Myòqjìt Sû Lé Lhoqgê Byî É Hkyô
9
Yesuq gi, sô yông ló nyi é u lé, hku lé é mai myòqjìt to gû nghut é byù rayùq lé myang ri.
Yohan 9:1-12
2 Haú hkûn, Yhâng é chángzô pé gi, Yhang lé, “Rabai ê, shí yuq, myòqjìt gû hku lé é gi, ó yùq kut shut é yubàk é yánmai nghut lhê lhú? Yhang kut shut é lhú? A nghut jáng, yhâng nu yhâng wa kut shut é lhú?” ga myî akô.
3 Yesuq tû taî é gi, “Haû gi, yhang kut shut é yánmai le a nghut, yhâng nu yhâng wa kut shut é yánmai le a nghut; haû Garai Gasâng é múzó lé, yhang má wó lhoqhtoq shit râ matú, haû dùt é ru nghut lhê. 4 Ngá-nhúng gi, haû Ngo lé nhang kat Su é múzó lé, nyí nghut tô ashî hkûn, zui saî nyì ra râ dùt lhê; myín jé jáng gi, ó yùq le, mû wó zui saí râ a nghut. 5 Ngò gi, mingkan htoq má nyi tô é u lé, mingkân é maubó nghut lhê.” gâ ri.
6 Yhang gi, haû su ga taí luî, myigùng má sôkan byé hkyó mù, tse-nyhaq saî yù luî, haú yùq é myòqjí má but byî ri. 7 Hau htâng, haú yùq lé, “Haû Silo-am wuìhtum má ê chî pyám aq.” ga taî ri. (Silo-am gâ é gi, nhang é gâ é lichyúm nghut lhê.) Haû mù, haú yùq gi, ê chi mù, myòq myàng luî, yhûm shut ló bê nghut ri.
8 Haû yhâng é yhûmkyo bang eq yhang dung zô wún é lé myang wú é bang gi, “Shí yùq gi, haû zung to mù, dung zo zo lhaq kut é sû, a nghut kó lhú?” ga myî bum akô. 9 Ra-am gi, “Haú yùq nghut lhê.” gâ bum akô.
Góbang gi, “A nghut, haú yùq su dùt é za ru nghut lhê.” ga taî akô.
Nghut kôlhang, yhang gi, “Ngò, haú yùq yhang nghut lhê.” ga taî ri.
10 Haú hkûn, yhángmòq gi, “Haû nghut le gi, náng myòq hkâsu kut wó myang é lhú?” ga myî akô.
11 Yhang gi, “Haû Yesuq gâ é byù rayùq, tse-nyhaq ra-tsuí saî yù luî, ngá é myòqjí má bùt byi mù, ‘Silo-am wuìhtum má ê chî pyám aq.’ ga ngo lé taî ri; haû mù, ngò ê chî pyâm é htâng má, ngá myòq wó myang é nghut lhê.” ga tû taî ri.
12 Haú hkûn, yhángmòq gi, “Byù haú yùq gi, hká má nyi ri lhú?” ga, yhang lé myî akô.
Yhang gi, “Ngò a sé.” ga taî ri.
Myòq Dum Myang Byùq É Hkyô Lé, Hparishe Pé Gôn Wú É Hkyô
13 Yhángmòq gi, haû myòqjìt wú bê sû lé, Hparishe pê chyáng shuî lé akô.
Yohan 9:13-41
14 Yesuq, tse-nyhaq saî yù mù, haú yùq é myòq lé lhoqmyâng byî é buìnyì gi, Bánno Buìnyì nghut ri. 15 Haû mù, yhang, myòq hkâsu kut wó myang é hkyô lé, haû Hparishe pé le dum myî akô. Haû jáng, yhang gi, “Haú yùq gi, ngá é myòqjí má tse-nyhaq bùt byi mù, ngò gi, ê chî pyám jáng, ngá myòq myàng bê nghut lhê.” ga tû taî ri.
16 Haû Hparishe pé ra-am gi, “Shí yùq gi, Bánno Buìnyi é târâ lé a châng é sû nghut é yánmai, Garai Gasâng chyáng mai lé é sû a nghut.” ga taî akô.
Nghut kôlhang, ra-am gi, “Yubàk dàp sû rayùq gi, haú sû é maúhpo alhô agàn pé lé, hkâsu wó kut htoq râ lhú?” ga myî akô. Haû mù, yhángmòq gi, myìt a huî lhûm bùm lò kó nghut ri.
17 Haû mù, yhángmòq gi, haû myòqjìt wú sû shut lhîng mù, “Nang lé myòq lhoqmyâng byî é sû gi, hkâsû é byù nghut lhê nghû, nàng taí râ lhú?” ga dum myi kôjáng, “Yhang gi, myìqhtoi rayùq nghut ri.” ga, yhang tû taî ri.
18 Haû Yudaq byu pé gi, haú yùq myòqjìt wú é hkyô lé le, ahkuî myòq dum myàng bê nghut é hkyô lé le, haû yhâng nu eq yhâng wa lé, ê ji lò nhang é hkûn jé shoq, a lùmjíng kó nghut ri. 19 Haû mù, Yhángmòq gi, haû yhâng nu eq yhâng wa lé, “Shí yùq gi, núngnhik é yhang zo nghut lhê lhú? Hku lé é hkûn mai, myòqjìt gù nghut lhê lhú? Yhang, ahkuî, hkâsu kut wó myang é lhú?” ga myî akô.
20 Haú hkûn, yhâng nu eq yhâng wâ nhik gi, “Yhang gi, ngá-nhik é yhang zo nghut é lé le, hku lé é hkûn mai myòqjìt gù nghut é lé le, ngá-nhik sê lhê. 21 Nghut kôlhang, yhang, ahkuî hkâsu kut wó myang é hkyô lé le, yhâng é myòq lé ó yùq èq lhoqmyâng byî é hkyô lé le, ngá-nhik a sé. Yhang, chyungxe wáng bê, yhang lé myî wú keq, yhânggùng yhang dàt taî kyo râ nghut lhê.” ga tû taî akô. 22 Haû yhâng nu eq yhâng wâ nhik gi, Yudaq byu pé lé gyùq kô é yánmai, haû su ga taí kô é nghut ri; hkâsu mù gâ le, Yesuq gi, haû Hkrisidùq nghut lhê ga yín yu é sû, ó yùq lé nghut kôle, haû târâjong mai lhoqhtoq pyám râ nghut lhê ga, haû Yudaq sûwún wuî chôm myìt hpyit to bekô nghut é yánmai nghut ri. 23 Hau é yánmai, yhâng nu eq yhâng wâ nhik gi, “Yhang, chyungxe wáng bê, yhang lé myî wú keq.” ga taí kô é nghut ri.
24 Haû Hparishe pé gi, myòqjìt wú bê sû haú yùq lé dum ji yù mù, “Garai Gasang lé za hkya-on wàq toq aq! Haú yùq gi, yubàk dàp sû rayùq nghut é lé ngá-mòq sê lhê.” ga taî akô.
25 Haú hkûn, yhang tû taî é gi, “Yhang gi, yubàk dàp sû rayùq nghut lhê lùq, a nghut é lùq, ngò a sé. Ngò gi, hí lé myòqjìt sû nghut kôle, ahkuî wó myâng bê nghut é lé za, ngò ru sê lhê.” gâ ri.
26 Hau htâng, yhángmòq gi, “Yhang, nang lé haî kut byî ri lhú? Náng é myòq lé, yhang, hkâsu kut lhoqmyâng byî ri lhú?” ga, yhang lé myî akô.
27 Haú hkûn, yhang gi, “Ahkuî za, ngò, núngmòq lé taî kyo bê le, núngmòq shèq a gyo kôluî nhîng! Núngmòq gi, haî mù dum gyô nau akô lhú? Núngmòq le, Yhâng é chángzô pé dùt nau akô lhú?” ga taû myî ri.
28 Haû mù, yhángmòq gi, yhang lé gyaí rhoi é dông mai, “Nàng gi, haú yùq é chángzo nghut rî-nhung! Ngá-mòq kúm gi, Mosheq é chángzô pé ru nghut lhê! 29 Garai Gasang gi, Mosheq lé dáng nyo é hkyô lé, ngá-mòq sê lhê; nghut kôlhang, haú yùq eq séng luî, Yhang gi, hká mai lé é sû nghut é lé lháng, ngá-mòq a sé.” ga taî akô.
30 Haú hkûn, haú yùq gi, “Yhang, ngo lé myòq wó lhoqmyâng byi kôlhang, Yhang gi, hká mai lé é sû nghut é lé, núngmòq a sé kô é gi, maúhpo yhang nghut bê! 31 Garai Gasang gi, yubàk dàp bâng é dang lé a gyo byî é hkyô lé, ngá-nhúng sê lhê. Garai Gasang gi, Yhang lé noqkuq luî, Yhang ô nau é hkyô lé, kut é su é dang lé kúm gyo byî lhê. 32 Hku lé é hkûn mai myòqjìt gù nghut é byù lé, ó yùq èq myòq lhoqmyâng byî é gâ é hkyô lé, mingkan lé jòq é hkûn mai, ó yùq le a wó gyô wú é nghut lhê. 33 Haú yùq gi, Garai Gasâng chyáng mai lé é sû za a nghut le gi, haî le wó kut râ a nghut.” ga tû taî ri.
34 Haû su ga jáng, yhángmòq gi, “Nàng gi, yubàk htui má hku lé é sû nghut to luî nhîng, ngá-mòq lé wám mhoqshit lhê lhú?” ga tû taí kôluî, yhang lé hkat htoq pyâm akô nghut ri.
Sô Má Myòqjìt É Hkyô
35 Yesuq gi, haú yùq lé yhángmòq hkat htoq pyâm é hkyô lé wó gyo luî, yhang lé myang hui jáng, “Nàng gi, haû Byu Yhangzo lé lùmjíng lhê lhú?” ga myî ri.
36 Haú hkûn, haú yùq gi, “Yhûmsîng ê, haû gi, ó yùq nghut lhê lhú? Yhang lé, ngò wó lùmjíng sháng gàq, taî kyo laq.” ga myî ri.
37 Yesuq gi, “Nàng, haú yùq lé myang wú bê nghut lhê; ahkuî, nàng eq dáng nyo nyi é sû gi, haú yùq yhang nghut lhê.” ga taî ri.
38 Haû mù, haú yùq gi, “Yhûmsîng ê, ngò lùmjíng lhê!” ga taí luî, Yhang lé noqkuq ri.
39 Haú hkûn, Yesuq gi, “Haû myòqjìt bang myòq myàng kôrâ hkyô eq myòq myàng bang myòqjìt kôrâ hkyô lé, târâ jéyáng râ matú, mingkan shî má Ngò jé lé é nghut lhê.” ga taî ri.
40 Yhang eq rahá nghut nyi é Hparishe pé ra-am gi, Yhang haû su ga taî é lé wó gyo kôjáng, “Hkâsu htà? Ngá-mòq gi, myòqjìt bang dùt bê lhú?” ga myî akô.
41 Haú hkûn, Yesuq gi, “Núngmòq, myòqjìt é bang ru nghut le gi, yubàk mara a bò kôrâ nghut lhê; nghut kôlhang, ahkuî, núngmòq gi, myòq myàng bang nghut lhê ga kô é yánmai, núngmòq má yubàk mara bo ashî kó nghut ri.