Lazaruq Shi Byùq É Hkyô
11
Ahkuî, Lazaruq gâ é byù rayùq gi, no nyi ri. Yhang gi, haû Mariq eq yhâng nhá Mahtaq nhik nyi é Behtani wà mâ é sû nghut lhê.
Yohan 11:1-16
2 Mariq haû gi, Yhûmsîng lé namngón xû hut gyun luî, hkyî má yhâng xam èq sut byî é sû nghut ri; yhang gi, haû no nyi é Lazaruq é yhâng nhá nghut ri. 3 Haû mù, haû yhâng nhâ nhik gi, “Yhûmsîng ê, Nàng chyitdàp é sû gi, no nyi ri.” ga, Yesuq chyáng ê taí nhang akô.
4 Yesuq gi, dang haû lé wó gyo jáng, “Nòhpyo haû gi, shî‑nò a nghut. Haû Garai Gasâng é Yhangzo gi, hau é yánmai, hpungwup shingkang wó dan hû é hui sháng gàq ga, Garai Gasâng é hpungwup shingkâng é matú dùt é ru nghut lhê.” ga taî ri. 5 Yesuq gi, Mahtaq eq yhang gu Mariq lé le, Lazaruq lé le, chyitdàp ri. 6 Haû su mù, Yhang gi, haû Lazaruq no nyi ri gâ é lé, wó gyô é hkûn, haû Yhang nyi é jowò má, í nyí nyi tô ashî nghut ri.
7 Hau htâng, Yhang gi, Yhâng é chángzô pé lé, “Ngá-nhúng gi, Yuda mau shut dum taû ló sháng.” ga taî ri.
8 Haú hkûn, yhángmòq gi, “Rabai ê, hkûyòq za, haû Yudaq byu pé, Nang lé lùqgòk èq dú sat râ da kô é nghut le nhîng, ahkuî, haú shut dum taû ló râ lhú?” ga Yhang lé myî akô.
9 Yesuq gi, “Nyí gi, hkyíng hkum raxe í hkum bo lhê a nghut kó lhú?a Nyí má hkyô sô é sû gi, mingkan shi é maubó é yánmai myòq myàng luî, lèqbàt râ a nghut. 10 Myín lé hkyô sô é sû kúm gi, maubó lé a wó é yánmai, lèqbàt lhê.” ga tû taî ri.
11 Haû su ga taî é htâng má, Yhang, yhángmòq lé xoq taî kyô é gi, “Ngá-nhûng é luzúm Lazaruq yhup myhî byùq bê nghut ri; nghut kôlhang, Ngò gi, yhang lé ê nhaû toq râ nghut lhê.” gâ ri.
12 Haú hkûn, Yhâng é chángzô pé gi, “Yhûmsîng ê, yhang yhup myhî tô é nghut le gi, ge lò râ nghut lhê.” gâ taî akô. 13 Yesuq gi, Lazaruq shi byùq bê hkyô lé taî é nghut ri; nghut kôlhang, Yhâng é chángzô pé gi, gè gè yhup myhî tô é lé taî é su ngam pyâm akô nghut ri.
14 Haû mù luî, Yesuq, yhángmòq lé san za jâng taî kyô é gi, “Lazaruq gi, shi byùq bê nghut lhê. 15 Ngò haú má a nyi záng é gi, núngmòq wó lùmjíng râ matú nghut luî, núngmòq é matú Ngò gabú byî ri; yhâng chyáng e ló sháng hkoi.” gâ ri.
16 Haû mù, haû Zozûm le gâ é Htomaq gi, gótû chángzô pé lé, “Ngá-nhúng le, Yhang eq rahá shî sháng gàq, châng e ló sháng.” ga taî ri.
Haû Î‑nhâ Nhik Lé, Yesuq Nhiktîng É Hkyô
17 Yesuq gi, jé e é hkûn, haû Lazaruq lé lùp má kat pyâm é myi nyí nghut bê hkyô lé, lhom taî kyô akô.
Yohan 11:17-57
18 Behtani wà gi, Yerusalem wà mó eq í déng kô za wê lhûm ri. 19 Haû mù, Yudaq byu pé myo myo gi, Mahtaq eq Mariq nhik é yhang gu shi byùq é yánmai, nhiktíng byi kôrâ ga lé jé nyi bum akô nghut ri. 20 Mahtaq gi, Yesuq jé lé lo é hkyô lé wó gyo jáng, htoq ê mù, Yhang lé ê huî ri; nghut kôlhang, Mariq gi, yhûm má nyi tô ri.
21 Mahtaq gi, Yesuq lé, “Yhûmsîng ê, Nàng, shî má nyi tô é ru nghut le gi, ngá gu shi byùq râ a nghut. 22 Nghut kôlhang, ahkuî le, Garai Gasâng chyáng Nàng haî dung kôlhang, Yhang byi râ nghut é lé, ngò sê lhê.” ga taî ri.
23 Yesuq gi, yhang lé, “Nunggu, dum dui toq râ nghut lhê.” ga taî ri.
24 Haú hkûn, Mahtaq gi, “Haû jihtûm buìnyì má dum dui toq é hkûn, yhang le dum dui toq râ nghut é lé, ngò sê lhê.” ga tû taî ri.
25 Haú hkûn, Yesuq gi, yhang lé, “Ngò gi, dum dui toq hkyô eq chyungxe nghut lhê. Ngo lé lùmjíng é sû gi, shi byùq kôlhang, dum duì râ nghut lhê. 26 Chyungxe dui nyì luî, Ngo lé lùmjíng é sû ó yùq nghut kôle, hkâ-nhám le shi é hui râ a nghut. Nàng gi, dang shî lé lùmjíng lhê lhú?” ga taî ri.
27 Haú hkûn, yhang gi, “Yhûmsîng ê, ngò lùmjíng lhê. Nàng gi, haû mingkan má jé lé lô râ nghut é, Garai Gasâng é Yhangzo, Hkrisidùq b nghut é lé, ngò lùmjíng lhê.” ga, Yhang lé taî kyô ri.
28 Yhang gi, haû su ga taî é htâng má, taû ló mù, yhang gu Mariq lé, tsik za wùt yù luî, “Haû Sará jé tô ri; Yhang gi, nang lé myî nyi ri.” ga taî kyô ri. 29 Mariq gi, haû lé wó gyo jáng, hân za toq mù, Yesuq chyáng ê bê nghut ri. 30 Haú u lé, Yesuq gi, haú wâ hkaû má a wang ló shî é za, Mahtaq eq huî é jowò má rû nyi tô ashî nghut ri. 31 Haû yhúmhkaû má, Mariq lé nhiktîng nyi é Yudaq byu pé gi, yhang hân za toq luî, htoq ló é lé myàng kôjáng, yhang, lùp má ê ngaû râ haq htung lhê âbe ga, myìt yù kômù, yhâng htâng châng e ló bum akô nghut ri.
32 Mariq gi, Yesuq nyi tô é jang má jé mù, Yhang lé myàng jáng, Yhâng é hkyîwang má ngóm gòp to luî, “Yhûmsîng ê, Nàng, shî má nyi tô é ru nghut le gi, ngá gu shi byùq râ a nghut.” ga taî ri.
33 Yesuq gi, Mariq ngaù nyi é lé le, haû yhang eq rahá lé lo é Yudaq byu pé ngau nyì kô é lé le, myàng jáng, Yhâng é myìt má gyai yhang hkâm zo wuî é eq myìt wui myìt hke dùt nyi ri. 34 Haû mù, Yhang gi, “Yhang lé, hká má tô tô akô lhú?” ga myi jáng, yhángmòq gi, “Yhûmsîng ê, lé wú wú aq.” ga tû taî akô.
35 Yesuq gi, ngaù bê nghut ri.
36 Haû mù, haû Yudaq byu pé gi, “Wú keq, Yhang gi, Lazaruq lé, haû í yhang chyit rî-nhung!” ga taî akô.
37 Nghut kôlhang, ra-am gi, “Haû myòqjìt sû lé, myòq wó lhoqmyâng byî é Sû gi, shí yùq lé le, a shî loshoq a wó kut é lhú?” ga taî bum akô nghut ri.
Lazaruq Lé Lhoqdui Toq É Hkyô
38 Yesuq gi, Yhâng é myìt má radàm dum gyai yhang hkâm zo wuî é èq, lùp má lé jé ri. Lùp haû gi, lùqhkyûng dong nghut luî, lùqgòk rachâm èq chî tô akô. 39 Haû mù, Yhang gi, “Lùqgòk haû lé yu pyám keq.” ga taî ri.
Haú hkûn, haû shi byùq su é yhâng nhá Mahtaq gi, “Yhûmsîng ê, yhang lé, haú má tô tô é myi nyí lháng nghut bê yánmai, ahkuî gi, bùp nàm berâ nghut lhê.” ga taî ri.
40 Haû mù, Yesuq gi, “Nàng, lùmjíng é nghut le gi, haû Garai Gasâng é hpungwup shingkang lé, wó myâng râ nghut lhê nghû, Ngò, nang lé taî kyô wú bê a nghut lhú?” ga taî ri.
41 Haû mù luî, yhángmòq gi, lùqgòk haû lé yu pyâm akô. Hau htâng, Yesuq gi, mauhkûng shut tu wú luî, “Âwa ê, Nàng, Ngá é dang lé gyo byî é yánmai, Ngò, Nang lé jeju hkya-ôn lhê. 42 Nàng gi, hkâ-nhám le, Ngá é dang lé gyo byî nyi é lé, Ngò sê lhê; nghut kôlhang, Nàng, Ngo lé nhang kat é hkyô lé, shî má yàp tô é bang lùmjíng kó sháng gàq nghû, yhángmòq é matú, Ngò, îsu nghû taî é nghut lhê.” ga taî ri.
43 Yhang gi, haû su ga taí luî, “Lazaruq ê, htoq lô àq.” ga htê mó èq wùt kat ri. 44 Haú hkûn, haû shi byùq bê sû gi, yhâng é lòq hkyî pé má pân èq htup yùp to gû eq, yhâng é myòqdong má hpajèt èq htup to gù htoq lo ri.
Haû mù, Yesuq gi, yhángmòq lé, “Yhang lé hpyi pyám byi mù, nhang kat keq.” ga taî ri.
Yesuq Lé Sat Pyám Râ Haq Dâ É Hkyô
45 Haû mù luî, Mariq chyáng lé kûn é Yudaq byu pé myo myo gi, Yesuq kut é hkyô lé myàng jáng, Yesuq lé lùmjíng bùm bekô nghut ri. 46 Nghut kôlhang, yhángmòq chyáng mâ é ra-am gi, haû Hparishe pê chyáng ló mù, Yesuq kut é hkyô lé, ló taî kyô akô. 47 Haû mù, haû hkyangjong agyi pé eq Hparishe pé gi, Yudaq byìn tú wàpdòqc zùphpong lé ji tsîng to mù, “Byù shí yùq gi, maúhpo alhô agàn myo myo kut shit nyi ri. Ngá-nhúng, hkâsu kut le gè râ lhú? 48 Ngá-nhúng, Yhang lé haû su ru kut nyî nhang é nghut jáng, yùq hkangmó gi, Yhang lé lùmjíng kôrâ nghut lhê; haú hkûn, Romaq byu pé gi, jé lé mù, ngá-nhûng é jowò eq ngá-nhûng é byùhú lé, lé lhoqhtên pyám kôrâ nghut lhê.” ga taî akô nghut ri.
49 Haú hkûn, yhángmòq chyáng mâ é, haú zân má hkyangjong mó nghut nyi é sû, Kayahpaq gi, yhángmòq lé, “Núngmòq gi, haî lháng a sé kó nghut rî-nhung! 50 Haû byùhú gón htên byòq byùq râ htoq má, byùhú hau é matú, byù rayùq shî hkám byî le gi, núngmòq é matú je gè râ hkyô lé, núngmòq, a myìt jé kó nghut ri.” ga taî kat ri.
51 Yhang haû su ga taî é gi, yhûmsing myìt dông a nghut é za, haú zân má, yhang gi, hkyangjong mó nghut é eq rajung za, haû Yudaq byùhû é matú, Yesuq shî hkám byi râ nghut é hkyô lé le, 52 byùhú hau é matú baú a nghut é za, haû byo myín tô é, Garai Gasâng é yhang zô pé lé, shuî tsîng yù mù, rading ralhum za dùt nhâng râ matú, shî hkám byi râ nghut é hkyô lé le, myìqhtoi dang taî é ru nghut lhê. 53 Haú nyí mai, yhángmòq gi, Yesuq lé sat râ matú chôm da bekô nghut ri.
54 Hau é yánmai, Yesuq gi, Yudaq byu pê gyoro má, de de a sô shit wún é za, haû mai htoq luî, haû yòso eq chyâng lhûm é mau mâ é, Ehprim gâ é wà má ê mù, Yhâng é chángzô pé eq rahá nyi nyi ri.
55 Haû Yudaq byu pê é Lhoqlhai Poî jé râ za nghut é hkûn, byù myo myo gi, Lhoqlhai Poî a jé shi má, lhoqsan lhoqyúng hking dông yhûmsing gùng lé lhoq sân-yúng yû râ matú, yòsô wà pé mai, Yerusalem wà mó shut dòq ló bum akô. 56 Haû mù, yhángmòq gi, Yesuq lé ho nyì kô é nghut luî, haû noqkuq yhûm wàng má yàp to uchyang, rayùq eq rayùq, “Núngmòq, hkâsu wó myìt akô lhú? Yhang gi, Poî má a lé lô râ gâ lhê lhà?” ga myî lhûm bum akô. 57 Nghut kôlhang, haû hkyangjong agyi pé eq Hparishe pé gi, Yesuq lé wó chyup yû râ matú, Yesuq hká má nyi é lé, sê é sû ó yùq nghut kôle, yhángmòq lé lo shit kyo râ lhê ga dangmó hkyó tô akô nghut ri.