Chángzô Pê É Hkyî Chi Byî É Hkyô
13
Haû Lhoqlhai Poî jé râ hí má za, Yesuq gi, Yhang, mingkan shî mai Yhâng Wâ chyáng htòt ló râ ahkyíng jé bê hkyô lé, sê ri. Yhang gi, mingkan má nyi é, Yhâng é byu pé lé chyitdàp nyi é nghut luî, jihtûm jé shoq Yhâng é chyitdàp myìt lé shit râ nghut lhê.
Yohan 13:1-17
2 Myínzang zô nyi bùm kô é u lé, nàt Tsádán gi, Simûn é yhang zo Yudaq Isikarut chyáng, Yesuq lé àp pyám râ myìt kat byî to gû nghut ri. 3 Yesuq gi, haû lhúnglháng lé Îwa mai Yhâng é lòq má àp byî to bê nghut é lé le, Yhang gi, Garai Gasâng chyáng mai lé é sû nghut luî, Garai Gasâng chyáng dum taû ló râ sû nghut é lé le, sê ri. 4 Haû mù, Yhang gi, zohpoq mai toq luî, Yhâng é bumó lé hkyut pyám mù, hpyidum má hpajèt ralhûm èq hpyihit hit tô ri. 5 Hau htâng, Yhang gi, lànghkang má ûchyam hut kat mù, Yhâng é chángzô pê é hkyî chi byi luî, haû Yhâng é hpyidum má hit tô é hpajèt èq sut huí byî ri.
6 Yhang gi, Simun Petiruq chyáng jé jáng, Simun Petiruq gi, “Yhûmsîng ê, Nàng gi, ngá hkyî lé chi byi râ nghut lhê lhú?” ga myî ri.
7 Haú hkûn, Yesuq gi, “Ngò, haî kut nyi é hkyô lé, ahkuî, nàng sê gyo râ a nghut; nghut kôlhang, htâng má sê gyo râ nghut lhê.” ga tû taî ri.
8 Petiruq gi, “Ngá hkyî lé, Nàng, hkâ-nhám le wó chi byi râ a nghut.” ga taí jáng, Yesuq gi, “Nang lé, Ngò a chi byî é nghut jáng, nàng gi, Ngò eq séng râ a nghut.” ga tû taî ri.
9 Haú hkûn, Simun Petiruq gi, “Yhûmsîng ê, haû su nghut jáng gi, ngá é hkyî lé baú za a nghut, ngá é lòq eq ulhum lé le chi byi laq!” ga tû taî ri.
10 Yesuq gi, “Gùng chi bê sû gi, hkyî za chi jáng, ragùngdû é sanséng bê nghut ri. Núngmòq gi, sanséng bekô; nghut kôlhang, yùq hkangmó gi, sansêng é a nghut.” ga tû taî ri. 11 Hkâsu mù gâ le, Yhang gi, Yhang lé àp pyám râ sû ó yùq nghut é lé, sê é yánmai, “Núngmòq gi, sansêng é bang chyat a nghut.” ga taî é nghut ri.
12 Yesuq gi, yhángmòq é hkyî lé ban chi byi jáng, Yhâng é bumó lé wùt mù, Yhâng é jowò má ló dum zùng luî, yhángmòq lé myî é gi, “Núngmòq gi, ahkuî, ngò kut byî é hkyô lé, sê gyô akô lhú? 13 Núngmòq, Ngo lé, ‘Sará’ ga le, ‘Yhûmsîng’ ga le, wùt kô é gi, a shut; hkâsu mù gâ le, Ngò gi, haú yùq yhang nghut lhê. 14 Ngò, núngmòq é Sará eq Yhûmsîng nghut sû lháng, núngmòq é hkyî lé chi byî é nghut le gi, núngmòq le, rayùq eq rayùq é hkyî lé chi byî lhum râ dùt lhê. 15 Núngmòq gi, Ngò, núngmòq lé kut byî é su kut kó sháng gàq nghû, Ngò, núngmòq lé alìk kut shit tô é nghut lhê. 16 Ngò, núngmòq lé teng za taí kôlé, duìnhâng zoshâng gi, yhûmsîng htoq je kô é a nghut; lagyo gi, nhang kat é sû htoq je kô é a nghut. 17 Ahkuî, núngmòq gi, haú pé lé sé bekô nghut luî, châng kut kô é nghut jáng, hkungsô wó kôrâ nghut lhê.
Yesuq Lé Ap Pyám Râ Lé, Te Taî É Hkyô
18 Ngò gi, núngmòq bànshoq bang lé lhoq-ang luî taî é a nghut; Ngò hkyin yu é bang lé gi, Ngò sê lhê. Nghut kôlhang, ‘Haû ngá é mùk lé bo zô é sû gi, yhâng é hkyîhtáng la-nhik èq ngo lé nâng htîng ri.’a gâ é Chyúmdang lé, lhoqdìk râ matú ru nghut lhê.
Yohan 13:18-38
19 Haû a dùt htoq shi-má, Ngò, núngmòq lé taî kyô nyi é gi, haû dùt é hkûn, Ngò gi, haú Yùqb nghut é lé, núngmòq wó lùmjíng kôrâ matú nghut lhê. 20 Ngò, núngmòq lé teng za taí kôlé, Ngò nhang kat é sû lé, lhom hàp yu é sû ó yùq nghut kôle, Ngo lé hàp yu é nghut bê; Ngo lé hàp yu é sû ó yùq nghut kôle, haû Ngo lé nhang kat é Sû lé hàp yu é nghut bê.” gâ ri.
21 Yesuq gi, haû su ga taî é htâng má, myìt wuîhkê nyì mù, sàksé hkâm é gi, “Ngò, núngmòq lé teng za taí kôlé, núngmòq mâ é rayùq sû gi, Ngo lé àp pyám râ nghut lhê.” gâ ri.
22 Haû mù, Yhâng é chángzô pé gi, ó yùq lé taî záng nyi é hkyô lé, rago a sé kô é yánmai, rayùq eq rayùq wú tsuq lhûm bum akô nghut ri. 23 Haû Yesuq chyitdàp é chángzo rayùq gi, Yesuq é tanghkoí nâm má lèq nge zung tô ri. 24 Haû mù, Simun Petiruq gi, chángzo haú yùq lé, lòq lìk kat mù, “Yhang, ó yùq lé lhoq-ang luî, taî nyi é hkyô lé, myî wú aq.” ga taî ri.
25 Haû mù, chángzo haû gi, Yesuq é tanghkoí má saî lèq nge zùng mù, “Yhûmsîng ê, haû gi, ó yùq nghut lhê lhú?” ga, Yhang lé myî ri.
26 Yesuq gi, “Ngò, mùk jàp zo shî lé jum yù mù, byî é sû gi, haú yùq nghut lhê.” ga tû taí luî, mùk jàp zo haú lé jum yù mù, Simun é yhang zo Yudaq Isikarut lé byî ri. 27 Yudaq gi, mùk haû lé yù zô kat é eq, Tsádán gi, yhâng chyáng wàng bê nghut ri.
Haû mù, Yesuq gi, “Nàng kut râ é hkyô lé, hân kut àq hkoi.” ga yhang lé taî kat ri. 28 Nghut kôlhang, yhang lé, Yesuq haû su ga haî mù taî é hkyô lé, zohpoq haú má nyi tô é bang gi, rayùq lháng a sê gyo kó nghut ri. 29 Haû Yudaq gi, ngùn zùm sû nghut é yánmai, ra-am gi, haû Poî má râ é hkyô lé, ê wuî râ matú, Yesuq taî ri ga luî le, myùng bang lé rajung jung byí nhang ri ga luî le, myìt yu bum akô nghut ri. 30 Yudaq gi, mùk haû lé lhom yù eq, htoq ló byùq bê nghut ri. Haú u gi, mauchut bê nghut ri.
Petiruq He-ngìk Pyám Râ Lé, Yesuq Te Taî É Hkyô
31 Haú yùq htoq ló byùq jáng, Yesuq taî é gi, “Ahkuî, haû Byu Yhangzo gi, hpungwup shingkang dan hû é nghut luî, Garai Gasang gi, haû Byu Yhangzô é yánmai, hpungwup shingkang dan hu bê nghut ri. 32 Garai Gasang gi, haû Byu Yhangzô é yánmai, hpungwup shingkang dan hû é nghut jáng, Yhang le, Yhang má haû Zo lé hpungwup shingkang dan hu nhâng râ nghut lhê; radá dâm dan hu nhâng râ nghut lhê.
33 Ngá zô pé ê, Ngò, núngmòq eq rahá nyì râ gi, razùp za ru nghut alô. Núngmòq gi, Ngo lé hô kôrâ nghut lhê; nghut kôlhang, ‘Ngò ló é jang má, núngmòq wó jé kôrâ a nghut.’ nghû, haû Yudaq byu pé lé, Ngò taî é eq rajung za, ahkuî, núngmòq lé le, Ngò taî lhê.
34 Ngò, núngmòq lé, hkunmó asik byî to kô lé, núngmòq yhangchang chyitdàp lhum keq. Ngò, núngmòq lé chyitdàp é su, núngmòq yhangchang chyitdàp lhum râ dùt lhê. 35 Núngmòq yhangchang chyitdàp lhum kô é nghut jáng, núngmòq gi, Ngá é chángzô pé nghut é hkyô lé, byù lhúnglhâng bang sé kôrâ nghut lhê.” gâ ri.
36 Haú hkûn, Simun Petiruq gi, “Yhûmsîng ê, Nàng, hká shut ló râ lhú?” ga, Yhang lé myi jáng, Yhang gi, “Ngò ló é jang má, núngmòq, ahkuî a wó cháng kôrâ nghut lhê. Nghut kôlhang, htâng má gi, núngmòq cháng ra kôrâ nghut lhê.” ga tû taî ri.
37 Petiruq gi, “Yhûmsîng ê, haî mù luî, ahkuî ngò Náng htâng a wó châng é lhú? Ngò gi, Náng é matú, shî hkám râ rì rì nghut lhê.” ga taî ri.
38 Haû mù, Yesuq taî é gi, “Nàng gi, gè gè yhang, Ngá é matú shî hkám râ lhú? Ngò, nang lé teng za taí lé, wòq a tûn shi-má, nàng, Ngo lé sum dâm he-ngìk pyám râ nghut lhê.