Sau Zúng Sû Eq Sau Hpúng
10
Ngò, núngmòq lé teng za taí kôlé, haû sau hkup má, hkúmdong mai a wang é za, gó hkyô dông dòq lùt wang é sû gi, hkau sû eq da-myàq nghut ri.
Yohan 10:1-21
2 Haû hkúmdong mai wang é sû kúm gi, sau zúng sû nghut ri. 3 Haû hkum zúng sû gi, yhang lé hkum hpóng byî é htoq agó, haû sau pé gi, yhâng é htê lé gyo byî akô. Yhang gi, yhâng é sau pé lé, myìng lang luî wùt yù mù, yhángmòq lé shuî htoq htoq kut nyi ri. 4 Yhâng é sau pé bànshoq lé hpông htoq yû mù, yhang gi, hí má sô ri; sau pé gi, yhâng é htê lé sê gyo kô é yánmai, yhâng é htâng má châng akô nghut ri. 5 Nghut kôlhang, yhángmòq gi, byù bíng é htâng má, hkâ-nhám lháng cháng kôrâ a nghut é za, yhâng chyáng mai kúm hpang byùq kôrâ nghut lhê; hkâsu mù gâ le, haû byù bíng é htê lé, yhángmòq a sê gyo kô é yánmai nghut ri.” ga taî ri. 6 Yesuq gi, dangtú haû lé yù mù, yhángmòq lé taî kyô ri; nghut kôlhang, yhángmòq gi, Yhang haî taî kyô nyi é lé, a sê gyo kó nghut ri.
7 Haû mù, Yesuq dum taî é gi, “Ngò, núngmòq lé teng za taí kôlé, Ngò gi, haû sau pé wang é hkúmdong nghut lhê. 8 Ngá é hí má lé é lhúnglhâng bang gi, hkau bang eq da-myàq pé nghut akô; haû sau pé kúm gi, yhángmòq é dang lé a lhom gyo byi kó nghut ri. 9 Ngò gi, hkúmdong nghut lhê; Ngò mai wang é sû ó yùq nghut kôle, hkyi yu é hui râ nghut lhê. Haú yùq gi, htoq htoq wàng wàng wó kut râ eq mhan-yô myang hô râ nghut lhê. 10 Haû hkau sû gi, hkau râ, sat râ eq lhoqhtên pyám râ matú, lé é za nghut lhê. Ngo lé é gi, yhángmòq, chyungxe wó yû râ eq byíng jùp é chyungxe lé wó yû râ matú shèq nghut lhê.
11 Ngò gi, ge é sau zúng sû nghut lhê; haû ge é sau zúng sû gi, sau pê é matú, yhûmsing é chyungxe lé àp byî pyâm é nghut lhê. 12 Haû langchyáng kut sû gi, sau pé lé sing é sau zúng sû a nghut; haû mù, yhang gi, haû wàmhkui lé lo é lé myàng jáng, sau pé lé pyâm to mù hpang ló byùq râ nghut lhê; haú hkûn, wàmhkui gi, sau hpúng lé ê htim luî, lhoqpyo pyám râ nghut lhê. 13 Yhang gi, langchyáng hpó nghut luî, haû sau pê é matú haî le a myìt chiq byî é yánmai, hpang é nghut ri.
14 Ngò gi, haû ge é sau zúng sû nghut lhê; haû Îwa gi, Ngo lé sê é nghut luî, Ngò le, haû Îwa lé sê é eq rajung za, 15 Ngá é sau pé lé, Ngò sê lhê; Ngá é sau pé le, Ngo lé sê akô nghut ri; Ngò gi, haû sau pê é matú, yhûmsing é chyungxe lé àp byî pyâm é nghut lhê. 16 Ngò gi, sau hkup shî mâ é a nghut é gótû sau pé wó ashî; sau haú pé lé le, Ngò, shuî yù ra râ nghut lhê; sau haú pé le, Ngá é htê lé gyo kôrâ nghut lhê; haú hkûn, sau hpúng rahpúng za dùt luî, sau zúng sû le rayùq za, nghut râ nghut lhê.a 17 Ngò gi, Ngá é chyungxe lé dum wó taû yù sháng gàq nghû, yhûmsing é chyungxe lé àp byî pyâm é yánmai, Ngá wa gi, Ngo lé chyitdàp é nghut lhê. 18 Ngá é chyungxe lé, ó yùq èq le wó yu pyâm é a nghut, Ngá é myìt dông byî pyâm é ru nghut lhê. Ngò gi, yhûmsing chyungxe lé àp byî pyám râ ahko ahkáng eq haû lé dum taû yù râ ahko ahkáng wó sû nghut lhê. Haû gi, Ngá wâ chyáng mai Ngò wó yu é hkunmó nghut lhê.” gâ ri.
19 Dang haú pê é yánmai, haû Yudaq byu pé gi, myìt a huî lhum dum dùt byùq bekô nghut ri. 20 Haú mâ é bang myo myo gi, “Yhang gi, nàt gang wang júng to luî, nâ byùq bê nghut ri. Yhâng é dang lé, haî mù gyô nyi akô lhú?” ga taî bum akô.
21 Nghut kôlhang, góbang gi, “Dang shi pé gi, nàt gang wang júng tô é byù taî é dang a nghut. Nàt gang gi, myòqjìt sû lé, myòq wó lhoqmyâng nhâng râ lhú?” ga taî bum akô nghut ri.
Yudaq Byu Pé A Lùmjíng Kô É Hkyô
22 Yerusalem wà mó má, Ap Nhông Poîb jé bê nghut ri. Haû gi, gyòqmyò nám nghut ri.
Yohan 10:22-42
23 Haú hkûn, Yesuq gi, haû noqkuq yhûm wàng mâ é, Sholumon é Jiròp má sô yông wún ri. 24 Haú u lé, haû Yudaq byu pé gi, Yhâng é lhînghkyùq má lé zîng bùm kômù, “Nàng gi, ngá-mòq lé hkâ-myháng jé shoq myìt gyàmkyô nyì nhâng râ lhú? Nàng, Hkrisidùq nghut le gi, ngá-mòq lé san za taî kyô pyám làq.” ga taî akô.
25 Yesuq gi, “Ngò, núngmòq lé taî kyo bê nghut lhê; nghut kôlhang, núngmòq a lùmjíng kó nghut ri. Ngá wâ é myìng mai, Ngò kut é làklaí alhô agàn haú pé gi, Ngá é matú sàksé hkám byî nyi ri. 26 Nghut kôlhang, núngmòq gi, Ngá é sau a nghut kô é yánmai, a lùmjíng kó nghut ri. 27 Ngá é sau pé gi, Ngá é htê lé dàt gyô akô; Ngò gi, yhángmòq lé sê lhê; yhángmòq le, Ngá htâng châng akô nghut ri. 28 Ngò gi, yhángmòq lé, ahtum abyùq é chyungxe byî é nghut mù, yhángmòq gi, hkâ-nhám le htên byòq kôrâ a nghut; ó yùq èq le, yhángmòq lé, Ngá é lòq mai wó lú yû râ a nghut. 29 Yhángmòq lé, Ngá é lòq má àp byî tô é sû, haû Ngá wa gi, lhúnglhâng htoq má je gyaú Sû nghut lhê; ó yùq èq le, yhángmòq lé, Ngá wâ é lòq mai wó lú yû râ a nghut. 30 Ngò eq haû Îwa gi, rayùq za nghut lhê.” ga tû taî ri.
31 Haú hkûn, haû Yudaq byu pé gi, Yesuq lé, dú râ matú lùqgòk dum kui akô. 32 Nghut kôlhang, Yesuq gi, yhángmòq lé, “Haû Îwâ chyáng mâ é làklaí alhô agàn mó pé myo myo, Ngò, núngmòq lé tûn shit bê nghut lhê. Núngmòq, Ngo lé dú râ gi, hká lhûm é yánmai nghut akô lhú?” ga myî ri.
33 Haû Yudaq byu pé gi, “Ngá-mòq, Nang lé dú râ gi, haú pé hká lhûm é yánmai le a nghut; Nàng gi, byù rayùq nghut to luî, Garai Gasang nghut é dông taî whuí luî, Yhang lé rhoî dang taî é yánmai, dú râ nghu lhê.” ga tû taî akô.
34 Haú hkûn, Yesuq gi, yhángmòq lé, “‘Núngmòq gi, hparà garaî pé nghut akô nghû, Ngò taí bê nghut lhê.’c ga núngmòq é târâ má kâ tô lhê a nghut kó lhú? 35 Chyúmdang haû lé gi, a ge lhoqhpyoq pyâm é nghut luî, haû Garai Gasâng é mungdang lé wó yu é bang lé, ‘garaî pé’ gâ é nghut le gi, 36 haû Îwa mai, Yhâng é matú hkyin htoq yû luî, mingkan má nhang é Sû eq séng luî gi, hká dông nghû kôrâ lhú? ‘Ngò gi, Garai Gasâng é Yhangzo nghut lhê.’ nghû taî é yánmai, Ngò gi, Garai Gasang lé taî hpoî ri nghû, núngmòq, haî mù Ngo lé mara hun akô lhú? 37 Ngá wâ é múzó pé lé, Ngò kut é a nghut jáng, Ngo lé hkâ lùmjíng kó. 38 Nghut kôlhang, Ngò, haú pé lé kut é nghut le gi, núngmòq, Ngo lé a lùmjíng kôlhang, haû múzó pé lé lùmjíng keq; haú hkûn, haû Îwa gi, Ngò má nghut nyi é hkyô lé le, Ngò gi, haû Îwa má nghut nyi é hkyô lé le, núngmòq wó sé luî, sê gyo kôrâ nghut lhê.” ga tû taî ri. 39 Yhángmòq gi, Yhang lé chyup râ dum hen akô; nghut kôlhang, Yhang gi, yhángmòq é lòq mai wó lùt ló bê nghut ri.
40 Hau htâng, Yesuq gi, haû Yodan làng hé hpoq mâ é, Yohan, wuìmyhup hkám byî hi é jowò má ló jé ri. Haú má, Yhang nyi nyi é nghut luî, 41 byù myo myo gi, Yhâng chyáng lé jé bum akô. Yhángmòq gi, “Yohan gi, maúhpo alhô agàn a kut wú é nghut kôlhang, shí yùq eq séng luî, Yohan taî é hkyô lhúnglháng gi, têng ri.” ga taî bum akô. 42 Haú jowò má, byù myo myo gi, Yesuq lé lùmjíng bùm bekô nghut ri.