Yesuq, Namngón xû Bùt Byi Huî É Hkyô
12
Haû Lhoqlhai Poî jé râ hkyuq nyí râ ashî hkûn, Yesuq gi, Yhâng èq shi é mai lhoqdui toq yu é sû, Lazaruq nyi é Behtani wà má ló jé ri.
Yohan 12:1-19
2 Haú má, Yesuq lé hkúnggâ é dông myínzang byi tsô akô; Mahtaq gi, zoshuq jaú ri; Lazaruq gi, haû Yesuq eq rahá zanggyap má zô zung nyì bang mâ é rayùq nghut ri. 3 Haú hkûn, Mariq gi, haû naridu a-myìt mai za saî yu é, gyai hpaû é namngón xû raxe í rûng kô yu lé mù, Yesuq é hkyî má hut gyun byi luî, yhâng é uxam èq sut byî ri. Haû mù, yhûm haû gi, namngón xû shôm byíng to bê nghut ri.
4 Nghut kôlhang, Yesuq lé àp pyám râ nghut é, Yhâng é chángzo rayùq nghut sû, Yudaq Isikarut gi, 5 “Haû myùng bang lé byî pyám râ matú, haû namngón xû lé denari súm sho èq haî mù a ûng pyâm é lhú?” ga taî ri. 6 Yhang haû su ga taî é gi, myùng bang lé chiq byî é yánmai taî é a nghut, yhang gi, ngùn htûng chûng sû nghut luî, haú má kat tô é ngùn lé, yhûmsing é matú lhaq yu chûng chûng kut é, hkau sû nghut é yánmai taî é nghut ri.
7 Yesuq gi, “Nghut sháng gàq; yhang gi, Ngo lé myhup yhum râ buìnyi é matú, namngón xû shî lé hkong to byî é nghut lhê. 8 Haû myùng bang gi, núngmòq eq rahá hkâ-nhám le nyì râ nghut lhê; nghut kôlhang, Ngò gi, núngmòq eq rahá ayang nyi nyì râ sû a nghut.” ga tû taî ri.
9 Haú u lé, Yudaq byu pé ajùm ayò gi, haú má Yesuq nyi é lé sé kôluî, lé lo akô; haú bang gi, Yesuq é yánmai za lé kô é a nghut, haû Yhâng èq shî bê mai lhoqdui toq yu é Lazaruq lé, lé myâng naù kô é yánmai le nghut ri. 10 Haû mù, haû hkyangjong agyi pé gi, Lazaruq lé le, sat pyám râ matú chôm hpyê lhûm akô. 11 Hkâsu mù gâ le, yhâng é yánmai, haû Yudaq byu pé myo myo gi, Yesuq chyáng lhing ló kômù, Yhang lé lùmjíng bûm kô é yánmai nghut ri.
Yesuq, Yerusalem Wà Mó Má Wang E Ló É Hkyô
12 Hau htang nyí, haû Poî má lé jé é byù mòqmó gi, Yerusalem wà mó shut Yesuq jé dòq ló é hkyô lé, wó gyô bum akô. 13 Haû mù, yhángmòq gi, byùm-haq pé yu chûng mù, Yhang lé ê tê uchyang,
“Hosana!a
Haû Yhûmsing é myìng mai jé lé lo é Sû gi, hkungsô wó nyî sháng gàq ô!
Haû Isira-elaq byu pê é Hkóhkâm gi, hkungsô wó nyî sháng gàq!”b
15 haû gi, “Zi-un byìzoc ê, hkâgyùq; wú keq, núngmòq é hkóhkâm gi, loze zo má ji mù lé lo nyi ri.”d
ga, kâ tô é eq rajung za nghut ri.
16 Haú pé bànshoq lé, Yhâng é chángzô pé gi, sânghi lé a sê gyo kó; nghut kôlhang, Yesuq gi, hpungwup shingkang dan hu huî é htâng má za shèq, haú pé gi, Yhang eq séng luî kâ tô é hkyô lé le, haû eq rajung za, Yhang lé, yhángmòq mai kut bê hkyô lé le, bûn sê kat akô nghut ri.
17 Haû Yesuq gi, lùp hkaû mâ é Lazaruq lé wùt luî, shi é mai lhoqdui toq yu é hkûn, Yhang eq rahá nghut é shiwa hpúng gi, haú hkyô lé, sàksé hkám byî nyi akô. 18 Haû mù, byù myo myo gi, Yesuq tûn shit é maúhpo alhô agàn hau é hkyô lé, wó gyo kô é yánmai, Yhang lé hui râ matú htoq e akô. 19 Hau é yánmai, haû Hparishe pé gi, “Wú keq, ngá-nhúng, hkâsu yhang a ge kut lo nhung! Haû mingkan gón gi, Yhâng htâng châng bùm bekô.” ga, rayùq eq rayùq taî lhûm bum akô nghut ri.
Yesuq, Yhang Shî Râ Hkyô Lé Te Taî É Hkyô
20 Haú hkûn, noqkuq râ matú Poî má dòq ló é bang má, Grik pé ra-am le bo tô akô.
Yohan 12:20-50
21 Yhángmòq gi, Galile mau, Bet‑saida wà mó mâ é Hpilip chyáng lé jé kômù, “Âhkaú ê, ngá-mòq gi, Yesuq lé myàng nau ri.” ga, dûng tôngbán akô. 22 Haû mù, Hpilip gi, Andire lé, ê taî kyô ri; Andire eq yhángnhik gi, Yesuq lé, ê taî kyô akô.
23 Haû mù, Yesuq gi, “Haû Byu Yhangzo gi, hpungwup shingkang dan hû é hui râ matú, ahkyíng jé bê nghut ri. 24 Ngò, núngmòq lé teng za taí kôlé, súngsô racham gi, myigùng má gyó luî, shi byùq é za a nghut jáng, acham roq za dùt nyì râ nghut lhê. Nghut kôlhang, shi byùq é nghut le gi, ashi myo myo lhoqhtoq râ nghut lhê. 25 Haû yhûmsing é chyungxe lé chyitdàp é sû gi, chyungxe sûm byùq râ nghut lhê. Mingkan shî má, haû yhûmsing é chyungxe lé a naù a wôm é sû kúm gi, ahtum abyùq é chyungxê é matú, yhûmsing é chyungxe lé wó sing to râ nghut lhê. 26 Ngo lé dójaú é sû ó yùq nghut kôle, Ngá htâng cháng râ lhê; Ngò, hká má nyi le, Ngá é duìnhâng zoshâng le nyì râ nghut lhê. Ngá wa gi, haû Ngo lé dójaú é sû lé, shigyaú râ nghut lhê.
27 Ahkuî, Ngò, myìt wuîhkê nyi ri; Ngò hkâsu nghû taí râ lhí? ‘Âwa ê, ahkyíng shî mai Ngo lé lhoqlhut yù laq.’ nghû taí râ lhú? Nghut kôle, Ngò gi, ahkyíng shi é matú za shèq jé lé é ru nghut lhê. 28 Âwa ê, Náng é myìng lé hpungwup shingkang dan hu nhâng àq hkoi!” ga taî ri.
Haú hkûn, “Ngò gi, Ngá é myìng lé hpungwup shingkang dan hu nhâng bê nghut luî, dum dan hu nhâng shirâ nghut lhê.” gâ é htê, mauhkûng mai htoq lo ri. 29 Haú má nyi tô é byù mòqmó gi, haú lé wó gyo kôjáng, “Maugum gûm ri.” gâ bum akô; ra-am gi, “Yhang lé, maumang lagyo rayùq nyo ri.” ga taî bum akô nghut ri.
30 Haú hkûn, Yesuq gi, “Danghtê shî gi, Ngá é matú a nghut, núngmòq é matú ru nghut lhê. 31 Ahkuî gi, mingkan shî lé jéyáng râ ahkyíng nghut bê; mingkan shi é zau gi, ahkuî hkat htoq pyâm é hui râ nghut lhê. 32 Nghut kôlhang, Ngò gi, myigùng mai tu shap kat é huî é hkûn, byù lhúnglhâng bang lé, Ngá chyáng she yù râ nghut lhê.” ga taî ri. 33 Yhang haû su ga taî é gi, Yhang hkâsu kut shî râ nghut é hkyô lé shit é nghut ri.
34 Haú hkûn, haû byù mòqmó gi, “Haû târâ laiká má, Hkrisidùq gi, ahtum abyùq dui nyì râ nghut lhê gâ é lé shèq, ngá-mòq wó gyô wú é ru nghut le nhîng, ‘Haû Byu Yhangzo gi, tu shap é hui ra râ nghut lhê.’ nghû, Nàng hkâsu kut wó taî lhê lhú? Haû Byu Yhangzo gi, ó yùq nghut lhê lhú?” ga, myî akô.
35 Haû mù, Yesuq gi, yhángmòq lé, “Núngmòq chyáng, haû maubó jòq nyì râ ahkyíng gi, a lûm myáng lo nghut ri. Mauchut gi, núngmòq chyáng a hkyit jé sháng gàq, núngmòq chyáng, haû maubó jòq nyi ashî hkûn sô nyì keq; hkâsu mù gâ le, haû mauchut má sô nyi é sû gi, yhang hká shut e ló nyi é lé, a sé nghut ri. 36 Núngmòq gi, maubó é yhang zô pé wó dùt kó sháng gàq, haû maubó jòq nyi ashî hkûn, haû lé lùmjíng keq.” ga taî ri. Yesuq gi, dang haû ban taí jáng, yhángmòq chyáng mai htoq ló luî, haq byùq bê nghut ri.
Yudaq Byu Pé, A Lùmjíng Ru Dùt Nyî Kô É Hkyô
37 Yesuq gi, yhángmòq é hí má, maúhpo alhô agàn haú pé bànshoq kut shit kôlhang, yhángmòq gi, Yhang lé a lùmjíng shi kó nghut ri. 38 Haû gi,
“Yhûmsîng ê, ngá-nhûng é danglù lé, ó yùq wá lùmjíng byî wú é lhú? Haû Yhûmsing é lòqe gi, ó yùq lé htoq shit wú é lhú?”f
ga, myìqhtoi Esai-a taî tô é dang lo dik é nghut ri.
39 Yhángmòq a wó lùmjíng kô é hkyô gi, Esai-a taî é dang má,
40 “Yhang gi, yhángmòq é myòqjí lé lhoqchit byi luî, yhángmòq é i‑myìt lé lhoqhtan to byi bê nghut ri;
haû mù, yhángmòq gi, myòqjí èq a wó myâng, i‑myìt èq a wó sê gyo, Ngò, yhángmòq lé yâ ge byi râ matú, a wó lhing taû lò kó dùt râ nghut lhê.”g
ga le bo tô é yánmai nghut lhê. 41 Esai-a gi, Yesuq é hpungwup shingkang lé myang é yánmai, Yhang eq sêng é hkyô lé, haû su ga taî é nghut ri.
42 Nghut kôlhang, haû ùphkâng bang myo myo lháng gi, haú u má, Yesuq lé lùmjíng bum akô. Nghut kôle, yhángmòq gi, Hparishe pê èq târâjong mai lhoqhtoq pyâm é hui râ lé, gyùq kô é yánmai, yhángmòq lùmjíng bê hkyô lé a yín yu bùm kó nghut ri. 43 Hkâsu mù gâ le, yhángmòq gi, Garai Gasâng chyáng mâ é xânghpoq nge wó hkyô lé, ô nau é htoq má, byu pê chyáng mâ é xânghpoq nge wó hkyô lé, je ô naù kô é yánmai nghut ri.
44 Haû mù, Yesuq, htê mó èq taî é gi, “Ngo lé lùmjíng é sû gi, Ngo lé baú lùmjíng é a nghut; haû Ngo lé nhang kat é Sû lé le, lùmjíng é nghut lhê. 45 Ngo lé myang é sû gi, haû Ngo lé nhang kat é Sû lé le myang é nghut lhê. 46 Ngò gi, Ngo lé lùmjíng é sû ó yùq le, mauchut hkaû má a nyì sháng gàq nghû, maubó dông mingkan má lé jé é nghut lhê.
47 Ngò gi, Ngá é dang lé wó gyo luî, a châng é sû ó yùq lé le, jéyáng râ a nghut; hkâsu mù gâ le, Ngò gi, mingkan lé jéyáng râ matú jé lé é a nghut; haû mingkan lé hkyi yù râ matú shèq, jé lé é ru nghut lhê. 48 Ngo lé he-ngìk luî Ngá é dang lé a hàp yu é sû lé, jéyáng râ Sû rayùq nyi lhê; Ngò taî é danghkun haû gi, haû jihtûm buìnyì má, haú yùq lé mara byi râ nghut lhê. 49 Hkâsu mù gâ le, Ngò gi, Ngá é myìt dông taî é a nghut; nghut kôlhang, Ngò haî taí râ eq hkâsu nghû taí râ lé gi, haû Ngo lé nhang kat é sû Îwa mai, Ngo lé hkunmó hkyô to bê nghut lhê. 50 Haû Yhâng é hkunmó gi, ahtum abyùq é chyungxe nghut é lé, Ngò sê lhê. Haû mù luî, Ngò, haî taí kôlé, haû Îwa mai Ngo lé taî kyô é lé za, taî é nghut lhê.” gâ ri.