Yesuq Lé, Lé Myî Chyam Wú Kô É Hkyô
8
Yesuq kúm gi, Tsanlun bùm shut e ló bê nghut ri.
Yohan 8:1-20
2 Htang nàpkyó nàpsûn noq le, Yesuq gi, noqkuq yhûm wàng hkaû má dum ê luî, byu pé lhúnglháng gi, Yhâng é lhînghkyùq má lé zîng bum akô; haû mù, Yhang gi, zung to luî, yhángmòq lé mhoqshit ri. 3 Haú hkûn, haû târâ sará pé eq Hparishe pé gi, sulàng shut nyi é má myang chyup yu é su-myi rayùq lé shuî lé lô kômù, gung gûng má shap to kôluî, 4 Yesuq lé, “Sará ê, myiwe myhí shî lé, sulàng shut nyi é má myang chyup yu é nghut lhê. 5 Haû Mosheq é târâ má gi, shî su é myiwe lé, lùqgòk èq dú sat pyám keq ga, ngá-nhúng lé hkunmó hkyô tô ri. Ahkuî, Nàng gi, hkâsu nghû râ lhú?” ga myî akô. 6 Yhángmòq haû su ga myî é hkyô gi, Yhang lé mara wó hûn shoq ga, chyam wú râ matú nghut ri.
Nghut kôlhang, Yesuq gi, ngóm mù, myigùng má lòqnyhuî èq htaû kâ nyi ri. 7 Yhang lé, yhángmòq ru jâng myî nyì kô é hkûn, Yhang gi, yàp nyhang kat mù, yhángmòq lé, “Núngmòq mâ é mara a wó é sû hí, myiwe myhí shí yùq lé lùqgòk èq dú sháng gàq.” ga taî ri. 8 Hau htâng, Yhang gi, dum ngóm luî, myigùng má kâ nyi ri.
9 Yhángmòq gi, haû su gâ é lé wó gyo kôjáng, je mang bang mai hî luî, rayùq htâng rayùq ló byùq bekô nghut luî, Yesuq baú za myìt gyó tô é eq, myiwe myhí haû jâng yàp nân tô ri. 10 Yesuq gi, yàp nyhang kat luî, yhang lé, “Myiwe myhí ê, yhángmòq hká ló bekô lhú? Ó yùq èq le, nàng lé mara a byi kó lhú?” ga myî ri.
11 Yhang gi, “Yhûmsîng ê, ó yùq le mara a byi kó nghut ri.” ga tû taî ri.
Haú hkûn, Yesuq gi, “Ngò le, nàng lé mara a byi, ló àq hkoi, ahkuî mai mara hkâdum kut shut lo.” ga taî kat ri.
Yesuq, Mingkân É Maubó
12 Yesuq gi, shiwa byu pé lé dum nyo é hkûn, “Ngò gi, mingkân é maubó nghut lhê; Ngá htâng châng é sû ó yùq nghut kôle, mauchut hkaû má hkâ-nhám le so râ a nghut, chyungxe maubó lé wó râ nghut lhê.” ga taî ri.
13 Haû mù, haû Hparishe pé gi, “Wú aq, Náng gûng Nàng sàksé hkâm yu é nghut ri; Náng é sàksé gi, teng râ a nghut.” ga taî akô.
14 Haú hkûn, Yesuq gi, “Ngá gûng Ngò sàksé hkám kôlhang, Ngá é sàksé gi, têng lhê; hkâsu mù gâ le, Ngò gi, Ngò hká mai lé lo é eq Ngò hká shut e ló é lé, sê lhê. Nghut kôlhang, núngmòq gi, Ngò hká mai lé lo é lé le, Ngò hká shut e ló é lé le, a sé kó nghut ri. 15 Núngmòq gi, byù hkyam dông za jéyáng akô; Ngò gi, ó yùq lé le a jéyáng é nghut lhê. 16 Nghut kôlhang, Ngò jéyáng é nghut jáng, Ngò jéyáng é hkyô gi, jô lhê; hkâsu mù gâ le, Ngò gi, Ngò baú a nghut, haû Ngo lé nhang kat é sû Îwa eq rahá nghut nyi lhê. 17 Haû núngmòq é târâ má yhang le, í yùq mai hkâm é sàksé gi, têng lhê ga kâ tô ri. 18 Ngò gi, Ngá é matú sàksé hkâm yù sû nghut lhê; hau htoq agó, haû Ngo lé nhang kat é sû Îwa le, Ngá é matú sàksé hkám byî é nghut lhê.” ga tû taî ri.
19 Haû mù, yhángmòq gi, Yhang lé, “Náng Wa gi, hká má lhú?” ga myi kôjáng, Yhang gi, “Núngmòq gi, Ngo lé le, Ngá wa lé le, a sé kó nghut ri; núngmòq, Ngo lé sé kô é nghut le gi, Ngá wa lé le, sé kôrâ nghut lhê.” ga tû taî ri. 20 Dang haú pé gi, haû noqkuq yhûm wàng hkaû mâ é alû kat jang nàm má, Yhang mhoqshit nyi é u lé taî é dang nghut ri. Nghut kôlhang, Yhang lé, ó yùq le a chyup kó; hkâsu mù gâ le, Yhâng é ahkyíng a jé shî é yánmai nghut ri.
21 Haû mù luî, Yesuq gi, yhángmòq lé, “Ngò gi, ló byùq râ nghut lhê, haú hkûn, núngmòq Ngo lé hô kôrâ, yhûmsing é mara má le shî kôrâ nghut lhê. Ngò ló é jang má, núngmòq wó jé kôrâ a nghut.” ga, radàm dum puq taî ri.
Yohan 8:21-36
22 Hau é yánmai, haû Yudaq byu pé gi, “‘Ngò ló é jang má, núngmòq wó jé kôrâ a nghut.’ gâ é gi, Yhânggùng yhang sat shî râ gâ é nghut lhê lhú?” ga myî bum akô.
23 Nghut kôlhang, Yesuq xoq taî é gi, “Núngmòq gi, a‑ô mai lo é bang nghut akô; Ngò gi, ahtoq mai lé é sû nghut lhê. Núngmòq gi, mingkan shî eq sêng é bang nghut akô; Ngò kúm gi, mingkan shî eq sêng é sû a nghut. 24 Haû mù, núngmòq gi, yhûmsing é mara má shî kôrâ nghut lhê nghû, Ngò taî é nghut lhê. Ngò gi, haú Yùq nghut lhê nghû taî é lé, núngmòq a lùmjíng kô é nghut jáng, núngmòq gi, gè gè yhang, yhûmsing é mara má shî kôrâ nghut lhê.” gâ ri.
25 Haú hkûn, yhángmòq gi, “Nàng, ó yùq nghut lhê?” ga myi kôjáng, Yesuq gi, “Ngò ó yùq nghut é lé, Ngò, hkâ-nhám le taî nyì bê nghut lhê. 26 Ngò gi, núngmòq eq séng luî, taí râ hkyô eq jéyáng râ hkyô, myo myo jòq lhê. Nghut kôlhang, Ngo lé nhang kat é Sû gi, tengmán é Sû nghut lhê mù, Yhâng chyáng mai wó gyô yu é gû lé, Ngò, mingkan lé taî kyô lhê.” ga tû taî ri.
27 Yesuq gi, yhángmòq lé, Yhâng Wa eq sêng é hkyô taî kyô nyi é lé, yhángmòq gi, a sê gyo kó nghut ri. 28 Haû mù luî, Yesuq gi, “Haû Byu Yhangzo lé núngmòq tu shapa kat é hkûn shèq, Ngò gi, haû Yùq nghut é hkyô lé le, yhûmsing myìt dông haî le a kut é za, haû Îwa mhoq byî é dông za taî é hkyô lé le, núngmòq sé kôrâ nghut lhê. 29 Haû Ngo lé nhang kat é Sû gi, Ngò eq rahá nghut nyi lhê; Ngò gi, hkâ-nhám le, Yhang lé myìt ngón nhang é hkyô chyat kut é yánmai, Yhang gi, Ngo lé baú za a tô pyâm to nghut ri.” ga taî ri. 30 Yhang, haû su taî nyi é u lé lháng, byù myo myo gi, Yhang lé lùmjíng bûm bekô nghut ri.
Abraham É Awùt Ashîn Pê Hkyô
31 Haû mù, Yesuq gi, Yhang lé lùmjíng é Yudaq byu pé lé, “Ngò mhoqshit é hkyô lé châng kut nyî bekô nghut jáng, núngmòq gi, gè gè yhang, Ngá é chángzô pé nghut bekô. 32 Núngmòq gi, haû tengmán hkyô lé sé kôrâ nghut luî, haû tengmán hkyô gi, núngmòq lé lhoqlhut kat râ nghut lhê.” ga taî ri.
33 Haú hkûn, yhángmòq gi, “Ngá-mòq gi, Abraham é awùt ashín pé nghut luî, ó yùq é jùn le hkâ-nhám a dùt wú é nghut lhê. Haû mù, ‘núngmòq lé lhoqlhut kat râ’ nghû Nàng hkâsu kut wó taî lhê lhú?” ga tû taî akô.
34 Yesuq dum tû taî é gi, “Ngò, núngmòq lé teng za taí kôlé, mara kut shut é sû gi, marâ é jùn nghut lhê. 35 Jùn gi, yhûm i-kun eq hkâ-nhám le sêng nyì râ a nghut; zo kúm gi, i-kun eq ahtum abyùq sêng lhê. 36 Haû mù luî, haû Zo gi, núngmòq lé lhoqlhut kat é nghut jáng, núngmòq gi, gè gè yhang, lùt berâ nghut lhê. 37 Núngmòq gi, Abraham é awùt ashín pé nghut é lé, Ngò sê lhê. Nghut kôlhang, núngmòq gi, Ngá é dang lé a lhom yù kô é yánmai, Ngo lé sat râ haq htung akô nghut ri.
Yohan 8:37-59
38 Ngò gi, Ngá wâ chyáng mai myang yu é eq rajung za, núngmòq lé taî kyô nyi lhê; núngmòq le, núngmòq é îwa chyáng mai wó gyô yu é eq rajung za kut nyi akô nghut ri.” gâ ri.
39 Haú hkûn, yhángmòq gi, “Ngá-mòq é îwa gi, Abraham nghut lhê.” ga tû taí kôjáng, Yesuq gi, “Núngmòq, Abraham é yhang zô pé nghut é nghut le gi, Abraham kut é su kut kôrâ nghut lhê. 40 Nghut kôlhang, núngmòq gi, haû Garai Gasâng chyáng mai wó gyô yu é tengmán hkyô lé taî kyo sû nghut é Ngo lé, sat pyám nau akô nghut ri. Haû sû é hkyô gi, Abraham a kut é nghut lhê. 41 Núngmòq gi, núngmòq é îwa kut é múzó lé yhang, kut nyi akô.” ga taî ri.
Haú hkûn, yhángmòq gi, “Ngá-mòq gi, dèzo a-myû a nghut; ngá-mòq gi, Îwa rayùq za wó lhê; haû gi, Garai Gasang nghut lhê.” ga taî he akô nghut ri.
Zô Wui É A-kyang Gi, Mó Ó Nghut É Hkyô Shit
42 Yesuq gi, yhángmòq lé, “Garai Gasang gi, núngmòq é Îwa nghut é nghut jáng, núngmòq gi, Ngo lé chyitdàp kôrâ nghut lhê; hkâsu mù gâ le, Ngò gi, Garai Gasâng chyáng mai lé jé luî, ahkuî, shî má nyi tô é nghut lhê. Ngò gi, Ngá myìt dông lé lo é a nghut, Yhang shèq Ngo lé nhang kat é ru nghut lhê. 43 Núngmòq gi, haî mù Ngá é dang lé a sê gyo kô é lhú gâ le, Ngò taî é dang lé, núngmòq a wó lhom yù kô é yánmai nghut ri. 44 Núngmòq gi, haû núngmòq é îwa nghut é nàt Tsádán eq sêng é bang nghut luî, núngmòq é îwa ô nau é hkyô lé kut nau bum akô. Yhang gi, a‑nham sânghi mai byù sat sû nghut ri. Yhang má tengmán hkyô a bo é yánmai, yhang gi, haû tengmán hkyô má a yàp gîng nyì nghut ri. Yhang gi, mhaû é hkûn, yhâng é myìt má bo é dông taî ri; hkâsu mù gâ le, Yhang gi, byù mhaú nghut luî, mhaú hkyô pê é îwa nghut ri. 45 Haû su mù, Ngò, núngmòq lé, haû tengmán hkyô taî kyô é yánmai, núngmòq gi, Ngo lé a lùmjíng kó nghut ri. 46 Núngmòq mâ é ó yùq wá, Ngo lé mara bo lhê nghû sàksé wó tûn shit akô lhú? Ngò gi, haû tengmán hkyô lé taî nyi é nghut le nhîng, núngmòq, Ngo lé haî mù a lùmjíng kô é lhú? 47 Garai Gasang eq sêng é sû gi, Garai Gasang taî é dang lé gyô lhê. Núngmòq a gyo kô é gi, núngmòq, Garai Gasang eq a séng kô é yánmai nghut ri.” ga taî ri.
Yesuq Eq Abraham
48 Haú hkûn, haû Yudaq byu pé gi, Yhang lé, “Nàng gi, Samariq byù nghut é htoq agó, nàt gang wang júng to sû nghut lhê nghû, ngá-mòq taî é dang gi, jô lhê a nghut lhú?” ga myî akô.
49 Yesuq gi, “Ngò gi, nàt gang wang júng é hui sû a nghut; Ngò gi, Ngá wa lé shèq hkúnggâ é ru nghut lhê; núngmòq kúm gi, Ngo lé taî hpoî nyi akô nghut ri. 50 Ngò gi, Ngá é matú xânghpoq nge wó hkyô ho nyi é a nghut; nghut kôlhang, hô byi Sû rayùq nyi lhê, haú yùq jéyáng sháng gàq. 51 Ngò, núngmòq lé teng za taí kôlé, Ngá dang lé châng é sû gi, hkâ-nhám le, shî râ a nghut.” ga taî ri.
52 Hau é yánmai, haû Yudaq byu pé gi, “Nàng gi, nàt gang wang júng to sû nghut é lé, ahkuî, ngá-mòq sé bê! Abraham gi, shi byùq bê; haû myìqhtoî pé le, shi byùq bekô nghut ri; nghut kôlhang, Nàng gi, ‘Ngá dang lé châng é sû gi, hkâ-nhám le, shî râ a nghut.’ ga taî ri. 53 Nàng gi, ngá-mòq é îwa Abraham htoq hkìk lhê lhú? Yhang gi, shi byùq bê; haû myìqhtoî pé le, shi byùq bekô nghut ri. Náng gûng nàng ó yùq su ngàm lhê lhú?” ga taî akô.
54 Yesuq gi, “Ngá gûng Ngò lhoqgyaú yu é nghut jáng, Ngá é xânghpoq nge wó hkyô gi, hai hpaudap é a nghut; nghut kôlhang, haû núngmòq é Garai Gasang nghut lhê ga núngmòq taî é sû, Ngá wa gi, Ngo lé lhoqgyaú é sû ru nghut lhê. 55 Núngmòq gi, Yhang lé a sé kó nghut ri; nghut kôlhang, Ngò gi, sê lhê. Yhang lé a sé nghû Ngò taî é ru nghut le gi, Ngò le núngmòq su byù mhaú dùt râ nghut lhê; nghut kôlhang, Ngò gi, Yhang lé sé luî, Yhâng é dang gyo sû nghut lhê. 56 Núngmòq é îwa Abraham gi, Ngò lé râ buìnyì lé myòqbyu gabú nyi é nghut luî, myàng mù, gabú bê nghut ri.” ga tû taî ri.
57 Haú hkûn, haû Yudaq byu pé gi, Yhang lé, “Nàng gi, chyungxe zànwut ngo xê zàn lháng a nghut shî é nhîng, Abraham lé myàng wú é nghut lhê lhú?” ga taî akô.