum akô. 64 Haú hkûn jáng, Zehkariq gi, nhuthkum bóng lô mù, dang wó nyô luî, Garai Gasang lé hkya-ôn nyi ri. 65 Haû su dùt é hkyô lé, wó gyô é awui ayàm lhînghkyùq mâ é lhúnglhâng bang gi, gyùq maú byùq bùm kômù, Yuda mau bum mau ra-mau gón taî pyo ló bum akô. 66 Wó gyô é lhúnglhâng bang gi, haú hkyô lé yhûmsing é i‑myìt ûnghkaû má kat to mù, “Zoshâng shî gi, hkâsu dùt lò râ sû nghut lhê lhú?” ga myìt wú nyi akô. Haî mù gâ le, haû Yhûmsing é lòq gi, yhang eq rahá nghut nyi é yánmai nghut ri.
Zehkariq É Myìqhtoi Dang
67 Haú hkûn, zôshang é yhâng wa Zehkariq gi, Chyoiyúng Sô byíng lô mù, myìqhtoi dang dông taî é gi,
68 “Haû Yhûmsîng, Isira-elaq é Garai Gasang lé hkya-on sháng ô!
Haî mù gâ le, Yhang gi, Yhâng é a-myû lé, lé kûm wú mù luî, lé hkyi yù bê nghut ri.
69 Garai Gasang gi, Yhâng é duìnhâng zoshâng, Dawiq é a-myû mai ngá-nhûng é matú
wum-o bo é hkyi yu é hkyuîb lé, yùq htoq lô nhâng bê.
70 Shí hkyô gi, a‑nham pyàt mai yhâng é chyoiyúng myìqhtoî pê é nhut mai taî tô é eq rajung za nghut ri.
71 Haû hkyuî gi, ngá-nhúng lé ngá-nhûng é gye pê chyáng mai le, a nguì a naù bang bànshoq é lòq mai le, hkyi yù râ nghut lhê.
72 Îwa Garai gi, ngá-nhûng é îchyí îwâ pé lé shogyo nhikmyin hkyô lé tûn shit râ matú, Yhang byî tô é chyoiyúng dangshikaq lé a tô-myhí nghut ri.
73 Haû gi, ngá-nhûng é chyi ké Abraham lé danghtum htûm tô é nghut lhê.
74-75 Ngá-nhúng lé gye pê lòq mai hkyi yù râ eq, ngá-nhúng chyungxe dui tô é buìnyì bànshoq má,
Yhâng é hí má a gyùq a kyum é za, chyoiyúng é eq díngmán é hkyô mai,
Yhang lé wó dójaú nyî nhâng râ matú, Yhang jé lé é nghut lhê.
76 Ngá zo ê, nàng gi, Yhûmsing é hí má, e ló mù luî, Yhâng é hkyô lé hen lajang byi râ sû nghut é yánmai,
nang lé Myhang htáng htúm Su é myìqhtoi ga kôrâ nghut lhê.
77 Nàng gi, Garai Gasâng é byu pé lé, yhángmòq é yubàk mara hkyut pyám byî é dông,
hkyi yu é hui râ hkyô lé taî kyo râ sû nghut lhê.
78 Haî mù gâ le, Garai Gasâng é shogyo nhikmyîn é yánmai, nàpsûn buìc gi, mauhkûng mai ngá-nhûng chyáng htoq lé lô râ nghut lhê.
79 Yhang gi, mauchut hkaûd eq shî wùp hkaû má lúng to bang lé buìloq su dùq bó byi râ eq,
ngá-nhúng lé nguì ngón yùqyò hkyô shut shuî e ló râ sû nghut lhê.” gâ ri.
80 Zoshâng haû gi, kô lò mù, sô wum-o bo lò luî, Isira-elaq byu pê chyáng htoq shit lo é buìnyì jé shoq, yòso pé má nyi nyi ri.